15–21 ni Maji

Vunau kei na Veiyalayalati 27-28

“Ena Vakayacori na Veika Kecega Me Vaka na Kena iVakarau”

A kaya o Elder D. Todd Christofferson ni gauna o vulica kina na ivolanikalou ka vola na veivakauqeti, “o sa solia tiko na vanua e yalomu me baleta na vosa ni Kalou, ka na vosa tiko vei iko oKoya” (“Ni Ko sa Saumaki Tale,” Ensign se Liaona, Me 2004, 11).

Vola na Veika o Vakauqeti Kina

Na ivakatakila a se dua na ka vou sara vei ira na Yalododonu ni toso tiko na kena dolavi na Vakalesui mai. Era a kila tu na lewe ni Lotu ni rawa me ciqoma na Parofita o Josefa Simici na ivakatakila me baleta na Lotu, ia ena rawa beka vei ira tale na so? A bibi sara na veitaro vaoqo ni a vakabauta o Airame Peji, e dua vei iratou na Lewe Walu na iVakadinadina ni peleti koula, ni a ciqoma okoya na ivakatakila me baleta na Lotu. E vuqa na Yalododonu yalodina a vakabauta ni sa mai vua na Kalou na ivakatakila oqo. A sauma na Turaga ena veivakavulici ni ena Nona Lotu “ena vakayacori na veika kecega me vaka na kena ivakarau” (Vunau kei na Veiyalayalati 28:13), ka kena ibalebale me dua ga “sa lesi me ciqoma na ivakaro kei na ivakatakila” me baleta na Lotu taucoko (Vunau kei na Na Veiyalayalati 28: 2). Me vakakina, e rawa ni ra ciqoma na tani na ivakatakila ni tamata yadua me baleta na nodra itavi ena cakacaka ni Turaga. Na ka dina, ni sa dua na ivakananumi kivei keda kece sara na vosa ni Turaga vei Oliva Kaudari: “Ka na qai soli vei iko … na veika mo la’ki kitaka” (Vunau kei na Veiyalayalati 28:15).

Raica talega “Ena Vakayacori na Veika Kecega Me Vaka na Kena iVakarau,” iVakatakila e na Vakasama, 50–53.

Vakasama eso ni Vuli iVolanikalou ni Tamata Yadua

Vunau kei na Veiyalayalati 27:1–4

E dodonu me’u vakayagataka na sakaramede ena mata sa vakatabakidua ki na lagilagi ni Kalou.

Erau a papitaisotaki o Seli Naiti kei Ema Simici ena June ni 1830, ia a vakasevai na nodrau veivakadeitaki mai vei ira na ilawalawa ca. Rua na vula i muri, erau a mai veisiko vei Ema kei Josefa o Seli kei na watina, o Niuwele, ka sa mani kena lewa me sa vakayacori sara na veivakadeitaki, ka me ra na vakaivotavota vata ena sakaramede. Ena nona lako me lai kauta mai na waini ni sakaramede, a tarovi Josefa e dua na agilosi. Na cava a vakavulica vei koya na agilosi me baleta na sakaramede? (raica na Vunau kei na Veiyalayalati 27:1–4).

Na cava e vakavulica vei iko na veitikina oqo me baleta na sala e vinakata na iVakabula mo goleva kina na sakaramede? Na cava o vakauqeti kina mo cakava ena veika o sa vulica tiko?

Na sakaramede e vakananumi keda me baleta na isoro ni iVakabula.

Vunau kei na Veiyalayalati 27:15–18

Na iyaragi ni Kalou ena vukei au me’u vorata na ca.

A kaya o Peresitedi M. Russell Ballard: “E sega ni dua na ka cecere ka dokai eda rawa ni cakava me na vakaiyaragitaki keda vakayalo. E sa tu na kaukauwa dina vakayalo ena vuqa na cakacaka lalai ka tali vata ena dua na isulu ni veivaqaqacotaki e veitaqomaki ka isasabai mai na ka ca kecega” (“Mo Kaukauwa Vua na Turaga,” Ensign, Jiulai 2004, 8).

Ni ko wilika na Vunau kei na Veiyalayalati 27:15–18, o rawa ni cakava e dua na ivolakabi me vaka na kena e ra. Na cava o sa cakava tiko mo tokara yadua na tiki ni iyaragi ni Kalou?

Tiki ni iyaragi	Tiki ni yago e taqomaki	Na cava e matataka na tiki ni yago oya
Peleti ni sere ni buladodonu	Lomamu	Noda gagadre kei na gagano
iVakaruru ni ulu ni veivakabulai	Na uluda se noda vakasama

Raica talega na Efeso 6:11–18; 2 Nifai 1:23.

Vunau kei na Veiyalayalati 28

Na parofita bula e gusu ni vosavosa ni Kalou me baleta na Nona Lotu.

