29 ni Maji–4 ni Epereli

Siganimate

“Sai Au sa Bula, Sai Au Talega sa Vakamatei”

Na kalasi ni Lalai ena Sigatabu ni Siganimate e sa dua na madigi vakasakiti ni nodra vukei na gone mera vaqaqacotaka na nodra vakabauti Jisu Karisito kei na Nona Veisorovaki. Vakasaqara na veidusimaki ni Turaga ena sala meda cakava kina. Sa rawa mo raica eso na vakasama veivuke ena ituvatuva oqo.

Vola na Veika o Vakauqeti Kina

Sureta na Veiwasei

Me ra qai wasea vata kei iko na gone na ka era kila na vuna eda dau marautaka kina na Siganimate. Taroga na cava e cakava na nodra matavuvale me ra marautaka kina na Tucaketale i Jisu Karisito ena gauna ni Siganimate. Se me ra wasea na ka era sa vulica tiko me baleti Jisu Karisito e vale ka vakakina ena ivolanikalou.

Vakavulica na iVunau: Gone Sobu

Vunau kei na Veiyalayalati 138:11–17

Ena vuku i Jisu Karisito, au na tucake tale.

Ni o vakatavulici ira na gone me baleta na Tucaketale i Jisu Karisito, na Vunau kei na Veiyalayalati 138:11–17 e rawa ni vukei iko mo vakamacalataka na ibalebale ni tucake tale. Na veitikina oqo e rawa talega ni vukea ni taracake na nodra vakabauta ni ra na tucaketale ena dua na siga.

iTaviqaravi e Rawa ni Caka

• Vakaraitaka na iyaloyalo ni mate, bulu kei na Tucaketale ni iVakabula (raica na Gospel Art Book, naba 57, 58, kei na 59). Tarogi ira na gone na cava era kila tu ena veika a yaco oqo. Vakadinadinataka ni a mate ena vukuda o Jisu ka duri cake mai na mate me rawa ni da tucake tale ni da sa mate.

• Vakasamataka e dua na lesoni vakaraitaki e rawa ni vukei ira na gone ni kila na ka e yaco ni da sa mate (sa veitawasei na yaloda kei na yagoda) kei na gauna eda na tucaketale (ena cokoti vata tale na yaloda kei na yagoda ). Me ivakaraitaki, na cava e yaco ni da kauta tani na batiri mai na dua na cina livaliva se na bola ni iqi mai na dua na peni? Na cava e yaco ni sa cokoti vata tale na veika oqo?

• Wilika vei ira na gone na Vunau kei na Veiyalayalati 138:17: “Ena cokoti vata tale na yalo kei na yago me sega tale ni veitawasei, io me ra rawata na marau sa vuabale.” Cava na vuna eda vakavinavinakataka kina na yagoda? Wasea na reki o vakila mo kila ni da na vakaturi cake kece ka taukena tale na yagoda.

• Lagata vata e dua na sere ni Tucaketale, vaka na “Did Jesus Really Live Again?” se “Jesus Has Risen” (Children’s Songbook, 64, 70). Solia vei ira na gone na iyaloyalo eso e tukuna tiko na vosa se malanivosa ena sere (me ivakaraitaki, raica na Gospel Art Book, naba 59, 60, kei na 61), ka sureti ira me ra dulaka cake na nodra iyaloyalo ni ra lagata na veivosa oya.

Vunau kei na Veiyalayalati 76:11–24; 110:1–7; Josefa Simici—Ai Tukutuku 1:14–17

A raici Jisu Karisito na Parofita o Josefa Simici.

Dua na sala me vukea ni vaqaqacotaka na nodra vakabauta na iVakabula na gone o ya me wasei vei ira na ivakadinadina i Josefa Simici: “Sa bula o Koya! Ni keirau a raici Koya, ni sa tiko ena liga imatau ni Kalou” (Vunau kei na Veiyalayalati 76:22–23).

iTaviqaravi e Rawa ni Caka

• Vakaraitaka vei ira na gone e dua na iyaloyalo ni Matai ni Raivotu i Josefa Simici (raica na ituvatuva ni Janueri 4–10 ena Lako Mai, Mo Muri Au—Me Baleti Ira na Tamata Yadua kei na Matavuvale). Sureti ira na gone me ra tukuna vei iko na veika e yaco tiko ena iyaloyalo, ka kerei ira me ra vakaraici Jisu Karisito. Tarogi ira na gone ke ra kila tu na gauna tale eso a raica kina na iVakabula o Josefa Simici. Ena nomu vosa ga, tukuna veika e vakamacalataki tiko ena Vunau kei na Veiyalayalati 76:11–24; 110:1–7. Tukuna vei ira na gone na sala e sa tara cake kina na nomu vakabauti Jisu Karisito na ivolanikalou eso oqo.

• Ni ra rokataka tiko na gone na tabana ni taviqaravi ena macawa oqo, wilika vei ira na ivolanikalou e dusia. Dusimaka na ka era tiko ena iyaloyalo ka vakamacalataki ena tikina eso. Vakadinadinataka vei ira na gone ni a raici Jisu Karisito na Parofita o Josefa Simici, ka sai koya oqo e dua na vuna eda kila kina ni sa bula tiko o Jisu.

Vakavulica na iVunau: Gone Qase Cake

Vunau kei na Veiyalayalati 76:11–24; 110:1–10; Josefa Simici—Ai Tukutuku 1:14–17

A vakadinadinataka na parofita o Josefa Simici ni bula tiko o Jisu Karisito.

