Era toki ki Katiladi na Yalododonu, mai vei Sam Lawlor

12–18 ni Epereli

Vunau kei na Veiyalayalati 37–40

“Kevaka Dou Sa Sega Ni Duavata, Dou Sa Sega Ni Noqu”

Na volai ni vakasama o vulica e sa dua na sala o rawa ni muria kina na ivakasala ni Kalou mo “kumuna cake ki [lomaseremu] na yalomatua” (Vunau kei na Veiyalayalati 38:30).

Vola na Veika o Vakauqeti Kina

Vei ira na Yalododonu taumada, na Lotu e a levu cake mai na dua na vanua me rogoci ga kina na ivunau ena Sigatabu. Ena gauna taucoko ni Nona ivakatakila vei Josefa Simici, e a vakamacalataka kina na Lotu na Turaga vata kei na veivosa me vaka na inaki, matanitu, Saioni, ka, vakawasoma toka na, cakacaka. Oya e a rairai tiki ni veika a dreti ira mai kina e vuqa na lewenilotu taumada ki na Lotu. Me vaka ga na levu ni nodra taleitaka na ivakavuvuli ni vakalesui mai ni Lotu, e vuqa a vinakata talega e dua na ka era rawa ni solia kina na nodra bula. Me vaka oya, na ivakaro ni Turaga ni 1830 kivei ira na Yalododonu me ra vakasoqoni ira vata mai Oaio a sega ni rawarawa vei ira eso me ra muria. Vei ira eso me vakataki Fipi Kata, sa kena ibalebale mera biuta tu mai na veivale vinaka ki na dua na sauka matalia (raica na “Voices of the Restoration” ena mua ni ituvatuva oqo). Nikua eda rawa ni raica vakamatata na veika era a rawa ni raica o ira na Yalododonu oya ena mata ga ni vakabauta: na Turaga a vakarautaka tu na veivakalougatataki cecere vei ira mai Oaio.

Na gagadre me ra soqoni vata ki Oaio sa sivi makawa sara, ia na Yalododonu edaidai se duavata tikoga e na inaki vata ga oya, na cakacaka vata ga: me “vakabulabulataki kina ko Saioni” (Vunau kei na veiyalayalati na 39:13). Me vakataki ira na Yalododonu taumada o ya, eda sa biuta tani “na veika vakavuravura” (Vunau kei na Veiyalayalati 40:2) baleta ni da nuitaka na nona yalayala na Turaga: “[Eda] na rawata … na veivakalougatataki sa uasivi sara [eda] sa sega mada ni bau kila eliu” (Vunau kei na Veiyalayalati 39:10).

Raica talega na Yalododonu, 1:109–11.

Vakasama eso ni Vuli iVolanikalou ni Tamata Yadua

Vunau kei na Veiyalayalati 37:1

Na cava a vakadewataka tiko o Josefa Simici ena 1830?

Ena tikina oqo, na Turaga a tukuna tiko na cakacaka nei Josefa Simici ena railesuvi veivakauqeti ni iVolatabu, ka a vakatokai me “ivakadewa.” Ni a ciqoma o Josefa na ivakatakila ka volai tu ena wase 37, a sa vakacavara oti kina e vica na iwase ni ivola Na iVakatekivu ka se qai vulica sara ga me baleti Inoki kei na nona koro ko Saioni (raica na Na iVakatekivu 18–24; Mosese 7). Eso na ivakavuvuli a vakavulica vei Inoki na Turaga e tautauvata kei na kena a vakatakila oKoya ena wase 38.

Raica talega na Church History Topics, “Joseph Smith Translation of the Bible,” ChurchofJesusChrist.org/study/topics.

E cakacaka vata kei Sidini Rikitoni o Josefa Simici ena dua na railesuvi veivakauqeti ni iVolatabu. iVakaraitakai mai vei Annie Henrie Nader

Vunau kei na Veiyalayalati 38

E vakasoqoni keda na Kalou me vakalougatataki keda.

A tinia na Turaga na Nona ivakaro me ra soqoni vata ki Oaio ena nona kaya, “Raica, sai koya oqo na yalomatua” (Vunau kei na Veiyalayalati 37:4). Ia era a sega ni raica kusarawa na tamata kece na yalomatua e tiko kina. Ena wase 38, a vakatakila kina vakamatailalai cake na Turaga na Nona yalomatua. Na cava o vulica rawa mai na tikina 11–33 me baleta na veivakalougatataki ni vakasoqonivata? Eda sa sega tale ni qai vakaroti na lewe ni Lotu me soqoni vata ki na dua na vanua; na sala cava so eda soqoni vata kina nikua? E yaga vakacava vei keda na veivakalougatataki oqo? (raica na Russell M. Nelson, “Vakasoqoni o Isireli sa Veiseyaki,” Ensign se Liaona, Nove. 2006, 79–81).

