“25–31 ni Janueri. Vunau kei na Veiyalayalati 6–9: ‘Sai Koya Oqo na Yalo ni Vakatakila,’” Lako Mai, Mo Muri Au—Me Baleta na Tamata Yadua kei na Matavuvale: Vunau kei na Veiyalayalati 2021 (2020)

“25–31 ni Janueri. Vunau kei na Veiyalayalati 6–9,” Lako Mai, Mo Muri Au—Me Baleti Ira na Tamata Yadua kei na Matavuvale: 2021

25–31 ni Janueri

Vunau kei na Veiyalayalati 6-9

“Sai Koya Oqo na Yalo ni Vakatakila”

Sa dau vakatakila na dina vei keda na Turaga ena noda vakasama kei na yaloda (raica na Vunau kei na Veiyalayalati 8:2–3). Ni o wilika na Vunau kei na Veiyalayalati 6–9, vola na veivakauqeti o ciqoma.

Vola na Veika o Vakauqeti Kina

Ena vulaimatua ni 1828, e a taura e dua na cakacaka vakaqasenivuli e Manchester, New York e dua na qasenivuli cauravou ka yacana o Oliva Kaudari, ka a lai tiko vata kei na matavuvale nei Lusi kei Josefa Simici Levu. A sa rogoca okoya me baleta na luvedrau tagane o Josefa, ka sa lai vakaitikotiko e Harmony, Pennsylvania, ia a vinakata o Oliva me kila eso tale na ka, ni dau raici koya tu vakai koya me dua na dauvaqara na dina. E rau a vakamacalataka na Simici na veisiko eso ni agilosi, e dua na itukutuku makawa, kei na isolisoli ni vakavakadewa ena kaukauwa ni Kalou. A rawai na yalo i Oliva. Ena rawa beka me dina? E rau a solia vua o Lusi kei Josefa levu na ivakasala ka sa baleti ira kece era vakasaqara na dina: masu ka kerea vua na Turaga.

A vakayacora o Oliva, ka sauma mai na Turaga, ni vosataka na veivakacegui kei na veivakadeitaki ki na nona vakasama. A raica kina o Oliva, ni ivakatakila, e rawa ni ka vakayadudua—e dua na ka a qai vulica vakalevu sara okoya ena veivula ka tarava. Na ivakatakila e sega ni baleti ira ga na parofita; e sa baleta e dua ga e gadreva ka vakasaqara. A se sega ni kila na veika kece o Oliva, ia a kila vakarauta ga me taura kina na ikalawa e tarava. Na Turaga e a cakava tiko e dua na ka bibi kei Josefa Simici, ka a via tiki ni ka oqori o Oliva.

Me baleta na ikuri ni ivakamacala ni itukutuku makawa ena Vunau kei na Veiyalayalati 6–9, raica na Yalododonu, 1:58–64; “Na Siga ni Lomavata” (vidio, ChurchofJesusChrist.org).

Vakasama eso ni Vuli iVolanikalou ni Tamata Yadua

Vunau kei na Veiyalayalati 6; 8–9

Sa dau vosa vei au na Tamada Vakalomalagi mai “na Yalo ni ka dina.”

Ena vula itubutubu ni 1829 a gole yani ki Harmony o Oliva Kaudari ka bolea me daunivolavola nei Josefa Simici ni vakadewataka okoya na iVola i Momani. Sa qai raica voleka oqo o Oliva na ivakarau ni vakavakadewa ena ivakatakila. A marautaka okoya na veika sotavi oqori, ka a nanuma ke rawa talega ni vakalougatataki ena isolisoli ni vakavakadewa. A vakatara vei koya na Turaga me tovolea me vakavakadewa, ia a ka vou vei Oliva na ciqomi ni ivakatakila, ka mani sega ni lako vinaka na nona sasaga. A se vuqa na ka me vulica okoya, ka vakaraitaki ena Vunau kei na Veiyalayalati 6, 8, kei na 9 ni a lomasoli tu na Turaga me vakavulici koya.

Ni o wilika na iwase oqori, raica na veika a vakavuvulitaka na Turaga me baleta na ivakatakila yadua. E veisemati vakacava na Nona vosa ki na veika o sa sotava—se o vinakata?

Me ivakaraitaki, na cava e vakatura na Vunau kei na Veiyalayalati 6:5–7; 8:1; 9:7–8 me baleta na veika e gadreva vei iko na Turaga ni se bera ni na vakatakila mai oKoya na Lomana?

Na cava o vulica mai na Vunau kei na Veiyalayalati 6:14–17, 22–24; 8:2–3; 9:7–9 me baleta na sala duidui eso e lako mai kina na ivakatakila?

E dua tale na ka o sa vulica me baleta na ivakatakila mai na iwase eso oqo?

