Martin Harris Farm, mai vei Al Rounds

22–28 ni Feperueri

Vunau kei na Veiyalayalati 18–19

“Sa Ka Talei na Yalo ni Tamata”

Kerea na Tamada Vakalomalagi me vukei iko ni raica na ivakavuvuli eso ena Vunau kei na Veiyalayalati 18–19 e vakaibalebale vakalevu vei ira na gone.

Vola na Veika o Vakauqeti Kina

Sureta na Veiwasei

Wilika na Vunau kei na Veiyalayalati 18:2, ka vakamacalataka ni a vukei Oliver Cowdery na Yalotabu me kila ni sa dina na ivolanikalou. Tukuna vei ira na gone e dua na gauna e a vakadinadinataka kina vei iko na Yalotabu ni sa dina na ivolanikalou. Me ra qai wasea na gauna eso era a vakila kina ni sa dina na ivolanikalou.

Vakavulica na iVunau: Gone Sobu

Vunau kei na Veiyalayalati 18:10–12

Eda sa ka talei vakayadua kivua na Kalou.

Ni ra kila na gone ni sa lomani ira na Tamada Vakalomalagi—kei ira kece na Luvena—era sa yalodei ka yalovinaka vakalevu cake vei ira na tani.

iTaviqaravi e Rawa ni Caka

• Vukea na gone mera tokaruataka vata kei iko na Vunau kei na Veiyalayalati 18:10 . Vakamacalataka ni sa vakaibalebaletaki na “yalo ni tamata” vei ira kece na luve ni Kalou. Tokaruataka kei ira na gone na tikina 10 , ka sosomitaka na “yalo ni tamata” ena yacadra na gone. (Raica talega na tabana ni itaviqaravi ena macawa oqo.)

• Vukea na gone me ra vakasamataka na veika era nanuma na tamata ni yaga vakalevu. Me ra qai veivukevuke ni tirova tu e dua na iloilo, ia ni caka tiko oya, tukuna ki na gone yadua ni ra sa luve ni Kalou ka sa ka talei. Vakadinadinataka ni vua na Tamada Vakalomalagi, era sa yaga vakalevu sara mai na veika kecega era a vakasamataka taumada.

Vunau kei na Veiyalayalati 18:13–16.

Sa vakavu reki vakalevu na wasei ni kosipeli.

O na vakauqeta vakacava na gone me ra sureta eso tale me ra lako vei Karisito ka kune reki vakalevu?

iTaviqaravi e Rawa ni Caka

• Tukuna vei ira na gone e dua na ka e vakavu reki vei iko. Me ra qai tukuna yadua vei iko na gone e dua na ka e vakavu reki vei ira. Wilika na Vunau kei na Veiyalayalati 18:13, 16. Na cava e vakavu reki vua na Turaga? Na cava e tukuna o Koya ena vakavu reki kivei keda?

• Lagata vata e dua na sere me baleta na cakacaka ni kaulotu, vaka na “I Want to Be a Missionary Now” (Children’s Songbook, 168), ka vukei ira na gone me ra vakasamataka na sala eso era rawa ni wasea kina na kosipeli, oka kina ena nodra dui tikotiko. Tukuna e dua na gauna o a wasea kina na kosipeli, ka me ra qai wasea na gone na veika era sotava.

Vunau kei na Veiyalayalati 19:18–19, 23–24

O Jisu Karisito a talairawarawa kivua na Tamada Vakalomalagi, ena gauna mada ga e dredre tu kina.

Na lomasoli ni iVakabula me “gunu mai na bilo wiwi ka [sega] ni vakasuka” (tikina e 18) e sa dua na ivakaraitaki vei keda kece me baleta na talairawarawa ki na lomana na Tamada Vakalomalagi . Navuca na sala o na vakauqeti ira kina na gone me ra muria na ivakaraitaki i Jisu.

iTaviqaravi e Rawa ni Caka

• Vakaraitaka na iyaloyalo i Jisu Karisito ni vakararawataki tu e Kecisemani (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Kerea na gone me ra tukuna vei iko na cava era kila me baleta na ka e yaco tiko ena iyaloyalo oqo. Vakalekalekataka ena nomu vosa ga na ka a tukuna na iVakabula ena Vunau kei na Veiyalayalati 19:18–19 me baleta na nona vakararawataki. Vakadreta na vakararawataki me baleta na noda ivalavala ca e sa ka dredre duadua me bau cakava e dua na tamata, ia ni sa lomani Tamana kei keda o Jisu, e sa talairawarawa kina ki na loma ni Kalou. Eda rawa vakacava ni talairawarawa vua na Tamada Vakalomalagi?

• Vukea na gone me ra vakasamataka eso na imoimoi rawarawa e salavata kei na veimalanivosa ena Vunau kei na Veiyalayalati 19:23. Wilika vakavica na tikina ni ra veimoiyaki na gone. Vukea mera vakasamataka na sala eso eda rawa ni vulici Karisito kina ka rogoca na Nona vosa.

Vakavulica na iVunau: Gone Qase Cake

Vunau kei na Veiyalayalati 18:10–12

Eda sa ka talei vakayadua kivua na Kalou.

