Ena Tekiduru na Duru Vakaadua Ga, mai vei J. Kirk Richards

22–28 ni Maji

Vunau kei na Veiyalayalati 29

O Jisu Karisito Ena Vakasoqoni Ira na Nona Tamata

O sa kilai ira na gone o vakavulica, ka levu tu na dina ena Vunau kei na Veiyalayalati 29 e rawa ni vakalougatataki ira. Muria na veivakauqeti ni Yalo Tabu ena nomu vulica na wase 29, ka vola na nanuma eso ena sala o na vakatavulici ira kina na gone ena veidina oqo.

Vola na Veika o Vakauqeti Kina

Sureta na Veiwasei

Navuca mo sureta e vica na gone me wasea na sala eso era vulica kina na kosipeli e vale—vakai ira se vakamatavuvale. Sureta e dua se levu na gone me wasea na nodra ivakadinadina me baleta na ka era sa vulica mai vale ena macawa oqo.

Vakavulica na iVunau: Gone Sobu

Vunau kei na Veiyalayalati 29:1–2

O Jisu Karisito ena vakasoqoni ira na Nona tamata ni bera na Nona lesu tale mai.

Eda sa vakasoqoni mai vua na iVakabula ni da ciqoma ka muria na Nona ivakavuvuli.

iTaviqaravi e Rawa ni Caka

• Me ra qai rokataka na gone na tabana ni itaviqaravi ena macawa oqo ni o vakaraitaka na vidio “Chicks and Hens” (ChurchofJesusChrist.org). Kerei ira na gone me ra vakarogoca na ivakarau e taqomaka kina na luvena na toa.

• Ni wiliki oti na Vunau kei na Veiyalayalati 29:1–2, matanataka na vosa vakatautauvata i Karisito ni vakasoqoni ira voli na Nona tamata “me vaka na toa yalewa sa vakasoqoni ira na luvena.” Sa rawa ni vakalecalecava e dua na gone me toa yalewa ka digitaka e dua na tutu ni rumu me duri kina. Ni sa “kaci vakatoa” o koya, mera qai vakasoqoni wavoliti koya mai na gone taucoko. Sa rawa mera veivukevuke na gone ni vaka na toa. Taura cake e dua na iyaloyalo ni iVakabula ka sureti ira na gone me ra soqoni yani Vua. Wasea vei ira na gone na sala e vukei keda kina o Jisu ni da soqoni yani Vua.

  

  Ena Vica na Gauna, mai vei Liz Lemon Swindle

Vunau kei na Veiyalayalati 29:2–11

Au rawa ni vakarau meu sotava na iVakabula.

Ena dua na siga, eda na tiko vakayadua ena mata i Jisu Karisito. Ni se rairai yawa sara no na siga oya, e rawa ni ra vakasamataka voli na gone se na vakacava tu beka kei na sala era rawa ni vakavakarau kina.

iTaviqaravi e Rawa ni Caka

• Vakaraitaka na iyaloyalo ni Karua ni Lesumai (raica na Gospel Art Book, naba 66), ka vukea e dua na gone me wilika na Vunau kei na Veiyalayalati 29: 11. Vukea mera siqema na gone na malanivosa eso ena ivolanikalou e vakamacalataka na ka era raica ena iyaloyalo. Wasea vei ira na gone na nomu nanuma me baleta na lako tale mai i Jisu Karisito ki vuravura.

• Lagata vakalasi e dua na sere, me baleta na iKarua ni Lako Mai, vaka na “When He Comes Again”” (Children’s Songbook, 82–83). Vakaraitaka vei ira na gone na iyaloyalo ni veika era rawa ni cakava me ra vakarau kina ni sotava na iVakabula ka bula tawayalani vata kei Koya (raica na Gospel Art Book ena vakasama eso). Vukei ira me ra raica na sala tale eso me ra vakarau kina ena Vunau kei na Veiyalayalati 29:2–10.

Vakavulica na iVunau: Gone Qase Cake

Vunau kei na Veiyalayalati 29

A vakarautaka vei au na Tamada Vakalomalagi e dua na yavu ni veivakabulai.

Na levu ni kilaka ni gone me baleta na yavu ni veivakabulai ni Kalou, na levu ni nona cakacakataka na nona vakabauta na Tamada Vakalomalagi kei Jisu Karisito ena muri ni tuvatuva o ya. Na tiki ni yavu cava o nanuma dei tu mo vakanamata kina?

iTaviqaravi e Rawa ni Caka

• Kerea e vica na gone me wasea e dua na ivakaraitaki ni gauna era a caka ituvatuva kina, vaka e dua na ilakolako se na vakacavari ni dua na itavi. O rawa talega ni wasea na ivakaraitaki ni tuvatuva eso, vakataka na ivolanivula ka volai tu kina na itaviqaravi eso se ivakasala ni kena caka e dua na ka. Cava na vuna era yaga kina na ituvatuva? Wasea vei ira na gone ni sa tiko e dua Nona ituvatuva na Tamada Vakalomalagi ena rawa kina meda vakataki Koya.

