25–31 ni Janueri

Vunau kei na Veiyalayalati 6–9

“Sai Koya Oqo na Yalo ni Vakatakila”

Tekivu vakavakarau ki na veivakatavulici ena wiliki ni Vunau kei na Veiyalayalati 6–9. Lako Mai, Mo Muri Au—Me Baleta na Tamata Yadua kei na Matavuvale kei na ituvatuva oqo ena rawa ni vakavurea eso na vakasama ena sala me ra vakavulici kina na gone ena nomu kalasi.

Vola na Veika o Vakauqeti Kina

Sureta na Veiwasei

Era kila tu beka na gone na italanoa kei Oliva Kaudari ena nona ciqoma e dua na isau ni masu? (raica na Yalododonu, 1:58–60). De rairai tiko talega e dua na ka era vakila me baleta na masu e rawa ni ra wasea.

Vakavulica na iVunau: Gone Sobu

Vunau kei na Veiyalayalati 6:5; 8:2; 9:7–9

Sa rawa ni vosa vei keda na Tamada Vakalomalagi mai na Yalo Tabu.

Vukei ira na gone mera kila vakavinaka ni tiko e dua na Tamadra dauloloma mai Lomalagi ka sa dau rogoca na nodra masu ka sauma mai ena Nona Yalotabu.

iTaviqaravi e Rawa ni Caka

• Vakayagataka na “Wase 5: Josefa Simici kei Oliva Kaudari” (Na iTalanoa ena Vunau kei na Veiyalayalati, 22–25, se na kena vidio ena ChurchofJesusChrist.org) mo vakamacalataki Oliva Kaudari vei ira na gone kei na ka a vulica ena sala e dau vosa kina vei keda na Tamada Vakalomalagi. Kerei ira na gone me ra tukuna vei iko na nodra tikina taleitaki ena italanoa, ka me ra qai veivukevuke ena talanoataki kei Oliva Kaudari vei iko.

• Tukuna vei ira na gone ni a saga o Oliva Kaudari me vakadewataka na iVola i Momani ia a sega ni rawa, ka mani taroga na Turaga o Josefa se cava na vuna. Wilika vei ira na gone na kena isau mai vua na Turaga: “Sa dodonu mo vakasamataka vakavinaka ena nomu vakasama; oti e dodonu mo qai taroga vei au kevaka e sa dodonu” (Vunau kei na Veiyalayalati 9:8). Sureti ira me ra vakamatanataka ni ra vuli ka masu tiko. Vukei ira na gone mera kila vakavinaka ni sai koya oqo na sala eda rawa ni ciqoma kina na isau ni taro mai vua na Turaga—ena vuli kei na kerei ni Nona veivuke.

  

  Oliva Kaudari, mai vei Lewis A. Ramsey

• Sureti ira na gone me ra tara na uludra kei na seredra ni o wilika na vosa “vakasama” kei na “vu ni yalomu” ena Vunau kei na Veiyalayalati 8:2. Vukei ira me ra kila vakamatata ni dau vosa vei keda na Tamada Vakalomalagi mai na Yalo Tabu, ka qai vakadewataka mai vei keda ena vakasama kei na veika e vakilai mai na vu ni yalo. Lagata vata e dua na sere baleta na Yalo Tabu, vaka na “Jisu Karisito” (iVolanisere ni Gonelalai, 56). Na cava e vakavulica na sere me baleta na sala e vosa kina vei keda na Yalo Tabu? Wasea e dua na ka o sotava o a vakila kina na Yalo Tabu ena nomu vakasama kei na vu ni yalomu.

Vunau kei na Veiyalayalati 6:33–36

Ena veivuke ni iVakabula, e sega ni dodonu meu rere.

