“15–21 ni Feperueri. Vunau kei na Veiyalayalati 14–17: ‘Tu ka iVakadinadina,’” Lako Mai, Mo Muri Au—Me Baleta na Tamata Yadua kei na Matavuvale: Vunau kei na Veiyalayalati 2021 (2020)
“15–21 ni Feperueri. Vunau kei na Veiyalayalati 14–17,” Lako Mai, Mo Muri Au—Me Baleta na Tamata Yadua kei na Matavuvale: 2021
15–21 ni Feperueri
Vunau kei na Veiyalayalati 14-17
“Tu ka iVakadinadina”
Era kerea ena so na gauna na matavuvale kei na itokani i Josefa Simici me vakasaqara na ivakatakila ena ka e vinakata na Kalou me ra cakava. Ni o wilika na veivakatakila oqo, vakasamataka na veidusimaki cava e tiko vua na Kalou me baleti iko.
Vola na Veika o Vakauqeti Kina
E dina ga ni a toso vinaka tiko na cakacaka ni vakavakadewa, ena Me ni 1829 sa yaco me drakidrakita sara na ituvaki i Hamoni kivei Josefa, Ema kei Oliva. Sa tubu tikoga na veicacati vakaveiwekani ka sa seavu mai na veitokoni ni matavuvale i Ema. Ena vakilai tu ni kena sega ni taqoqo rawa o Hamoni, a dolele yani o Oliva ki na dua na itokani ka vakaraitaka tu na nona maleleta na cakacaka i Josefa Simici: o Tevita Witima. A tiko o Tevita vata kei na nona itubutubu kei ira na tacina e Feieti, Niu Ioka, rauta ni 100 na maile na kena yawa. A sotavi Oliva o koya ena yabaki eliu, ka sa volavola vakavica vua o Oliva mai na gauna oya, ena wasei ni veika a donumaka ni cakacaka vata voli kei na Parofita. A sega taumada ni se sotavi Josefa o Tevita se dua ena nona matavuvale. Ia ni kerea o Oliva ke rawa vua me toki vata kei Josefa ki na itikotiko nei Witima me vakacavari na vakadewataki ni iVola i Momani, e tuvakarau ni dolava na nodratou katuba na matavuvale na Witima. Ka levu tale na ka e vakarautaka na Turaga ki na matavuvale na Witima mai na vakavaletaki ga ni parofita. A tiko eso na Nona ivakasala vakatabakidua me baleti iratou, kune ena Vunau kei na Veiyalayalati 14–17, ia emuri ratou a yaco me dua na matavuvale yavutaki sara ni Lotu ka vakadinadina ki na tadolavi ni Veivakalesuimai.
Ena so tale na ka me baleta na matavuvale na Witima, raica na Yalododonu, 1:68–71.
Vakasama eso ni Vuli iVolanikalou ni Tamata Yadua
Au rawa ni vakaitavi ena “cakacaka levu ka veivakurabuitaki” ni Kalou.
Ni sa sotavi Josefa Simici, a se cauravou tu o Tevita Witima ka sa vakaogai koya ki na nona cakacaka ena iteitei ni matavuvale. Ia sa vakarautaka tu na Turaga e duatani na cakacaka me baleti Tevita—e dina ni a via vaka toka ga na teitei. Ni o wilika na Vunau kei na Veiyalayalati 14:1–4, raica na sala e vakatauvatana kina na Nona cakacaka na Turaga ki na mataqali cakacaka e a kila vinaka tu o Tevita. Na cava o vulica me baleta na cakacaka ni Turaga mai na veivakatauvatani oqo?
E rawa vakacava ni o “curumaka na [nomu] isele takelo”? (tikina e 4). Raica na yalayala eso e soli ena wase oqo vei ira ka “gumatua sara [ni] tarai Saioni … cake” (tikina e 6).
Vunau kei na Veiyalayalati 14:2
Sa “bula ka kaukauwa” na vosa ni Kalou.
A vakatauvatana na Turaga na nona vosa ki na “iseleiwau batirua” (Vunau kei na Veiyalayalati 14:2). Na cava e vakatura vei iko na veivakatauvatani oqo me baleta na vosa ni Kalou? Me ivakaraitaki, e bula, kaukauwa, ka gata vakacava na Nona vosa? O sa vakila vakacava na kaukauwa ni vosa ni Kalou?
Vakasamataka na sala tale eso e vakamacalataka kina na Kalou na Nona vosa. Me ivakaraitaki, na cava o vulica me baleta na vosa ni Kalou mai na veivakatauvatani ena malanivosa eso oqo?
A vakatauvatana na Turaga na Nona vosa ki na dua na iseleiwau.
Vunau kei na Veiyalayalati 14:7
Na bula tawamudu sa “isolisoli uasivi duadua ni Kalou.”
