19–25 ni Epereli

Vunau kei na Veiyalayalati 41–44

“Na Noqu Lawa mo Dou Cicivaka Kina na Noqu Lotu”

“Ia kevaka ko na kerea,” a yalataka na Turaga, “ko na ciqoma na ivakatakila ena ivakatakila, na kilaka ena kilaka” (Vunau kei na Veiyalayalati 42:61). Na taro cava so e rawa mo taroga me rawa ni o ciqoma kina na ivakatakila o gadreva?

Vola na Veika o Vakauqeti Kina

Na tubu totolo ni Lotu ena 1830 kei na 1831—vakabibi na nodra vakusakusa mai na curuvou ki Katiladi, Oaio—a ka marautaki ka veivakayaloqaqataki vei ira na Yalododonu. Ia e a vakaraitaka talega eso na bolebole. O na vakaduavatataka beka vakacava e dua na ilawalawa ni tamata vakabauta ka tubu totolo sara tiko, vakabibi ni ra kauta vata tiko mai kei ira na ivunau kei na ivakarau eso ni nodra lotu eliu? Me ivakaraitaki, ni a yaco yani e Katiladi o Josefa Simici ena itekivu ni Feperueri, 1831, a raici ira na lewenilotu vou ni ra veiwaseitaka tiko na iyau raraba ena dua na sasaga dina mera vakamurimuri ira na Lotu Vakarisito ni Veiyalayalati Vou (raica na Cakacaka 4:32–37). A cakava kina na Turaga eso na veivakadodonutaki kei na veivakamatatataki bibi ena ka oqo kei na veiulutaga tale eso, vakalevu ga mai na dua na ivakatakila ka volai tu ena Vunau kei na Veiyalayalati 42, ka a vakatoka oKoya me “noqu lawa me cicivaki kina na noqu lotu” (tikina e 59). Ena ivakatakila oqo, eda vulica kina na dina e bibi sara ena kena tauyavutaki na nona Lotu na Turaga ena iotioti ni gauna, oka kina e dua na yalayala bibi ka vakamatatataka ni na dau levu cake tu ga na ka me vulici: “kevaka ko na kerea, ko na ciqoma na ivakatakila ena ivakatakila, na kilaka ena kilaka” (Vunau kei na Veiyalayalati 42:61).

Raica talega na Yalododonu, 1:114–19.

Vakasama eso ni Vuli iVolanikalou ni Tamata Yadua

Vunau kei na Veiyalayalati 41

“Raica ko koya sa ciqoma na noqu lawa ka talairawarawa kina, sa noqu tisaipeli.”

Ena itekivu ni 1831, sa tekivu mera soqoni vata yani ki Oaio na Yalododonu, ena nanamaki mera ciqoma kina na lawa ka sa yalataka tu na Kalou me na vakatakila mai ekea (raica na Vunau kei na Veiyalayalati 38:32). Ia, taumada, na Turaga a vakavulica vei ira na Nona tisaipeli na sala mera vakavakarau kina mera ciqoma na Nona lawa. Na ivakavuvuli cava soti o raica ena tikina e 1–5 ka a rawa ni vukei ira na Yalododonu mera ciqoma na lawa ni Kalou? Ena vukei iko vakacava na ivakavuvuli oqo mo ciqoma kina na veivakasalataki mai Vua?

Vunau kei na Veiyalayalati 42

Na lawa ni Kalou e vakatulewataka na Nona Lotu ka rawa ni vakatulewataka na noda bula.

Era a okata na Yalododonu na ivakatakila e kune ena Vunau kei na Veiyalayalati 42:1–72 me dua na kena e bibi duadua ka sa bau ciqoma na Parofita. E a dua vei ira na imatai me tabaki, ka a rairai kina ena rua na niusiveva e Oaio, ia a kilai wale tu ga me vaka “na lawa.” E vuqa vei ira na ivakavuvuli ena iwase oqo a sa vakatakilai taumada mai vua na Turaga. E dina ga ni sega ni okati ena iwase oqo na ivakaro kece sara a vinakata na Turaga mera talairawarawa kina na Nona Yalododonu, e sa yaga me vakasamataki vakatitobu na vuna a bibi kina me tokaruataki na ivakavuvuli eso oqo ki na Lotu vakalesui vou oqo.

Ena rawa beka ni vukei iko mo wilika vakatikina lalai na wase 42 me vaka oqo ka vakaraica na ivakavuvuli e vakavulici tiko ena veitikina yadua. Ni o cakava qori, vakasamataka na sala ena rawa ni vukei iko kina na lawa oqo ka a soli me dusimaka na Lotu, me rawa talega ni dusimaka na nomu bula vakai iko.

Na tikina e 4–9, 11–17, 56–58 

Na tikina 18–29 

Na tikina e 30–31 

Na tikina e 40–42 

Na tikina e 43–52 

Raica talega na 3 Nifai 15:9.

Vunau kei na Veiyalayalati 42:30–42

A rawa vakacava vei ira na Yalododonu mera “vakatabuya na [nodra] iyau” me tokoni ira na dravudravua?