Raitayaloyalotaka mada se na vakacava tu beka vua e dua me ciqoma na ivakaro kei na ivakatakila me baleta na Lotu taucoko. Ena nona a kaya o Airame Peji ni a ciqoma na ivakatakila vaka oya, a yaco na veilecayaki ena kedra maliwa na lewe ni Lotu. Ena Vunau kei na Veiyalayalati 28, e vakatakila kina na Turaga e dua na ivakaro me baleta na ivakatakila ni Nona Lotu. Na cava o vulica mai na wase oqo me baleta na nodra itavi bibi na Peresitedi ni Lotu? Na cava o vulica mai na vosa ni Turaga vei Oliva Kaudari ena tikina e 3? Na cava o vulica mai na wase oqo me baleta na sala e rawa me dusimaki iko kina na Kalou?

Raica talega na Dallin H. Oaks, “Rua na Sala ni Veitaratara,” Ensign se Liaona, Nove. 2010, 83–86.

Vunau kei na Veiyalayalati 28:8–9

Na cava e bibi kina na kaulotu nei Oliva Kaudari vei ira na Leimanaiti?

E dua na inaki ni iVola i Momani sai koya me “ra na kila kina na Leimanaiti na kedra itukutuku na nodra qase, ka ra na kila talega kina na yalayala ni Turaga” (Vunau kei na Veiyalayalati 3:20). Oqo e salavata kei na yalayala ni Turaga vei ira e vuqa na parofita ni iVola i Momani (raica, me ivakaraitaki, 1 Nifai 13:34–41; Inosi 1:11–18; Ilamani 15:12–13). Era a vakabauta tu na lewe ni Lotu taumada ni ra sa kawa ni tamata ena iVola i Momani na kai Idia ni Amerika. (Na itutu vakadonui ni Lotu edaidai sai koya ni o ira na Leimanaiti “eso vei ira na nodra qase taumada na kai Idia ni Amerika” [ivakamacala taumada ki na iVola i Momani].)

Mo wilika eso tale na ka me baleta na kaulotu nei Oliva vei ira na yavusa Idia ni Amerika tu voleka, raica na “E Dua na Kaulotu vei ira na Leimanaiti” (iVakatakila ena Vakasama, 45–49). Na cava e vakavullica vei iko na kaulotu oqo me baleta na Turaga kei na Nona cakacaka?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 27:1–2.E rawa beka ni da nanuma vakavinaka cake vakacava na solibula ni iVakabula vei keda ni da vakaivotavota ena sakaramede?

Vunau kei na Veiyalayalati 27:5–14.Na cava eda kila me baleti ira na parofita ena veitikina oqo? O na rawa ni vakasaqaqara me baleta na ivakamacala me baleti ira ena iDusidusi ki na iVolanikalou (scriptures.ChurchofJesusChrist.org). Na veivakalougatataki cava soti sa dolavi qo vei keda mai na idola ka a tu vei ira? Me baleta na ikuri ni ivakamacala ni idola oqo, raica na Maciu 16:16–19; Vunau kei na Veiyalayalati 110:11–16.

Vunau kei na Veiyalayalati 27:15–18.Ena rawa beka ni na taleitaka na nomu matavuvale me vakatasuasuataka e dua na ivalu vakalasulasu ga vata kei na so tale na isulu me matataka tiko na iyaragi ni Kalou, me vaka na isala, isiqeleti, eparoni, se na ivava. E taqomaki keda vakacava na iyaragi ena loma ni ivalu? Veivosakitaka na veivakayarayarataki ca eso e sotava tiko na nomu matavuvale kei na veika o rawa ni cakava mo tokara kina na iyaragi vakayalo. Sa rawa mo vakaraitaka na vidio “Put on the Whole Armor of God” (ChurchofJesusChrist.org).

Vunau kei na Veiyalayalati 28:2–7.Na cava eda vulica mai na veitikina oqo me baleta na veikacivi ni dua na parofita? Era na rawa beka ni railesuva na lewe‑ni‑matavuvale na itukutuku eliu eso mai vua na noda parofita bula ka wasea na ivakasala ena vukei keda vakacava me da muri Jisu Karisito.

Vunau kei na Veiyalayalati 28:11.Ni da gadreva me da veivakadodonutaki vua e dua, na cava e bibi kina me qaravi oqo “mo drau veivosaki taurua ga”?

Me ikuri ni itukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere vakaturi: “Mai, Rogoca Na Domo Ni Parofita,” Sere ni Lotu, naba 12.

Vakavinakataki ni Vuli Yadudua

Vulica na nodra vosa na parofita kei na iapositolo edaidai. Wilika na cava era vakatavuvulitaka na parofita kei na iapositolo e muri oqo baleta na ivakavuvuli dina e kunei ena ivolanikalou. Vakasamataka mo railesuva na ituvatuva ni ulutaga ni koniferedi raraba conference.ChurchofJesusChrist.org se ena Gospel Library app.