Me vulici kina eso tale na ka me baleta na ivakatakila, raica na Russell M. Nelson, “iVakatakila ki na Lotu, iVakatakila ki na Noda Bula,” Ensign se Liaona, Me 2018, 93–96; Julie B. Beck, “Vei Ira Talega na Vada Kau na Sovaraka na Yaloqu ena Gauna Ko Ya,” Ensign se Liaona, Me 2010, 10–12. Me baleta na ikuri ni itukutuku ni “isolisoli vaka-Eroni” e vakamacalataki tiko ena wase 8, raica na “iSolisoli nei Oliva Kaudari,” iVakatakila vaka Vakasama, 15–19.

Vunau kei na Veiyalayalati 6:18–21, 29–37

Vakararavi tiko vei Karisito ena vakasama kece.

E dina ga ni a sa sotava oti o Josefa na “veika dredre” ni cakava tiko na cakacaka ni Turaga (Vunau kei na Veiyalayalati 6:18), o koya kei Oliva a sega beka ni kila na kena dredre na veika e a qai yaco ena loma ni vica na yabaki ka tarava. Ia a sa kila tu na Turaga, ka kila talega oKoya na veika dredre ena nomu veisiga mai muri. Na Nona ivakasala vei Josefa kei Oliva ena Vunau kei na Veiyalayalati 6:18–21, 29–37 ena rawa talega ni vukei iko. Vakacava beka na ka rau a vakila o Josefa kei Oliva ni rau rogoca oti na vosa eso oqo? Na cava o raica ena veitikina oqo e vukei iko mo nuitaka na Turaga? O na rawa vakacava ni rai tiko vei Karisito vakalevu cake ena nomu bula?

Vunau kei na Veiyalayalati 6–7; 9:3, 7–14

“Me vaka ko sa gadreva mai vei au e sa na vaka dina kina.”

Raica na levu ni gauna e rairai mai kina na vosa na “gagadre” se na “gadreva” ena wase 6 kei na7. Na cava o vulica mai na wase oqo me baleta na kena bibi vua na Kalou na nomu gagadre? Tarogi iko ena nona taro na Turaga ena Vunau kei na Veiyalayalati 7:1: “A cava ko sa gadreva?”

E dua na gagadre dodonu nei Oliva Kaudari—me vakavakadewa me vakataki Josefa Simici—a sega ni vakayacori. Ni o wilika na Vunau kei na Veiyalayalati 9:3, 7–14, na veivauqeti cava so o ciqoma kina ka na rawa ni vukei iko ni sega ni vakayacori na nomu gagadre dodonu?

Raica talega na Vunau kei na Veiyalayalati 11:8; Dallin H. Oaks, “Gagadre,” Ensign se Liaona, Me 2011, 42–45.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 6:7, 13.E rawa vakacava mo vukea nomu matavuvale me kila vakavinaka ni sa kune ga na “iyau” dina ena bula tawamudu? (tikina e 7). Sa rawa mo sureta na lewe ni matavuvale me cakava na ilavo lasulasu ka vola se droinitaka kina eso na veivakalougatataki levu sa ciqoma na nomu matavuvale ena vuku ni kosipeli vakalesui mai.

Vunau kei na Veiyalayalati 6:15, 22–23; 8:2–3; 9:7–9.Na wiliki ni veitikina oqo me baleta na sala e vosa kina vei ira na luvena na Kalou ena rawa ni dua na madigi vinaka mo wasea ki na nomu matavuvale na sala sa vosa kina vei iko.

Vunau kei na Veiyalayalati 6:33–37.Era rawa ni wasea na lewe ni matavuvale na sala e rawa ni ra “caka vinaka,” kina kevaka sara mada ga era vakila na rere. E rawa ni veivuke talega mo sarava taucoko se vakatikina ga na itukutuku nei Elder Ronald A. Rasband ena “Dou Kakua ni Rarawa” (Ensign se Liaona, Nove. 2018, 18–21). Na cava na kena ibalebale me da “vakararavi vei [Karisito] ena vakasama kece”? (tikina e 36). Na cava eso tale na ivakaraitaki ni tamata era a vuki vua na Turaga me uabaleta na vakatitiqa kei na rere? (raica me kena ivakaraitaki, Esiteri 4; Alama 26:23–31).

Vunau kei na Veiyalayalati 8:10.Oqo e rawa me dua na madigi vinaka mo wasea na sala cava a vaqaqacotaki iko kina kei na nomu matavuvale na vakabauti Jisu Karisito. Na cava e bibi kina meda “kerea ena vakabauta”? Na veivakalougatataki cava soti o sa raica mai na nomu vakasaqara na kena isau se na veivuke ena vakabauta?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Mo Bolea Mo Dina Tu,” iVolanisere ni Gonelalai, 80.

