Yasanibuka ena Misuri, mai vei Bryan Mark Taylor

31 ni Me–6 ni June

Vunau kei na Veiyalayalati 60–62

“Sa Tu ena Qeteqete ni Ligaqu na Bula ni Tamata Kecega”

E vakavulica o Peresitedi Ezra Taft Benson ni gauna eda vulica kina na ivolanikalou, “ena tubu na ivakadinadina. Ena qaqaco cake na solibula. Ena kaukauwa sara na matavuvale. Ena drodro mai na ivakatakila ki na tamata yadua” (“The Power of the Word,” Ensign, Me 1986, 81).

Vola na Veika o Uqeti Kina

Ena June ni 1831, a vakayacora o Josefa Simici e dua na koniferedi vata kei ira na italatala qase ni Lotu e Katiladi. E kea, a tuvanaka vakaitokani na Turaga eso na italatala qase ka talai ira yani ki na yasayasa vaka-Jekesoni, Misuri, ena ivakaro oqo: “Vunau voli” (Vunau kei na Veiyalayalati 52:10). E vuqa vei ira na italatala qase era a gumatuataka sara, ia eso tale a sega. Ni sa yaco na gauna me ra lesu tale ki Kirtland, a kaya kina na Turaga, “Au sa sega talega ni marautaka eso vei kemudou [na italatala qase], ni ra sa sega ni dolava na gusudra, ia era vunitaka na taledi au sa solia vei ira, ena nodra rerevaka na tamata” (Vunau kei na Veiyalayalati 60:2). E vuqa vei keda a rawa ni lomani ira na italatala qase oqo—eda a rairai lomalomarua meda dolava na gusuda meda wasea na kosipeli. Eda a rairai tarovi beka ni da “rerevaka na tamata.” Eda a rairai vakatitiqataka na noda kilikili ni bula se na noda gugumatua. Se cava ga na vuna, sa kila tiko na Turaga “na malumalumu ni tamata kei na sala me vukei [keda] kina” (Vunau kei na Veiyalayalati 62:1). Era veituyaki ena ivakatakila oqo vei ira na daukaulotu taumada na veivakadeitaki e rawa ni vukei keda meda vorata rawa na noda rere meda wasea yani na kosipeli— se so tale na rere eda sotava: “Ni koi Au na Turaga, au sa lewa na lomalagi e cake.” “Ni sa rawa meu qisi kemudou mo dou savasava.” “Sa Tu ena Qeteqete ni Ligaqu na Nodra Bula na Tamata Kecega.” Ia “dou reki ka marau na gonelalai; niu sa tiko ena kemudou maliwa.” (Vunau kei na Veiyalayalati 60:4, 7; 61:6, 36.)

Vakasama ni Vuli iVolanikalou ni Tamata Yadua

Vunau kei na Veiyalayalati 60; 62

E marautaka na Turaga niu dolava na gusuqu meu wasea na kosipeli.

Eda sa sotava oti na gauna a rawa kina meda a wasea na kosipeli vua e dua, ia ena vuku ni ka eso, eda a sega ni cakava. Ni o wilika na vosa ni Turaga vei ira na daukaulotu taumada era a sega ni “dolava na gusudra,” vakasamataka na nomu madigi mo wasea kina na kosipeli. Sa yaco vakacava na nomu ivakadinadina baleta na kosipeli me vaka e dua na “taledi,” se na iyau levu mai vua na Kalou? Ena sala cava soti eda dau “vunitaka [kina] na [noda] taledi”? (Vunau kei na Veiyalayalati 60:2; raica talega na Maciu 25:14–30).

A vakadodonutaki ira na daukaulotu taumada oqo na Turaga, ia a saga talega me vakauqeti ira. Na itukutuku veivakayaloqaqataki cava mai Vua o raica rawa ena wase 60 kei na 62? E tara cake vakacava na itukutuku oqo mo nuidei tiko ni ko wasea yani na kosipeli? Ena veisiga ni mataka, vakasaqara na madigi eso mo dolava kina na gusumu ka wasea na veika ni Kalou sa nuitaki iko kina.

Raica talega na Vunau kei na Veiyalayalati 33:8–10; 103:9–10; Dieter F. Uchtdorf, “Cakacaka ni Kaulotu: Wasei na Veika e Tu e Lomamu,” Ensign se Liaona, Me 2019, 15–18.

E vinakata na Kalou meu wasea na kosipeli vei ira na tamata.

Vunau kei na Veiyalayalati 61:5–6, 14–18

Sa cudruva beka kecega na wai na Turaga?

Na ivakasala ni Turaga ena Vunau kei na Veiyalayalati 61 a vakatikina walega, oqo na ivakaro iqaqarauni baleta na veika rerevaki era na sotava na Nona tamata ena nodra ilakolako ki Saioni ena Uciwai na Misuri, ka a kilai tu ena gauna o ya ni vakarerevaki. Na ivakaro iqaqarauni oqo me kakua ni vakadewataki ni kena ibalebale meda sa kakua ni veilakoyaki e wai. Sa tu Vua na Turaga na “kaukauwa kecega,” oka kina na kaukauwa ni lewa na wai (tikina 1).

