26 ni Epereli–2 ni Me

Vunau kei na Veiyalayalati 45

“Ni Sa Vakayacori … Na Veika Kecega sa Yalataki”

A vakavulica o Peresitedi Russell M. Nelson: “Vola na vakanananu e yaco mai ki na nomu vakasama. Vola na nomu nanuma ka salamuria ena cakacaka o sa vakauqeti kina mo na taura” (“iVakatakila ki na Lotu, iVakatakila ki na Noda Bula,” Ensign se Liaona, Me 2018, 95).

Vola na Veika o Uqeti Kina

Eda bula tiko ena veigauna dredre, ka sa na rawa ni veivakaleqai. O ira sara mada ga na tisaipeli i Jisu, ni ratou sa rogoci Koya ni sa parofisaitaka na veileqa lelevu ena yaco mai ena noda gauna, e ratou sa “lomaleqa kina” (Vunau kei na Veiyalayalati 45:34). Era a lomaleqa talega na Yalododonu taumada mai Katiladi, Oaio, ena vuku ni gauna dredre era a bula donuya. Me ikuri ni veika tale eso, a “vuqa na itukutuku lasu … kei na italanoa lialia” a vosabecataka tiko na itukutuku ni kosipeli (Vunau kei na Veiyalayalati 45, ulutaga ni wase). Ia a qai kaya kina na Turaga, ena gauna o ya vakakina nikua, o ya mo “dou kakua ni rarawa” (tikina 35.). Io, e tiko na veika butobuto, ia sa vakadinadinataki talega ni sa vakatotolotaka tiko na Kalou na Nona cakacaka. Io, sa yalataki tu ni na yaco na veika dredre ni bera na iKarua ni Lako Mai, ka dodonu meda qaqarauni tiko kina. Ia oqo era sega walega ni veivakaroti baleta na veika rerevaki; era sa ivakatakilakila talega ni veika sa yalataka na Kalou sa na yaco tiko mai. Oqo beka na vuna a ciqomi kina ena Vunau kei na Veiyalayalati 45—na ivakatakila a vakamacalataka vakamatailalai e vuqa na ivakatakilakila oqo—mera “reki vakalevu na Yalododonu” (ulutaga ni wase).

Vakasama ni Vuli iVolanikalou ni Tamata Yadua

Vunau kei na Veiyalayalati 45:1–5

Sa noda Dautataro vei Tamada ko Jisu Karisito.

O sa bau nanuma beka ni ko tawayaga se sega ni kilikili e mata ni Kalou? Ena rawa mo vakadeitaki ena Vunau kei na Veiyalayalati 45:1–5. Na cava era tukuna tiko vei iko na vosa “dautataro” kei na “vakamamasu”? E dautataro beka vakacava vei iko na iVakabula, se vakamamasu ena vukumu? Na cava na kena ibalebale vei iko mo kila tiko ni Karisito sa nomuni Dautataro?

Na qaqanivosa oqo mai vei Peresitedi Joseph Fielding Smith e rawa ni vukei iko mo vakasamataka vakatitobu na veitikina oqo: “O Jisu [sa] noda Dautataro, sa vakamamasu ena vukuda ni sa noda dauveivakameautaki ena nona cakacaka ni lotu kei na sasaga me vakaduavatataki keda, me rawa ni da veidinadinati vata kei na Kalou” (ena Conference Report, Okot. 1953, 58).

Raica talega na 2 Nifai 2:8–9; Mosaia 15:7–9; Moronai 7:27–28; Vunau kei na Veiyalayalati 29:5; 62:1.

Vunau kei na Veiyalayalati 45:9–10

Na kosipeli sa dua na ivakatagedegede ki na veimatanitu kecega.

Ena gauna makawa, na ivakatagedegede sai koya e dua na drotini se kuila e cecebuyataki yani ena gauna ni ivalu. Era tuvaivalu ka vakaduavatataki kina na sotia ka vukei ira mera kila na vanua mera laki cokovata kina kei na ka mera cakava. Na ivakatagedegede sa ivakaraitaki talega se lawa mera vakarautaki kina na veika tale eso. Ni o wilika na Vunau kei na Veiyalayalati 45:9–10, vakananuma vakatitobu na sala era sa nomu ivakatagedegede na veiyalayalati ni kosipeli. Ena duidui vakacava na nomu bula kevaka e sega vei iko na veiyalayalati oqo?

Raica talega na Aisea 5:26; 11:10–12; Vunau kei na Veiyalayalati 115:5–6.

Vunau kei na Veiyalayalati 45:11–75

Sa na yaco na veika sa yalataka tu na Turaga.

Ena yaco mada e liu na veivaluvaluti, ivalavala butobuto, kei na rarawa levu ni bera na iKarua ni Lako Mai ni iVakabula. Ia,“dou kakua ni rarawa,” a kaya na Turaga, “ni, ena gauna sa yaco kina na veika oqo, mo dou kila sara ni sa vakayacori na veika kecega sa yalataki vei kemudou” (Vunau kei na Veiyalayalati 45:35).

