Veikau Tabu, mai vei Greg K. Olsen

4–10 ni Janueri

Josefa Simici—Ai Tukutuku 1:1–26

“Au sa Raica kina e dua na Duru Bukawaqa”

Ena nomu wilika na Josefa Simici—Ai Tukutuku 1:1–26, na itukutuku cava so o raica me baleta nomu bula? Na cava e ka vakamareqeti vakalevu duadua vei iko kei na nomu vuvale?

Vola na Veika o Vakauqeti Kina

E sa dua nai vola ni isau ni masu na Vunau kei na Veiyalayalati: a yaco e vuqa na ivakatakila tabu ena ivola oqo ena saumi tu ni taro eso. Sa ganiti kina me na tekivutaki na vulici ni Vunau kei na Veiyalayalati ena kena raici na taro a tekivutaka na sovaraki mai ni ivakatakila ena gauna edaidai—na kena a taroga o Josefa Simici ena dua na loma ni veikau ena 1820. E a lomaleqa tu o Josefa ena “ivalu vosa kei na sosa ni vakasama eso” (Josefa Simici—Ai Tukutuku 1:10) me baleta na lotu kei na ituvaki ni yalona; de na rawa mo semata oya. Sa vuqa tu na vakasama veisaqasaqa kei na vosa veirawai ena gauna oqo, gauna eda via vacakulea kina na veitukutuku oqo ka kunea na ka dina, sa rawa ni da cakava na ka a kitaka o Josefa. Eda rawa ni vakataroga, vulica na ivolanikalou, tugana, ka qai kerea vua na Kalou. Me isau ni masu i Josefa, a lako sobu mai lomalagi e dua na duru bukawaqa; a rairai mai na Kalou na Tamada kei Jisu Karisito ka sauma na nona taro. Na ivakadinadina i Josefa me baleta na veika mana oya sa cauraka vakadoudou, ke dua “sa [lailai] vua na vuku me na kerea vua na Kalou, io ena soli vua” (Josefa Simici—Ai Tukutuku 1:26). Eda sa rawa kece ni ciqoma, ke sega ni raivotu vakalomalagi, ia e dua mada ga na raivotu matata sara, e serauni tu ena rarama vakalomalagi.

Vakasama eso ni Vuli iVolanikalou ni Tamata Yadua

Josefa Simici—Ai Tukutuku 1:1–26

O Josefa Simici esa Parofita ni Veivakalesuimai.

Na inaki ni tukutuku i Josefa Simici oya me da “kila kina na dina” baleta ni sa dau vakatanitaki wasoma na dina me baleti Josefa (Josefa Simici—Ai Tukutuku 1:1). Ni o wilika na Josefa Simici—Ai Tukutuku 1:1–26, na cava e vaqaqacotaka na nomu ivakadinadina me baleta na nona ilesilesi vakalou? Raica na ivakadinadina o sa kunea ni a vakarautaki Josefa Simici na Turaga me baleta na nona ilesilesi vakaparofita. Ni o wiliwili, o na via vola talega na nomu vakasama kei na nanuma me baleti Josefa Simici kei na nona ivakadinadina.

Raica talega na Yalododonu, 1:3–19.

Josefa Simici—Ai Tukutuku 1:5–20

Kevaka au kerekere ena vakabauta, ena sauma mai na Kalou.

Sa bau “lailai ena vuku” se veilecayaki tu ena dua na vakatulewa e gadrevi mo cakava? (Josefa Simici—Ai Tukutuku 1:13). Na cava o vulica mai na veika e sotava o Josefa Simici ena tikina e 5–20? Vakasamataka na nomu gagadre vaka vuku kei na kilaka levu cake, ka navuca na sala o na vaqara kina na dina.

Raica talega na 1 Nifai 10:17–19; 15:6–11; Russell M. Nelson, “Na iVakatakila ki na Lotu, Na iVakatakila ki na Noda Bula,” Ensign se Liaona, Me 2018, 93–96.

Eda rawa ni taroga vua na Kalou na noda taro ena masumasu.

Josefa Simici—Ai Tukutuku1:15–20

Cava na vuna era duidui kina na itukutuku ni Matai ni Raivotu?

Ena gauna ni nona bula, a vola vaka va o Josefa Simici na veika a sotava ena Veikau Tabu, ka dau vakayagataka wasoma e dua na vunivola. Me kena ikuri, e vica na itukutuku taurivakitale e a volai mai vei ira na tamata ka a rogoci Josefa ni tukuna na nona raivotu. E dina ga ni ra duidui na itukutuku oqo ena so na tikina, vakatauci tu vei ira na rogoca kei na ituvaki, ia era veisotari tiko. Ka ra kuria na itukutuku yadua na kena matailalai eso e vukei keda meda kila vinaka na veika a sotava o Josefa Simici, me vaka na kena vukei keda na Kosipeli e vakamatatataka na nona ilesilesi na iVakabula.