Vunau kei na Veiyalayalati 61–62

Sai kaukauwa duadua ga na Turaga ka sa rawa ni maroroi au.

Ena ilakolako lesu ki Katiladi, a sotava o Josefa Simici kei ira na iliuliu tale eso ni Lotu e dua na ka vakarerevaki sara ena Uciwai na Misuri (raica na Yalododonu, 1:133–34). A vakayagataka na Turaga na madigi oqo me vakarota ka vakasalataki ira kina na Nona italai. Na cava o sa kunea ena Vunau kei na Veiyalayalati 61 sa vakayaloqaqataki kemuni mo ni biuta na nomu veivakabauti vua na Turaga ena nomuni sotava na nomuni ibolebole eso? Me vakataka, na cava na vuna e bibi kina me kilai tiko ni Kalou sa “mai na tawavakaiyalayala ki na tawavakaiyalayala”? (tikina e 1).

Era tiko talega na veivakarararamataki vakaoqo ena wase 62. Na cava e vakavulica na Turaga vei iko me baleti Koya kei na Nona kaukauwa ena ivakatakila oqo?

Vakasamataka vakatitobu na tarai cake ni vakabauta o sa bau sotakaya ena gauna a vukei iko kina na Turaga mo vorata rawa na dredre vakayalo se vakayago.

Vunau kei na Veiyalayalati 62

E vinakata na Turaga meu dau vakatulewa ka me “sa vakatau ga vei [au].”

Ena so na gauna sa dau dusimaki keda vakadodonu na Turaga, ka dau laiva vei keda na kena eso meda vakatulewa kina. O sa raica vakacava na ivakavuvuli oqo e vakamatatataki tu ena Vunau kei na Veiyalayalati 62? (raica talega na Vunau kei na Veiyalayalati 60:5; 61:22). O sa bau raica beka na ivakavuvuli oqo ena nomu bula? Na cava na vuna e vinaka kina vei keda meda cakava eso na vakatulewa ni sega na veidusimaki mai vua na Kalou?

Raica talega na Ica 2:18–25; Vunau kei na Veiyalayalati 58:27–28.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 60:2–3.Na cava na vuna era a lomalomarua kina na daukaulotu taumada mera wasea na kosipeli? Na cava na vuna eda daulomalomarua kina ena so na gauna? Sa rawa mo dou dramataka na sala mera wasea kina na matavuvale na kosipeli ena veituvaki duidui.

Vunau kei na Veiyalayalati 61:36–39.Na cava na vuna eda raica ena veitikina oqo “mo dou vakacegu”? (raica talega na Joni 16:33). Sa rawa ki na nomu matavuvale me ratou vola se droinitaka na veika e kauta mai na reki ka biuti ira vata ena dua na bilo levu ni “dou reki ka marau”. (Mo raica me ra oka kina na iyaloyalo ni iVakabula kei na veivakananumi ni Nona lomani keda.) Ena loma ni macawa ena gauna e gadreva kina na matavuvale na vuna mera marau kina, sa rawa mera digitaka e dua na ka mai na bilo levu.

Vunau kei na Veiyalayalati 61:36.Ena rawa vakacava mo vukea na nomu matavuvale ka nanuma tiko ni sa tiko na iVakabula “ena [keda] maliwa”? Sa rawa mo ni lewa vata na vanua mena dau toka kina na kena iyaloyalo o Koya ena nomudou loma ni vale. Eda na sureta vakacava na iVakabula ki na noda bula e veisiga?

Vunau kei na Veiyalayalati 62:3.Sa rawa mo dou cakava e dua na soqoni ni soli ivakadinadina ni wiliki oti na tikina oqo. Me vakamacalataka na cava e dua na ivakadinadina, sa rawa mo wasea eso na iwase ni itukutuku nei Peresitedi M. Russell Ballard “Pure Testimony” (Ensign se Liahona, Nove. 2004, 40 – 43). Na cava na vuna e vinaka kina meda vola na noda ivakadinadina?

Vunau kei na Veiyalayalati 62:5, 8.Na cava na vuna e sega ni solia kina na Turaga na ivakaro me baleta na veituvaki kece ni noda bula? Me vaka e tukuni tiko ena tikina e 8, eda na vakatulewa beka vakacava?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti na Lalai.

Sa vakaturi tiko na sere: “Nai Vakadinadina,” Sere ni Lotu, naba 77.

Vakatorocaketaki ni Vuli ni Tamata Yadua

Me dusimaki iko na Yalo ena nomu vuli. Me dusimaki iko na Yalo Tabu. Mo yadrava tiko na Nona vakasolokakana ni sa dusimaki iko yani ki na veika e gadrevi mo vulica ena veisiga, kevaka sara mada ga ni nona vakasolokakana e vakatura mo wilika se vulica e dua na ulutaga duidui mai na kena o dau gadreva, se ena dua tale na sala.

Na Vakatawa ni Sipi Vinaka, mai vei Del Parson