Vanua ni teitei nei Martin Harris, mai vei Al Rounds

22–28 ni Feperueri

Vunau kei na Veiyalayalati 18-19

“Sa Ka Talei Na Yalo Ni Tamata”

Na ivakatakila ena Vunau kei na Veiyalayalati a soli me isau ni taro vakatabakidua ki na ituvaki ni bula voleka ni 200 na yabaki sa oti, ia sa tawa‑vakagauna na ivakavuvuli era vakavulica. Vakaraica na ivakavuvuli eso oqo ni o vaka wilika, ka vakasamataka na sala era yaga kina vei iko.

Vola na Veika o Vakauqeti Kina

Erau a taukena o Matini kei Lusi Erisi e dua na iteitei totoka e Palmyra, New York. A taura e vuqa na yabaki me rau rawata kina, a rawa me rau susuga cake kina e dua na matavuvale, ka solia vei rau na itutu vinaka vakaitikotiko. Ia ena 1829 sa yaco me matata sara ni iVola i Momani ena rawa walega ni tabaki kevaka e mokititaka o Matini na nona vanua ni teitei me saumi kina na dautabaivola. A tiko na ivakadinadina nei Matini ni iVola i Momani, ia o Lusi a sega. Kevaka sa na toso ga o Matini ena kena mokititaki ka qai sega ni voli vakavinaka na iVola i Momani, e na vakayalia okoya na nona vanua ni teitei ka vakaleqa na nona vakawati. Ena dua na gauna se dua tale, eda dau sotava na taro vata ga oya ka a rairai sotava tiko o Matini: Na cava na kena yaga vei au na kosipeli i Jisu Karisito? Na cava au sa lomasoli kina me’u solia yani me vukea na tarai cake ni matanitu ni Kalou? Ena rawa ni vukei keda meda nanuma tiko ni sega ni dua e sa bau sauma na kena isau e cecere cake me vakalougatataki ira kina na luve ni Kalou mai vei Jisu Karisito, “ko koya sa kaukauwa sara” (Vunau kei na Veiyalayalati 19:18).

A vakatulewataka o Matini me mokititaka na nona vanua ni teitei. A sauma na kena tabaki na imatai ni 5,000 na ilavelave ni iVola i Momani na nona solibula. Ia oqo, sa ra vakalougatataki kina mai 190 na milioni na kena ilavelave e muri, e milioni na yalo ni tamata e vuravura raraba.

Raica na ikuri ni ivakamacala me baleta na kena tabaki na iVola i Momani, ena Yalododonu, 1:76–84.

Vakasama eso ni Vuli iVolanikalou ni Tamata Yadua

Vunau kei na Veiyalayalati 18:10–16

E rekitaka na Turaga ni da sa veivutuni.

Raica na sala e vakayagataki wasoma kina na vosa na veivutuni kei na veivutuni ena Vunau kei na Veiyalayalati 18 kei na 19, ka vakasamataka vakatitobu na veika o vulica mai na vosa oqo ena veigauna kece e vakayagataki kina. Vakasamataka vakabibi na Vunau kei na Veiyalayalati 18:10–16; na cava o vakila me baleta na veivutuni mai na tikina eso oqo—nomu veivutuni vakai iko kei na itavi mo sureti ira na tani me ra veivutuni?

Raica talega na Alama 36:18–21; Dale G. Renlund, “Veivutuni: Dua na Digidigi Rekitaki,” Ensign se Liaona, Nove. 2016, 121–24.

Vunau kei na Veiyalayalati 18:34–36

Au rawa ni rogoca na domo ni Turaga ena Vunau kei na Veiyalayalati.

Na cava o na kaya, kevaka e dua e tarogi iko se vakacava tu na domo ni Turaga? Vakasamataka na taro oqo ni o wilika na Vunau kei na Veiyalayalati 18:34–36. Na cava o sa vulica me baleta na domo ni Turaga mai na wiliki ni Vunau kei na Veiyalayalati? Na cava o rawa ni cakava mo rogoca vakamatata cake kina na Domona?

Vunau kei na Veiyalayalati 19:15–20

O Jisu Karisito a vakararawataki me’u rawa ni veivutuni ka lako mai Vua.

E vakamacalataki ena Veiyalayalati Vou na vakararawataki ni iVakabula e Kecisemani mai na ivakarau ni nodra rai o ira era a tiko kina. Ena Vunau kei na Veiyalayalati 19:15–20, a tukuna o Jisu Karisito me baleta na Nona vakararawataki ena Nona vosa vakaikoya. Ni o wilika na itukutuku tabu, ka Nona vakaikoya oqo, vakaraica na vosa kei na malanivosa e vakamacalataka na vakararawataki ni iVakabula. Vakasamataka na cava e vakavulica vei iko na vosa se malanivosa yadua. Na cava a lomasoli kina na iVakabula me vakararawataki? Vakasamataka mo vola na nomu nanuma baleti Jisu Karisito kei na nona solibula baleti iko.

