Na Gauna ni Tatamusuki e Varanise, mai vei James Taylor Harwood

18–24 ni Janueri

Vunau kei na Veiyalayalati 3–5

“Na Noqu Cakacaka Ena Vakayacori Ga”

Vola na veika o sa vulica ka vakila ena nomu vulica na ivolanikalou. Oqo ena vukei iko mo nanuma na vakasama kece oqori ka wasea vata kei ira na tani.

Vola na Veika o Vakauqeti Kina

E a se sega ni kila na veika kece me baleta na “cakacaka veivakurabuitaki” a lesi me cakava o Josefa Simici ena imatai ni vica nona yabaki vaka parofita ni Turaga. Ia e dua na ka a vakavulici koya kina na veika a sotava me rawa ni vakadonui ki na cakacaka ni Kalou, oya na matana e dodonu vakaidina me “vakatabakidua ki na lagilagi ni Kalou” (Vunau kei na Veiyalayalati 4:1, 5). Me ivakaraitaki, ke a solia vua na Turaga na ivakasala ka saqata na nona gagadre, ena ganita me muria okoya na ivakasala ni Turaga. Ia kevaka sara mada ga e “levu na nona ivakatakila …, ka tiko vua na kaukauwa me vakayacora kina na cakacaka kaukauwa e vuqa,” ke sa yaco me bibi cake e matana na nona lewa mai na lewa ni Kalou, o koya e “na bale vakaidina” (Vunau kei na Veiyalayalati 3:4). Ia a vulica o Josefa e dua tale na ka e bibi talega ena cakacaka ni Kalou: “Na Kalou sa rui yalololoma,” ia kevaka sa veivutuni vakaidina o Josefa, okoya ena “digitaki tikoga” (tikina e 10). Na cakacaka ni Kalou, mai na veika kece, e dua na cakacaka ni veivueti. Ka na “sega ni rawa ni dua e tarova” na cakacaka oqori (tikina e 1).

Vakasama eso ni Vuli iVolanikalou ni Tamata Yadua

Vunau kei na Veiyalayalati 3:1–15

E dodonu me’u nuitaka na Kalou mai na rerevaka na tamata.

Ena itekivu ni veiqaravi nei Josefa Simici, a dredre sara na vakaitokani vinaka—vakabibi na itokani me vakai Martin Harris, e dua na tamata dokai, sautu, ka tu vinaka me vakarautaka na veitokoni yaga. Ka a lomasoli me tokoni Josefa o Martin, dina ga ni ra a sega ni rokovi koya kina na nona icaba ka gadrevi kina na solibula vakailavo.

Sa rawarawa gona kina me da raica na vuna a vinakata kina o Josefa me rokova na kerekere nei Martin me kauta na imatai ni iwase ni ivakadewa ni iVola i Momani me vakaraitaka vei watina, okoya ka a vakatitiqataka na dina ni iVola i Momani. A cikeva tikoga o Josefa vua na Turaga me baleta na kerekere oqo, ena gauna mada ga a vakatabuya kina oKoya, me yacova sara emuri, ni oti na ikatolu ni gauna ni taro i Josefa, sa qai vakadonuya na Turaga. Ka ni rarawa, ni a yali na ivola‑volai ni a tiko e ligai Martin, ka rau a vosataki vakaukauwa mai vua na Turaga o Josefa kei Martin (raica na Yalododonu, 1:51–53).

Ni o wilika na Vunau kei na Veiyalayalati 3:1–15, vakasamataka vagumatua na sala o dau vakayarayarataki beka kina mai na nodra nanuma na tani. O rawa ni raica talega ni ikuri ni vosataki i Josefa Simici, a cavuta na vosa ni loloma cecere na Turaga. Na cava o vulica mai na ivakarau a vakadodonutaki ka vakauqeti Josefa kina na Turaga? Na ivakasala cava o raica ena rawa ni vukei iko ni o temaki mo rerevaka vakalevu cake na tamata tale eso mai vua na Kalou?

Raica talega na “The Contributions of Martin Harris,” Revelations in Context, 1–9, history.ChurchofJesusChrist.org.

Vunau kei na Veiyalayalati 4

Na Turaga e kerei au me’u qaravi koya ena yaloqu taucoko.

Na wase 4 e dau vakayagataki wasoma vei ira na daukaulotu tudei. Ia, e taleitaki ni da kila ni a soli taumada na ivakatakila oqo vei Josefa Simici Levu., ka a sega ni kacivi ki na kaulotu ia a “gadreva [me] qarava na Kalou” (tikina e 3).

E dua na sala me wiliki kina na iwase oqo oya me raitayaloyalotaki me vaka e dua na ivakamacala ni cakacaka vua e dua e gadreva me cakava na cakacaka ni Turaga. Na cava so na ka e gadrevi kina? Na cava era gadrevi kina na kila maqosa se na itovo eso oqori? O na rawa beka ni digitaka ena masumasu e dua na ka o rawa ni cakava me vinaka cake nomu “rawa [mo] qarava na cakacaka” (tikina e 5).

