E Kacivi Au o Koya ena Yacaqu, mai vei Michael Malm

11–17 ni Janueri

Vunau kei na Veiyalayalati 2; Josefa Simici—Ai Tukutuku 1:27–65

“Ena Gole na Lomadra na Gone Vei Ira na Nodra Qase”

Tekivutaka na nomu vakavakarau ena wiliki ni Vunau kei na Veiyalayalati 2 kei na Josefa Simici—Ai Tukutuku 1:27–65. Na vakasama eso ena idusidusi oqo e rawa ni vukea mo vakavulica na dina ena veiwase ni vola oqo.

Vola na Veika o Vakauqeti Kina

Sureta na Veiwasei

E rawa mo tekivuna na kalasi ena nodra kerei na gone me ra wasea na ka era kila tu me baleta na rairai ni agilosi o Moronai kivei Josefa Simici.

Vakavulica na iVunau: Gone Sobu

Josefa Simici—Ai Tukutuku 1:27–54

A kacivi Josefa Simici na Tamada Vakalomalagi me Vukei Koya me Kitaka na Nona Cakacaka.

E rawa ni titobu sara na nodra vakacaucautaka na Parofita o Josefa Simici na gone ni ra vulica na cakacaka a kacivi koya kina na Kalou.

iTaviqaravi e Rawa ni Caka

• Vakaraitaka e dua na iyaloyalo ni rairai nei Moronai vei Josefa Simici (raica na Gospel Art Book, naba 91). Kerea na gone me ra dusimaka na veika era siqema ena iyaloyalo. Vakalekalekataka na itukutuku ni rairai nei Moronai vei Josefa. Me vaka e gadrevi, raica na Josefa Simici—Ai Tukutuku 1:27–54 kei na “Wase 3: Na Agilosi o Moronai kei na Peleti Koula” (Na iTukutuku ena Vunau kei na Veiyalayalati, 13–17). Sureti ira na gone me ra raitayaloyalotaka ni o ira o Josefa Simici ena ituvaki duidui eso ni talanoa ni ra roqoliga me vaka era masu tiko, me vaka ni ra cabeta tiko na Ulunivanua o Kumora, kei na so tale.

• Wilika i cake na Josefa Simici—Ai Tukutuku 1:33. , ka kerea na gone mera tucake ni ra rogoca na malanivosa “Sa digitaki au na Kalou meu qarava e dua na cakacaka.” Na cava e vinakata na Kalou me kitaka o Josefa? Na cava e kerea o Koya me da kitaka? Me ra qai droinitaka na gone na iyaloyalo ni veika e vinakata na Kalou me ra kitaka, vaka na masu, veiqaravi, se wili ivolanikalou.

Vunau kei na Veiyalayalati 2

A solia o Ilaija na kaukauwa vei Josefa Simici me vauca vata na matavuvale.

E rawa ni vukea na gone mera vakacaucautaka na veivakalougatataki ni matavuvale tawamudu na vulici ni kaukauwa ni veivauci.

iTaviqaravi e Rawa ni Caka

• Vukea na gone me ra kaya vakavica na yaca “Ilaija”. Kerea mera vakarogoca na yaca oqo ni o wilika na Vunau kei na Veiyalayalati 2:1. Vakamacalataka ni sai koya oqo na vosa nei Moronai vei Josefa Simici, ka ra vakavulica ni na vakalesuya mai o Ilaija na dodonu ni lewa ni matabete. A qai rairai e muri o Ilaija vei Josefa ena Valetabu e Kirtland ka solia vua na Parofita na kaukauwa me vauca vata na matavuvale.

• Kerea na gone me ra tukuna vei iko e dua na ka era taleitaka me baleta nodra matavuvale. Vakaraitaka na iyaloyalo ni dua na matavuvale toka tikiva na valetabu—nomu matavuvale, ke rawa (se raica na Gospel Art Book, naba 120). Vakadinadinataka ni sa vinakata na Tamada Vakalomalagi me ra tiko tawamudu vata na matavuvale, ka sa dua na vuna oqo e solia kina vei keda o Koya na valetabu.

• Lagata vata na “Matavuvale me Tawamudu Tu,”iVolanisere ni Gonelalai,98). Na cava e tukuna na sere oqo eda rawa ni cakava me da tiko tawayalani vata kei na noda matavuvale?

Vunau kei na Veiyalayalati 2

Sa rawa ni vakamarautaki au na vulici ni veika me baleti ira na tubuqu.

E rawa ni yaco mada ga vei ira na gone lalai mera kauwaitaka ka vakila na reki ni tuva kawa.

iTaviqaravi e Rawa ni Caka

• Sureta na itubutubu ni dua na gone me lako mai ki na kalasi ka wasea na italanoa ni dua na tubuna (ka vakaraitaka e dua na iyaloyalo ke tiko). Tukuna na reki o vakila ni o vulica na veika baleta nomu tuva kawa.

• Solia ki na gone yadua e dua na uto pepa. Vukei ira me ra vola kina na yacadra kei na “Au yalataka meu dau nanumi ira na tubuqu”. Wilika na Vunau kei na Veiyalayalati 2:2, ka vakamacalataka ni a lako mai o Ilaija me vagolea na yaloda vei ira na tubuda.

Vakavulica na iVunau: Gone Qase Cake

Josefa Simici—Ai Tukutuku 1:28–29

Au rawa ni masu meu vosoti.