Ni o wilika na Vunau kei na Veiyalayalati 14:7, vakasamataka vakatitobu na vuna e “isolisoli uasivi duadua ni Kalou” na bula tawamudu. Ena rawa ni veivuke na raititobu oqo mai vei Peresitedi Russell M. Nelson: “Ena tuvatuva cecere ni bula marau ni Kalou, sa rawa kina me ra vauci na matavuvale ena valetabu ka vakarau tu me ra lesu tale ka laki tiko tawayalani ena Nona iserau tabu. Oqori na bula tawamudu!” (“Me Vakavinavinakataki Ga na Kalou,” Ensign se Liaona, Me 2012, 77).
Navuca na vakuri ni vosa vagolei eso ki na tikina e 7 e vukei iko ni kila vakavinaka cake na bula tawamudu (raica na “Eternal Life” ena Topical Guide se Guide to the Scriptures, scriptures.ChurchofJesusChrist.org). Na cava o sa vulica ni vakauqeti iko mo sasagataka ena bula tawamudu?
Vunau kei na Veiyalayalati 15–16
E sa ka yaga vakalevu sara na kau mai ni yalo kivei Karisito.
Rau a via kila o Joni kei Pita Witima na ka “e bibi duadua” ena nodrau bula (Vunau kei na Veiyalayalati 15:4; 16:4). Ko sa bau vakasamataka li na ka oqo me baleta nomu bula? Ni o wilika na Vunau kei na Veiyalayalati, 15–16, vakasamataka vakatitobu na vuna e bibi duadua kina na kau mai ni yalo kivei Karisito. O na sureti ira vakacava na tamata vei Karisito?
Raica talega na Vunau kei na Veiyalayalati 18:10–16.
Sa dau vakayagataki ira na vakadinadina na Turaga me yavutaka na Nona vosa.
Na cava na vakadinadina? Cava na vuna e vakayagataki ira kina na ivakadinadina na Turaga ena Nona cakacaka? (raica na 2 Korinica 13:1). Vakasamataka vakatitobu na veitaro oqo ni o wilika na vosa ni Kalou ki na Tolu na Vakadinadina ena Vunau kei na Veiyalayalati 17. Ena via veivuke talega me railesuvi “Na Vakadinadina ni Lewe Tolu” ena iVola i Momani. Era veivuke vakacava na ivakadinadina ena vakayacori ni “inaki dodonu” ni Kalou? (tikina e 4).
O bau kila tu ni a ciqoma talega o Meri Witima e dua na ivakadinadina ni peleti koula? A vakaraitaka vei koya na agilosi o Moronai me vakatakilai kina na solibula a cakava okoya ni a vakaitikotiko o Josefa, Ema, kei Oliva ena nona vale (raica na Yalododonu, 1:70–71). Na cava o vulica mai na ka a sotava o koya me baleta na ciqomi ni dua na ivakadinadina?
Raica talega na Yalododonu, 1:73–75; Ulisses Soares, “Na Tadu Mai ni iVola i Momani,” Ensign se Liaona, Me 2020, 32–35.
Eso na Vakasama me baleta na Vuli iVolanikalou Vakavuvale kei na Lotu Vakavuvale
-
Vunau kei na Veiyalayalati 14:1–4.Navuca mo sureta nomu matavuvale me vaqara na malanivosa eso e semati ki na teitei ena veitikina oqo. Cava na vuna e vakatauvatana kina na Turaga na Nona cakacaka ki na tatamusuki? Na cava eda rawa ni cakava meda veivuke kina ena Nona cakacaka?
-
Vunau kei na Veiyalayalati 14:2.Na itaviqaravi me baleta na tikina oqo ena “Vakasama eso ni Vuli iVolanikalou ni Tamata Yadudua” e lisitaka tu eso na malanivosa ni ivolanikalou me baleta na vosa ni Kalou. De na rawa beka ni wilika na lewe ni matavuvale ka wasea na ka era sa vulica. E vakauqeti keda vakacava na veimalanivosa ni ivolanikalou oqo meda “rogoca matua” na vosa ni Kalou?
-
Vunau kei na Veiyalayalati 15:6; 16:6.Na veitikina oqo e rawa ni vakauqeta na veivosaki me baleta na veika e bibi duadua ki na nomu matavuvale (raica talega na Vunau kei na Veiyalayalati 18:10).
-
Vunau kei na Veiyalayalati 17.Ena taleitaka beka na nomu matavuvale me droinitaka na iyaloyalo eso ni veiyaya yadua ratou a raica na Lewe Tolu na iVakadinadina (raica na tikina e 1). Ni o wilika na wase 17, vaqara na malanivosa eso e vakavulica me baleta na bibi ni iVola i Momani. E rawa vakacava meda ivakadinadina ni iVola i Momani. Sa rawa talega ni sarava na nomu matavuvale na vidio “A Day for the Eternities” (ChurchofJesusChrist.org).