Ni o wilika na vo ni wase oqo, vaqara na veitikina ka a vukei ira beka na Yalododonu me rawata na vakabauta era a gadreva mera talairawarawa ki na ivakaro ni Kalou me ra vakasoqoni vata e Oaio. Vakasamataka talega baleta na ivakaro sa solia vei iko oKoya kei na vakabauta o gadreva mo muria kina. Na taro eso oqo ena rawa ni dusimaka na nomu vuli:

• Na cava o raica ena tikina e 1–4 ka solia vei iko na nuidei vua na Turaga kei na Nona ivakaro?

• Ena vukei iko vakacava na tikina e 39 mo talairawarawa ki na ivakaro ni Kalou ena gauna sara mada ga e gadrevi kina na solibula?

Na cava tale o sa kunea?

Vunau kei na Veiyalayalati 38:11–13, 22–32, 41–42

Kevaka au sa vakarau tu, au na sega sara ni rere.

Era a sa sotava oti na Yalododonu e vuqa na veisaqasaqa, ka sa kila tu na Turaga ni na lako tiko mai eso tale (raica na Vunau kei na Veiyalayalati 38:11–13, 28–29). Me vukei ira mera kakua ni rere, a vakatakila kina oKoya e dua na ivakavuvuli bibi: “Kevaka dou sa vakarau vakavinaka tu dou na sega sara ni rere” (Vunau kei na Veiyalayalati 38:30). Taura e dua na miniti mo vakananuma kina vakatitobu na veibolebole o sotava. Ka ni o vulica na wase 38, vakarorogoca na veivakauqeti ni Yalotabu me baleta na sala o rawa ni vakavakarau ki na bolebole eso mo kakua kina ni rere.

Raica talega na Ronald A. Rasband, “Dou Kakua ni Rarawa,” Ensign se Liaona, Nove. 2018, 18–21.

Vunau kei na Veiyalayalati 39–40

Na veika ni vuravura me kakua ni vagolei au tani mai na talairawarawa ki na vosa ni Kalou.

Wilika na wase 39–40, oka kina na ivakamacala ni ituvaki eliu e na veiulutaga ni wase, ka vakasamataka na sala e rawa ni yaga kina vei iko na veika a sotava o Jemesa Koveli. Me ivakaraitaki, vakasamataka na veigauna ni nomu … “ivalavala dodonu e [matana]” (Vunau kei na Veiyalayalati 40:1). O a vakalougatataki vakacava baleta nomu yalodina? Vakananuma talega na “veika ni vuravura” cava o sotava (Vunau kei na Veiyalayalati 39:9; 40:2). Na cava so o raica ena veiwase oqo e vakauqeti iko mo talairawarawa vagumatua cake?

Raica talega na Maciu 13:3–23.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 37:3.Me vukea na nomu matavuvale mera kila vakavinaka na nodra solibula na Yalododonu mera soqoni vata kina ki Oaio, sa rawa mo raica na mape e salavata kei na ituvatuva oqo.

Vunau kei na Veiyalayalati 38:22.E rawa vakacava meda cakava me “vunilawa” ni noda matavuvale o Jisu Karisito? E rawa vakacava meda “tamata galala” ni da vakamuria na Nona lawa?

Vunau kei na Veiyalayalati 38:24–27.Me rawa ni vakavulici vei ira na gone na kena ibalebale meda “duavata sara,” o rawa ni vukei ira mera wilika na lewe ni nomuni matavuvale ka veivosakitaka na cava e bibi kina na tamata yadua ki na nomu matavuvale. Vakabibitaka ni soqonivata o iko sa dua na matavuvale. Sa rawa ni o vukei ira na luvemu mera droinitaka e dua na 1 levu ena dua na ivolakabi ka ukutaka ena yacadra kei na droini se iyaloyalo ni lewe ni matavuvale yadua. E rawa talega mo vola ena ivolakabi na veika mo na cakava mo duavata vakalevu cake vaka dua na matavuvale. O na rawa talega ni sarava na vidio “Love in Our Hearts” (ChurchofJesusChrist.org) se wilika na Mosese 7:18.

Vunau kei na Veiyalayalati 38:29–30.E rawa mo veivosakitaka na veika sotavi wale tikoga oqo ni matavuvale se tamata yadua ka gadrevi kina na vakavakarau. E tara vakacava na veika sotavi na nomu vakavakarau? Na cava e vinakata vei keda na Turaga me da vakavakarau kina? Ena vukei keda vakacava me da kakua ni rere na vakavakarau? Na cava eda rawa ni cakava me da vakavakarau kina?

