iTikotiko nei Pita Witima, mai vei Al Rounds

1–7 ni Maji

Vunau kei na Veiyalayalati 20–22

“Na Cadra Tale ni Lotu i Karisito”

Ni o wilika na Vunau kei na Veiyalayalati 20–22, vakarau tu ki na veivakauqeti ni Yalo Tabu. Raica mo vola me rawa ni o na lesuva tale.

Vola na Veika o Vakauqeti Kina

Sa mai cava na cakacaka i Josefa Simici na Parofita ni vakavakadewa ni iVola i Momani. Ia na cakacaka ni Vakalesui mai a se qai tekivu ga. E sa matata mai na ivakatakila eso eliu ni me ikuri ni kena vakalesui mai na ivunau kei na lewa ni matabete, e a vinakata na Turaga me vakalesuya mai e dua na isoqosoqo dei—na Nona Lotu (raica na Vunau kei na Veiyalayalati 10:53; 18:5). Koya gona enai ka 6 ni Epereli, 1830, e sivia na 40 na tamata vakabauta era a osota yani na valetolonikau ni matavuvale na Witima e Feieti, Niu Ioka, me vakadinadinataka kina na tauyavutaki ni iSoqosoqo ni Lotu i Jisu Karisito.

Ia, eso na tamata era se taroga ga, na cava me dua kina na Lotu vakaituvatuva? Na kena isau e rawa ni kune, vakatikina mada ga, e na ivakatakila e semati vata kei na imatai ni soqoni ni Lotu ena 1830. Eke, e vakamacalataki tu kina na veivakalougatataki ka na sega ni rawa kevaka me sega ni “tauyavutaki ka cokonaki” na Lotu i Jisu Karisito dina ena veisiga emuri (Vunau kei na Veiyalayalati 20:1).

Raica talega na Yalododonu, 1:84–86, kei na “Tara Cake na Noqu Lotu,” iVakatakila e na Vakasama, 29–32.

Vakasama eso ni Vuli iVolanikalou ni Tamata Yadua

Vunau kei na Veiyalayalati 20:1–36

E yavutaki na Lotu i Jisu Karisito ni Yalododonu Edaidai ena ivunau dina.

Na wase 20 e vakamacalataki taumada me “ivakatakila ni kena tauyavutaki na Lotu kei na qaravi ni kena cakacaka” (ikau ni iwase). Ia ni bera ni tuvai na lawatu ni Lotu, na ilesilesi ni matabete, kei na iwalewale ni kena vakayacori na cakacaka vakalotu, e tekivu na ivakatakila oqo ena vakavulici ni yavudei ni ivunau. Ni o wilika na imatai ni 36 na tikina ni ivakatakila oqo, tarogi iko na cava beka na vuna. O na cakava tale beka ga e dua na lisi ni dina ni kosipeli o raica. Oqo e vica na kena ivakaraitaki:

• Na iVola i Momani kei na kena inaki ena Veivakalesui mai (tikina e 8–12)

• Na ituvaki ni Kalou (tikina e 17–19)

• Na Veisorovaki i Jisu Karisito (tikina e 20–27)

Na cava e a yaga kina me vakabibitaki na dina oqo ni a tauyavutaki tiko na Lotu?

Vunau kei na Veiyalayalati 20:37, 75–79

Era sa tiki yaga sara ni Lotu vakalesui mai na vei cakacakatabu vakalotu.

Ena kena a tauyavutaki na Lotu, a vakavulici ira na Nona Yalododonu na Turaga me baleta na veicakacaka tabu vakalotu, oka kina na papitaiso kei na sakaramede. Ni o wilika na ivakaro “me baleta na ivalavala ni papitaiso” ena tikina e 37, vakasamataka na nomu papitaiso. O a bau vakila li na veika e vakamacalataki ena tikina oqo? O vakila tiko beka ena gauna oqo? Vakasamataka vakatitobu na cava o rawa ni cakava mo maroroya na bulabula ni nomu “inaki dei ni … qaravi [Jisu Karisito] me yacova na ivakataotioti.”

Ni o wilika me baleta na sakaramede ena Vunau kei na Veiyalayalati 20:75–79, tovolea mo wilika na masu bibi oqo ena ivakarau ni rai mai vua e dua e sa qai rogoca tiko vakadua. Na raititobu cava soti o sa ciqoma me baleta na sakaramede? me baleti iko? Ena vukea vakacava na raititobu eso oqori na sala ni nomu vakavakarau mo ciqoma na sakaramede ena macawa oqo?

Na sakaramede e sa dua na cakacaka tabu vakalotu.

Vunau kei na Veiyalayalati 20:38–60

Na veiqaravi ni matabete e vakalougatataka na lewe ni Lotu kei na nodra matavuvale.

