Na ivakatakarakara taumada ni iVola i Momani volai ena liga.

1–7 ni Feperueri

Vunau kei na Veiyalayalati 10–11

“Me Rawa Ni Nomu Na Qaqa”

Wilika ena yalomasumasu na Vunau kei na Veiyalayalati 10–11, ni vakasamataki na sala o rawa ni vukei ira kina na gone mera kila matua na dina eso ena veiwase oqo. Sa rawa ni veivuke—na vakasama eso ena ituvatuva oqo—me baleti ira na gone sobu kei ira na gone qase cake.

Vola na Veika o Vakauqeti Kina

Sureta na Veiwasei

Kerei ira na gone mera wasea na ka era nanuma mai na lesoni sa oti me baleti Martin Harris kei na yali ni draunipepa eso ni vakadewa ni iVola i Momani. Wasea e dua na itukutuku era sa guilecava. Sa rawa mo raica na “Wase 4: Martin Harris kei na Draunipepa Era Yali” (iTalanoa ni Vunau kei na Veiyalayalati, 18–21).

Vakavulica na iVunau: Gone Sobu

Vunau kei na Veiyalayalati 10:5

Niu masu wasoma, ena vakalougatataki au na Tamada Vakalomalagi.

So na gauna era nanuma na gone ni rawa walega ni ra masu ena vanua kei na gauna eso, ni ra tekiduru se bobo tu. Na iwalewale cava o rawa ni vukei ira kina mera “dau masu tikoga”?

iTaviqaravi e Rawa ni Caka

• Vakaraitaka na iyaloyalo ni veika eda dau cakava wasoma, me vaka na kana, moce, se qito voli. Era vukei keda vakacava na veika oqo? Vakaraitaka na iyaloyalo ni dua na gone ka masu tiko ni ko wilika vei ira na gone na vosa mai na Vunau kei na Veiyalayalati 10:5 “dau masu tikoga.” Kerei ira na gone me ra cavuta vakavica na vosa oqo. Ena vukei keda vakacava meda dau masu tikoga?

• Vakayagataka na tabana ni itaviqaravi ena macawa oqo me vukei ira na gone ni vakasamtaka na vanua kei na gauna e vuqa eda rawa ni masu kina.

• Sureti ira na gone me ra droinitaka na kedra iyaloyalo se nodra matavuvale ni masu tiko ena gauna kei na vanua duidui eso, vaka ena valenilotu, ni bera na vuli, se ena gauna ni moce. Vakamacalataka ni sa rawa ni ibalebale ni masu tikoga na masu wasoma ena siga taucoko. E rawa vakacava ni da masu ni da maliwai ira tu na tamata, vaka e koronivuli se vakaveitokani?

  

  Ena vukei keda na Turaga ni da masu.

Vunau kei na Veiyalayalati 11:12–13

Sa muataki au na Yalo Tabu meu caka vinaka.

Ena bula vagone mada ga, sa rawa ni ra tekivu vakila na gone na gauna e vosa kina vei ira na Yalotabu.

iTaviqaravi e Rawa ni Caka

• Vunitaka e dua na matanicina se cina livaliva kei na iyaloyalo ni dua na mata mamarau ena dua na vanua ena rumu. Sureti ira na gone me ra vakaraica na veiyaya oqo. Wilika na Vunau kei na Veiyalayalati 11:13, ka vukei ira na gone me ra kila na vosa eso e semati ki na veiyaya era kunea. Na cava e vakavuvulitaka na vosa eso oqo me baleta na sala e vukei keda kina na Yalo Tabu?

• Vakaraitaka na ituvaki eso vei ira na gone ka na gadrevi kina mera vakayaco digidigi ena ka e dodonu se cala—vaka na digidigi mo tukuna na ka dina se lasu, se na digidigi mo yalovinaka se yaloca. Eda na kila vakacava ni sa donu e dua na digidigi? Wilika vata na Vunau kei na Veiyalayalati 11:12, ka vakadinadinataka ni na vukei keda na Yalo Tabu me da vakayacora na digidigi donu kevaka eda vakarorogo Vua.

• Lagata e dua na sere me baleta na veidusimaki ni Yalo Tabu, vaka na “Listen, Listen” (Children’s Songbook, 107). Tarogi ira na gone se cava e vakavulica vei ira na sere ena sala e vukei keda kina na Yalo Tabu.

Vakavulica na iVunau: Gone Qase Cake

Vunau kei na Veiyalayalati 10:5

Niu masu wasoma, au na vorata rawa na veitemaki i Setani.

O rawa ni vukei ira na gone me ra kila vakamatata ni masu gugmatua e sa solia vei ira na kaukauwa mera ulabaleta na veitemaki.

iTaviqaravi e Rawa ni Caka

• Vola na vosa se malanivosa mai na Vunau kei na Veiyalayalati 10:5 ena so na tiki ni pepa, ka kerei ira na gone me ra biuta ena kena ituvaki donu. Vakauqeti ira me ra vakaraica na tikina ke ra gadreva na veivuke. Mai na tikina oqo, na veivakalougatataki cava e basika mai ni da dau masu tikoga? Ena vukei keda vakacava na nanumi ni masu e veisiga, vakabibi ena noda temaki meda cakava e dua na cala?

• Sureti ira na gone me ra cakava e dua na lisi ni gauna kei na vanua eso eda rawa ni masu kina. Me baleta na ikuri ni vakasama, vakauqeti ira mera vaqara ena Alama 34: 17–27.

