Inidipenideni, Misuri, mai vei Al Rounds

24–30 ni Me.

Vunau kei na Veiyalayalati 58–59

“Gumatua ena Cakacaka Vinaka”

E vakavulica o Peresitedi Dallin H. Oaks, “Ena vukei keda na ivolanikalou meda sauma rawa na noda dui vakatataro baleta ni gauna eda wilika kina eda na sureta ka rawata mai kina na veivakauqeti ni Yalo Tabu, ka na dusimaki keda ki na veika dina kecega” (ena David A. Edwards, “Are My Answers in There?” New Era, Me 2016, 42).

Vola na Veika o Uqeti Kina

Ena gauna era sa raica kina na italatala qase ena Lotu ena imatai ni gauna na vanua ni siti o Saioni—Inidipenideni, Misuri—a sega ni kena era a namaka. Eso era a nanuma ni ra na raica e dua na itikotiko raraba sa rawati koya tu, ka gugumatua ena veicakacaka vata kei na dua na ilawalawa qaqa ni Yalododonu. Ia era a raica ga e dua na lewelailai ni tamata e taudaku, e sega kina na veivakatorocaketaki era a dau bula tu kina ka ra tu kina eso na lewenivanua e loma itovo kaukauwa ka sega ni ira na Yalododonu. Ia a laurai ni a sega ni kerea na Turaga mera lako walega mai ki Saioni—a vinakata o Koya mera tara .

Ni sega ni veisotari na veika eda namaka ki na ka dina e yaco, eda rawa ni nanuma na ka a kaya na Turaga vei ira na Yalododonu ena 1831: “Dou na sega ni raica rawa e matamudou vakayago, ena gauna oqo, na ituvatuva ni nomudou Kalou … kei na lagilagi ena muria mai ni sa oti e vuqa na veika rarawa” (Vunau kei na Veiyalayalati 58:3). Io, na bula e sinai ena veika dredre, na ivalavala ca sara mada ga, ia eda rawa meda “vakayacora na veika dodonu eso; ni sa tu vei [keda] na kaukauwa” (tikina e 27–28).

Raica talega na Yalododonu, 1:127–33.

Vakasama ni Vuli iVolanikalou ni Tamata Yadua

Vunau kei na Veiyalayalati 58:1–5, 26–33, 44; 59:23

Na veivakalougatataki e yaco mai ena gauna ga ni Kalou kei na noda gugumatua.

Era a tara na Yalododonu na yavu kei Saioni mai na yasayasa vaka-Jekesoni, Misuri,na vanua era a vosota kina e vuqa na veivakatovolei. Era a nuitaka dina sara ni nodra gauna ni bula ena buroro cake na vanua oqo me dua na itikotiko era na soqoni vata kece mai kina na Yalododonu. Ia, era a vakasavi tani na Yalododonu mai na yasayasa va-Jekesoni ena vica na yabaki a tarava, a qai vakatakila mai na Turaga ni o ira na Nona tamata era na “waraka vakalailai tale mada na kena vueti o Saioni” (Vunau kei na veiyalayalati na 105:9).

Ni ko vulica na veitikina oqo, vakaraica na vuna ena dau tarovi tu mada kina na veivakalougatataki. Na taro e ra ena rawa ni vukei iko mo vakasama vakatitobu.

Vunau kei na Veiyalayalati 58:1–5; 59:23. Na itukutuku cava ena veitikina oqo e vaqaqacotaka na nomu rawa ni vosota rawa vakalevu cake na veika dredre? Na veivakalougatataki cava o sa ciqoma ni oti na veika dredre? Na cava na vuna o nanuma kina ni so na veivakalougatataki ena yaco walega mai ni oti na veika dedre?

Vunau kei na Veiyalayalati 58:26-33. Na cava na itavi ni “gumatua ena cakacaka vinaka” ena kena vakayacori na nona yalayala na Kalou? Na cava na itavi ni nomu talairawarawa?

Vunau kei na Veiyalayalati 58:44. Na cava na kedrau isema na “masu ni vakabauta” kei na loma ni Turaga kivei keda?

Vunau kei na Veiyalayalati 59, ulutaga ni iwase

O cei o Poli Naiti?

O Poli Naiti kei na watina, o Josefa Naiti Levu, rau a dua vei ira era a imatai mera vakabauta na veikacivi vakaparofita nei Josefa Simici. A ka bibi sara na nodrau tokona na Parofita o Poli kei Josefa ena cakacaka ni kena vakadewataki na iVola i Momani. E ratou a biubiu mai na vuvale na Naiti mai Kolosivili, Niu Ioka, me ratou laki soqoni vata kei ira na Yalododonu mai Oaio ka tarava sara nodra sa vakaroti mera toki yani ki na yasayasa vaka-Jekesoni, Misuri. Ni ra sa lako tiko, sa tekivu me torosobu na bula nei Poli, ia a saga tikoga me na raici Saioni ni bera ni mate. A mai vica walega na siga na nona tiko e Misuri sa takali yani (raica na Yalododonu, 1:127–28, 132–33). A ciqomi naVunau kei na Veiyalayalati 59 ena siga a mate kina, ka vaka me baleti koya tiko na tikina e 1 kei na 2 .

