E Kacivi Au o Koya ena Yacaqu, mai vei Michael Malm

11–17 ni Janueri

Vunau kei na Veiyalayalati 2; Josefa Simici—Ai Tukutuku 1:27–65

“Ka na Gole na Lomadra na Gone vei Ira na Nodra Qase”

Na Yalo Tabu e rawa ni vakavulici iko ena veigauna kece o wilika na ivolanikalou—na ivolanikalou sara mada ga o sa wilika oti vakavuqa e liu. Ia dau vakarau tu ki na raititobu kei na veivakauqeti vou eso.

Vola na Veika o Vakauqeti Kina

A sa oti e yabaki tolu mai na gauna a rairai kina vei Josefa Simici ena loma ni veikau na Kalou na Tamada kei na Luvena, o Jisu Karisito, ia a se sega ni ciqoma tale o Josefa e dua na ikuri ni ivakatakila mai na gauna oya. Sa tekivu me lomatarotaro o koya me baleta na nona itutu ena mata ni Turaga. Me vakataki keda ga, a caka cala o koya, ka vakila ni sa cudruvi kina. Ia se tu e dua na cakacaka mai vua na Kalou me vakayacora o koya. Ia na cakacaka a kacivi kina o Josefa me cakava esa semati tiko ki na ka e kerea vei keda na Kalou. O Josefa ena kauta mai na iVola i Momani; na cava eda sa kerei me da cakava kina? O Josefa ena ciqoma na idola ni matabete me vagoleya na yalodra na gone vei ira na nodra qase; eda sa vagolea tiko vakacava na yaloda vei ira na noda qase? A tukuni vei Josefa na parofisai eso ka sa voleka sara ni vakayacori; na cava sa noda itavi me vukea na kena vakayacori? Ni da vakaitavi ena cakacaka ni Kalou, e rawa ni da namaka me da sotava na veisaqasaqa kei na veivakacacani sara mada ga, me vaka ga a sotava na Parofita. Ia e rawa talega ni da vakabauta ni na cakava na Turaga me da nona liga ni cakacaka, me vaka a cakava vei Josefa.

Raica talega na Yalododonu, 1:20–48.

Vakasama eso ni Vuli iVolanikalou ni Tamata Yadua

Josefa Simici—Ai Tukutuku 1:27–33

Sa tiko vua na Kalou e dua na cakacaka me’u vakayacora.

Ni o wilika na Josefa Simici—Ai Tukutuku 1:27–33, vakasamataka ni sa tiko vua na Kalou e dua na cakacaka mo vakayacora, me vaka a cakava vei Josefa Simici. Vakasamataka vakatitobu na veisureti oqo mai vei Peresitedi Russell M. Nelson: “Taroga vua na Tamamu Vakalomalagi, ena yaca i Jisu Karisito, na nomu ilesilesi e vuravura. Kevaka o kerea ena gagadre dina, ena yaco me vakasolokakanataka vei iko na Yalo na veisautaki-bula dina. … Au yalataka vei iko ni ko sa tekivu mo raica vakalailai mada ga na ivakarau e raici iko kina na Tamada Vakalomalagi kei na ka e nuitaki iko kina o Koya mo cakava ena Vukuna, sa na veisau vakadua na nomu bula!” (“Me da Tamata Dina ni Mileniumi” [lotu e vuravura raraba ni itabagone qase cake, 10 ni Janu., 2016], broadcasts.ChurchofJesusChrist.org).

O na vakila beka ena so na gauna me vakataki Josefa ena tikina e 28–29. Na cava o rawa ni vulica mai na ivakaraitaki i Josefa ena ka me caka ni sega ni veiraurau tu na ka o cakava kei na cakacaka a kacivi iko kina na Kalou?

Josefa Simici—Ai Tukutuku 1:34–65

Na iVola i Momani e tiko kina “na taucoko ni Kosipeli tawamudu.”

Ni o wilika na Josefa Simici—Ai Tukutuku 1:34–65, vakasamataka na veitikina matailalai cava so ena matata sara vei iko kevaka o se bera vakadua ni se rogoca na iVola i Momani. Me vaka e dua na tamata vakabauta, cava na vuna e bibi kina na itukutuku oqo ki na nomu ivakadinadina me baleta na iVola i Momani?

Navuca na sala e vakataucokotaka kina na iVola i Momani na parofisai eso ena Aisea 29:4, 11–18.

Josefa Simici—Ai Tukutuku 1:36–41

Sa vakataucokotaka na Vakalesui mai ni kosipeli na parofisai makawa eso.

A cavuta o Moronai vei Josefa eso na parofisai ena Veiyalayalati Makawa kei na Veiyalayalati Vou, me vakataka na Aisea 11; Cakacaka 3:22–23; kei na Joeli 2:28–32. Cava na vuna e bibi kina vei Josefa me kila na veiparofisai oqo? Cava na vuna e sa bibi kina vei iko mo kila?

Vunau kei na Veiyalayalati 2

Na cava a vakalesuya mai o Ilaija?