Me wiliki na itukutuku tale eso i Josefa, raica na “iTukutuku ni iMatai ni Raivotu” (Gospel Topics, topics.ChurchofJesusChrist.org). Na cava o vulica rawa mai na wiliki taucoko ni veitukutuku oqo?

Josefa Simici—Ai Tukutuku 1:15–20

A tekivutaka na Matai ni Raivotu na Vakalesui mai ni kosipeli i Jisu Karisito.

A nuitaka o Josefa Simici ni na sauma na nona masu na Kalou, ia a sega tu ni kila ni na veisautaka kina na nona bula na isaunitaro oya—kei na vuravura. Ni o wilika na veika a sotava o Josefa, vakasamataka vakatitobu na sala esa veisautaka kina na nomu bula na Matai ni Raivotu. Me ivakaraitaki, o na via vakacavara na iyatuvosa oqo ena sala duidui eso: “Baleta ni a yaco na Matai ni Raivotu, au kila ni …” O sa vakalougatataki vakacava ena vuku ni Matai ni Raivotu?

Raica talega na “Ask of God: Joseph Smith’s First Vision,” vidio, ChurchofJesusChrist.org; Yalododonu, 1:14–19; Russell M. Nelson, “Rogoci Koya,” Ensign se Liaona, Me 2020, 88–92.

Josefa Simici—Ai Tukutuku 1:21–26

Au rawa ni dina tikoga ki na ka au sa kila, ke ra vakuwai au mada ga na tani.

E dua na veivakalougatataki ni ivolanikalou o ya ni tiko kina na nodra ivakaraitaki veivakauqeti na turaga kei na marama qaqa ka a sotava na bolebole eso ena vakabauti Jisu Karisito. Ni sotava tu o Josefa Simici na veisaqasaqa ena vuku ni nona raivotu, a vakatautauvatataki koya kei na iApositolo o Paula, ka a vakacacani talega ena vuku ni nona kaya ni a raica e dua na raivotu. Ni o wilika na itukutuku i Josefa, na cava e vakauqeti iko mo dinata tikoga kina na nomu ivakadinadina? Na ivakaraitaki cava tale eso—mai na ivolanikalou se na tamata o kila—e sa vakayaloqaqataki iko mo dinata tikoga kina na veika vakayalo o sa sotava?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Josefa Simici—Ai Tukutuku 1:6.Eda rawa ni walia vakacava na duidui eso ka sega ni veileti tu me vakataki ira na tamata e vakamacalataki ena tikina oqo?

Josefa Simici—Ai Tukutuku 1:11–13.Na wiliki ni tikina eso oqo e rawa ni vakauqeti ira na lewe ni matavuvale me ra wasea na veika era sotava ni tara na yalodra e dua na tiki ni ivolanikalou ka vakauqeti ira mera cakava.

Josefa Simici—Ai Tukutuku 1:16–20.Ni wilika na nomu matavuvale na veitikina oqo, navuca ni vakaraitaka na droini e salavata kei na ituvatuva oqo se dua tale na iyaloyalo ni Matai ni Raivotu (ena taleitaka beka nomu matavuvale na nodra dui droini ga). Sa rawa talega mo sarava na vidio “Ask of God: Joseph Smith’s First Vision” (ChurchofJesusChrist.org). Sa rawa ni dou vola yadua na lisi ni dina eso eda sa vulica mai na raivotu oqo, qai wasea na lisi vakai kemuni. Sa na dua na gauna vinaka oqo mera wasea kina na lewe ni matavuvale na sala era a rawata kina na nodra ivakadinadina ni Matai ni Raivotu i Josefa Simici.

Josefa Simici—Ai Tukutuku 1:17.Ni a rairai mai na Kalou vei Josefa Simici, a kacivi Josefa ena yacana. Na gauna cava era a bau vakila kina na lewe ni nomu matavuvale ni sa kilai ira vakayadua na Tamada Vakalomalagi?

Josefa Simici—Ai Tukutuku 1:21–26.Eda na sauma vakacava ni ra vakataroga na tamata na noda ivakadinadina?

Me ikuri ni tukutuku ni nodra vakavulici na gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Matai Ni Masu Nei Josefa Simici,” Sere ni Lotu, naba 14.

Domo ni Vakalesuimai

Matavuvale nei Josefa Simici

Eda sa tarai yadua vakalevu sara ena noda bula vakamatavuvale, ka sega ni duidui kina o Josefa Simici. E a tea na sorenikau ni vakabauta dina vakalotu kei na ivakarau na nona itubutubu me rawa kina na Veivakalesuimai. E vakacaucautaka vakaoqo o Josefa ena nona ivolaniveisiga: “Era [sa] tawaveiganiti na vosa meu vakamacalataka noqu vakavinavinaka kivua na Kalou ena kena soli vei au e rua na itubutubu dokai sara.”¹

Na malanivosa era tarava oqo mai vei tinana, o Lusi Meki Simici; tacina o Viliame Simici; kei na Parofita vakataki koya esa vakatakila vei keda na veivakayarayarataki vakalotu ena nodratou vuvale na Simici.