Me ikuri ni tukutuku ni nodra vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Sere vakaturi: “Au Lako Ke Ko Ni Lewa,” Sere ni Lotu, naba 164.
Na Domo ni Vakalesuimai
O Lusi Meki Simici kei iratou na Lewe Tolu kei na Lewe Walu na iVakadinadina
A vakaraitaka na agilosi o Moronai na peleti koula vei Josefa Simici, Oliva Kauderi, Tevita Witima, kei Matini Erisi ena loma ni veikau volekata na nodratou vale na Witima e Fayette, New York. Rau a sikovi iratou tiko na Witima na itubutubu i Josefa ena gauna o ya. A vakamacalataka o Lusi Meki Simici, na tinai Josefa, na revurevu mana ni veika a sotavi oqo vei iratou na vakadinadina:
“Ni rauta toka na maliwa ni tolu kei na va na kaloko. Erau a dabe tiko vata kei au o Mrs. Witima kei Mr. Simici ena dua na rumu ni moce. Au a dabe toka ena yasa ni loga. Ni curu ga mai o Josefa, a daberaki koya sobu sara e yasaqu. ‘Tamaqu! Tinaqu!’ a kaya o koya. ‘O drau sega ni kila na levu ni noqu marau. E sa vakavuna na Turaga me vakaraitaki na peleti ki na lewe tolu tale mai vei au, ka ratou sa raica talega e dua na agilosi ka sa dodonu me ratou na vakadinadinataka na dina ni veika au a tukuna. Ni ratou sa kila vakataki ratou ni’u sega ni veilakoyaki voli me vakaisini ira na tamata. Ka’u vakila tu niu sa vakacegui mai na dua na icolacola vakadomobula, ka sa via sivia vei au me’u vosota rawa. Ia eratou sa na cola oqo e dua na tikina, ka sa marau na yaloqu ni’u sa na sega tale ni tiko duadua voli e vuravura.’ Sa qai yaco mai o Matini Erisi. Sa vaka me tarai vakabibi o koya ena reki vuabale. A qai vakadinadinataka okoya na veika a raica ka rogoca, me vakataki rau talega na rua, o Oliva kei Tevita. E a tautauvata na lewe ni nodratou ivakadinadina me vaka na kena e tu ena iVola i Momani. …
“O Matini Erisi vakabibi a vaka me sega ni rawa sara ga ni biuta vakavosa na veika a vakila. A kaya o koya, ‘Au sa qai raica oqo e dua na agilosi mai Lomalagi ka a vakadinadinataka na dina ni veika kece au sa rogoca me baleta na itukutuku, ka’u sa raici koya ena mataqu. Au sa raica talega na peleti eso ka tarai ira ena ligaqu ka sa rawa ni vakadinadinataka vakakina ki vuravura taucoko. Ia au sa ciqoma vakaiau e dua na vakadinadina ka sega ni tukuni rawa, ni sega na yame e rawa ni vakamacalataka, ka’u sa vakalougatataka kina na Kalou ena yalodina mai vu ni yaloqu ni sa lako sobu mai o koya me vakarautaki au, o au saraga, me dua na vakadinadina ni nona cakacaka kei na ituvatuva cecere ena vuku [ni] luve ni tamata.’ Erau a tomani koya talega o Oliva kei Tevita ena veivakacaucautaki bibi vua na Kalou ena vuku ni nona vinaka kei na loloma cecere. Keitou a lesu ki vale [e Palmyra, New York,] ena siga ka tarava vaka e dua na ilawalawa lailai mamarau ka reki voli.”1
iTaba kei Oliva Kauderi, Tevita Witima, kei Matini Erisi mai vei Lewis A. Ramsey
A tiko talega o Lusi Meki Simici ni ra lesu mai na Lewe Walu na Vakadinadina mai na ka era a sotava:
“Ni ra sa lesu oti ki vale na vakadinadina oqo, a vakaraitaki koya tale na agilosi vei Josefa; ka gauna vata oya a dolea yani kina o Josefa na peleti ki na ligana. Keimami a soqoni vata ena yakavi o ya, ka ra wasea kece kina na vakadinadina na veika me vaka sa tukuni toka e cake; kei ira kece na neimami matavuvale, ka yaco sara vei Don Carlos [Simici], ka se qai yabaki 14 ga, a vakadinadinataka na dina ni itabagauna oqo—ni sa qai vakatikori vakataucoko tu.”2
iVakatakarakara kei Josefa Simici kei na Lewe Walu na Vakadinadina mai vei Gary Ernest Smith
Vakaraitaka Tiko na Agilosi o Moronai na Peleti Koula vei Josefa Simici, Oliva Kauderi, kei Tevita Witima, mai vei Gary B. Smith