28 ni Tiseba–3 ni Janueri

Vunau kei na Veiyalayalati 1

“Dou Vakatudaliga, Oi Kemudou na Tamata”

Sa dodonu me vulici ena masumasu na Vunau kei na Veiyalayalati 1, me matai ni kalawa ena nomu vakavakarau ni veivakatavulici. Ni ko vakayacora, mo vakarorogo ki na veivakauqeti ni nodra gagadre na gone, ka vakaraica na ivakavuvuli eso ena vakaibalebale vei ira. Na veivakauqeti oqo ena vukea nomu tuva na itaviqaravi yaga eso me vakavulici kina na veivakavuvuli oqo.

Vola na Veika o Vakauqeti Kina

Sureta na Veiwasei

Taura cake na Vunau kei na Veiyalayalati, ka kerei ira na gone me ra wasea na veika era kila tu me baleta na ivola oqo. O cei a vola? Na cava e umani tu kina? Cava na vuna e bibi kina?” Me veivuke, sa rawa ni o raica na “Wase 23: Vunau kei na Veiyalayalati” (Na iTukutuku ena Vunau kei na Veiyalayalati, 90–92). Wasea na nomu taleitaka na Vunau kei na Veiyalayalati kei na nomu maqusa mo vuli mai kina ena yabaki oqo.

Vakavulica na iVunau: Gone Sobu

Vunau kei na Veiyalayalati 1:4.

Mai vei ira na Nona parofita, sa vakaroti keda na Turaga ena veika rerevaki vakayalo.

A cauraka na Turaga ni Domona e sa dua na “domo ni veivakasalataki.” O na vakauqeti ira vakacava na gone me ra rogoca ka talairawarawa ki na ivakaro e solia o Koya?

iTaviqaravi e Rawa ni Caka

• Me ra qai taura tu na gone na iyaloyalo ni ivakatakilakila ni ivakaro—vaka na osooso ni gaunisala, draki ca, se paisoni—ka veivosakitaka na sala era vakasalataki keda kina ena veika rerevaki. Se tukuna e dua na italanoa o a muria kina e dua na ivakasala. Veidutaitaka na ivakasala ni qaqarauni oqo ki na ivakasala e solia vei keda na Turaga mai vei ira na Nona parofita. Vakadinadinataka ni sa vakasalataki keda o Koya baleta ni lomani keda ka vinakata tu me da taqomaki (raica talega na tabana ni itaviqaravi ena macawa oqo).

• Wiliwili vei ira na gone mai na Vunau kei na Veiyalayalati 1:4: “Ia na domo ni veivakasalataki sa baleti ira kecega na tamata.” Wasea e dua na ka a qai vakatavulica wale tikoga oqo na parofita ena rawa ni taqomaki keda. Vakaraitaka na iyaloyalo veisemati eso, ke rawa. Veivosakitaka na sala o sa muria tiko kina na ivakasala ni parofita.

Vunau kei na Veiyalayalati 1:17, 29

O Josefa Simici na parofita ni Kalou.

Ni tekivu na nomuni vulica vata kei ira na gone na Vunau kei na Veiyalayalati, vukei ira ena nodra tara cake na nodra ivakadinadina me baleta na veikacivi tabu i Josefa Simici.

iTaviqaravi e Rawa ni Caka

• Vakaraitaka na iyaloyalo ni Parofita o Josefa Simici (raica na Lako Mai, Mo Muri Au—Me Baleta na Tamata Yadua kei na Matavuvale; raica talega na Gospel Art Book, naba 87). Kerea na gone me ra duri tikiva tu na iyaloyalo ka wasea na ka era kila me baleti Josefa Simci.

• Me ra qai taura na gone e dua a iyaloyalo ni iVakabula kei na dua na iyaloyalo kei Josefa Simici. Tukuna vei ira na ka a solia na iVakabula vei keda mai vei Josefa Simici, me vaka na ivakaro (raica na tikina e 17) kei na iVola i Momani (raica na tikina e 29). Tukuna vei ira na gone ena Vunau kei na Veiyalayalati era na vulica kina na ivakaro a solia na Turaga ki na Lotu mai vei Josefa Simici.

• Wasea na nomu nanuma me baleti Josefa Simici, ka vakadinadinataka ni Kalou “sa kacivi Josefa Simici Lailai na noqu tamata ka vosa vua mai lomalagi” (tikina e 17).

Vunau kei na Veiyalayalati 1:38

Na nodra vosa na parofita na vosa ni Kalou.

Era sa na rairai rogoca na gone o vakavulica ni vosa na Peresitedi ni Lotu, ia era na sega ni kila tu ni sa lako mai vua na Kalou na nona vosa. Vukea me ra vulica ni vakila na vosa ni parofita sa vaka na vosa ni Kalou.

iTaviqaravi e Rawa ni Caka

• Vakayacora e dua na qito rawarawa ena soli ni ivakasala vua e dua na gone ka kerei koya me tokaruataka na ivakasala me baleti ira na vo ni gone. Vukea mera raica ni kena muri na ivakasala ni gone e sa tautauvata ga na kena muri na nomu ivakasala kei na muri ni parofita e sa tautauvata ga na muri ni Turaga. Wilika vei ira na iotioti ni yatu ni Vunau kei na Veiyalayalati 1:38: “Se mai na domoqu ga se mai na domodra na noqu tamata, e sa tautauvata ga.”

• Lagata vata e dua na sere baleti ira na parofita, vaka na iotioti ni qaqa ni “Follow the Prophet” (Children’s Songbook, 110–11). Wasea na nomu ivakadinadina ni sa tukuna na parofita na vosa ni Kalou.

