8–14 ni Feperueri

Vunau kei na Veiyalayalati 12–13; Josefa Simici—Ai Tukutuku 1:66–75

“Vei Kemudrau Na Noqu iTokani Dauveiqaravi”

Erau a ciqoma o Josefa Simici kei Oliva Kaudari na ikuri ni kila-ka ni rau masulaka me baleta na dina rau a vulica ena ivolanikalou (raica na Josefa Simici—Ai Tukutuku1:68). O na vakamuria vakacava na nodrau ivakaraitaki?

Vola na Veika o Vakauqeti Kina

E vuqa na tamata e vuravura raraba se rairai sega ni rogoca e dua na vanua ka vakatokai o Harmony, Pennsylvania. Ia na Turaga e dau digitaka wasoma na vanua tabogo me baleta na veika matalia sara ena Nona matanitu. Ena dua na vanua veikau volekati Harmony ena ika 15 ni Me, 1829, e a rairai mai kina o Joni na Dauveipapitaiso vei Josefa Simici kei Oliva Kaudari me vaka e dua e sa tucaketale. A biuta na ligana e uludrau ka vakatikora na Matabete i Eroni vei rau, ni kacivi rau na “noqu itokani dauveiqaravi” (Vunau kei na Veiyalayalati 13:1).

Me rau vakadonui me dua na itokani dauveiqaravi kei Joni na Dauveipapitaiso, okoya ka papitaisotaka na iVakabula ka caramaka na sala ena Nona lako mai (raica na Maciu 3:1–6, 13–17), a rairai veivakayalomalumalumutaki, ka veiuabaleti sara beka ga vei rau e rua na cauravou yabaki ya ruasagavulu vakacaca. Ena gauna o ya, erau a se tawakilai sara o Josefa kei Oliva, me vakataki Harmony. Ia na veiqaravi ena cakacaka ni Kalou sa dau baleta tu ga na sala eda veiqaravi kina, e sega ni baleti ira era raica. Se vakacava sara na lailai se na kena sega ni laurai na nomu cau ena so na gauna, o iko talega sa dua na dauveiqaravi ena cakacaka cecere ni Turaga.

Vakasama eso ni Vuli iVolanikalou ni Tamata Yadua

Vunau kei na Veiyalayalati 12

E vinakata na Turaga me’u vukea na kena tauyavutaki na inaki kei Saioni.

Erau a sotavi Josefa Simici o Josefa Naiti levu kei na watina o Poli, ni a mai cakacaka okoya ena nodrau vanua ni teitei, ni sa yabaki 20. A vakamacalataki koya o Josefa Naiti me dua na daucakacaka vinaka duadua sa bau raica. A vakabauta okoya na ivakadinadina nei Josefa Simici me baleta na peleti koula ka a kauti Poli me laki sikovi Josefa Simici ena gauna a vakadewataka tiko kina na iVola i Momani e nona vale e Harmony, Pennsylvania. E a vakabauta o Poli ena gauna vata ga oya. Ena vo kece ni nodrau bula, erau a dina tu ga o Josefa kei Poli ki na kosipeli vakalesui mai. E sivia e 60 na lewe ni matavuvale na Naiti era a curu ki na Lotu ka vukea na kena tauyavutaki e New York, Ohio, Missouri, Nauvoo, ka qai muri sara e Salt Lake City.

A vinakata o Josefa Naiti me kila na sala e rawa ni veivuke kina ena cakacaka ni Turaga. Na isau ni taro (sa tu oqo ena Vunau kei na Veiyalayalati 12) e kovuti “ira kecega era gadreva me turi ka yavutaki na cakacaka oqo” (tikina e 7)—oka kina o iko. Na cava na kena ibalebale vei iko “me turi ka yavutaki na inaki kei Saioni”? (tikina e 6). Ena vukei iko vakacava mo cakava oqori na ivakavuvuli kei na ivakaraitaki mai na tikina e 7–9 ?

Raica talega “Na Matavuvale na Naiti kei na Witima,” iVakatakila ena Vakasama, 20–24.

Vunau kei na Veiyalayalati 13

A vakalesui mai na Matabete i Eroni mai vei Joni na Dauveipapitaiso.

A vakatakila o Joni na Dauveipapitaiso e vuqa na dina me baleta na Matabete i Eroni, ena dua ga na iyatuvosa. Raica mo vola na veika kece o sa vulica mai na wase oqo (oka kina mai na ulutaga ni wase). Ena rawa ni veivukei mo vulica eso na malanivosa o kunea. Oqo eso na vakasama mo rawa ni tekivu kina:

• “Na idola ni nodra veiqaravi na agilosi”: 2 Nifai 32:2–3; Moronai 7:29–32; Jeffrey R. Holland, “Nodra Veiqaravi na Agilosi,” Ensign se Liaona, Nove. 2008, 29–31; Na iDusidusi ki na iVolanikalou, “Agilosi,” scriptures.ChurchofJesusChrist.org

• “Na idola … ni kosipeli ni veivutuni”: 3 Nifai 27:16–22; Vunau kei na Veiyalayalati 84:26–27; Dale G. Renlund, “Na Matabete kei na Kaukauwa ni Veisorovaki ni iVakabula,” Ensign se Liaona, Nove. 2017, 64–67

• “Na luvei Livai”: Na Tiko Mai Na Lekutu 3:5–13; Vunau kei na Veiyalayalati 84:31–34; iDusidusi ki na iVolanikalou, “Matabete i Eroni,” “Livai,” scriptures.ChurchofJesusChrist.org

Na veivakalougatataki cava soti o sa rawata mai na cakacaka vakalotu ni Matabete i Eroni?