A kaya o Peresitedi Henry B. Eyring: “Sa ka bibi sara me da kila na vuna a yalataka kina na Turaga me talai Ilaija mai. O Ilaija e dua na parofita rogo ka soli vua na kaukauwa levu mai vua na Kalou. A taura tu na kaukauwa levu e solia na Kalou vei ira na luvena: a taura tu o koya na kaukauwa ni veivauci, na kaukauwa ni ka kecega sa vauci e vuravura ena vauci mai lomalagi” (“Yalovata ka Duavata,” Ensign se Liaona, Me 2005, 78).

Raica talega na Vunau kei na Veiyalayalati 110:13–16; David A. Bednar, “Me na Tara na Vale Oqo ki na Yacaqu,” Ensign se Liaona, Me 2020, 84–87.

Valetabu e Palamaira Niu Ioka. Era sa vauci vata na matavuvale ena valetabu ena kaukauwa a vakalesui mai vei Ilaija.

Vunau kei na Veiyalayalati 2

A lako mai o Ilaija me vagolea na yaloqu vei ira na noqu qase e liu.

Na cava e vakavulica vei iko na vosa eso vaka na “tea,” “lomadra,” kei na “vagolea” ena iwase oqo me baleta na ilesilesi i Ilaija kei na veivakalougatataki ni idola ni matabete a vakalesuya mai okoya? O sa vakila vakacava na vagolei ni lomamu vei ira na nomu qase e liu? Vakasamataka na sala eso o rawa ni vakila vakawasoma kina na veika oqori. De o na kerea beka e dua na wekamu me wasea na italanoa vei iko me baleta e dua vei ira na nomu qase e liu—se vinaka sara, mo na vola toka. Se o na raica beka e dua na nomu qase e liu sa mate ka sega tu ni ciqoma na cakacaka vakalotu ni kosipeli ka qai vakayacora na cakacaka o ya ena valetabu.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Josefa Simici—Ai Tukutuku 1:28–29.Na cava a vakila o Josefa Simici me baleta na nona caka cala? Na cava a cakava okoya me baleta na ka a vakila o ya? Na cava eda vulica mai vua ena ka meda cakava ni da sa caka cala?

Josefa Simici—Ai Tukutuku 1:33–54.Mo kerea e dua na lewe ni matavuvale me wilika i cake vakatikina se taucoko na itukutuku i Moronai mai na Josefa Simici—Ai Tukutuku 1:33–42 vaka va (baleta o Moronai a tokaruataka na itukutuku oqo vaka va). Ena maliwa ni wiliwili yadua, kerei ira na vo ni lewe ni matavuvale me ra wasea na ka era nanuma mai na nona itukutuku, kua ni raica na ivolanikalou. Cava na vuna e dau tokaruataka kina vakavica na Turaga na itukutuku bibi eso? Na sala cava tale eso e vakavulici keda kina na Turaga ena kena tokaruataki?

Vunau kei na Veiyalayalati 2:2.Me vukei ira na luvemu ni kila vakavinaka na “yalayala eso a caka vei ira na qase,” dou rawa ni wilika vata na Eparaama 2:9–11 se sarava na vidio “Special Witnesses of Christ—President Russell M. Nelson” (ChurchofJesusChrist.org). Raica na yalayala eso a cakava na Kalou me tiki ni Nona veiyalayalati kei Eparaama. Me da “tea” beka vakacava na veiyalayala oqo ki na lomada?

Vunau kei na Veiyalayalati 2:2–3.Me vukea na lewe ni matavuvale ni vagolea na yalodra vei ira na nodra qase (se qase e liu), sa rawa mo sureti ira ni vulica e dua na ka baleta na nodra qase e liu ka wasea na ka era sa vulica ki na vo ni matavuvale. Na cava beka e vinakata kina na Turaga meda vulica baleti ira na noda lewe ni matavuvale ka vakayacora na cakacaka vakalotu ni valetabu ena vukudra? Eda sa vakalougatataki vakacava ni da vakaitavi ena cakacaka ni valetabu kei na tuva kawa? (raica na Dale G. Renlund, “Cakacaka ni Valetabu kei na Tuva Kawa: Veivauci kei na Veivakabulai,” Ensign se Liaona, Me 2018, 46–49).

Ena ikuri ni vakasama ni nodra vakavulici na gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “iTuvatuva ni Noqu Kawa,” iVolanisere ni Gonelalai, 100.

Vakavinakataki ni Vuli Yadudua

Vakayagataka na veivuke ni vuli ivolanikalou. Na veiyaya ni cakacaka vaka na ivakamacala e ra, Topical Guide, Bible Dictionary, Guide to the Scriptures, kei na ChurchofJesusChrist.org sa rawa ni vukei iko mo kila vakavinaka cake na tamata, veika e yaco, kei na malanivosa eso ena ivolanikalou.

Sa Ciqoma o Josefa na Peleti, mai vei Gary E. Smith