Peter Whitmer Home, mai vei Al Rounds

1–7 ni Maji

Vunau kei na Veiyalayalati 20–22

“Na Cadra Mai ni Lotu i Karisito”

Ni o vulica na Vunau kei na Veiyalayalati 20–22 ena macawa oqo, ena basika mai vei iko na vakasama eso ni veivakavulici. Sa rawa mo raica na vakasama tale eso ni veivakavulici ena ituvatuva oqo.

Vola na Veika o Vakauqeti Kina

Sureta na Veiwasei

Vakaraitaka na iyaloyalo ena ituvatuva ni macawa oqo ena Lako Mai Mo Muri Au—Baleta na Tamata Yadua kei na Matavuvale, ka sureta na gone me ra wasea na ka era kila me baleta na tauyavu ni Lotu. Me veivuke, raica na “Chapter 9: Organization of the Church of Jesus Christ” (Na iTukutuku ena Vunau kei na Veiyalayalati, 40–42).

Vakavulica na iVunau: Gone Sobu

Vunau kei na Veiyalayalati 20–21

E sa vakalesui mai na Lotu i Jisu Karisito.

Ena ika 6 ni Epereli, 1830, a vakasoqoni vata kei na so tale o Josefa Simici kei Oliva Kaudari me tauyavu na Lotu i Jisu Karisito sa vakalesui mai. O rawa ni vukea vakacava na gone o vakavulica me ra kila vakamatata na bibi ni soqo oqo?

iTaviqaravi e Rawa ni Caka

• Vakayagataka na ulutaga ni iwase ena Vunau kei na Veiyalayalati 21 se wase 9 ni iTalanoa ni Vunau kei na Veiyalayalati me tukuna vakalekaleka vei ira na gone na ka a yaco ena siga a tauyavutaki kina na Lotu. Me vukea me ra kila vakamatata na veika oqo, vakaraitaka na vidio “Organization of the Church” (ChurchofJesusChrist.org).

• Tukuna vei ira na gone na vuna o vakavinavinaka kina ni sa tiko vei keda Na Lotu i Jisu Karisito ni Yalododonu Edaidai. Vakamacalataka ni noda mai lewena na Lotu e sa vakarautaki keda meda laki bula vata tale kei na Kalou. Vukea me ra tokaruataka vakavica na malanivosa “I belong to The Church of Jesus Christ of Latter-day Saints” se lagata “The Church of Jesus Christ” (Children’s Songbook, 77).

Vunau kei na Veiyalayalati 20:37, 71–74

Au sa vakavakarau tiko meu papitaiso.

Era sa vakarau tiko na gone o vakavulica me ra papitaiso. Vukea me ra kila vakamatata na ibalebale ni papitaiso kei na ka e rawa ni ra cakava me ra vakarau tu.

iTaviqaravi e Rawa ni Caka

• Vakaraitaka na iyaloyalo ni dua na gone e papitaiso tu (raica na Gospel Art Book, naba 104), ka kerei ira na gone mera tukuna na veika era siqema. Wilika se vakalekalekataka na Vunau kei na Veiyalayalati 20:71–74, ka vukea na gone me ra raica na sala e veisotari kina na iyaloyalo kei na ivakasala ena veitikina oqo. Vakadinadinataka ni sa dodonu me da muria na ivakaraitaki ni iVakabula ka papitaisotaki ena sala e sa vakarota o Koya.

• Vakalekalekataka na Vunau kei na Veiyalayalati 20:37. Na cava eda vulica mai na tikina oqo me baleti ira na tamata era via papitaiso? Vakaraitaka na iyaloyalo ni sala eso era rawa ni vakavakarau kina na gone ki na papitaiso, vaka na qaravi ira na tani kei na masumasu.

• Lagata e dua na sere baleta na papitaiso, vaka na “When I Am Baptized” (Children’s Songbook, 103), se sarava “The Baptism of Jesus” (biblevideos.ChurchofJesusChrist.org). Sureti ira na gone mera wasea na nodra nanuma me baleta nodra papitaiso.

Vunau kei na Veiyalayalati 20:75–79

Sa vukei au na sakaramede meu nanumi Jisu Karisito.

O rawa vakacava ni vukea na gone me ra kila vakamatata na vuna eda taura kina na sakaramede ena veimacawa?

iTaviqaravi e Rawa ni Caka

• Wilika na Vunau kei na Veiyalayalati 20:77 vei ira na gone. Kerea mera tucake ni ra rogoca na ka sa dodonu meda nanuma ni da kania na madrai ni sakaramede. Vakayacora vakakina ena tikina 79.. (O na via dusimaka beka ni da gunuva na wai ka sega ni waini.) Eda na vakaraitaka vakacava ni da sa nanumi Jisu?

• Tukuna vei ira na gone e dua na gauna o a cakava kina e dua na yalayala ka maroroya. Sureta me ra dui tukuna na kedra dui talanoa vakaoya. Vakamacalataka ni gauna eda vakayagataka kina na sakaramede, eda sa yalayala. Wilika na Vunau kei na Veiyalayalati 20:77, ka vakadreta na yalayala eso eda cakava meda “dau nanumi koya” ka “muria na nona ivakaro.” Sureti ira na gone me ra wasea e dua na gauna era a nanuma kina na iVakabula se talairawarawa ki na dua na ivakaro.

  

  Sa vakananumi au na sakaramede meu vakasamataki Jisu Karisito.

Vakavulica na iVunau: Gone Qase Cake

Vunau kei na Veiyalayalati 20–21

E sa vakalesui mai na Lotu i Jisu Karisito.