E Papitaisotaki Oliva Kaudari o Josefa Simici, mai vei Del Parson

Josefa Simici—Ai Tukutuku 1:66–75

Na cakacaka vakalotu e dolava vei au na sala ki na kaukauwa ni Kalou.

O Sisita Carole M. Stephens, daunivakasala e liu ena Mataveiliutaki Raraba ni iSoqosoqo ni Veivukei, a vakavuvulitaka: “Na cakacaka vakalotu kei na veiyalayalati ni matabete oqo era sa katuba tiko ki na veivakalougatataki sa yalataka tu vei keda na Kalou, ka ra sa vakayacori rawa ena vuku ni Veisorovaki ni iVakabula. Era sa vakaiyaragitaki kina na luvena tagane kei na yalewa na Kalou ena kaukauwa, oya na kaukauwa ni Kalou, ka vakarautaka vei keda na madigi meda ciqoma kina na bula tawamudu” (“Eda Kila Beka na Ka sa Tu Vei Keda?” Ensign se Liaona, Nove. 2013, 12).

Ni ko wilika na Josefa Simici—Ai Tukutuku 1:66–75, oka kina na idusidusi ena mua ni tikina e 71, vakasamataka na cava a vakauqeti Josefa kei Oliva me rau taroga me baleta na papitaiso, ka raica na veivakalougatataki a yaco vei rau ni oti na nodrau vakaitavi ena cakacaka vakalotu ni matabete. Vakasamataka mo wilika na lewe ni ivolaniveisiga ko a rairai vola beka ni oti nomu ciqoma na cakacaka vakalotu eso se vola na nomu vakanananu ni veika a yaco oqori. Na veivakalougatataki cava soti o sa rawata ena cakacaka vakalotu ni matabete?

Raica talega na Vunau kei na Veiyalayalati 84:20–22; Yalododonu, 1:65–68.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 12:8.Na cava era yaga kina na itovodei eso e tiko ena tikina oqo ni da cakava tiko na cakacaka ni Turaga?

Vunau kei na Veiyalayalati 13.Na cava ena rawa ni tara cake kina na vakabauta ni nomu matavuvale na vakalesui mai ni Matabete i Eroni? Na vidio “Restoration of the Aaronic Priesthood” (ChurchofJesusChrist.org) se na cakacaka ni liga ka salavata na ituvatuva oqo e rawa ni vukea na nomu matavuvale me raitayaloyalotaka na vakalesui mai ni Matabete i Eroni. Era na marautaka beka mera droinitaka e dua na iyaloyalo ni ka a yaco oya, ka yavutaki ena veika era sa wilika ena Josefa Simici—Ai Tukutuku 1:68–74? Era rawa talega ni ra wasea nodra ivakadinadina baleta na kaukauwa ni matabete ki na nodra bula.

Raica talega na “Priesthood Restoration Site” ena history.ChurchofJesusChrist.org.

Josefa Simici—Ai Tukutuku 1:68.E rawa vakacava ni da vakamuria na ivakaraitaki nei Josefa Simici kei Oliva Kaudari meda kunea kina na isau ni noda taro? E rairai ni o ni wilika vata, sa rawa mo ni cakava me dua na ivakarau tudei me ra cegu vakalailai ka taroga se dua e tiko nona taro me baleta na veika era wilika tiko.

Josefa Simici—Ai Tukutuku 1:71, idusidusi.Na cava e vakauqeti ira na lewe ni nomu matavuvale me baleta na vosa nei Oliva Kaudari? Na cava soti na “veisiga guiguilecavi dredre” ni nomu matavuvale?

Josefa Simici—Ai Tukutuku1:73–74.Na cava a vakayacora na Yalo Tabu vei Josefa kei Oliva? Na gauna cava a sa bau vukea kina nomu matavuvale na Yalo Tabu me kila vakavinaka na ivolanikalou ka reki kina vua na Turaga?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Matabete Sa Lesu Mai,” iVolanisere ni Gonelalai, 60.

Vakatorocaketaki Noda Veivakavulici

Vulica e dua nai ulutaga. Digitaka vakamatavuvale e dua nai ulutaga, o na vinakata mo vulica vakamatailalai cake. Me ivakaraitaki, ena macawa oqo sa rawa mo vakayagataka na Topical Guide se iDusidusi ki na iVolanikalou (scriptures.ChurchofJesusChrist.org) mo raica kina na ivolanikalou me baleta na Matabete i Eroni.

Vei Kemudrau Na Noqu iTokani Dauveiqaravi, mai vei Linda Curley Christensen