29 ni Maji–04 ni Epereli

Siganimate

“Sai Au Sa Bula, Sai Au Talega Sa Vakamatei”

Ni ko vakavakarau mo vakananuma na Tucaketale mai na mate ni i Vakabula ena Sigatabu ni Siganimate, vakasamataka vakatitobu na sala sa vakatitobutaka kina na ivakatakila edaidai na nomu vakabauta ni o Jisu Karisito sa Luvena Duabau ga na Kalou ka Dauveivueti kei vuravura.

Vola na Veika o Vakauqeti Kina

Na ika 3 ni Epereli, 1836, e a Sigatabu ni Siganimate. Ni oti na qaravi ni sakaramede vei ira na Yalododonu ena valetabu vakatabui vou e Katiladi, o Josefa Simici kei Oliva Kaudari rau a raica e dua na vanua vakanomodi ena daku ni dua na ilati ena valetabu ka tekicuva ena masu lo. Oti oya, ena siga bibi oqo ni ra vakananuma kina na lotu Vakarisito e veivanua kecega na Tucaketale nei Jisu Karisito, a basika mai vakai koya na iVakabula vakaturi cake tale ena nona vale tabu, ka tukuna mai, “Sai Au sa bula, sai Au talega sa vakamatei” (Vunau kei na Veiyalayalati 110:4).

Na cava na kena ibalebale me tukuni ni o Jisu Karisito “sai Au sa bula”? E sega walega ni kena ibalebale ni a tucake tale oKoya mai na ibulubulu ena ikatolu ni siga ka rairai vei ira na nona tisaipeli kai Kalili. Sa kena ibalebale ni sa bula tiko oKoya nikua. E dau vosa mai oKoya vei ira na parofita nikua. E liutaka tiko Nona Lotu nikua. E vakabulai ira na yalo sa mavoa kei na kavoro ni yalo nikua. Sa rawa kina ni da voqataka na vosa ni ivakadinadina kaukauwa nei Josefa Simici: “Ni sa oti na ivakadinadina kece sara e tukuni me baleti koya, sai koya oqo na ivakadinadina … me keirau tukuna me baleti koya: Ni bula dina tiko!” (Vunau kei na Veiyalayalati 76:22). Eda rawa ni rogoca na Domona ena ivakatakila eso oqo. Eda rawa ni vakadinadinataka na Ligana ena noda bula. Ka da rawa ni vakila yadua ni “talei tu vei au: ‘Au sa kila ni bula tu!’” (Sere ni Lotu, naba 76).

Vakasama eso ni Vuli iVolanikalou ni Tamata Yadua

Vunau kei na Veiyalayalati 29:5; 38:7; 62:1; 76:11–14, 20–24; 110:1–10

E bula tiko o Jisu Karisito.

A raica vakavica na Parofita o Josefa Simici na iVakabula sa vakaturi cake tale, ka rua na gauna oqori sa volai tu ena Vunau kei na Veiyalayalati. Ni o wilika na wase 76:11–14, 20–24; 110:1–10, na cava e vakurabuitaki iko me baleta na ivakadinadina nei Josefa Simici? Na cava e yaga vakalevu sara kina vei iko na nona ivakadinadina?

Ena Vunau kei na Veiyalayalati, a vakadinadinanataka kina na iVakabula na Nona ilesilesi kei na itutu vakalou. Na cava o vulica me baleta na Karisito bula mai na Nona veivosa eso ena Vunau kei na Veiyalayalati 29:5; 38:7; 62:1? Sa rawa mo katona na veivosa vaka oqo ka o raica ni o vulica na Vunau kei na Veiyalayalati.

Raica talega na Josefa Simici—Ai Tukutuku 1:17.

Vunau kei na Veiyalayalati 29:26–27; 42:45–46; 63:49; 88:14–17, 27–31; 93:33–34

Ena vukui Jisu Karisito, au na tucake tale.

A kila tu o Josefa Simici na ivakarau ni yalo rarawa ni mate e dua na daulomani. E rua na tuakana, o Alaveni, kei Toni Kalosi, a mate ni rau se cauravou. Erau a buluta o Josefa kei Ema e ono na luvedrau, ka ra lailai sobu kece mai na yabaki rua. Ia mai na ivakatakila eso a ciqoma, a rawata kina o Josefa e dua na rai tawamudu baleta na mate kei na ituvatuva tawamudu ni Kalou. Vakasamataka na vei dina eso a vakatakilai mai ena Vunau kei na Veiyalayalati 29:26–27; 42:45–46; 63:49; 88:14–17, 27–31; 93:33–34. E tara vakacava na sala o raica kina na mate na ivakatakila oqo? Ena tara vakacava na ivakarau ni nomu bula?

Raica talega na 1 Korinica 15; M. Russell Ballard, “Na Raivotu ni Nodra Vueti na Mate,” Ensign se Liaona, Nove. 2018, 71–74; Nodra iVakavuvuli na Peresitedi ni Lotu: Josefa Simici (2007), 174–76.

Vunau kei na Veiyalayalati 18:10–13; 19:16–19; 45:3–5; 76:69–70

A rawata o Jisu Karisito e dua na “veisorovaki e uasivi sara.”