A vuqa tu na ka e vakavuna me rau rere kina o Josefa Simici kei Oliva Kaudari—na veivakacacani kei na bula dravudravua a so ga na bolebole e rau a sotava. Na itukutuku ni Turaga vei Josefa kei Oliva sa rawa talega ni vakayaloqaqataki ira na gone ni ra yalorere.

iTaviqaravi e Rawa ni Caka

• Kerei ira na gone mera tokaruataka vakavica na malanivosa “kakua ni rere, na qele ni sipi lalai” (Vunau kei na Veiyalayalati 6:34) me vakavuqa. Vakamacalataka ni qele ni, sai koya e dua na ilawalawa manumanu, me vaka na sipi. Vakaraitaka e dua na iyaloyalo ni iVakabula ni vakatawana tiko na Nona sipi (raica na Gospel Art Book, naba 64), ka vakadinadinataka ni sa wanonovi keda tu o Koya me vaka sa wanonovi ira na Nona sipi na kedra ivakatawa. Baleta ni lomani keda o Koya, e sega ni dodonu meda rere.

• Me ra qai vakatakarakara taka na gone ni ra dua na qele ni sipi ka rere toka. Na cava era na rairai rerevaka tu na sipi ena so na gauna? Me qai vakatakarakara taka e dua na gone ni sa ivakatawa ka taqomaki ira tiko na sipi. Na cava eda dau rerevaka tu ena so na gauna? Wasea na nomu ivakadinadina ni o Jisu Karisito e sa vaka na noda ivakatawa ka sa rawa ni vakamaravutaka o Koya na noda rere. Lagata vata e dua na sere me baleta na iVakabula, me vaka na “Little Lambs So White and Fair” (Children’s Songbook, 58).

• Wilika na Vunau kei na Veiyalayalati 6:36 vei ira na gone, ka sureta mera tokaruataka na malanivosa “kakua ni vakatitiqa, kakua ni rere.” Vukei ira na gone me ra vakasamataka na sala eso era rawa ni “vakararavi tiko,” se nanuma, na iVakabula ena loma ni macawa (raica talega na tabana ni itaviqaravi ena macawa oqo).

Vakavulica na iVunau: Gone Qase Cake

Vunau kei na Veiyalayalati 6:5, 15–16, 22–23; 8:2; 9:7–9

Na Yalo Tabu sa vosa ki na noqu vakasama kei na vu ni yaloqu.

Era sa na rairai ciqoma beka na isolisoli ni Yalo Tabu na gone o vakavulica. Era sa kila vakamatata li na sala mera vakila kina na nodra ivakatakila mai na Yalotabu?

iTaviqaravi e Rawa ni Caka

• Droinitaka ena papa ni volavola e dua na ulu kei na uto. Vukei ira na gone me ra wilika na veitikina oqo ka vakadeitaka o koya cava e vakamacalataka ni vosa tiko na Yalo Tabu ki na noda vakasama, ki na vu ni yaloda, se vei rau ruarua: Vunau kei na Veiyalayalati 6:15, 23; 8:2; 9:8; 9:9. Tukuna vei ira na gone, mai na veika o sa sotava, na kena vakilai ni vosa ki na nomu vakasama kei na vu ni yalomu na Yalo Tabu.

• Wilika vata na Vunau kei na Veiyalayalati 6:5, ka sureti ira na gone me ra wasea na veika era sa sotava ena vuku ni masumasu kei na ciqomi ni kena isau. Vukei ira me ra vakasamataka na ivakaraitaki ni dua na tamata ena ivolanikalou ka a masu ka qai ciqoma e dua na isau ni taro (raica na 1 Nifai 2:16; Inosi 1:1–6; Ica 2:18–3:6).

• Vola ena papa ni volavola E dau vosa vakacava vei keda na Yalo Tabu? Sureti ira na gone me ra vaqara ena Vunau kei na Veiyalayalati 6:15–16, 22–23; 8:2; 9:7–9 na isau ni taro. Wasea na veika o sotava o a vakila kina ni vosa tiko vei iko na Yalo Tabu.