Vunau kei na Veiyalayalati 59:9–19

Na kena rokovi na Siga ni Vakacecegu e kauta mai na veivakalougatataki vakayago ka vakayalo.

Ni oti nona sa yalataka me vakalougatataki ira na Yalododonu mai Saioni ena “ivakaro e vuqa,” sa vakamatatataka vakatabakidua na Turaga e dua na ivakaro: na ivakaro me da rokova na Nona “siga tabu” (Vunau kei na Veiyalayalati 59:4, 9). Ni ko vulica na Vunau kei na Veiyalayalati 59:9–19, vakananuma vakatitobu na vuna a rairai bibi kina mera rokova na Siga ni Vakacecegu o ira na Yalododonu oqo ni ra saga mera tarai Saioni.

Sa rawa talega mo vakasamataka vakatitobu na taro vakaoqo: Au sa vakayagataka tiko beka na Siga ni Vakacecegu ena sala e vinakata na Turaga? Ena vukei au vakacava na noqu vakatabuya na Siga ni Vakacecegu me “kakua ni tauvi [au] na duka ni ka vakavuravura”? (tikina e 9). Na cava e rawa niu cakava meu “qaravi koya ga sa Cecere Sara”? (tikina e 10).

Ni wiliki oti na veitikina oqo, na cava soti o sa vakauqeti kina mo cakava mo vakatabuya vakalevu cake kina na Siga ni Vakacecegu? Nai Vakatekivu 2:2–3; Lako Yani 20:8–11; 31:13, 16; Na iVakarua 5:12–15; Aisea 58:13–14; Marika 2:27; Joni 20:1–19; Cakacaka 20:7.

Ena rairai yaga talega e dua vei ira na vuqa na vidio se na ivurevure tale eso baleta na Siga ni Vakacecegu era tiko ena sabbath.ChurchofJesusChrist.org.

Raica talega na Russell M. Nelson, “Me Ka e Rekitaki na Siga ni Vakacecegu,” Ensign se Liaona, Me 2015, 129–32; Bible Dictionary, “Sabbath.”

Na vakaivotavota ena sakaramede sa tiki ni kena vakatabui na Siga ni Vakacecegu.

Vakasama ni Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 58:26–29.Sa rawa mera vola na lewe ni matavuvale eso na ka era sa “gumatua” tiko kina. Era sa “cakacaka vinaka” kece sara beka? Na cava na vuna e vinakata kina na Turaga meda “vakayacora e levu na ka mai na [noda] kila ga”? Kerei ira na lewe ni matavuvale yadua me ra vakasamataka na veika era rawa ni cakava ena macawa oqo mera “vakayacora na veika dodonu eso.” Ni oti mera na qai ripotetaka na veika era cakava.

Vunau kei na Veiyalayalati 58:42-43.Na cava era vakila na lewe ni matavuvale ni ra wilika na veitikina oqo? E rawa vakacava me veivuke na veitikina oqo vua e dua e gadreva tu me veivutuni?

Vunau kei na Veiyalayalati 59:3–19.Na cava beka na ibalebale meda “vakaisalataki … ena ivakaro”? (tikina e 4). Ni o wilika na ivakaro era tiko ena tikina e 5–19, veivosakitaka na veivakalougatataki o sa ciqoma ena nomu talairawarawa ki na veivakaro oqo.

O na raica rawa talega ni vosa eso me vaka na “marau,” “yaloreki,” “matamamarau” kei na “reki” era vakayagataki me vakamacalataka kina na ivakaro mo rokova na Siga ni Vakacecegu. O na cakava vakacava me ka rekitaki vakalevu cake kina na nomu Siga ni Vakacecegu? Sa rawa ki na nomu matavuvale me ratou cakava e dua na qito kadi mera veisotari donu ena veika o rawa ni cakava mo vakatabuya kina na Siga ni Vakacecegu.

Vunau kei na Veiyalayalati 59:18–21.Na cava eda rawa ni cakava me da “vakatusa … na liga ni [Kalou] ena ka kecega”? (tikina e 21). Sa rawa mo taubale mada se sarava na iyaloyalo, ka raica rawa na veika me “reki kina na mata ka … marau kina na yalo” (tikina e 18). O rawa ni tabaka se droinitaka na iyaloyalo ni veika o sa kunea ka veitalanoataka na sala e rawa ni o vakaraitaka kina na nomu vakavinavinaka me baleta na veika oqo. Eda sa raica vakacava na liga ni Kalou ena noda bula?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

E vakaturi tiko kina na sere: “Digitaka na Dodonu,” Sere ni Lotu, naba 142.

Vakatorocaketaki Noda Veivakavulici

Wasea na ivolanikalou Solia vei ira na lewe ni matavuvale na gauna mera wasea kina na veimalanivosa ni ivolanikalou era sa kunea ena nodra vuli vakaiira ena vakaibalebale vakalevu vei ira.

Droini mai vei Marti Major