E dua na tiki bibi ni lawa ka vakatakilai mai ena wase 42 sai koya na ka a qai yaco me kilai me lawa ni soli ka kei na veiqaravi. Na lawa oqo a vakavulici ira na Yalododonu mera rawa vakacava, me vakataki ira na daumuri Karisito ena gauna e liu, mera “taukena vata na ka kecega” (cakacaka 2:44; 4 Nifai 1:3), ka “sa sega vei ira sa dravudravua” (Mosese 7:18). Era a vakatabuya na nodra iyau na Yalododonu ena nodra solia vua na Turaga, mai vua na bisopi (raica na Vunau kei na Veiyalayalati 42:30–31). Na bisopi a vakasuka vei ira na veika era a gadreva (raica na tikina e 32)—vakavuqa na ka ga era a vakatabuya ka vakalevu cake. Era a solia na lewenilotu na kena vo ni nodra iyau me vukei ira na dravudravua (raica na tikina e 33–34). Na lawa oqo a dua na veivakalougatataki levu vei ira na Yalododonu, vakabibi vei ira era a biuta tu yani na ka kecega mera lako mai ki Oaio. Era a lomasoli ena nodra cau e vuqa na Yalododonu.

E dina ga ni da cakava tiko nikua ena sala e duidui, na Yalododonu Edaidai e se bulataka tikoga na lawa ni soli ka. Ni o wilika na Vunau kei na Veiyalayalati 42:30–42, vakasamataka vagumatua na sala o rawa ni vakatabuya kina na veika sa solia vei iko na Kalou me tarai cake kina na nona matanitu ka vakalougatataki ira era gadreva tu na veivuke.

Raica talega na Linda K. Burton, “Au a Vulagi,” Ensign se Liaona, Me 2016, 13–15; “Na lawa,” Revelations in Context, 93–95, history.ChurchofJesusChrist.org.

Karisito kei na iLiuliu Cauravou Vutuniyau, mai vei Heinrich Hofmann.

Vunau kei na Veiyalayalati 42:61, 65–68; 43:1–16

Na Kalou e solia na ivakatakila me dusimaka kina na Nona Lotu.

Raitayaloyalotaka ni o veivosaki tiko kei na dua na lewe vou ni Lotu ka marautaka me kila ni sa dusimaki tiko na Lotu mai na ivakatakila. O na vakayagataka vakacava na Vunau kei na Veiyalayalati 43:1–16 mo vakamacalataka kina vei koya na ivakarau e dusimaka kina na Turaga na Nona Lotu mai vua na Nona parofita? O na vakayagataka rawa vakacava na Vunau kei na Veiyalayalati 42:61, 65–68 mo vakavulica me baleta na kena ciqomi na ivakatakila ni tamata yadua?

Raica talega na “All Things Must Be Done in Order,” Revelations in Context, 50–53, history.ChurchofJesusChrist.org.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 41:1–5Na cava eso na ivakaraitaki ni lawa ni vanua, ka ra yaga vakacava vei keda na lawa eso oqori? Era vakalougatataki keda vakacava na lawa se ivakaro eso nei Tamada Vakalomalagi? Era rawa ni droinitaki ira vakai ira na lewe ni matavuvale ni ra talairawarawa tiko ki na lawa ni Kalou.

Vunau kei na Veiyalayalati 42:45, 88.Na cava ena vukea na nomu matavuvale me “bula vata ena veilomani”? (raica talega na Mosaia 4:14–15). Sa rawa mo vola se cavuta na veika vinaka vakataki kemudou se lagata e dua na serenilotu me baleta na loloma ena loma ni matavuvale, me vakataka na “Loloma e Vale” (Sere ni Lotu, naba 178).

Vunau kei na Veiyalayalati 42:61.E na rawa beka ni o wilika na tikina oqo ni o biuta vata tiko e dua na qito iba. Vakayagataka na qito iba mo vakavulica kina na sala e vakatakila kina na Kalou na Nona veika vuni—“ivakatakila ena ivakatakila, na kilaka ena kilaka.” E rawa ni ra wasea na lewe ni matavuvale na sala sa vakatakila kina na Kalou vei ira na dina e vakalalai ena veigauna yadua.

Vunau kei na Veiyalayalati 43:25.E rawa beka ni vakayagataka na nomu matavuvale e dua na ka me cakava na rorogo ni kurukuru me dua na sala me tekivutaka e dua na veivosaki me baleta na tikina e 25. E sa vakacava e dua na “domo ni kurukuru” na domo ni Turaga? Vaqara vata na tikina me baleta na sala eso ena rawa ni kacivi keda kina na Turaga meda veivutuni. E rawa vakacava meda yalorawarawa cake kina ki na domo ni Turaga?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi : “Meu Sa Bulataka Tu,” iVolanisere ni Gonelalai, 72; raica na “Vakasama Eso me Vakatorocaketaka na Vuli iVolanikalou ni Nomu Matavuvale.”

Vakatorocaketaki ni Noda Veivakavulici

Susuga e dua na ituvaki veilomani. Na ivakarau ni nodra veimaliwai kei na veiqaravi vakai ira na lewe ni matavuvale ena rawa ni vakayarayarataka vakatitobu na yalo ni nomu vuvale. Vukea na lewe ni vuvale taucoko me ra tauyavutaka e dua na vuvale veilomani, veirokorokovi ka mera rawa ni vakila kina ni ra maroroi ni ra wasea na veika era sotava, na loma tarotaro, kei na ivakadinadina. (Raica na Veivakavulici ena iVakarau ni iVakabula, 15.)

E vunau tiko o Josefa Simici e Nauvu, mai vei Sam Lawlor