Matavuvale i Josefa Simici, mai vei Dan Baxter

Lusi Meki Simici

“[Rauta na 1802], Au a tauvimate tu. … Au a kaya lo, au se bera ni tuvakarau meu mate ni’u se sega ni kila tu na sala i Karisito, ka sa vaka e dua na qakilo butobuto ka galili a tu ena keirau itadrua kei na Karisito ka’u sa sega ni doudou meu takosova. …

“Au a rai yani vua na Turaga ka vakatakekere ka vakamamasu vua na Turaga me vakabulai au me rawa niu susugi ira cake na luvequ ka vakaceguya na yalo i watiqu; au a davo tu vakaoqori ena bogi taucoko. … Au veiyalayalati vua na Kalou [ni] kevaka ena vakatara me’u bula au na sasaga meu rawata na matalotu oya koya e vukea noqu qaravi koya vakadodonu, se mai na iVola Tabu se vanua cava ga e kune rawa kina, ke mai lomalagi sara ena masumasu kei na vakabauta. E muri a qai vosa vei au e dua na domo ka kaya, ‘Dou vakasaqara ka dou na kunea, dou tukituki ka na dolavi vei kemudou. Me vakacegu na yalomu. Ko ni sa vakabauta na Kalou; vakabauti au talega.’ …

“Tekivu mai na gauna qori ka lako yani au sa kaukauwa cake tikoga. Au a vosa ka vakalailai sara ena veika vakalotu e dina ga ni a vakatawana kece tu na noqu vakanananu, kau nanuma niu na gumatua sara ena gauna ga au rawa ni qara kina eso na tamata daulotu ka kila tu na sala ni Kalou me vakasalataki au ena veika vaka Lomalagi.”²

Viliame Simici

“Na tinaqu, e dua na marama daulotu ka dau maleleta na nodra tiko vinaka na luvena, eke kei na kena se bera mai, a vakayagataka vinaka na madigi eso a vakatura rawa na nona loloma vakatina, me vakaogai keitou ena qarai ni neitou vakabulai vakayalo, se (me vaka na kena ivosavosa ena gauna oya) ‘ena rawati ni lotu.’ A dau raica o koya me keitou tiko ena veisoqoni, ka sa yaco me malele sara kina na matavuvale taucoko, ka dauqara na dina.”³

“Keitou dau vakayaco masu vakamatavuvale mai na gauna au nanuma rawa. Au nanuma vinaka ni dau tawana toka o tamaqu na nona matailoilo ena taga ni nona kote e loma, … kei na gauna keitou raica kina na tagane ni ucuna mai na nona matailoilo, keitou kila sara ni sa sikinala oya me keitou vakarau ena masumasu, ia ke keitou sega ni siqema rawa ena kaya o tinaqu, ‘Viliame,’ se ocei ga e vakawelewele tiko, ‘vakarau ena masumasu.’ Ni oti na masu sa tiko e dua na sere me keimami lagata.”⁴

A vakatavulica na nodrau matavuvale o Josefa Levu kei Lusi Simici me ra vulica na ivolanikalou.

Josefa Simici

“Au sa kaya oqo, ni a sega ni cakava [o tamaqu] e dua na ivalavala vakatani e rawa ni tukuni ni tawadodonu, ena nona bula, ki na ka au kila. Au sa lomani tamaqu kei na nona vakananumi; kei na vakananumi ni nona ivalavala dokai, sa toka matua sara ki na noqu vakasama; ka vuqa na nona vosa ni loloma vakaitubutubu vei au, esa volai tu ena peleti ni lomaqu. Sa ka dokai vei au, na vakanananu eso au vakamareqeta tu ena itukutuku ni nona bula, ka sa lako curuma na lomaqu ka teivaki tu kina, ena noqu vakadidike mai na gauna au a sucu kina. … Sa dua talega na marama veidokai, ka uasivi duadua sara vei ira kece o tinaqu.”⁵

iDusidusi

1. Journal, December 1841–December 1842, 180, josephsmithpapers.org.

2. Lucy Mack Smith, History, 1844–1845, ivola 2, tabana e 2–4, josephsmithpapers.org; vakavoui na sipeli kei na pagitueti.

3. William Smith on Mormonism: A True Account of the Origin of the Book of Mormon (1883), 6.

4. In J. W. Peterson, “Another Testimony: Statement of William Smith, concerning Joseph, the Prophet,” Deseret Evening News, Jan. 20, 1894, 11.

5. Journal, December 1841–December 1842, 180, josephsmithpapers.org.

Na iMatai ni Raivotu ni Veivakalesuimai, mai vei Michael Bedard