Ena nodra talairawarawa ki na ivakaro ni Turaga, a tauyavutaka ka vakalesuya mai kina o Josefa Simici, Oliva Kaudari, kei na so tale na Lotu i Jisu Karisito enai ka 6 ni Epereli, 1830. Navuca na sala eso mo vukei ira kina na gone ni raica na kena sa mai vakalougatataka na nodra bula na ka oqo.

iTaviqaravi e Rawa ni Caka

• Vakananuma vei ira na gone baleta na ka bibi eso era sa vulica tiko mai—vaka na vakalesui mai ni matabete kei na vakadewataki ni iVola i Momani. Cava na vuna e sa gadrevi kina me yaco na veika oqo ni bera ni tauyavutaki na Lotu?

• Vakaraitaka na iyaloyalo kei na ka eso eda cakava ena Lotu ka vakamacalataki ena wase 20, vaka na vulici tiko ni Kalou kei Jisu Karisito, veiqaravi, papitaiso, kei na vakayagataki ni sakaramede. Vukea na gone me ra vakasotara vata na veiyaloyalo oqo kei na ivolanikalou e vakamacalataki ira, vaka na Vunau kei na Veiyalayalati 20:17–21, 47, 70, 72–74, 75–79, kei na ulutaga ni wase 21. Na veivakalougatataki cava soti e tiko vei keda baleta ni da sa lewe ni Lotu?

• Lagata vata “The Church of Jesus Christ” (Children’s Songbook, 77).

Vunau kei na Veiyalayalati 20:37, 77, 79

Ena gauna au a papitaiso kina, au a yalataka meu muri Jisu Karisito.

E vuqa vei ira na gone ena nomu kalasi sa papitaiso. Vakananuma vei ira na veiyalayalati era sa cakava “ me ra taura na yaca i Jisu Karisito” (Vunau kei na Veiyalayalati 20:37).

iTaviqaravi e Rawa ni Caka

• Sureta e vica na gone me ra vakavakarau mai ni wasea na ka era a vakila se sotava ni ra sa papitaiso. De rawa beka ni ra kauta mai e dua na iyaloyalo ni siga ni nodra papitaiso me vakaraitaki ki na kalasi. Cava na vuna era digitaka kina mera papitaiso? E sa vakalougatataki ira vakacava na nodra mai papitaiso ka ciqoma na Yalo Tabu?

• Wilika vata na Vunau kei na Veiyalayalati 20:77, ka kerea na gone me ra raica na yalayala eso eda vakayacora ena gauna ni sakaramede. Me vukea na gone me ra kila vakavinaka ni tiko na ka eso era rawa ni cakava ena veisiga me ra “dau nanumi” Jisu Karisito kina, sureta e dua na gone me matanataka e dua na ka e rawa ni cakava me nanuma na iVakabula. Taroga na kena vo me ra vakilakila na imoimoi cava o ya. Mai na tikina 77, eda sa vakalougatataki vakacava ni da dau nanuma tikoga na iVakabula?

• Vukea na gone me ra vakatauvatana na Vunau kei na Veiyalayalati 20:37 ki na tikina e 77 me ra raica e dua na malanivosa e tokaruataki vei rau ruarua. Vakaraitaka vei ira na gone e dua na ka e vakayacani tu (vaka e dua na yaca ni vakatakilakila se yaca ni tamata). Na cava e tukuna vei keda na yaca me baleta na iyaya? Wilika vata na Vunau kei na Veiyalayalati 20:37 me dikevi na yaca i cei eda sa tugana ni da papitaiso tu. Na cava na kena ibalebale me da tugana na yaca i Jisu Karisito? Me da na vakasama ka cakacaka vakacava ni sa tiko vei keda na yaca oqo?

Vunau kei na Veiyalayalati 21:4–6

Au sa vakalougatataki niu muria na parofita.

O na vukea vakacava na gone me ra ciqoma na veivakalougatataki sa yalataki tu ena veitikina oqo kivei ira era muria na parofita?

iTaviqaravi e Rawa ni Caka

• Vola ena papa iVakaro kei na Veivakalougatataki. Sureti ira na gone me ra wilika na Vunau kei na Veiyalayalati 21:4–6, ka vakaraica na ivakaro eso a solia na Turaga kei na veivakalougatataki sa yalataka kina. Sureti ira mera vola ena papa na ka era raica.

• Vakaraitaka e dua na iyaloyalo ni parofita ena gauna oqo, ka sureti ira na gone mera wasea e dua na ka era sa vulica se rogoca mai vua walega oqo. Wilika vata na Vunau kei na Veiyalayalati 21:5. Sureti ira na gone me ra vola se droinitaka e dua na ka era rawa ni cakava me ra muria na parofita. Wasea na nomu ivakadinadina ni gauna eda muria kina na parofita, eda sa muria tiko na iVakabula.

Vakauqeta na Vuli e Vale

Sureti ira na gone me ra cakava e dua na tuva na vuna era vakavinavinaka kina me baleta na Lotu i Jisu Karisito sa vakalesui mai. Vakayaloqaqataki ira me ra wasea na nodra lisi ki na dua na lewe ni matavuvale se itokani.

Vakatorocaketaki Noda Veivakavulici

Vakayagataka na italanoa me vakavulica na ivunau. “E vukei ira na gone na italanoa eso me ra raica na sala e tutaki kina na kosipeli ki na bula ni veisiga. … Ni o vakavulici ira tiko na gonelalai, tuva na sala eso mo okati ira kina ena italanoa; me ivakaraitaki, e rawa ni ra taura tu na iyaloyalo, tokaruataka na malanivosa eso, se matanataka eso na tikina” (Veivakavulici ena iVakarau ni iVakabula, 25).