Na ilesilesi levu duadua ni parofita o ya me vakadinadinataki Jisu Karisito. Vukea na gone me ra taracake na nodra vakabauta na iVakabula ena vulici ni ivakadinadina i Josefa Simici me baleti Koya.

iTaviqaravi e Rawa ni Caka

• Na veimalanivosa oqo e vakamacalataka na gauna eso a rairai kina o Jisu Karisito kivei Josefa Simici: Vunau kei na Veiyalayalati 76:11–24; 110:1–10; Josefa Simici—Ai Tukutuku 1:14–17. Ena papa, vola eso na dina eda vulica me baleta na iVakabula mai na veitikina oqo. Sureti ira na gone me ra raica na tikina cava so e vakavulica na dina era volai tu ena papa. Na cava tale eda vulica baleti Jisu Karisito mai na veika a sotava o Josefa Simici?

• Ena tabana ni taviqaravi ena macawa oqo, vukea na gone me ra vakasotara vata na iyaloyalo ki na tiki ni ivolanikalou eso. Cava na vuna e dua kina na veivakalougatataki na kena kilai ni a raica na iVakabula vakaturi o Josefa Simici? Wasea na nomu ivakadinadina ni bula tiko o Jisu Karisito ka sa parofita o Josefa Simici.

Vunau kei na Veiyalayalati 63:49; 88:14–17, 27; 138:11, 14–17

Ena vuku i Jisu Karisito, au na tucake tale.

O na vukei ira vakacava na gone ena vakatitobutaki ni nodra vakacaucautaka na isolisoli ni iVakabula me baleta na tucake tale kivei keda kece sara?

iTaviqaravi e Rawa ni Caka

• Lesia ki na gone yadua e dua na malanivosa ni ivolanikalou oqo: Vunau kei na Veiyalayalati na 63:49; 88:14–17, 27; 138:11, 14–17. Sureti ira na gone me ra vaqara na nodra tikina me raici e dua na malanivosa era nanuma ni kovuta na itukutuku ni Siganimate. Me ra qai wasea na nodra nanuma. Kevaka e levu na gauna, me ra qai caka kadi e tiko kina na malanivosa eso era kunea era rawa ni solia vei ira na lewe ni matavuvale se itokani.

• Taroga na gone na sala cava era na vakamacalataka kina vua na tacina gone se itokani na ibalebale ni tucake tale. Ena vakasama eso, wilika vata na Vunau kei na Veiyalayalati 138:14–17, ka vakasamataka na taro eso vakaoqo: Na cava e yaco ki na yaloda kei na yagoda ni da sa mate? Na cava e yaco ni da sa tucake tale? E vakavuna vakacava o Jisu Karisito na tucake tale?

• Vakaraitaka na vidio “Because He Lives” (ChurchofJesusChrist.org), ka me ra qai wasea na gone na nodra nanuma ena ka e vakayacora na iVakabula ena vukudra.

  

  Lord of Prayer, by Yongsung Kim

Vunau kei na Veiyalayalati 18:10–13; 19:16–19; 45:3–5; 58:42–43

Ena vuku i Jisu Karisito, sa rawa ni vosoti na noqu ivalavala ca.

Me ikuri ni noda vakabulai mai na mate vakayago, sa vakarautaka o Jisu Karisito e dua na sala me da vakabulai kina mai na mate vakayalo—ena dua tale na kena itukutukuni, meda vosoti ena noda ivalavala ca ka lesu tale ki na iserau ni Kalou.

iTaviqaravi e Rawa ni Caka

• Vola e rua na ulutaga ena papa me vakaoqo: Na ka e cakava na iVakabula kei Na ka meu cakava. Sureta na gone yadua me vaqara e dua vei ira na wasenivosa oqo me raici e dua na ka e taukeni tu ena veiulutaga oqo: Vunau kei na Veiyalayalati 18:10–13; 19:16–19; 45:3–5; 58:42–43. Wasea na nomu marau kei na vakavinavinaka me baleta na ka a vakayacora na iVakabula ena vukuda.

• Vukea na gone me ra vulica na ikatolu ni yavu ni vakabauta. Sa rawa ni o vukei ira me ra cavuqaqataka ena vakaraitaki ni yaloyalo eso e veiganiti kei na malanivosa bibi eso.

• Vakaraitaka na vidio “The Shiny Bicycle” (ChurchofJesusChrist.org), se tukuna na nomu italanoa baleta e dua na gone digidigi cala ka qai veivutuni. Vukea na gone me ra veivosakitaka na ka e cakava na gone ena italanoa me vosoti kina. E vakavuna vakacava na iVakabula meda vosoti?

Vakauqeta na Vuli e Vale

Vukea na gone me ra vakasamataka e dua na ka era rawa ni cakava me tukuna vei ira tale eso—vakabibi nodra lewe ni matavuvale—na ka e sa cakava ena vukuda o Jisu Karisito. Na gauna tale ni sota kina, kerei ira ni wasea vata kei iko na ka era vakayacora.

Vakatorocaketaki Noda Veivakavulici

Dau yaga vei ira na gone na tokarua. Kakua ni wawa mo tokaruataka vakavica na itaviqaravi, vakauasivi vei ira na gone sobu. Na tokarua ena vukei ira na gone ni nanuma na ka era vulica tiko.