15–21 ni Feperueri

Vunau kei na Veiyalayalati 14–17

“Mo na Tu ka iVakadinadina”

O rawa vakacava ni vukei ira na gone mera tu ka vakadinadinataka na kosipeli? Ena rawa ni soli vakasama vei iko na itaviqaravi ena ituvatuva oqo.

Vola na Veika o Vakauqeti Kina

Sureta na Veiwasei

Navuca mo sureta e vica na gone me wasea e dua na ka era vulica ena macawa oqo, e vale se ena Lalai, era vakabauta ni dina.

Vakavulica na iVunau: Gone Sobu

Vunau kei na Veiyalayalati 14:1–7

Au rawa ni vukea na Turaga ni cakava Nona cakacaka.

Navuca na sala e rawa ni vukei ira kina na gone na vosa ni Turaga kivei David Whitmer me ra kila vakamatata na iwalewale era rawa ni vakaitavi kina ena cakacaka ni Kalou.

iTaviqaravi e Rawa ni Caka

• Wasea vakalekaleka e vica na ka me baleta na matavuvale i Whitmer (raica na Yalododonu, 1:68–71 se na ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Me ivakaraitaki, wasea o cei o David Whitmer kei na sala e a vukei Josefa Simici kina o koya kei na nona matavuvale ni a vakadewataka tiko na iVola i Momani.

• Vukea na gone me ra kila vakamatata na vakatauvatani ni cakacaka tiko ena dua na were kei na vakaitavi voli ena cakacaka “levu ka veivakurabuitaki” ni Kalou (tikina 1). Me ivakaraitaki, na tatamusuki sa rawa ni vakatakarakarataka na kau mai ni yalo kivei Karisito. O rawa ni vakaraitaka na iyaloyalo ni dua na dauteitei, kauta mai na isulu ni dauteitei me ra tovolea na gone, se veivosakitaka na itavi ni veisiga era qarava na dauteitei. Vakamacalataka ni a dua na dauteitei o David Whitmer ka vinakata tu me kila na sala e rawa ni vukea kina na Turaga. Wilika vei ira na gone na Vunau kei na Veiyalayalati 14:3–4 , ka vukea mera kunea na ka a kaya na Turaga vei David Whitmer me cakava. E rawa vakacava ni da veivuke ena cakacaka ni Turaga?

• Vakayagataka e dua na iloloma mo vakavulici ira kina na gone ena isolisoli ni Kalou me baleta na bula tawamudu. Me ivakaraitaki, vakaraitaka vei ira na gone e dua na iloloma ka volai toka ena pepa e loma, “Bula tawamudu” (Vunau kei na Veiyalayalati 14:7). Me qai cereka na isolisoli e dua na gone, ka wilika ena domo levu na Vunau kei na Veiyalayalati 14:7 . Wasea ni balebale ni bula tawamudu o ya na bula tawacava vata kei na Kalou ka yaco me vakataki Koya. Wasea na nomu ivakadinadina ena veivakalougatataki ni talairawarawa ki na ivakaro kei na ciqomi ni bula tawamudu.

  

  Na cakacaka va-kaulotu sa dua na sala eda rawa ni vukea kina na Turaga ni kitaka na nona cakacaka.

Vunau kei na Veiyalayalati 15:6; 16:6

Au rawa ni vukei ira tale eso me ra toro voleka yani vei Jisu Karisito.

Rau a taci David Whitmer o John Whitmer kei Peter Whitmer Jr. Vakataki David, rau a vinakata me rau kila na sala cava e rawa ni rau vukea kina na Turaga. A kerea o koya me rau “kau yalo mai kivei” Koya.

iTaviqaravi e Rawa ni Caka

• Kerea na gone me ra vakamacalataka e dua na ka e bibi se yaga sara vei ira (vaka e dua na ka ni vakatatalo, ivola, se qito). Wilika na Vunau kei na Veiyalayalati 15:6 se 16:6, ka kerea na gone me ra laveta na ligadra ni ra rogoca na ka e kaya na Turaga sa “ka bibi duadua.”

• Vola vata kei ira na gone na sala eso era rawa ni vukea kina e dua me muri Jisu Karisito, vaka na veitokani kei ira tale eso, wasei ni ivolanikalou kei na dua na itokani, se masulaka tiko e dua e vakaleqai tu. Me soli vakasama vei ira na gone, sa rawa ni o vakaraitaka eso na iyaloyalo veiganiti mai na mekasini ni Lotu se na Gospel Art Book. Se rawa ni ra droinitaka na gone na kedra iyaloyalo vakai ira. Sureta me ra tovolea e dua na ka ena nodra lisi ena loma ni macawa.

Vunau kei na Veiyalayalati 17

Au rawa ni dua na vakadinadina ki na veika sa cakava vei au na Kalou.

A yaco o David Whitmer me dua vei ratou na Tolu na Vakadinadina ni iVola i Momani, ka va na tacina a maliwai ira na Walu na Vakadinadina. Vakataki David kei ira na tacina, sa rawa vakayadua me da “tu ka ivakadinadina” ni ka dina (Vunau kei na Veiyalayalati 14:8).

iTaviqaravi e Rawa ni Caka

• Tukuna vei ira na gone me baleta na Tolu kei na Walu na Vakadinadina (raica na “Wase 7: Sa Raica na Peleti Koula na iVakadinadina eso” [Tukutuku ena Vunau kei na Veiyalayalati, 31–33], se na kena vidio ena ChurchofJesusChrist.org). Sureti ira na gone me ra droinitaka e dua na iyaloyalo ni nodra raica tiko na peleti na vakadinadina.