Raica na Joni 15:13; Mosaia 3:7; Alama 7:11–12; Vunau kei na Veiyalayalati 18:10–13.

Na Yaga ni dua na Yalo ni Tamata, mai vei Lemon Swindle

Vunau kei na Veiyalayalati 19:26–27, 34–41

Sa cecere cake na veivakalougatataki ni Kalou mai na iyau ni vuravura.

A sega ni volitaki vinaka sara mai Palmyra na iVola i Momani, ka vakavuna, me volitaka o Matini Erisi e dua na iwase levu ni nona qele ni teitei me saumi kina na dinau (raica na “The Contributions of Martin Harris,” iVakatakila ena Vakasama, 7–8). Vakasamataka vakatitobu na solibula o ya—kei na veivakalougatataki o sa mai taura kina—ni o wilika na veitikina oqo. O na vakasamataka tale ga baleta na ka sa kerea vei iko na Turaga mo solia tani. Na cava o sa raica ena veitikina oqo ka vakauqeti iko mo kitaka na solibula oqo ena “reki” kei na “mamarau”? (raica talega na tikina e 15–20).

Vunau kei na Veiyalayalati 19:23

E kauta mai na vakacegu na vuli vei Jisu Karisito kei na vakamuri Koya.

Vakasamataka na veisureti ni iVakabula “Mo vuli vei au.” Na cava o vulica me baleti Jisu Karisito ena Vunau kei na Veiyalayalati 19? Vola na nomu nanuma, ka vakasamataka vakatitobu na sala ena vukei iko kina mo kunea na vakacegu na veidina oqo me baleta na iVakabula. Na cava e kena ibalebale vei iko mo “bula ena yalomalua ni [Yalona]”?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 18:1–5.Na lewe‑ni‑matavuvale e rawa beka ni ra wasea e “vuqa sara na gauna” (tikina 2) ka a vakatakila kina vei ira na Yalo Tabu, ni sa dina na ivolanikalou me vaka ga a cakava vei Oliva Kauderi. E rawa vakacava me “vakanuinui ki na veika sa volai tu” (tikina e 3) ena ivolanikalou na nomu matavuvale? E rawa vakacava mo tara cake na yavu ni nomu matavuvale ena “uluvatu” (tikina e 4) ni kosipeli?

Vunau kei na Veiyalayalati 18:10–13; 19:16–19.E rawa ni ra wilika na lewe‑ni‑matavuvale yadua na Vunau kei na Veiyalayalati 18:10–13 ka vakaisosomitaka na yacadra ki na vosa na “yalo ni tamata,” “yalo,” kei na “tamata kecega.” Sa rawa ni o qai veivosakitaka na sala e vukei keda kina na veitikina oqo me da kila na keda yaga vua na Tamana kei na Luvena (raica na Vunau kei na Veiyalayalati 19:16–19).

Vunau kei na Veiyalayalati 18:21–25.E tu beka na kena ibalebale bibi ni yacadra na nomu lewe‑ni‑matavuvale? Ena rawa beka ni o vosa me baleta na cava e bibi kina na yaca kei na kena ibalebale me da taura vei keda na yaca i Jisu Karisito (raica na Mosaia 5:7). Oqo e rawa ni dua na madigi vinaka me vukea na lewe‑ni‑matavuvale me vakavakarau me ra taura na yaca i Karisito ki vei ira ena gauna era na papitaiso kina.

Vunau kei na Veiyalayalati 19:15–20.Me vukea me vakaibalebale ki na nomu matavuvale na veitikina oqo, de na rawa ni o wilika ka vakaraitaka tiko e dua na iyaloyalo i Jisu Karisito (e dua e salavata tiko na ituvatuva oqo). Sa rawa ni ra qai wasea na lewe‑ni‑matavuvale na nodra nanuma me baleta na iVakabula. Ena rawa talega ni sureta na Yalo e dua na serenilotu taleitaki me baleta na iVakabula.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Loloma i Jisu,” Sere ni Lotu, naba 110.

Vakatorocaketaki ni Vuli ni Tamata Yadudua

Taroga na taro. E sa ivakadinadina na Vunau kei na Veiyalayalati ni taro sa veimuataki ki na ivakatakila. Ni ko vulica na ivolanikalou, vola na taro eso e yaco mai vei iko. Qai vakasamataka vakatitobu ka masu mo vakasaqara na isau ni taro.

Karisito ni Masu e na Were o Kecisemani, mai vei Hermann Clementz