Na ivakatakarakara ni imatai ni ivolavolai ni iVola i Momani.

1–7 ni Feperueri

Vunau kei na Veiyalayalati 10–11

“Me Rawa Ni Nomu Na Qaqa”

Na volai ni vakasama eso ni wiliki tiko na ivolanikalou e vaka ga na tei sore ni kau; na vakasama lalai sara mada ga e rawa ni kauta mai na ivakatakila yadua e vakaibalebale.

Vola na Veika o Vakauqeti Kina

Ni toso tiko na vakadewataki ni iVola i Momani, a basika cake e dua na vakatataro: na cava me rau na cakava o Josefa Simici kei Oliva Kaudari me baleta na veidraunipepa ni ivakavakadewa a sa mai yali? Na ka dodonu beka me rau lesu tale ka vakadewataka tale na tikina o ya, ia na Turaga a rawa ni raica e dua na ka erau sega ni raica rawa—era a bukiveretaka tiko na tamata ca me ra moica na vosa ena veidraunipepa oqori me vakatitiqataki kina na cakacaka veivakauqeti nei Josefa Simici. E a tu e dua na ituvatuva ni Kalou me vakaseva na sasaga nei Setani ka sosomitaka na veika sa yali. Na ituvatuva oqo a tekivutaki ena udolu na yabaki sa oti ni a vakauqeti kina na parofita o Nifai me tauyavutaka e dua na ikarua ni itukutuku ka kovuta na gauna vata ga oya. E muri, a vakauqeti o Momani me okatavata na itukutuku oqo ki na iVola i Momani “me baleta e dua na inaki vuku” a kilai tu vua na Turaga (raica na Vosa i Momani 1:3–7).

A kaya na Turaga vei Josefa, “Ni noqu yalomatua e uasivia sara na ilawaki qaseqase ni tevoro” (Vunau kei na Veiyalayalati 10:43). Oqori e dua na itukutuku veivakadeitaki ena noda veisiga nikua, ni sa kaukauwa cake tikoga na sasaga ni vunica me vakamalumalumutaka na vakabauta. Me vakataki Josefa, eda sa rawa ni “yalodina ka tomana tikoga” na cakacaka sa kacivi keda kina na Kalou meda cakava (tikina e 3). Eda na qai raica ni sa vakarautaka oti tu oKoya e dua na sala me “sega ni rawati [keda] na matamata ki eli” (tikina 69).

Raica na Yalododonu, 1:51–61.

Vakasama eso ni Vuli iVolanikalou ni Tamata Yadua

Vunau kei na Veiyalayalati 10:1–33

E segata o Setani me vakarusa na cakacaka ni Kalou.

E gadreva cake o Setani me da guilecava ni bula tiko okoya—se me da kua mada ga ni kidava na nona sasaga me vakayarayarataki keda (raica na 2 Nifai 28:22–23). Ia na vosa ni Turaga ena Vunau kei na Veiyalayalati 10 e vakatakila ni o Setani e saqata tudei tikoga na cakacaka ni Kalou. Ni o wilika na tikina e 1–33, vakaraica na sala e saga kina o Setani me vakarusa na cakacaka ni Kalou ena gauna nei Josefa Simici (raica talega na tikina e 62–63). Na kena vakatautauvata cava so o raica ena veisala e cakacaka tiko kina nikua o Setani? Sa rawa mo kerea na Turaga me vukei iko mo raica rawa se temaki iko tiko vakacava o Setani. Na cava o vulica mai na wase 10 ka na rawa ni vukei iko mo vorata na sasaga nei Setani?

Vunau kei na Veiyalayalati 10:34–52

Na “yalomatua [ni Turaga] e uasivia sara na ilawaki qaseqase ni tevoro.”

Ni se vo tu e sivia ni 2,400 na yabaki, a sa vakarautaka tu na Turaga me sosomitaka na yali ni draunipepa ni iVola i Momani (raica na 1 Nifai 9). Na cava o vulica me baleta na Turaga mai na Vunau kei na Veiyalayalati 10:34–52? Na ivakadinadina cava ni yalomatua kei na kila taumada ni Turaga o sa raica ena nomu bula?

Na ivolatukutuku ka vakarautaka na Kalou me sosomitaka na ivolavolai ka a yali e sa kunei oqo mai na 1 ni Nifai ki na Omanai. E vakacava na kena “vakamatatataka vinaka na kosipeli” vei iko na italanoa kei na ivakavuvuli ena itukutuku oqo? (Vunau kei na Veiyalayalati 10:45).

O Momani ni Vakalekalekataka Tiko na Peleti mai vei Tom Lovell

Vunau kei na Veiyalayalati 11

Kevaka au kerea vua na Kalou, au na ciqoma.

