Veikau Tabu, mai vei Greg K. Olsen

4–10 ni Janueri

Josefa Simici—Ai Tukutuku 1:1–26

“Au sa Raica Kina E Dua na Duru Bukawaqa”

Ni o vulica na ivolanikalou, vakasamataki ira na gone o vakavulica. Na Yalo Tabu e rawa ni vakauqeti iko, mai na veivakauqeti o ciqoma, mo kila na ka mo vakanamata kina ena kalasi.

Vola na Veika o Vakauqeti Kina

Sureta na Veiwasei

Sureta e vica na gone me ra wasea na ka era kila tu me baleti Josefa Simici kei na nona masu ena Veikau Tabu (e rawa ni veivuke me vakaraitaki e dua na iyaloyalo ni Matai ni Raivotu). Tarogi ira se cava na nodra nanuma ni ra rogoca ni a rairai vei Josefa Simici na Tamada Vakalomalagi kei Jisu Karisito. Kevaka me sikova mai na noda kalasi o Josefa Simici, na cava eda na taroga vua me baleta na ka a sotava?

Vakavulica na iVunau: Gone Sobu

Josefa Simici—Ai Tukutuku 1:3–20

A sa vakarautaki tu o Josefa Simici me dua na parofita ni Kalou.

Na vulici ni nona bula vakagone o Josefa Simici sa rawa ni vakavolekataki ira na gone ki vua ka ra vakarau me vulica na veika a sotava. De rairai e rawa ni o vukei ira me raica na veika a sotava o Josefa ni se gone e sa vakarautaki koya me dua na parofita ni Kalou.

iTaviqaravi e Rawa ni Caka

• Kerea e dua na gone me taura cake e dua na iyaloyalo kei Josefa Simici (raica na Gospel Art Book, naba 87) ni o wasea eso na ka dina me baleti Josefa ena Josefa Simici—Ai Tukutuku 1:3–14 (raica talega na “Wase 1: Josefa Simici kei na Nona Matavuvale,” Na iTukutuku ena Vunau kei na Veiyalayalati, 6–8, se na kena vidio ena ChurchofJesusChrist.org). Vukea mera vakatauvatana na itukutuku ni nona matavuvale kei na nona bula ki na nodra vakai ira. Wasea na nomu ivakadinadina ni a digitaki Josefa na Kalou ka vakarautaki me dua na parofita (raica na “Voices of the Restoration: Joseph Smith’s Family,” ena Lako Mai, Mo Muri Au—Me Baleta na Tamata Yadua kei na Matavuvale). Kevaka e ganita, vakavulica vei ira na gone ni parofita e dua ka vosa ena vukuna na Kalou.

• Sureta e dua na cauravou ena tabanalevu me sikova na nomu kalasi, me o Josefa Simici. Vakarautaka e vica na taro vei ira na gone me ra taroga vua ka sa saumi tu ena Josefa Simici—Ai Tukutuku 1:3–20 (o na rairai vinakata mo wasea taumada na veitaro oqo vei ira na cauravou). Qai sureta na cauravou me wilika eso na vosa saraga nei Josefa Simici me baleta na Matai ni Raivotu (me ivakaraitaki, Josefa Simici—Ai Tukutuku 1:25).

Josefa Simici—Ai Tukutuku 1:10–17

Sa dau rogoca ka sauma na Tamada Vakalomalagi na noqu masu.

Na ka a sotava o Josefa Simici sa rawa ni vakauqeta na gone mera masu ena vakabauta ka na rogoci ira na Kalou.

iTaviqaravi e Rawa ni Caka

• Tukuna vei ira na gone na taro eso a tiko vei Josefa Simici (raica na Josefa Simici—Ai Tukutuku 1:10). Na cava eda rawa ni cakava ni tiko vei keda eso na taro me baleta na Kalou? Vakaraitaka vei ira na gone e dua na ilavelave ni iVola Tabu, ka vakamacalataka ni gauna a wilika kina o Josefa na iVola Tabu, a vulica o koya ni sa rawa vua me “kerea vua na Kalou” (Jemesa 1:5; raica talega na Gospel Art Book, naba 89). Wasea na nomu ivakadinadina ni sa rawa ni da taroga na Kalou ena masu.