Era sotavi dredre e vuqa na tamata ena vakanananu ni tawayaga; eso tale era vakatotogani ira na tamata era duatani mai vei ira. Na itukutuku qaqa ena Vunau kei na Veiyalayalati 18:10 sa rawa ni veisautaka na ivakarau ni noda raici keda kei ira na wavoliti keda tu.

iTaviqaravi e Rawa ni Caka

• Kerea na gone yadua me vola na yacana ena dua na tiki ni pepa ka solia wavoki na pepa ena rumu. Sureta me ra vola ena pepa yadua era ciqoma e dua na ka era taleitaka me baleta na tamata o ya. Vakayaloqaqataki ira me ra dau yalovinaka ka veinanumi ena veika era tukuna. Qai vukei ira na gone me ra wilika na Vunau kei na Veiyalayalati 18:10–12, ka sureta me ra wasea na ka era vulica ena vakanananu ni Kalou me baleti keda. Vakamacalataka ni da sa ka talei kece sara kivua na Kalou baleta ni da sa Luvena.

• Vakaraitaka vei ira na gone e dua na ka e sa rui yaga vakalevu vei iko. Eda na qarava vakacava na veika e yaga vakalevu vei keda? Kerea e dua na gone me wilika na Vunau kei na Veiyalayalati 18:10. Eda na vakaraitaka vakacava ki na tamata tale eso ni sa “ka talei na [yalodra]” kivei keda?

  

  Worth of a Soul, mai vei Liz Lemon Swindle

Vunau kei na Veiyalayalati 19:16–19

E vakararawataki o Jisu Karisito me baleti au.

O na sureta vakacava e dua na yalo ni vakarokoroko ena nomu kalasi me rawa ni vakadinadinataka kina na Yalo Tabu vei ira na gone ni sa sauma o Jisu Karisito na isau ni nodra ivalavala ca?

iTaviqaravi e Rawa ni Caka

• Wasea na italanoa i Jisu Karisito ni vakararawataki tu me baleta na noda ivalavala ca (raica na “Chapter 51: Jesus Suffers in the Garden of Gethsemane,” New Testament Stories, 129–32, se na kena vidio ena ChurchofJesusChrist.org). Sureti ira na gone mera tukuna tale na italanoa ena nodra vosa ga, ka qai sureta me ra wilika na sala a vakamacalata kina na iVakabula na ka oya ena Vunau kei na Veiyalayalati 19:16–19. Na cava eda vulica mai na Nona ivakamacala?

• Sureti ira na gone me ra bobo ni ra wilika na Vunau kei na Veiyalayalati 19:16–19 ka vakasamataka na nodra nanuma me baleta na iVakabula. Vukea na gone me ra raica ena Serenilotu se na Children’s Songbook na sere eso e vukei ira ni vakaraitaka na nodra nanuma me baleti Jisu Karisito (raica na tuvai vakamatanivola ni ulutaga eso ena veivola oqo). Sureti ira na gone me ra lagata na sere eso era digitaka ka wasea na nodra ivakadinadina.

• Vukei ira na gone me ra cavuqaqataka na ikatolu ni yavu ni vakabauta.

Vunau kei na Veiyalayalati 19:26, 34–35, 38

Sa ka levu sara na veivakalougatataki ni Kalou mai na iyau ni vuravura eso.

A sau levu sara na tabaki ni iVola i Momani, ka sega ni ceguva rawa o Josefa Simici. A kerei Martin Harris na Turaga me “solia e dua na iwase ni [nona] iyau,” nona iteitei vuavuai vinaka, me saumi kina na misini ni tabaivola (tikina 34). Eda sa ciqoma na veivakalougatataki cecere ena vuku ni solibula nei Martin kei na vuqa tale.

iTaviqaravi e Rawa ni Caka

• Vola ena papa na taro eso vakaoqo me vukea nodra kila vakamatata na gone na Vunau kei na Veiyalayalati 19:26, 34–35, 38: Na cava a kerei Martin Harris kina na Turaga me cakava? Cava na vuna a kerei koya kina me cakava? Na cava a yalataka o Koya me kena isau? Sureti ira na gone me ra veisasa ka cakacaka vata me raica na isau ni taro ena veitikina oqo. Tarogi ira se na vaevei tu na nodra vakanananu ke o ira o Martin Harris.

• Vakaraitaka vei ira na gone e dua na ilavelave ni iVola i Momani, ka tukuna vei ira e dua na ka o taleitaka kina. Sureta me ra wasea se cava era nanuma kina. Veitalanoataka vakalekaleka na solibula i Martin Harris me rawa kina ni tabaki na iVola i Momani (Tukutuku ena Vunau kei na Veiyalayalati, 33). Na cava e kaya na Turaga vei Martin ena Vunau kei na Veiyalayalati 19: 38. e a rairai vukei koya me yalodina ka talairawarawa? Vukea na gone me ra vakasamataka e dua na ka era rawa ni solibula kina me ra talairawarawa vua na Kalou se veivuke ena Nona cakacaka.

Vakauqeta na Vuli e Vale

Sureti ira na gone mera vakasamataka e dua era rawa ni vukea mai na ka era vulica ena Vunau kei na Veiyalayalati 18 se 19—me ivakaraitaki, ni da sa ka talei taucoko kivua na Kalou. Vakayaloqaqataka mera vakasamataka na sala era na wasea kina na ka era sa vulica vua na tamata oya.

Vakatorocaketaki Noda Veivakavulici

Vukei ira na gone me ra vuli mai na ivolanikalou. E dau dredre toka ki na so na gone na wiliki ni ivolanikalou. Ena rawa ni veivuke na nodra vakanamata ki na dua ga na tikina se malanivosa.