• Sureti ira na gone me ra rokataka na tabana ni taviqaravi ena macawa oqo, ka vakayagataka me ra tukuna na itukutuku ni Tolu na Vakadinadina.

• Taura cake e dua na ilavelave ni iVola i Momani, ka wilika vei ira na gone na iotioti ni laini ni Vunau kei na Veiyalayalati 17:6: “Ia sa dina sara me vaka sa bula na nomudou Turaga kei na nomudou Kalou.” Tukuna vei ira na gone na ivakarau ni nomu kila ni sa dina na iVola i Momani. Sureti ira na gone mera vakadinadina tu ni iVola i Momani ena kena wiliki ka masulaki me ra kila ke sa dina ka qai wasea na nodra ivakadinadina vei ira tale eso.

Vakavulica na iVunau: Gone Qase Cake

Vunau kei na Veiyalayalati 14–16

Au rawa ni vukea na Turaga ni cakava Nona cakacaka.

Ni ko veivosakitaka na ivakatakila kivei ratou na veitacini na Whitmer, sa rawa ni o wasea na sala eso e sureti keda yadua kina na Turaga meda vukei Koya ena Nona cakacaka.

iTaviqaravi e Rawa ni Caka

• Wasea na italanoa eso baleti David Whitmer kei na nona matavuvale o nanuma ni na veivakauqeti vei ira na gone (raica na Yalododonu, 1:68–71). A vakayagataki ratou vakacava na Whitmer na Turaga me vukea na tara cake ni Nona matanitu?

• Ena veitikinipepa, vola na taro rawarawa eso kei na ivolanikalou veisemati eso mai na Vunau kei na Veiyalayalati 14–16. Me ivakaraitaki: E vaka tu na cava na vosa ni Kalou? (14:2). Na cava na isolisoli uasivi duadua ni Kalou? (14:7). Na cava e kaya na Turaga ni sa ka bibi duadua? (15:6; 16:6). Sureta na gone yadua me digitaka e dua na taro ka raica na kedra isau ena tikina eso.

• Vola e rua na ulutaga ena papa: Cakacaka ni Teitei kei Na Cakacaka ni Turaga. Vukea na gone me ra vaqara na Vunau kei na Veiyalayalati 14:3–4 ena malanivosa eso e semati ki na cakcaka ni teitei, ka volai ira ena ruku ni matai ni ulutaga. Na cava e vakavulica vei keda na veimalanivosa oqo me baleta na cakacaka ni Kalou? Vola na nodra isau ni taro na gone ena ruku ni karua ni ulutaga. E rawa vakacava ni da vukea na cakacaka ni Turaga?

Vunau kei na Veiyalayalati 17

Au rawa ni dua na ivakadinadina ki na veika sa cakava vei au na Kalou.

Ena Vunau kei na Veiyalayalati 17, a tukuna na Turaga vei Oliver Cowdery, David Whitmer, kei Martin Harris ni ratou sa na Tolu na iVakadinadina ni iVola i Momani. Vukea na gone mera vulica na sala era rawa ni ivakadinadina talega ni ka dina.

• Sureta e dua na gone me vakavakarau mai ni wasea na kedratou itukutuku na Tolu na Vakadinadina (raica na “Wase 7: Ra Raica na iVakadinadina eso na Peleti Koula” [Doctrine and Covenants Stories, 31–33], se na kena vidio ena ChurchofJesusChrist.org). Na cava eda rawa ni vulica mai na itukutuku oqo ena sala me da ivakadinadina qaqa kina? O na rairai vakaraitaka talega na veitikina digitaki mai na vidio “A Day for the Eternities” (ChurchofJesusChrist.org; na tikina baleta na Tolu na iVakadinadina e tekivu rauta na 15:00).

• Wilika vata na yalayala ni Turaga ena Vunau kei na Veiyalayalati 17:1–3, ka vukea na gone me ra raica na kena vakavotukana ena “The Testimony of Three Witnesses” ena iVola i Momani.

• Wilika vata na Vunau kei na Veiyalayalati 17:3–5 me laurai na cava a kerei kina o Oliver Cowdery, Martin Harris, kei David Whitmer me ratou cakava ni raici oti na peleti koula. Na cava eso na dina eda rawa ni vakadinadinataka? Tukuna na sala o a wasea kina na nomu ivakadinadina vei ira tale eso, ka sureti ira na gone mera wasea na veika era a sotava.

Vakauqeta na Vuli e Vale

Sureti ira na gone me ra na tu ka ivakadinadina ni dua na ka era sa vulica ena kalasi nikua. Kerea mera wasea na sala era vakayacora kina oqo ena kalasi ni macawa mai oqo.

Vakatorocaketaki Noda Veivakavulici

Raica me ra bulabula na gone. Sa rawa mo tara cake na nodra itovo waribariba na gone ni ra sureti me ra matanataka e dua na italanoa se vakaraitaki vukivuki e veisotari ki na dua na sere se mala ni ivolanikalou. (Raica na Veivakavulici ena iVakarau ni iVakabula, 25–26.)