Na Domo ni Veivakalesuimai

Vakadewataki ni iVola i Momani

Ena Epereli 1829, na vula a ciqomi kina na wase 6–9 ni Vunau kei na Veiyalayalati, a cakacaka levu nei Josefa Simici oya na vakadewataki ni iVola i Momani. Ni a tarogi emuri okoya baleta na sala a vakadewataki kina na itukutuku oqo, a kaya “ni a sega ni nakiti me tukuni ki vuravura na kena matailalai taucoko.”¹ E a dau kaya ga ni a vakadewataki “ena isolisoli, kei na kaukauwa ni Kalou.”²

Eda sega soti ni kila na matailalai ni walewale cakamana eso ni vavakadewa a caka, ia eda kila ni o Josefa Simici e a daurairai, ka vukei mai na iyaya eso a vakarautaka na Kalou: e rua na vatu makare ka vakatokai na Urimi kei na Cumimi kei na dua tale na vatu ka vakatokai me vatu daurairai.³

E tokona na ivakadinadina i Josefa, na itukutuku eso oqo, mai vei ira era a vakadinata ena matanavotu, na cakacaka ni vakavakadewa.

Na kato kau i Airame Simici ka taura toka na peleti koula — E vakabauti ni kato oqo, ka taukena ko Airame Simici, a vakayagataki me vunitaki toka kina vakawawa na peleti koula.

Ema Simici

“Ni a vakadewataka tiko na iVola i Momani na watiqu, au a vola e dua na tikina, ni cavuta mai okoya na iyatuvosa yadua, na vosa ki na vosa, ia ni yaco mai okoya ki na vosaniyaca eso ka sega ni cavuvosataka rawa, se eso na vosa balavu, a sipeli‑taka ga mai okoya, ni’u a vola tiko, kevaka au cakava e dua na cala ena kena sipeli‑taki, ena tarovi au mai okoya ka vakadodonutaka dina ga ni dredre vua me raici au mai ni’u volavola tiko ena gauna oya. Na vosa sara mada ga na Sera a sega ni cavuvosataka rawa eliu okoya, ia a sipeli‑taka ga mai, ka’u qai cavuvosataka yani vua.”⁴

“Era dau biu tu ga na peleti ena teveli ka sega ni bau tovolei me tabonaki, solegi toka ga ena dua na iubi ni teveli lineni lailai, kau a solia vua me dau solegi ira kina. Dua na gauna au a vakayamoca na peleti, ni ra a biu tu ena teveli, ka vakamuria ena ligaqu na kedra ituvaki kei na ibulibuli. Era vaka me ra malumu tu ga me vaka na pepa vavaku, ka rogo tatavasavasa ni vakacereki na batibatina ena idovidovi ni kakana, me vaka e dua e vakacereka na batibati ni dua na ivola. …

“E sa noqu vakabauta ni sa ka dina vakalou na iVola i Momani—e sega ni dua tale noqu vakatitiqa lailai. Au yalovakacegu ni sega ni dua na tamata e rawa ni cavuta tikoga mai gusuna na veika me volai vakavo kevaka e vakauqeti kina; ena gauna au nona liganivolavola tiko kina, ena dau cavuta tiko mai vei au o Josefa ena vica vata na auwa na ka me volai; ni oti mai na kana, se ni oti e dua na ka curukoso, ena tekivu sara ga mai na vanua e mai yaco toka kina, ka sega mada ga ni bau raica na veika sa volai tu se me wiliki yani vua. Oqo e dua na ka a matau vua me cakava. Ena sega beka ni dua na tamata vuli me na cakava rawa oqo; ia, vua e dua e lecaika tu ka tawavuli me vakataki koya, sa qai sega sega sara ga ni rawa.”⁵

E veivuke tiko o Ema Simici ena vakavakadewa — Na droini kei Ema vata kei Josefa Simici mai vei Michael T. Malm

Oliva Kaudari

“Au a vola ena noqu peni na iVola i Momani taucoko(vakavo ga e vica na drauna) me vaka e a lutu mai na tebe ni gusuna na parofita, ni vakadewataka okoya ena isolisoli kei na kaukauwa ni Kalou, ena sala ni Urimi kei na Cumimi, se, me vaka e vakatokai ena ivola, na dauvakadewavosa tabu. Au a raica e mataqu, ka taura ena ligaqu, na peleti koula ka a vakadewataki mai kina. Au a raica talega na dauvakadewavosa.”⁶

vakadewataka tiko na peleti koula o Josefa Simici kei Oliva Kaudari — Erau a vuli vakalevu o Josefa Simici kei Oliva Kaudari mai na kena vakadewataki na peleti koula.