Kevaka e dua e tarogi iko mo cavuta na itavi eso ni dua na lewe ni matabete, na cava o na kaya? Wilika na Vunau kei na Veiyalayalati 20:38–60, ka volai tu kina na nodra itavi na veitutu eso ni matabete. E bau dua na ka ena veitikina oqo e veisautaka na itovo ni nomu nanuma me baleta na itavi ni matabete kei na sala e cakava kina na Nona cakacaka na iVakabula? O sa bau vakalougatataki beka vakacava mai na cakacaka e vakamacalataki ena veitikina oqo?

Mo vulica baleta na sala era vakayacora kina na marama na lewa ni matabete ena cakacaka ni Lotu, raica na Dallin H. Oaks, “Na iDola kei na Lewa ni Matabete,” Ensign se Liaona, Me 2014, 49–52.

Vunau kei na Veiyalayalati 21

Na Lotu i Jisu Karisito e liutaki mai vua e dua na parofita bula.

Na cava o vulica mai na Vunau kei na Veiyalayalati 21:4–9 me baleta na nodra vosa na parofita ni Turaga? Vakasamataka na vosa ni yalayala eso e vakamacalataki ena tikina e 6 vei ira era ciqoma na vosa ni Turaga mai vua na Nona parofita. Na cava na ibalebale ni yalayala oqo vei iko?

O na ciqoma vakacava na vosa ni parofita bula “me vaka ga ni dou rogoca mai [na gusu ni Kalou]”? (tikina e 5). Na ivakasala cava sa solia na parofita edaidai ka rawa ni veimuataki ki na veivakalougatataki e yalataki tu ena tikina e 6?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 20.Na cava eda na kaya ke dua e taroga vei keda na vuna eda gadreva kina na Lotu? Na isaunitaro cava eda kunea ena Vunau kei na Veiyalayalati 20? Raica talega ena D. Todd Christofferson, “Na Vu ni Lotu,” Ensign se Liaona, Nove. 2015, 108–11.

Vunau kei na Veiyalayalati 20:69.Na cava na kena ibalebale me da “ivalavala dodonu e mata ni Turaga”? Ena lasa beka vei ira na lewe‑ni‑matavuvale mera droinitaka se vola ena tiki ni pepa eso na veika ena vukei ira mera ivalavala dodonu kina se na veika e rawa ni vagolei ira tani mai na kena yaco oqori. Sa na qai rawa beka mera bulia e dua na sala ka vakayagataka kina na veitiki ni pepa oqori ka segata me ra lakova yani na sala, ni ra butuka ga na droini eso ena kauti ira mai vei Karisito.

Vunau kei na Veiyalayalati 20:37, 71–74.Kevaka e dua ena nomu matavuvale e se bera ni papitaiso, na tikina oqo e rawa ni tekivuna e dua na veivosaki me baleta na sala ni vakavakarau ki na papitaiso (raica na tikina e 37) kei na sala e qaravi kina na papitaiso (raica na tikina e 71–74). E rawa ni ra wasea na lewe‑ni‑matavuvale na iyaloyalo se ivakananumi eso mai na siga ni nodra papitaiso.

Vunau kei na Veiyalayalati 20:75–79.Era na vakayagataka vakacava na nomu matavuvale na veitikina oqo mera vakavakarau me baleta na veigauna vakaibalebale, vakarokoroko ni sakaramede? Na veitikina oqo ena rawa ni vakatura na veika o rawa ni vakasamataka ena gauna ni sakaramede, ka ra na rawa ni raica se droinitaka na iyaloyalo ni veika oqori na lewe-ni-matavuvale. Kevaka e ganita, mo kauta mai na iyaloyalo eso oqori ki na nomu soqoni ni sakaramede ka tarava me ivakananumi ni veika me dau vakasamataki ena gauna ni sakaramede.

Vunau kei na Veiyalayalati 21:4–7.Vakasamataka mo sureta na lewe-ni-matavuvale mera vakasaqara na vosa kei na malanivosa ena tikina e 4–5 ka vakavulici keda me baleta na muria na parofita ni Turaga. Na cava na kena ibalebale meda ciqoma na nona vosa na parofita ena vosota? ena vakabauta? Na gauna cava eda a ciqoma kina na veivakalougatataki e yalataki tu ena tikina e 6?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Au Lewe ni Lotu i Jisu Karisito,” iVolanisere ni Gonelalai, 48.

Vakatorocaketaki ni Noda Veivakavulici

Vakatotomuria na bula ni iVakabula. “Ia na kaukauwa ni iVakabula me veivakavulici ka laveti ira cake na tamata e tadu mai na ivakarau ni Nona bula kei na mataqali tamata vakacava o Koya. Na levu ni nomu gugumatua mo sasaga mo bula me vakataki Jisu Karisito, na levu ni nomu rawa ni veivakavulici me vakataki Koya” (Veivakavulici ena iVakarau ni Vakabula, 13).

Sa Tabaki Josefa Simici o Oliva Kauderi, mai vei Walter Rane