• Talanoataka e dua na gauna o a veilecayaki tu kina, kerea na veivuke ni Kalou, ka ciqoma na kena isau. Vukea na gone me ra vakasamataka na gauna eso a saumi kina na nodra masu. O rawa talega ni wasea e dua na italanoa mai na mekesini ni Lotu me baleta na kena saumi na masu ni dua na gone.

Josefa Simici—Ai Tukutuku 1:17–19

A raica o Josefa Simici na Tamada Vakalomalagi kei na Luvena, o Jisu Karisito.

O rawa ni vukea na gone me ra yavutaka e dua na ivakadinadina kaukauwa me baleta na Matai ni Raivotu i Josefa Simici. Wasea vei ira na sala o a rawata kina na nomu ivakadinadina me baleta na bibi ni ka oqo.

iTaviqaravi e Rawa ni Caka

• Vakaraitaka na iyaloyalo ni Matai ni Raivotu ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale, ka wasea ena nomu vosa ga na ka a yaco ni a masu o Josefa. Sureti ira na gone me ra droinitaka na nodra iyaloyalo ni talanoa o ya.

• Sureti ira na gone me ra rokataka na tabana ni taviqaravi ena macawa oqo ka vakayagataka me ra tukuna na italanoa ni Matai ni Raivotu (raica talega na “Wase 2: Na iMatai ni Raivotu i Josefa Simici,” Na iTukutuku ena Vunau kei na Veiyalayalati, 9–12, se na kena vidio ena ChurchofJesusChrist.org).

• Wilika na Josefa Simici—Ai Tukutuku 1:17, ka dusimaka vei ira na gone na vosa a kaya na Tamada Vakalomalagi vei Josefa Simici.

Vakavulica na iVunau: Gone Qase Cake

Josefa Simici—Ai Tukutuku 1:10–13

Sa rawa ni sauma na Kalou na noqu taro mai na ivolanikalou.

A vakauqeti o Josefa Simici ena dua na malanivosa a wilika mai na iVolatabu, a veimuataki oqo ki na Matai ni Raivotu kei na Vakalesuimai ni Lotu i Karisito. Vukea na gone me ra raica na sala e rawa ni vukei ira kina na vulici ni ivolanikalou me ra kunea na isau ni nodra vakatataro vakayalo.

iTaviqaravi e Rawa ni Caka

• Vakaraitaka vei ira na gone na ivola duidui eso (vaka na enisaikolopidia se ivola ni vakasaqa), ka vukei ira me ra vakasamataka na taro eso ena rawa ni sauma na veivola oqo. Qai vakaraitaka vei ira e dua na ilavelave ni ivolanikalou. Na taro cava soti e rawa ni sauma na veiivola oqo? O rawa ni vakarautaka e dua na ivakaraitaki ni dua na taro ka saumi ena ivolanikalou. Wilika vata na Josefa Simici—Ai Tukutuku 1:10–11 me laurai na taro cava soti a tiko vei Josefa Simici kei na isau cava e kunea o koya ena ivolanikalou.

• Vukea na gone me ra raica na vosa eso ena tikina e 12 e vakamacalataka na kena rawai Josefa Simici na wiliki ni Jemesa 1:5 . Wasea e dua na ka o sa sotava ena ivolanikalou—me ivakaraitaki, ena nomu raica na isau ni dua na nomu vakatataro mai na wiliki ni ivolanikalou. Lagata vata na “Search, Ponder, and Pray” (Children’s Songbook, 109).