Vunau kei na Veiyalayalati 40.Na cava na kena ibalebale vei keda na malanivosa “na veika vakavuravura” (tikina 2)? E tiko beka e dua na veika vakavuravura ka tarovi keda tiko mai na ciqoma na vosa ni Kalou “ena marau”? Eda na vorati ira beka vakacava?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Dauloloma ko Jisu,” iVolanisere ni Gonelalai, 39.

Domo ni Vakalesui Mai

Vakasoqoni vata mai ki Oaio

Na koro e Katiladi, mai vei Al Rounds

A maliwai ira e vuqa na Yalododonu ka ra a soqoni yani ki Oaio ena 1830 o Fipi Kata. E a lewena okoya na Lotu ena tokalau vualiku kei Amerika ni se qai yabaki ruasagavulu vakacaca, e dina ga ni rau a sega ni vakakina na nona itubutubu. A qai vola emuri okoya na nona lewa me lako ki Oaio me duavata kina kei ira na Yalododonu:

“Era a kurabui ena noqu itosotoso na noqu itokani, me vakataki au, ia e dua na ka e lomaqu a vakayavalati au tikoga. Na lomabibi nei tinaqu ena noqu biubiu mai vale a voleka sara me’u sega ni taura rawa; ka ke a sega na yalo e lomaqu ke’u a qai rawai sara ga emuri. A tukuna vei au o tinaqu ni na vinaka cake vua me raica na noqu buluti mai na noqu lako taudua yani ki na sala tawaloloma ni vuravura.

“‘[Fipi],’ a kaya o koya, ena veidokai, ‘O na lesu tale beka mai vei au kevaka o raica ni cala na vakabauta vaka-Momani?’

“Au a sauma, ‘io, tinaqu; Au na cakava.’ … A vakaceguya na nona lomaleqa na noqu isau ni taro; ia na lomabibi levu ni veitalatala a kena isau vei keimami kece. Ni yaco mai na gauna me’u sa biubiu kina au a sega ni nuitaki au rawa me’u cavuta na vakamoce; ka’u a mani vola na noqu vakamoce yadua, ka biuti ira tu ena dela ni noqu teveli, cici sobu yani ka lade ki na kareti. A vakaoya na noqu biuta na vale lomani ni noqu gauna ni gone me semati kina na noqu bula kei ira na yalododonu ni Kalou.”¹

A vola vakaoqo o Fipi, ena dua vei ira na itukutuku ni veitalatala oya:

“Noqu itubutubu lomani—Au sa vakarau me’u biuta vakalailai na delavuvu vakatama ni noqu bula … Au sega ni kila na kena dede—ia e sega sara ena yalo tawavakavinavinaka me baleta na loloma, au a ciqoma tu mai ni’u se lailai sara me yacova na gauna oqo—ia sa vaka me vakarota qo na Kalou mai na veika sa yaco oti. Me da biuta na veika kece oqo ki na liga ni Kalou ka da vakavinavinaka ni da sa vakadonui me da bula vata mai vakabalavu ena vei ituvaki vinaka eso me vaka eda sa sotava, kei na vakabauta ni na yaco me vinaka vei keda na ka kecega kevaka eda lomana vakalevu sara na Kalou. Me da kila tiko ni rawa ni da masuta e dua na Kalou ena rogoca na nodra masu yalodina na nona tamata kecega ka solia vei keda na ka sa uasivi duadua vei keda. …

“Tinaqu, au vakabauta ni sa loma ni Kalou me’u lako ki na ra ka’u sa vakadeitaka ni a sa vaka tu kina ena dua na gauna balavu. Oqo sa dolavi na sala … ; Au vakabauta ni sai koya na yalo ni Turaga e sa cakava oqo ka sa ganita vinaka na ka kecega. Ia mo kua ni lomaleqataka kina na luvemu; na Turaga ena vakacegui au. Au vakabauta ni na maroroi au na Turaga ka solia vei au na kena me vinaka sara. … Au sa gole baleta ni sa kaci mai na noqu iVakavuvuli—sa vakamatatataka na noqu itavi okoya.”²

iDusidusi

1. Ena Edward W. Tullidge, The Women of Mormondom (1877), 412.

2. iVola nei Fipi Kata vei rau na nona itubutubu, sega na tikinisiga, Church History Library, Salt Lake City; vakavoui na pagitueti. A lewena na Lotu o Fipi ena 1834, a toki ki Oaio ena 1835, ka vakawatitaki Wilivote Uturavu ena 1837.