• Vukei ira na gone me ra bulia e dua na ivakatakilakila lailai se iyaloyalo me vakananumi ira me ra dau masu tikoga. Sureti ira me ra vakaliliga na nodra ivakatakilakila ena nodra itikotiko ena vanua era na raica wasoma kina.

Vunau kei na Veiyalayalati 11:12–13

Sa dau muataki au na Yalo Tabu meu caka vinaka.

Era dau vakilakila na tamata gone se vakacava tu mada na veidusimaki ni Yalo Tabu. Rawa ni o vakayagataka na Vunau kei na Veiyalayalati 11 mo vakavulica vei ira na gone na sala mera vakila kina “na Yalo ka na veiliutaki ki na caka dodonu” (tikina e 12).

iTaviqaravi e Rawa ni Caka

• Vukei ira na gone ni cakava e dua na lisi ni tamata era lako kina ni ra qara veivuke se lomatarotaro. Cava na vuna eda vakabauta kina ni ra na vukei keda na tamata oqo? Sureti ira na gone me ra wilika na Vunau kei na Veiyalayalati 11:12 ka vakaraica na ka a tukuni vei Hyrum Smith me vakabauta. Na cava eda vulica mai na tikina oqo meda vakararavi kina ki na veidusimaki ni Yalo Tabu?

• Tarogi ira na gone na cava era na kaya vua e dua na itokani ka tarogi ira se cava ena vakilai ni vosa vei ira na Yalo Tabu. Sureti ira na gone me ra wilika na Vunau kei na Veiyalayalati 11:12–13 me kilai na isaunitaro dodonu eso.

• Wasea vei ira na gone eso na ka o a sotava ena veituberi ni Yalo Tabu mo caka vinaka. Sureti ira na gone mera vakasamataka na gauna era a sotava beka kina na veika vakaoqo ka qai wasea na veika era sotava kevaka era lomavinaka kina. Vakadinadinataka ni vinakata na Tamada Vakalomalagi me tuberi keda mai na Yalo Tabu. Vakayaloqaqataki ira na gone me ra siqema ena macawa lako mai na ka era sa vakila me vaka e vakamacalataki tiko ena Vunau kei na Veiyalayalati 11:12–13.

Vunau kei na Veiyalayalati 11:21, 26

Au gadreva meu kila na kosipeli me rawa niu vukei ira tale eso me ra kunea na dina.

Ena vuqa na nodra madigi na gone o vakatavulica me ra wasea na kosipeli. Sa rawa ni vakavulici ira na veitikina oqo ena sala mera vakavakarau kina ki na veimadigi oqo.

iTaviqaravi e Rawa ni Caka

• Sureti ira na gone me ra matanataka na sala era na tukuna kina na kosipeli kivua e dua a se bera ni bau rogoca. Me kena ivakaraitaki, era na sauma vakacava na taro me baleta na iVola i Momani? Era na vakamacalataka vakacava se ocei o Jisu Karisito? Wilika vata kei ira na gone na Vunau kei na Veiyalayalati 11:21, 26. Na cava e tukuna na Turaga vei Hyrum Smith me kitaka me rawa ni vakatavulica kina na kosipeli? Na cava na kena ibalebale meda “vulica” na vosa ni Kalou, ka rawa vakacava ni da cakava oqo? Eda na “tugana sara” vakacava na vosa ni Kalou e lomada?

• Sureti ira na gone me ra wasea e dua na ivolanikalou era taleitaka ka vakamacalataka na vuna era taleitaka kina. Me ra qai veivosakitaka na sala e vakalougatataka kina na nodra bula na ivolanikalou kei na ka era sa cakava tiko me ra vulica na vosa ni Kalou e vale. Vakayaloqaqataki ira me ra tuva takete me ra wilika vagumatua sara na vosa ni Kalou.

• Lagata vata e dua na sere me baleta na wasei ni kosipeli, vaka na “I Want to Be a Missionary NowChildren’s Songbook,168). Na cava e vakavulica na sere oqo me baleta na noda rawa ni daukaulotu ena veisiga?

• Wasea e dua na ka mai na “Nuinui nei Isireli” mai vei Peresitedi Russell M. Nelson kei Sisita Wendy W. Nelson (ena Lotu e vuravura raraba ni itabagone, 3 ni June, 2018, ChurchofJesusChrist.org) me vakauqeti ira na gone me ra veivuke ena vakasokomuni ira na luve ni Kalou mai na wasei ni kosipeli.

Vakauqeta na Vuli e Vale

Sureti ira na gone mera veivosaki kei na dua na lewe ni matavuvale me baleta e dua na ka era sa vulica mai na Vunau kei na Veiyalayalati 10 se11 nikua. Me ivakaraitaki, sa rawa ni ra wasea na sala era navuca tu me ra dau masu tikoga kina.

Vakatorocaketaki Noda Veivakavulici

Vakasaqara na ivakatakila e veisiga Ni ko sa vakarau mo veivakavulici, masulaka ka vakasamataka vakatitobu na ivolanikalou ena loma ni macawa. O na raica ni na “vakavukui iko” na Yalotabu (Vunau kei na Veiyalayalati 11:13). Na vakasama kei na vakanananu eso ena iwalewale ni veivakavulici sa rawa ni basika vei iko ena gauna kei na vanua cavaga—ni o gole ki cakacaka, qarava na cakacaka ni vale, se veivosaki kei ira na tani.