Josefa Simici—Ai Tukutuku 1:10–19

Sa dau rogoca ka sauma na Tamada Vakalomalagi na noqu masu.

E kilai Josefa Simici tu na Kalou, ni gauna e masu kina, sa rogoci koya na Kalou. Ena duidui beka na veika era sotava mai vei Josefa na gone o vakavulica, sa rawa ni o veivuke me ra vakila ni sa kilai ira ka rogoci ira na Kalou ni ra masu.

iTaviqaravi e Rawa ni Caka

• Sureta na itubutubu ni dua vei ira na gone me duri tu e tautuba ni rumu ni vuli ka saumi taro mai vei ira na gone ena vakayagataki ni vakarau eso vaka na vakau itukutuku ena televoni, qiri, volavola, se vakau vosa veirogoci. Na cava eso na sala e dau veivosaki vata kina kei keda na Tamada Vakalomalagi? (raica na “iVakatakila,” iDusidusi ki na iVolanikalou, scriptures.ChurchofJesusChrist.org). Mai na Josefa Simici—Ai Tukutuku 1:16–19, a sauma vakacava na Tamada Vakalomalagi na masu i Josefa Simici? E sa sauma beka vakacava na noda masu o Koya?

• Lagata vata “A Child’s Prayer” (Children’s Songbook, 12–13).

  

  E dau rogoca ka sauma na Kalou na noda masu.

Josefa Simici—Ai Tukutuku 1:14–19, 25

A rairai vei Josefa Simici na Tamada Vakalomalagi kei Jisu Karisito.

Sa gadreva tu na gone vakayadua o vakavulica e dua na ivakadinadina me baleta na ka a sotava o Josefa Simici ena Veikau Tabu. O rawa vakacava ni vukei ira me rawata se vakaqaqacotaka na nodra ivakadinadina?

iTaviqaravi e Rawa ni Caka

• Me railesuvi na itukutuku ni Matai ni Raivotu, vola na ivakaleka ni tikina yadua mai na Josefa Simici—Ai Tukutuku 1:14–19 ena tiki ni pepa duidui eso. Biuta na pepa ena dua na itawatawa, ka sureti ira na gone mera digitaki ira yadudua ka biuti ira ena papa ena kena ituvatuva donu.

• Sureti ira na gone mera bobo ka raitayaloyalotaka se na vaevei tu beka mera a Josefa ni o wilika na tikina digitaki eso ena Josefa Simici—Ai Tukutuku 1:14–17. Kerea me ra wasea na nodra vakasama kei na nanuma me baleta na ka a sotava o Josefa.

• Vakaraitaka na vidio “Ask of God: Joseph Smith’s First Vision” (ChurchofJesusChrist.org), ka kerea na gone mera wasea e dua na ka era sa vulica me baleta na raivotu i Josefa Simici mai vua na Tamada Vakalomalagi kei Jisu Karisito.

• Wilika vata na ivakadinadina i Josefa Simici ena Josefa Simici—Ai Tukutuku 1:25. Kerea na gone me ra vakaraica na vosa kei na malanivosa eso e vakaraitaka na vakabauta i Josefa. E rawa vakacava ni da yalodina tikoga vua na Kalou kei na noda ivakadinadina ni ra sega ni duavata kei keda na tamata tale eso?

Vakauqeta na Vuli e Vale

Sureti ira na gone me ra wasea ki na dua tale na italanoa ni Matai ni Raivotu i Josefa Simici—ke rawa, vua e dua e se bera ni rogoca eliu. Sa rawa ni ra vakayagataka na tabana ni taviqaravi ena macawa oqo me vukei ira me talanoataka.

Vakatorocaketaki Noda Veivakavulici

Vakauqeta na vakarokoroko Me vakananuma na gone me ra dau vakarokoroko, o na lagata beka se vagugutaka e dua na sere, vakaraitaka na iyaloyalo kei Jisu, se vakayagataka e dua na ivukivuki ni liga era kila na gone.