• Wasea e dua na iyaloyalo, katokatoni, se vidio ni parofita bula tiko oqo. Wasea nomu ivakadinadina ni sa tukuna vei keda na parofita na ka e vinakata na Kalou meda kila. Sureti ira na gone me ra wasea na nodra nanuma baleta na parofita.

  

  E vakavulica vei keda na parofita na ka e vinakata na Kalou meda kila.

Vakavulica na iVunau: Gone Qase Cake

Vunau kei na Veiyalayalati 1:15–17, 29–30

A kila tu na Turaga na bolebole eda na sotava, sa vakalesuya mai kina o Koya na kosipeli mai vei Joseph Smith.

Sa rawa mo vukea na gone me ra vakavakarau ki na bolebole ni veisiga ni mataka ena nodra vakavulici ena sala e vakarautaka kina na veitaqomaki vakayalo na Vakalesuimai ni kosipeli.

iTaviqaravi e Rawa ni Caka

• Vukea na gone mera vakasamataka eso na leqa ena vuravura nikua. Railesuva vata kei ira na Vunau kei na Veiyalayalati 1:15–16 , ka vukea mera raica eso na leqa e sa parofisaitaka tu na Turaga ni na yaco. Sureta me ra dikeva ena tikina e 17 kei na 29–30 na ka e sa cakava na Turaga me vukei keda kina ni sotava na bolebole eso ni bula oqo.

• Kerei ira na gone mera raitayaloyalotaka ni ra sa vakavakarau tiko ki na dua na ilakolako. Na cava era na vakatawana? Ena veivuke vakacava kevaka era sa kila rawa ni na tau na uca ena nodra ilakolako se na kalamu na taya ni nodra motoka? Wilika vata na tikina e 17., ka veivosakitaka na ka e sa kila tu na Turaga ni na yaco vei keda kei na sala sa vakarau tu kina o Koya. (Ke ganita, vakamacalataka na ka “rerevaki” o ya e dua na leqa vakasauri se ka vakadomobula.) E dau vukei keda vakacava ena noda sotava na bolebole ni bula oqo na ivakaro ni Kalou?

Vunau kei na Veiyalayalati 1:30

E sa “lotu dina ka bula tiko” ni Turaga Na Lotu i Jisu Karisito ni Yalododonu Edaidai.

O rawa vakacava ni vukei ira na gone me ra marautaka na veivakalougatataki levu ni mai lewena tu “na lotu dina ka bula duadua ga”?

iTaviqaravi e Rawa ni Caka

• Sureti ira na gone me ra vola eso na ka e bula tiko kei na so na ka e sega (ke rawa, kauta mai na iyaloyalo se ivakaraitaki eso). Na cava na duidui ni dua na ka bula kei na dua na ka tawabula? Wilika vata na tikina e 30. Na cava e kena ibalebale ni sa “dina” na Lotu? ni sa “bula tiko”?

• Vakaraitaka e dua na iyaloyalo, vaka e dua na droini ni iVakabula, ka kerea na gone me ra vakamacalataka ni boko tu na cina ena rumu. Vakayagataka na itaviqaravi oqo me vukea na nodra rai na gone ni se “tawamacala” ka “butobuto” tu na Lotu dina ni iVakabula vei ira e vuqa na tamata. E rawa vakacava ni da vukei ira na tani me ra vulica na veika me baleta na Lotu?

Vunau kei na Veiyalayalati 1:37–38

Sa tawa yalani na vosa ni Turaga.

O rawa ni vukei ira na gone ena tarai cake ni nodra vakabauti Jisu Karisito ni vakavulici vei ira ni sa dei ka nuitaki na Nona vosa.

iTaviqaravi e Rawa ni Caka

• Vukea na gone me ra vakatauvatana na veika e vakagauna ga, vaka na ka vure se waicevata malumu lalai, ki na veika e vaka me tudei, vaka e dua na ulunivanua se na matanisiga. Kerea me ra raica ena tikina e 37–38 e dua na ka a kaya na Turaga ni tudei. Cava na vuna e veivakalougatataki kina na kena kilai ni “na sega ni takali” na vosa ni Kalou?

• Vukea na gone mera kila vakavinaka ni “domodra na noqu tamata” e oka kina na domodra na noda iapositolo kei na parofita. Vukea na gone mera raica na “parofisai kei na yalayala eso,” ena dua na vosa ni koniferedi raraba walega oqo mai vua e dua na italai ni Turaga. Wasea na nomu ivakadinadina ni sa vakauqeti na veivosa oqo mai vua na Turaga ka “na yaco kece vakaidina.”

Vakauqeta na Vuli e Vale

Railesuva vata kei ira na gone na ka era sa vulica nikua, ka sureti ira mera digitaka e dua na ka era nanuma ni sa dodonu me kila na tamata kecega. Vakayaloqaqataki ira mera wasea vua e dua na itokani se lewe ni matavuvale.

Vakatorocaketaki Noda Veivakavulici

Era vuli na gone ena vuqa na sala. “Era sega ni tautauvata kece na gone, ka sa totolo sara na vakatorocaketaki ni gone yadua. Nomu sasaga mo vakavulici ira na gone ena mana vakalevu sara ni o vakayagataka e vica na iwalewale ni veivakavulici,” oka kina na italanoa, iyaloyalo, kei na sere kei na ivakatagi (Veituberi ena iVakarau ni iVakabula,25).