E vica vei ira na lewe ni matavuvale kei na itokani nei Josefa Simici a kerei koya me vakasaqara na lewa ni Turaga me baleti ira. A marautaka o Josefa me cakava vakakina, ia na Turaga sa lomasoli tale tu ga me solia vei ira na ivakatakila yadua. Ena Vunau kei na Veiyalayalati 11, e dua na ivakatakila a ciqoma o Josefa me baleta na tuakana ko Airame, a kaya kina na Turaga, “Au na solia vei iko na Yaloqu, … ka oti ko sa na qai kila … na veika kecega ko na gadreva mai vei au” (Vunau kei na Veiyalayalati 11:13–14).

A kaya na Turaga ni Nona vosa sa baleti “ira kece era sa gadreva na ka vinaka, ka ra sa curumaka na nodra isele takelo me ra tatamusuki” (tikina e 27). Ena Vunau kei na Veiyalayalati 11, na cava e tukuna tiko vei iko na Turaga me baleta na ivakatakila yadua? me baleta na vakaitavi ena cakacaka ni Kalou? Na itukutuku cava so tale sa vakarautaka tu oKoya vei iko?

Vunau kei na Veiyalayalati 11:15–26

Ni’u segata me’u “vulica na vosa [ni Kalou],” au na ciqoma na Nona Yalotabu kei na kaukauwa.

A maqusa sara me vunautaka na kosipeli o Airame Simici, ni se bera mada ga ni se vakadewataki oti na iVola i Momani. Ni o wilika na vosa ni Turaga ni sauma nona gagadre, vakasamataka na kena ibalebale vei iko mo “vulica na vosa [ni Kalou]” (tikina e 21). E vukei iko vakacava mo veiqaravi ena Lotu na vulici ni vosa ni Kalou? E kauta mai vakacava na kaukauwa ni Kalou ki na nomu bula?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 10:5.Na cava e da vulica mai na tikina oqo me baleta na kaukauwa ni masu? Me da “dau masu tikoga” vakacava beka? (Me baleta eso na vakasama, raica na David A. Bednar, “Dau Masu Tikoga,” Ensign se Liaona, Nove. 2008, 41–44.)

Vunau kei na Veiyalayalati 10:38–46.Me vukea na nomu matavuvale me veivosakitaka na sala a sosomitaka kina na Turaga na draunipepa ni iVola i Momani a yali, e rawa ni veivosakitaka beka na lewe ni matavuvale e dua na ka era sa qai vakayalia walega. Na cava era a vakila ni ra sa raica ni sa yali na ka oya? Na cava era a vakila ni sa kune tale? E dina ga ni a sega ni qai kune rawa na draunipepa ni iVola i Momani a yali, a sosomitaka vakacava na Turaga na kena yali, me vaka ena Vunau kei na Veiyalayalati 10:38–46?

Vunau kei na Veiyalayalati 10:55–70.Sureti ira na lewe ni matavuvale me ra raica se makataka na malanivosa e tekivu ena “Koi au” se “Au na.” Na cava eda vulica mai na malanivosa “Koi au” me baleta o cei o Jisu Karisito kei na Nona ituvaki? Na cava eda vulica mai na malanivosa “Au na” me baleta na veika e dau vakayacora? Vakayaloqaqataki ira na lewe ni matavuvale me ra wasea na sala e vaqaqacotaka kina na nodra vakabauti Jisu Karisito na dina eso oqo.

Vunau kei na Veiyalayalati 11:12–14.Na wiliki ni veitikina oqo ena rawa ni vukei ira nomu matavuvale mera vakila ni sa veitaratara tiko vata kei ira na Yalo Tabu. O rawa ni cinava yani na fuloa ena dua na cina livaliva ka sureta e dua na lewe ni matavuvale me toso ki na vanua e cila tiko kina na rarama. E tautauvata beka vakacava oqo kei na kena vakamuri na veidusimaki ni Yalo Tabu? Na veika cava soti o sotava o rawa ni wasea?

Vunau kei na Veiyalayalati 11:15–30.Vakasamataka mo cakava e dua na ituvatuva ni veika a tukuna na Turaga vei Airame Simici me cakava me vakarautaki koya kina me wasea na kosipeli. Na cava me da cakacakataka vakamatavuvale?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Vaqara ka Masu,” iVolanisere ni Gonelalai, 66; raica na “Vakasama Eso me Vakatorocaketaka na Vuli iVolanikalou ni Nomu Matavuvale.”

Vakatorocaketaki ni Noda Veivakavulici

Bulataka na ivolanikalou ena nomu bula. Ni wiliki oti e dua na tikini ivolanikalou, kerei ira na lewe‑ni‑vuvale me ra wasea na sala e veiganiti kina ki na nodra bula na tikina oya. Me ivakaraitaki, era rawa ni wasea na sala e vakauqeti ira kina na Yalo Tabu me vaka e vakaraitaki tiko ena Vunau kei na Veiyalayalati 11:12–13.

Josefa kei Airame Simici, mai vei Ken Corbett