Ni ko vulica na Vunau kei na Veiyalayalati 45:11–75, vakasamataka mo vakanamata sega walega ena veika e veivakaleqai ka sa parofisaitaki tu ia ena veivakalougatataki talega sa yalataka tu na Turaga (me vakataka, na yalayala ena tikina 54–59 me baleta na lewa vaka-mileniumi ni iVakabula). Sa rawa mo cakava oqo ena nomu vola toka se vakatakilakilataka vakapepa se makataka na veitikina. Na cava beka o sa raica ni na vukei iko mo “kakua ni rarawa” me baleta na iotioti ni veisiga oqo?

Vunau kei na Veiyalayalati 45:31–32, 56–57

Mo “tudei tu ena veivanua tabu” ka kakua ni yavalati rawa.

E dua na vuna e vakavulici keda kina na iVakabula kei ira na Nona tisaipeli me baleta na ivakatakilakila ni iKarua ni Lako Mai o ya me vukea na noda vakavakarau. Na cava o sa vulica ena Vunau kei na Veiyalayalati 45:31–32, 56–57 me baleta na vakavakarau ki na iKarua ni Lako Mai ni iVakabula? E rawa ni veivuke me da railesuva na italanoa vakaibalebale ni tini na goneyalewa, kunei ena Maciu 25:1–13. Ena italanoa vakaibalebale oqo e vakatauvatana kina na iVakabula na waiwai ki na dina kei na Yalo Tabu (raica na Vunau kei na Veiyalayalati 45:57). Na veivakararamataki cava o sa rawata ni o wilika na italanoa vakaibalebale o ya ena sala oqo?

iTalanoa Vakaibalebale ni Tini na Goneyalewa, mai vei Dan Burr.

Vunau kei na Veiyalayalati 45:11–15, 66–71

O Saioni sa dua na vanua ni veitaqomaki vei ira na Yalododonu ni Kalou.

Era a maqusa na Yalododonu ena gauna nei Josefa Simici mera tarai Saioni cake, na Jerusalemi Vou, me vaka e vakamacalataki tiko ena iVola i Momani (raica na Ica 13:2–9) vakakina ena vakadewa vou vakauqeti vakayalo ni iVola Tabu nei Josefa Simici (raica na Mosese 7:62–64). Na cava o sa vulica baleti Saioni—o ya na koro levu makawa ena gauna nei Inoki kei na korolevu edaidai—mai na Vunau kei na Veiyalayalati 45:11–15, 66–71?

Nikua na ivakaro me tauyavutaki o Saioni sa vakaibalebaletaki tiko ki na kena tauyavutaki na matanitu ni Kalou ena vanua cava ga eda vakaitikotiko kina—ena vanua cava ga era soqoni vata kina na luve ni Kalou mera taqomaki kina ena Nona “veiyalayalati tawamudu” (tikina e 9). Na cava o rawa ni cakava mo vukea na kena tarai cake o Saioni ena vanua o tiko kina?

Raica talega na Ulutaga ni Kosipeli, “Saioni,” topics.ChurchofJesusChrist.org.

Na Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 45:3–5.Na cava e dau cakava e dua na Dautataro ena vukuda? Sa rawa mo sarava na vidio “The Mediator” (ChurchofJesusChrist.org) ka veivosakitaka na vuna e vakatokai kina na iVakabula me noda Dautataro.

Vunau kei na Veiyalayalati 45:9–10.Ke sa tiko beka ena nomu vuvale e dua na “ivakatagedegede,” se kuila, me matataka kina na nomudou yalodina tiko ki na kosipeli, ena vakacava beka na kena irairai? Ena ka marautaki mera cakava vata e dua na kuila vakamatavuvale ka veivosakitaka na sala era rawa ni vukea ira eso mera muria na ivakatagedegede ni kosipeli.

Vunau kei na Veiyalayalati 45:32.Na cava so na noda “veivanua tabu”? Na cava na ibalebale ni “sega ni yavalati rawa”? Eda na cakava vakacava me dua na vanua tabu na noda itikotiko?

Vunau kei na Veiyalayalati 45:39–44.E rawa vakacava mo vukei ira na lewe ni vuvale mera kila vinaka na cava na ibalebale meda yadrava tiko na iKarua ni Lako Mai ni iVakabula? Sa rawa mo vakasamataka e dua na soqo o sa nanamaki tiko kina ka wasea na sala mo na “yadrava” tiko kina na soqo oqo. Se rawa mo ni bulia vata e dua na keke ka yadrava tiko na ivakatakilakila ni sa gauna me laukana kina. Na cava eda sa cakava tiko meda yadrava tiko kina na iKarua ni Lako Mai ni iVakabula?

Vunau kei na Veiyalayalati 45:55.Ni ko wilika na 1 Nifai 22:26 kei na iVakatakila 20:1–3 ena rawa ni vukea na nomu vuvale mo dou kila vinaka na sala ena “sega kina ni sereki” o Setani ena gauna ni Mileniumi. E rawa vakacava meda vesuki Setani mai na noda bula?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

Sere vakaturi: “Ena Lesu Tale Beka Mai,” Nodra Sere na Gonelalai, 46; raica talega na “Vakasama me Vakatorocaketaka na Vuli iVolanikalou ni Nomu Vuvale.”

Vakavinakataki ni Vuli Yadudua

Vakayagataka na veivuke ni vuli. Vakayagataka na ivakamacala e botona, na Topical Guide, na Bible Dictionary, kei na iDusidusi ki na iVolanikalou me rawati na veivakararamataki ki na ivolanikalou.

Ni Sa Lako Mai na Karisito, mai vei Jubal Aviles Saenz