8–14 ni Feperueri

Vunau kei na Veiyalayalati 12–13; Josefa Simici—Ai Tukutuku 1:66–75

“Vei Kemudrau na Noqu iTokani Dauveiqaravi”

O ira na gone o vakavulica e duatani tu na kedra ituvaki ka duidui na nodra gagadre. Ni ko vakavakarau tiko, vakasamataka na sala o rawa ni vukei ira vinaka kina me ra vulica na dina eso e vakavulici ena Vunau kei na Veiyalayalati 12–13 kei na Josefa Simici—Ai Tukutuku 1: 66–75.

Vola na Veika o Vakauqeti Kina

Sureta na Veiwasei

Sureti ira na gone mera wasea na gauna era a raica kina e dua ni papitaiso se ciqoma na veivakalougatataki ni matabete. A ciqoma vakacava o Josefa Simici kei Oliva Kaudari na matabete?

Vakavulica na iVunau: Gone Sobu

Vunau kei na Veiyalayalati 13

A vakalesuya mai o Joni na Dauveipapitaisotaki na Matabete i Eroni.

Ena 15 ni Me, 1829, a rairai vei Josefa Simici kei Oliva Kaudari o Joni na Dauveipapitaisotaki ka solia vei rau na Matabete i Eroni. Ena vakalougatataki ira vakacava na gone o vakavulica na vulici ni ka oqo?

iTaviqaravi e Rawa ni Caka

• Tukuna vei ira na gone na sala a vakalesui mai kina na Matabete i Eroni (raica na Josefa Simici—Ai Tukutuku 1:68–70; raica talega na “Wase 6: Sa Soli na Matabete vei Josefa kei Oliva,” Tukutuku ena Vunau kei na Veiyalayalati, 26–27). Se sureta e dua na turaga ena tabanalevu me lako mai ki na kalasi ka talanoataka me vaka ga ni o Joni na Dauveipapitaisotaki o koya, ni wilika vei ira na gone na ka a tukuna o Joni vei Josefa Simici kei Oliva Kaudari.

• Vakaraitaka na iyaloyalo kei Joni na Dauveipapitaisotaki ni papitaisotaka tiko na iVakabula kei na vakalesui mai ni Matabete i Eroni (Gospel Art Book, 35, 93; raica talega na ivakatakarakara ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Sureti ira na gone me ra wasea na ka era kila tu baleta na veika e yaco tiko ena iyaloyalo (raica na Maciu 3:13–17; Vunau kei na Veiyalayalati 13; Josefa Simici—Ai Tukutuku 1: 68–70).

• Vukea na gone mera vulica e dua na sere me baleta na matabete, vaka na “The Priesthood Is Restored” (Children’s Songbook, 89). Sureti ira na gone me ra taubale wavoki ena rumu ni ra lagasere tiko, ka veivukevuke ni taura tu na iyaloyalo mai na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale.

Vunau kei na Veiyalayalati 13

Na matabete sai koya na kaukauwa ni Kalou.

Na lesoni eso ni kena vakalesui mai na Matabete i Eroni e sa gauna vinaka ni nodra vukei na gone me ra kila vakamatata na matabete kei na sala era rawa ni vakalougatataki kina.

iTaviqaravi e Rawa ni Caka

• Kauta mai e vica na iyaya ki na kalasi, oka kina e dua na ki. Vakaraitaka na iyaya eso, ka kerei ira na gone mera vakarorogo ni ko wilika na Vunau kei na Veiyalayalati 13 ka mera raica na iyaya e tukuni ena ivolanikalou. Na cava eda rawa ni cakava ena ki? Vakaraitaka na iyaloyalo ni veika eda rawa ni cakava baleta ni sa vakalesui mai na Matabete i Eroni (raica na tabana ni taviqaravi ena macawa oqo; raica talega na Gospel Art Book, 103–4, 107–8). Tukuna vei ira na gone na sala sa vakalougatataka kina na nomu bula na matabete.

• Me vukea na gone me ra vulica na malanivosa Na matabete sai koya na kaukauwa ni Kalou, kerei ira mera vakasausau ni ra kaya na itautau ni vosa yadua. Vakaraitaka e dua na iyaya e gadreva e dua na batiri me cakacaka kina, ka vakavulica ni, vaka ga ni vakayaco kaukauwa na batiri ki na iyaya, na matabete sa kauta mai na kaukauwa ni Kalou ki na noda bula. Wasea na nomu ivakadinadina me baleta na veivakalougatataki e yaco mai vei iko ena vuku ni matabete.

Josefa Simici—Ai Tukutuku 1:66–75

Au rawa ni papitaiso.

A wilika o Josefa Simici kei Oliva Kaudari ena iVola i Momani me baleta na papitaiso ka via kila e levu tale. Sa rawa ni o vukea na gone o vakavulica me ra vakanamata ki na nodra papitaiso ka vulica e levu tale na ka me baleta na cakacaka tabu vakalotu oqo.

iTaviqaravi e Rawa ni Caka

• Vakaraitaka na vidio “Restoration of the Aaronic Priesthood” (ChurchofJesusChrist.org). Tarova vagauna na vidio mo tarogi ira na gone ena taro eso vakaoqo “Cava na vuna a gole kina ki na veikau o Josefa Simici kei Oliva Kaudari?” kei “Na cava na nomu nanuma erau a vakila o Josefa Simici kei Oliva Kaudari ni oti na nodrau papitaiso?” Kerea mera wasea na nodra nanuma ena ka era na vakila ni ra sa papitaiso.