• Me vukei ira na gone me ra kila na ituvatuva ni Kalou, caka ivakatakilakila ena veivosa oqo: na bula taumada, na Veibuli, na Lutu, na bula vakavuravura, kei na iKarua ni Lesumai. Ni oti nomu vakamacalataka na vosa yadua (raica na Vunau kei na Veiyalayalati 29:9–45), solia na ivakatakilakila yadua me ra yadua na gone, ka kerei ira me ra duri tu ena kena ituvatuva donu me vakaraitaka na gauna e yaco kina na veika oqori ena ituvatuva ni Tamada Vakalomalagi. Sa rawa ni wasea na gone yadua na ka e kila tu me baleta na ka e tiko ena nona ivakatakilakila. Vukea mera raica na gone na kena sa vukei keda na kilai ni tuvatuva ni Tamada Vakalomalagi me rawa ni da vakataki Koya vakalevu cake kei na iVakabula.

• Vakayagataka e dua se sivia na itaviqaravi e ra me vakavulica na dina eso baleta na ituvatuva kei na sala meda vakayagataka kina. Navuca mo kerea eso na gone mera vakavakarau mai me vukei iko ena veivakavulici.

  • Galala ni Digidigi. Vukea mera kila vakamatata na gone ni sa solia vei keda na Tamada Vakalomalagi na isolisoli ni galala ni vakatulewa—na galala ni digidigi—ka da na saumi taro ena vuku ni noda digidigi (raica na Vunau kei na Veiyalayalati 29:39–40). Bulia e rua na ivakatakilakila ki na gone yadua: dua e matataka na digidigi vinaka (me ivakaraitaki, e dua na matadredredre) ka dua e matataka na digidigi cala (me ivakaraitaki, e dua na mata lomaleqa). Wasea na ivakaraitaki eso ni digidigi vinaka kei na digidigi cala, ka kerei ira na gone me ra laveta na ivakatakilakila dodonu. Kerei ira na gone me ra wasea na veivakalougatataki e basika mai ni da muri Jisu Karisito. Cava na vuna e vakalaiva kina na Tamada Vakalomalagi meda digidigi ga vakaikeda?

  • Na ivakaro. Sureti ira na gone me ra vola ena vava ni volavola eso na ivakaro. (Me ivakaraitaki, e rawa ni ra vaqara Na Lako Yani 20:3–17 kei na Gospel Art Book, 103–15.) Cava na vuna e vakaroti keda kina na Tamada Vakalomalagi? Na cava eda vulica mai na Vunau kei na Veiyalayalati 29: 35 me baleta na ivakaro ni Tamada Vakalomalagi?

  • Na Veisorovaki i Jisu Karisito. Vukea mera raica na gone ni sa vakarautaka na Tamada Vakalomalagi e dua na sala meda vosoti kina ni da digidigi cala. Kerea na gone yadua me wilika e dua na tikina ena Vunau kei na Veiyalayalati 29:1, 42–43 ka wasea na ka e vakavulica baleta na Veisorovaki ni iVakabula. Raica e dua na sala maqosa mo sureti ira kina na gone me ra wasea na ka era kunea, me vaka na ituvatuva ni nodra siganisucu, se lekaleka ki na balavu duadua, kei na so tale.

Vunau kei na Veiyalayalati 29:1–2

O Jisu Karisito ena vakasoqoni ira na Nona tamata ni bera na Nona lesu tale mai.

E rawa vakacava ni o vukei ira na gone o vakavulica mera makututaka na kena vukei na vakasoqoni vata i Isireli?

iTaviqaravi e Rawa ni Caka

• Sureti ira na gone me ra wilika na Vunau kei na Veiyalayalati 29:1–2 ka vakaraica na ka e vakatauvatani Koya kina na Turaga. Na cava era raitayaloyalotaka na gone ni ra wilika na veivakatauvatani oqo? Na cava e kaya na Turaga ni dodonu me caka me da vakasoqoni kina mai Vua?

• Dua na sala mera makututaka kina na gone na vakasoqoni o ya me wasei na italanoa ni dua ka a lewena na Lotu. Me ivakaraitaki, o cei a vakatakila na nomu matavuvale ki na Lotu? Navuca ni tarogi ira vakailiu na gone mera vakaraica mai na imatai ni lewe ni Lotu ena nodra matavuvale ka wasea na nona italanoa ki na kalasi.

• Sureta mera cakava e dua na lisi na gone ena sala eso era rawa ni vukea kina na tamata me ra vakasoqoni vua na iVakabula. Me ivakaraitaki, e rawa ni ra sureta na itokani se lewe ni matavuvale ki na dua na itaviqaravi ni Lalai se ki na lotu vakamatavuvale kei na nodra matavuvale.

• E tukuna tiko na ikatini ni yavu ni vakabauta na vakasoqoni vata tale i Isireli. E rawa beka ni ra cavuqaqataka na gone na yavu ni vakabauta oqo? Kevaka era rawata, sureti ira me ra cavuqaqataka ki na kalasi. Kevaka e sega, vukea mera tuva takete me ra cavuqaqataka.

Vakauqeta na Vuli e Vale

Sureti ira na gone me ra vola e dua na dina era sa vulica ena kalasi. Taroga e vica na vakasama ni ka era na cakava mera wasea kina na dina oqo vei ira na nodra matavuvale.

Vakatorocaketaki Noda Veivakavulici

Vakarorogo matua. Vakarorogo matua ki na ivakarau ni nodra sausaumi na gone ena nomu kalasi ki na itaviqaravi ni vuli eso. Kevaka era sa tekivu yavavala, e sa na rairai gauna mo toso kina ki na dua tale na itaviqaravi se vakamuri sala tu. Kevaka o siqema ni ra sa vakaitavi ka vuli tiko na gone, kakua ni yalobibi mo toso ga.