Vunau kei na Veiyalayalati 6:33–37

“Kua ni rere ni kitaka na ka vinaka”

Era na rairai yalorere ena so na gauna na gone o vakavulica me ra tutaka na dina. Vunau kei na Veiyalayalati 6:33–37 e rawa ni vakauqeti ira me ra yaloqaqa, ena veituvaki dredre sara mada ga.

iTaviqaravi e Rawa ni Caka

• Wilika vata na Vunau kei na Veiyalayalati 6:33, ka veivosakitaka na vuna ena rairai rere kina e dua me caka vinaka (raica talega na tikina e 28–29). Vukei ira na gone me ra vakaraica na vosa se malanivosa eso ena tikina e 33–37 ka na vukea me solia vei ira na yaloqaqa me ra caka vinaka.

• Vukei ira na gone me ra droinitaka na veika era rawa ni ivakaraitaki ena nodra vei vale me ivakananumi vei ira me ra “vakararavi tiko vei [Jisu Karisito] ena vakasama kece” (tikina e 36). Ni ra droini tiko, veitalanoataka na ibalebale ni vakararavi tu vua na iVakabula kei na sala e rawa ni taqomaki ira kina.

• Lagata vata e dua na sere ni yaloqaqa, vaka na “Mo Bolea Mo Dina Tu” (iVolanisere ni Gonelalai, 80) se “Me Da sa Gu Tiko” (Sere ni Lotu, naba 146). Kerei ira na gone me ra vakasaqara ena sere eso na veika e dodonu meda “kakua ni rere” kina (tikina e 36).

Vunau kei na Veiyalayalati 8:10.

Au rawa ni kerekere ena vakabauta.

Ena loma taucoko ni ivolanikalou, sa vakananumi keda na Turaga me da vakabauti Koya. O rawa vakacava ni vukei ira na gone o vakavulica me ra vakabauti Jisu Karisito vakalevu sara?

iTaviqaravi e Rawa ni Caka

• Vola ena papa ni volavola Ni sega ko na sega ni rawata e dua na ka; o koya mo kerea ena . Sureti ira na gone me ra tovolea me ra vakasamataka e dua na vosa e veiganiti me vakacurumi ena vanua lala ruarua. Qai wilika vata na Vunau kei na Veiyalayalati 8:10 me laurai mai kina na kena isau. Na cava eso na ka eda rawa ni vakayacora kevaka e tiko vei keda na vakabauta?

• Ni oti na wiliki vata ni Vunau kei na Veiyalayalati 8:10, vukei ira na gone me ra vakasamataka na veika era rawa ni ra kerea vua na Turaga me vukei ira kina. Sureti ira me ra droinitaka e dua na iyaloyalo e matataka e dua na ka e dodonu me ra kerea. Ni ra vakaraitaka ki na kalasi na nodra iyaloyalo, me na qai vakilakila na vo ni gone na cava e matataka na iyaloyalo oya.

Vakauqeta na Vuli e Vale

Vukei ira na gone me ra digitaka e dua na malanivosa lekaleka mai na Vunau kei na Veiyalayalati 6–9 era na via wasea vata kei na dua e vale, vaka na “kakua ni rere ni kitaka na ka vinaka” (6:33), “ kakua ni vakatitiqa, kakua ni rere” (6:36), se “ni sega na vakabauta ko na sega ni rawata e dua na ka” (8:10).

Vakatoroicaketaki na Noda Veivakavulici

Vakayagataka na vei italanoa eso. Na italanoa ena vukea na nodra kila na gone na ivakavuvuli ni kosipeli baleta ni ra vakaraitaka na ivakarau era bulataka kina eso tale na ivakavuvuli. Ni o veivakavulici, raica na sala eso mo okata kina na italanoa—mai na ivolanikalou, mai na itukutuku makawa ni Lotu, se mai na nomu bula—e vakaraitaka na ivakavuvuli era tiko ena ivolanikalou.