• Tukuna vei ira na gone me baleta na papitaiso i Josefa Simici kei Oliva Kaudari (raica na Josefa Simici—Ai Tukutuku 1:68–74; raica talega “Chapter 6: Joseph and Oliver Are Given the Priesthood,” Tukutuku ena Vunau kei na Veiyalayalati, 26–28). Vakadreta na reki a vakila o Josefa kei Oliva, ka tukuna vei ira na gone me baleta na nomu papitaiso. Sureti ira mera droinitaka na kedra iyaloyalo ni ra sa papitaiso tu ena dua na siga.

  

  Au rawa ni papitaisotaki baleta ni sa vakalesui mai na matabete.

Vakavulica na iVunau: Gone Qase Cake

Vunau kei na Veiyalayalati 13; Josefa Simici—Ai Tukutuku 1:66–72

A vakalesuya mai o Joni na Dauveipapitaisotaki na Matabete i Eroni.

Na itukutuku ni kena vakalesui mai na Matabete i Eroni e rawa ni vukei ira na gone o vakavulica mera kila vakavinaka na bibi ni dina me baleta na matabete kei na veitabaki ki na matabete.

iTaviqaravi e Rawa ni Caka

• Wilika vata na Josefa Simici—Ai Tukutuku 1:66–72, ka sureti ira na gone me ra droinitaka na iyaloyalo eso ni ka e vakamacalataka na veitikina oqo. Me ra qai talanoa na gone ni ra vakayagataki ni nodra iyaloyalo. Sureta e dua me wasea na ka e sotava ni raica e dua ni tabaki tu ki na dua na itutu ni matabete. E tautauvata vakacava o ya ki na ivakarau a tabaki kina o Josefa kei Oliva me vaka e vakamacalataki ena Josefa Simici—Ai Tukutuku 1:66–72?

• Solia e vica na miniti me ra cakava kina na gone e dua na lisi ni ka kece era kila tu me baleti Joni na Dauveipapitaiso, ka qai vakatara me ra wasea na ka era vola. Sureti ira na gone mera cakacaka veisasa ni wilika e dua mai na veimalanivosa oqo ka vakuria ki na nodra lisi: Maciu 3:13–17; Vunau kei na Veiyalayalati 13; Josefa Simici—Ai Tukutuku 1:66–72.

Vunau kei na Veiyalayalati 13

Au dau ciqoma na veivakalougatataki mai na Matabete i Eroni.

Eda ciqoma e vuqa na veivakalougatataki mai na Matabete i Eroni. Na cava o rawa ni cakava mo vukei ira kina na gone o vakavulica mera kila vakavinaka ni sa rawati duaduaga na veivakalougatataki oqo baleta ni sa vakalesui mai na matabete?

iTaviqaravi e Rawa ni Caka

• Biuta na iyaloyalo ni papitaiso kei na sakaramede ena dua na itawatawa e gadrevi kina e dua na idola me dolava. Veivosakitaka na vuna era bibi kina na idola, ka me ra qai vakayagataka na gone na idola me dolavi kina na itawatawa. Sureti ira na gone mera wilika na Vunau kei na Veiyalayalati 13 ka raica na vosa kei na malanivosa eso e vakavulica vei ira na veivakalougatataki e vakavu mai na Matabete i Eroni.

• Vakaraitaka na vidio “Blessings of the Priesthood” (ChurchofJesusChrist.org), ka kerea na gone mera raica na sala eso era sa vakalougatataki kina na tamata ena vidio ena vuku ni matabete.

Josefa Simici—Ai Tukutuku 1:73–74

Na Yalo Tabu sa rawa ni vukei au meu kila vakamatata na ivolanikalou.

Ni oti na papitaisotaki i Josefa Simici kei Oliva Kaudari, a vukei rau na Yalo Tabu me rau kila vakamatata sara na ivolanikalou. Oqo ena rairai veivakayaloqaqataki vei ira na gone, e dau dredre beka ni ra kila vakamatata na volanikalou.

iTaviqaravi e Rawa ni Caka

• Kauta mai e dua na ka ni qito ki na kalasi, ka sureti ira na gone me ra vakasotara vata. Ni ra cakava tiko, tarogi ira se tautauvata vakacava na wiliki ni ivolanikalou kei na vakasotari vata ni ka ni qito. Wilika vata na Josefa Simici—Ai Tukutuku 1:73–74, ka sureti ira na gone me ra wasea na ka a vukei Josefa kei Oliva me rau kila vakavinaka na ivolanikalou. Na cava eda rawa ni cakava me qarai na veivuke ni Yalo Tabu ni da vulica na ivolanikalou?

• Sureti ira na gone me ra cakava e dua na ivakatakilakila ni ivola era rawa ni biuta ena nodra ivolanikalou me vakananuma me ra dau qara na veivuke ni Yalo Tabu ni ra wiliwili. De dua era na raica beka e dua na malanivosa veivakauqeti ena Josefa Simici—Ai Tukutuku 1: 74 era rawa ni vola ena nodra ivakatakilakila ni ivola.

Vakauqeta na Vuli e Vale

Kevaka e sega na nomu gauna vei ira na gone mo vakacavara na tabana ni itaviqaravi ena kalasi, navuca ni vakauta na ilavelave ki vale me rawa ni ra cakava na gone vata kei na nodra matavuvale.

Vakatorocaketaki Noda Veivakavulici

Mo dau yalorawarawa ka vakarorogo ki na Yalotabu. Kakua ni nanuma ni sa dodonu mo vakayagataka na vakasama eso ena ituvatuva oqo. O sa kilai ira na gone o vakavulica; kerea na Tamada Vakalomalagi me tuberi iko ena sala vinaka duadua mo vukei ira kina ni vulica na ivunau ni kosipeli ka tara cake na nodra vakabauta.