So na gauna ena rairai vakilai ni ra “beitaki ena [nodra] malumalumu ka itovo tawakilikili” na gone o vakavulica (Josefa Simici—Ai Tukutuku 1:29) me vakataki Josefa Simici. Vukea mera vulica ni sa rawa mera gole kivua na Tamada Vakalomalagi ena veivosoti.

iTaviqaravi e Rawa ni Caka

• Wilika vata kei ira na gone na Josefa Simici—Ai Tukutuku 1:29 A vakacava tu na vakanananu i Josefa Simici me baleta na nona caka cala? Na cava a cakava kina? Na cava eda rawa ni vulica mai na ivakaraitaki i Josefa Simici e rawa ni vukei keda ni da caka cala? Taroga na gone se vakacava na nodra nanuma me ra kila ni a kacivi Josefa na Kalou dina ga ni a sega tu ni vinaka sara.

• Cava na vuna e bibi kina me vakasamataki na noda “tu ena mata ni [Kalou]”? (Josefa Simici—Ai Tukutuku 1:29). Tukuna vei ira na gone na ka o cakava ni o vakilakila tu na vanua o tu kina kei na Kalou.

Josefa Simici—Ai Tukutuku 1:30–54

A kacivi Josefa Simici na Kalou me kitaka e dua na cakacaka bibi.

E rawa ni vukei ira na gone na vulici ni tukutuku i Moronai vei Josefa Simici me vaqaqacotaka na nodra ivakadinadina ena ilesilesi tabu i Josefa Simici.

iTaviqaravi e Rawa ni Caka

• Sureti ira na gone me ra matanataka se droinitaka na iyaloyalo ni veika a yaco ena Josefa Simici—Ai Tukutuku 1:30–54, vakataka na rairai i Moronai vei Josefa (tikina e 30–47), vosa tiko o Josefa vei tamana (tikina 48–50), kei na nona kunea o Josefa na peleti (tikina 51–54). Na cava eda vulica mai na itukutuku oqo me baleta na cakacaka a kacivi kina o Josefa me cakava?

• Wilika vata kei ira na gone na Josefa Simici—Ai Tukutuku 1:33–35, ka kerea me ra vakarorogo ki na ka a vinakata o Moronai me kila o Josefa me baleta na cakacaka a tataunaki vua (Josefa). Eda sa vakalougatataki vakacava baleta ni sa vakataucokotaka o Josefa Simici na nona cakacaka vaka daunivakadewa vosa ni iVola i Momani? Sureti ira na gone me ra dau wilika wasoma na iVola i Momani.

Vunau kei na Veiyalayalati 2

Sa vinakata tu na Tamada Vakalomalagi me ra vauci na matavuvale ena valetabu.

A tukuna vei Josefa Simici o Moronai ni na lako mai o Ilaija me “vakatakila … na Matabete”(tikina 1). Oqo e vakaibalebaletaki tu ki na kaukauwa ni veivauci ni matabete e vakatara na matavuvale mera cokoti vata tawamudu ka vakavuna me da ciqoma na cakacaka vakalotu eso baleti ira na tubuda ena valetabu.

iTaviqaravi e Rawa ni Caka

• Kerei ira na gone me ra wilika na parofisai ena Vunau kei na Veiyalayalati 2:1. Kerea mera vakaraica se o cei ena tala mai na Turaga ena iotioti ni gauna kei na ka ena vakatakila na tamata oqo. Vakaraitaka e dua na iyaloyalo kei Ilaija ena Valetabu e Kirtland (raica na Gospel Art Book, naba 95), ka veivosakitaka na sala a vakataucokotaki kina na parofisai oqo ni oti e 13 na yabaki na rairai i Moronai (raica na Vunau kei na Veiyalayalati 110:13–15).

• Vakamacalataka ni a vakalesuya mai o Ilaija na idola ni matabete e vakatara na matavuvale me ra vauci vata tawamudu. Vakaraitaka eso na iyaya e rawa ni vukea na gone mera kila vakavinaka na ibalebale ni kena vauci e dua na ka, vaka e dua na tini kakana se dua na taga palasitika ni mamaroroi qamuti. E vukei keda vakacava na veiyaya oqo me da kila vakamatata na ibalebale ni kena vauci e dua na matavuvale?

• Vakaraitaka e dua na iyaloyalo ni valetabu, ka vukea na gone me ra tukuna eso na ka eda cakava ena valetabu. Vakamacalataka na veipapitaisotaki ena vukudra na mate, vakamau tawamudu, kei na vauci ni matavuvale ena valetabu sa vakavotukana taucoko ena vuku ni dola ni matabete sa vakalesuya mai o Ilaija.

• Sureta e dua na goneyalewa se cauravou ena tabanalevu me wasea na nona a raica e dua na yaca ni tubuna ka sa papitaisotaki ena vuku ni tubuna oya ena valetabu.

  

  Era sa vauci na matavuvale ena valetabu ena kaukauwa a vakalesuya mai vei Ilaija.

Vakauqeta na Vuli e Vale

Vakayaloqaqataki ira na gone me kerea na nodra itubutubu me tukuna vei ira e dua na italanoa ni dua na tubudra se vukei ira ni vakarautaka e dua na kakana taleitaki ni tubudra ka kania vata kei koya.

Vakatorocaketaki Noda Veivakavulici

Vukei ira na gone sobu me ra vuli mai na ivolanikalou. Mo vukei ira na gone sobu mera vuli mai na ivolanikalou, vakanamata ki na dua ga na tikina se dua mada ga na malanivosa bibi. O na rairai sureti ira na gone me ra tucake se laveta na ligadra ni ra rogoca na vosa se malanivosa oya. (Raica na Veivakavulici ena iVakarau ni iVakabula,21.)