Vunau kei na Veiyalayalati 5

Au rawa ni rawata noqu ivakadinadina vakataki au ni iVola i Momani.

Martin Harris, mai vei Lewis A. Ramsey

Kevaka o kacivi mo vakadinadinataka ena mataveilewai me baleta na dina ni iVola i Momani, na lewe‑ni‑ivakadinadina cava o na vakarautaka? E dua na taro va oqori a tiko e na vakasama nei Martin Harris ni a biuta cake na watina, o Lucy, e dua na ile ni o Josefa Simici a vakaisinitaki ira tiko na tamata ena nona vakalasulasuya tiko me vakadewataka na peleti koula (raica na Yalododonu, 1:56–58). A mani tarogi Josefa o Martin me baleta eso tale na ivakadinadina ni sa ka dina na peleti koula. Vunau kei na Veiyalayalati 5 e dua na ivakatakila me isau ni kerekere nei Martin.

Na cava o vulica mai na Vunau kei na Veiyalayalati 5 me baleta na veika oqo:

• Vakacava na nanuma ni Turaga me baleti ira era sega ni vakabauta na dina vakayalo eso vakavo ga ke tiko na ivakadinadina (raica na tikina e 5–8; raica talega na Joni 20:24–29).

• Na nodra itavi na ivakadinadina bula ena cakacaka ni Turaga (raica na tikina e 11–15; raica talega na 2 Korinica 13:1).

• Na sala mo rawata kina e dua na ivakadinadina ni iVola i Momani vakataki iko (raica na tikina e 16; raica talega na Moronai 10:3–5).

Vunau kei na Veiyalayalati 5:1–10

Era na ciqoma na vosa ni Kalou na itabatamata oqo mai vei Josefa Simici.

Na cava e vakavulica vei iko na Vunau kei na Veiyalayalati 5:1–10 me baleta na itavi bibi nei Josefa Simici ena noda itabagauna—kei na nomu bula? Vakasamataka vakatitobu na sala o sa ciqoma kina na vosa ni Kalou mai vua na parofita o Josefa Simici. Vola ena dua na ivolaniveisiga se wasea vua e dua na nomu vakavinavinaka me baleta na dina ka a vakalesui mai se vakamatatataki mai vua.

Raica talega na 2 Nifai 3:6–24.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 3:1–4.Kerea e dua na lewe ni matavuvale me lako ena dua na laini “takelo” ka qai lako ena laini “dodonu”. Na cava na kena ibalebale ki na noda matavuvale me kila ni “sa dodonu sara na nona sala [na Kalou]”?

Vunau kei na Veiyalayalati 3:7–10.Ni dua e usuraki keda meda beca na Kalou, na dina cava so ena veitikina oqo ena rawa ni vukei keda meda yalodina tikoga? Ena rawa beka ni vakatasuasuataka na lewe ni matavuvale e dua na ituvaki me baleta e dua a yalodina tu ga dina ni usuraki me talaidredre vua na Kalou.

Vunau kei na Veiyalayalati 4.Ni veivosakitaka na nomu matavuvale na kena ibalebale me ra cakacaka ena were ni Kalou, era rawa ni cakava eso na cakacaka ena dua na iteitei (se me vakatasuasua ga). Na iyaya ni cakacaka cava so e gadrevi me baleta na cakacaka ni teitei? Na cava e vakamacalataka na Kalou ena wase e 4 ka rawa ni vakatokai me iyaya ni cakacaka e gadrevi me caka kina na Nona cakacaka? Na nomu matavuvale e rawa ni veivosakitaka na cava e bibi kina na iyaya yadua ena kena vakayacori na cakacaka ni Kalou.

Vunau kei na Veiyalayalati 5:7.Na cava eso na ivakaraitaki ni dina eda vakabauta ia eda sega ni raica rawa? Eda na vukea vakacava e dua na itokani e gadreva na ivakadinadina ni sa dina na iVola i Momani?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Meu Dina Tu,” iVolanisere ni Gonelalai, 85.

Vakatorocaketaki ni Vuli ni Tamata Yadudua

Cavuqaqataka e dua na ivolanikalou. “Me cavuqaqataki e dua na ivolanikalou sa ikoya me da bukia e dua na veitokani vou. E vaka na noda raica vou e dua e rawa ni veivuke ena gauna ni leqa, me dau veivakauqeti ka veivakacegui, ka me ivurevure ni veivakayaloqaqataki me baleta na veisau e gadrevi” (Richard G. Scott, “Na Mana ni iVolanikalou,” Ensign se Liaona, Nove. 2011, 6).

Na Bibi Veivakarusai ni 116 na Draunipepa, mai vei Kwani Povi Winder