E dua na sala meda raica matua kina na iVakabula ena gauna ni Siganimate sai koya meda vulica na ivakatakila eso ena Vunau kei na Veiyalayalati ka vakavulica me baleta na Nona veisorovaki. Eso vei ira oqo e rawa ni kune ena Vunau kei na Veiyalayalati 18:10–13; 19:16–19; 45:3–5; 76:69–70. O na rawa beka ni cakava e dua na lisi ni dina eso me baleta na Veisorovaki ni iVakabula o kunea rawa ena veitikina oqo. Me vakatitobutaka na nomu vuli, o na rawa ni vakuria na nomu lisi ena kena vakasaqarai na tiki ni ivolanikalou ka volai tu ena “Sorovaka, Veisorovaki” (iDusidusi ki na iVolanikalou, scriptures.ChurchofJesusChrist.org).

Oqo e so na taro e rawa ni dusimaka na nomu vulica:

• Na cava a digitaka kina o Jisu Karisito me vakararawataki?

• Na cava me’u na cakava me’u ciqoma kina na veivakalougatataki ni Nona solibula?

• Au na kila vakacava ni sa cakacaka tiko na Nona Veisorovaki ki na noqu bula?

Na Turaga ni Masu, mai vei Yongsung Kim

Eso na Vakasama me baleta na Vuli iVolanikalou Vakavuvale kei na Lotu Vakavuvale

Koniferedi rarabaBaleta ni rau sota vata saraga na koniferedi raraba kei na Sigatabu ni Siganimate ena yabaki oqo, sa rawa mo vakasamataka na ka mo cakava (oka kina na sere kei na ivakatagi) me rawa ni vakatitobutaka kina na itukutuku ni koniferedi eso na ivakadinadina ni nomu matavuvale baleti Jisu Karisito. Me ivakaraitaki, e rawa ni ra droinitaka na gonelalai e dua na iyaloyalo ni iVakabula, se taura cake tu e dua na kena iyaloyalo oKoya, na gauna era rogoca kina e dua na itukutuku se sere me baleti Jisu Karisito. Eso tale na lewe ni matavuvale e rawa mera vola e dua na lisi ni dina eso era rogoca me baleta na iVakabula. Ni oti o ya, mera wasea na lewe ni matavuvale na nodra droini se lisi kei na nodra dui ivakadinadina i Jisu Karisito.

Vunau kei na Veiyalayalati 88:14–17; 138:17, 50.Na nomu matavuvale ena taleitaka beka me vakananuma e dua na vosa vakatautauvata se lesoni vakaraitaki me vakamacalataka na ibalebale ni mate kei na tucaketale—e dua ka vakaraitaka na veitawasei ni yago kei na yalo ka qai cokoti vata tale, me vaka e dua na liga kei na dua na qaniliga. E vakatitobutaka vakacava na veitikina oqo na noda vakavinavinaka ki na ka a vakayacora na iVakabula me baleti keda?

“Se Bula Na Karisito: Nodra iVakadinadina na iApositolo.”Me vakauqeta na veivosaki me baleta na nodra ivakadinadina ni iVakabula na parofita ni gauna oqo, sa rawa mo lesia yadua na lewe ni matavuvale me ra wilika e dua na iwase ni “Se Bula Na Karisito: Nodra iVakadinadina na iApositolo” (Ensign se Liaona, Me 2017, loma ni waqana e liu) ka wasea na veika era sa vulica me baleti Jisu Karisito. E rawa talega ni o vakaraitaka na vidio “Apostle Testimony Montage” (ChurchofJesusChrist.org). Na dina cava so eda kunea e vakauqeti keda?

“Au Kila ni Bula Tiko na Noqu iVakabula.”Me vukea na nomu matavuvale me vakasamataka na sala e vuqa e vakalougatataki keda kina nikua na iVakabula sa vakaturi cake tale, me lagati vata na “Au Sa Kila ni Bula Tu!” (Sere ni Lotu, naba 76) ka semati na dina era vakavuvulitaki ena sere oqo vata kei na kena e vakavuvulitaki ena ivolanikalou eso oqo: Vunau kei na Veiyalayalati 6:34; 45:3–5; 84:77; 98:18; 138:23. Ena rawa ni taleitaka talega na nomu matavuvale me vakavola eso na ikuri ni veitiki ni sere ni Lotu ka vakaraitaka na nodra kila vakacava ni bula tiko na nodra iVakabula.

Me baleta na vidio kei na ivurevure tale eso ni Siganimate, raica na Easter.ComeUntoChrist.org.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Jisu Turaga,” iVolanisere ni Gonelalai, 44.

Vakatorocaketaki Noda Veivakavulici

Raica na lesoni mai na veika ni siga yadua. Vakasamataka na sala e rawa ni veimuataki me yaco kina na veivosaki vakaibalebale me baleta na dina ni kosipeli na veika era sotava e veisiga na nomu lewe ni matavuvale (raica na Veivakavulici ena iVakarau ni i Vakabula,4). Me ivakaraitaki, e dua na cava‑ucauca e rawa ni dua na madigi me veitalanoataki kina na sala e dau sovaraka mai kina na Kalou na veivakalougatataki vei ira na luvena.

Sa Rairai Mai o Jisu Karisito vua na Parofita o Josefa Simici kei Oliva Kaudari, mai vei Walter Rane