Saints Move to Kirtland, mai vei Sam Lawlor

12–18 ni Epereli

Vunau kei na Veiyalayalati 37–40

“Kevaka Dou Sa Sega ni Duavata Dou Sa Sega ni Noqu”

Sa kila na Kalou na ka era gadreva tu mera vulica na gone ena nomu kalasi. Me tuberi iko o Koya ni o digitaka na ivakavuvuli kei na itaviqaravi eso me vukea na nomu vakavulici ira.

Vola na Veika o Vakauqeti Kina

Sureta na Veiwasei

Solia wavoki e dua na ilavelave ni ivolanikalou. Ni ra taura yadua tu na gone na ivolanikalou, me qai wasea na gone e dua na ka e nanuma ena lesoni ni macawa sa oti se ena kena wiliki na ivolanikalou e vale ena macawa oqo.

Vakavulica na iVunau: Gone Sobu

Vunau kei na Veiyalayalati 38:24–27

Au rawa ni lomani ira tale eso.

A vinakati ira na Yalododonu na Turaga mera vakasoqoni vata e Ohio ka mera veilomani vakatautauvata. O rawa vakacava ni vukea na gone me ra vakila na veivakaduavatataki kei na loloma vei ira na tani?

iTaviqaravi e Rawa ni Caka

• Vakayagataka na tabana ni itaviqaravi ena macawa oqo mo vakaraitaka vei ira na gone ni se ka vou sara na Lotu, a kerei ira na lewenilotu na Turaga me ra toso vata ki Ohio (raica talega na mape ena idusidusi ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Na Kalou e vinakati ira me ra vulica na ivakarau ni loloma kei na veimaliwai vinaka vakai ira. Tarogi ira na gone ena vakasama eso ni sala era rawa ni vakaraitaka kina na loloma vakai ira.

• Wilika vei ira na gone na Vunau kei na Veiyalayalati 38:25 ka tukuna vei ira ena nomu vosa ga na ibalebale ni nomu okata na tacimu se ganemu me vakataki iko (raica talega na Maciu 7:12). Vukea mera tokaruataka na ivolanikalou, ka sosomitaka “na tacina” ena dui yacadra.

• Lagata e dua na sere ni veilomani ka okata eso tale, vaka na “I’ll Walk with You” se “We Are Different” (Children’s Songbook, 140–41, 263). Ni o laga tiko, me ra qai taura na gone na iyaloyalo ni gone mai na veivanua tale eso e vuravura.

• Vukea na gone me ra matanataka e dua na ituvaki e a lewena kina e dua na gone vou na nodra kalasi ni Lalai. E rawa vakacava ni da vukei koya me loma dei? Era na rairai taleitaka na gone ni matanataka oqo ena matakau qaniliga se ivakatakarakara kotivi eso.

Vunau kei na Veiyalayalati 38:30

Keu sa vakarau tu, meu na kua ni rere.

E dua na sala e vukei keda kina na Tamada Vakalomalagi meda kakua ni rere o ya na noda vakavulici meda vakavakarau tu.

iTaviqaravi e Rawa ni Caka

• Tokaruataka vakavica na malanivosa “Kevaka dou sa vakarau vakavinaka tu dou na sega sara ni rere” (tikina e 30). Oti e vica na gauna, biuta tani e dua na vosa, me ra qai cavuta na gone na vosa e yali tiko. Tukuna vei ira na gone na gauna o a vakarau tu ki na dua na ka, ka sa vukei iko mo kua ni rere na nomu vakavakarau tu.

• Vukea na gone me ra vakasamataka na veika e vinakata na Tamada Vakalomalagi me ra vakavakarau kina, vaka na papitaiso se lako ki na valetabu. Vakayagataka na iyaloyalo se iyaya eso me soli vakasama vei ira. Veitalanoataka na sala eso era rawa ni vakavakarau kina, ka me ra qai droinitaka na kedra iyaloyalo ni ra vakarau se vakaitavi voli ena veika era nanuma tu.

Vunau kei na Veiyalayalati 39:6, 23

Au ciqoma na isolisoli ni Yalo Tabu niu sa vakadeitaki.

Na cava era gadreva na gone ena nomu kalasi mera kila vakamatata kina na ciqomi ni solisoli ni Yalo Tabu? Na ivakasala ni Turaga vei James Covel ena cakacaka tabu vakalotu oqo ena rawa ni veivuke.

iTaviqaravi e Rawa ni Caka

• Vakaraitaka na iyaloyalo ni dua e papitaisotaki kei na dua e vakadeitaki (raica na Gospel Art Book, naba 104, 105). Wilika na Vunau kei na veiyalayalati na 39:23, ka kerea na gone me ra dusia na iyaloyalo donu ni ra rogoca ni o wilika na veipapitaisotaki se veivakadeitaki.

• Wilika vata na Vunau kei na Veiyalayalati 39:6, ka vakaraitaka vei ira na gone na iyaloyalo se iyaya e matataka na sala eso e vakalougatataki keda kina na Yalo Tabu (oka kina na kena e tukuni ena tikina e 6). Me ra qai veivukevuke na gone ni taura tu na iyaloyalo se iyaya, ni vaka tu kina, wase ivakadinadina ena ivakarau e sa vakalougatataki iko kina na Yalo Tabu ena veisala oqo. Vukea na gone me ra siqema na gauna eso era na rairai vakila kina na veivakayarayarataki ni Yalotabu.

Vakavulica na iVunau: Gone Qase Cake

Vunau kei na Veiyalayalati 37; 38:31–33

Sa vakasoqoni keda na Kalou me vakalougatataki keda.

A dua dina na solibula levu na vakasoqoni e Ohio ki vei ira e vuqa na Yalododonu taumada. Nikua eda sa sega ni vakaroti me da vakasoqoni ena dua na vanua, ia eda sa vakasoqoni vakamatavuvale, tabanalevu, kei na iteki.

iTaviqaravi e Rawa ni Caka

• Vakaraitaka vei ira na gone na itaviqaravi ena macawa oqo se na mape ena idusidusi ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale. Wilika vata na Vunau kei na Veiyalayalati 37, ka vukea na gone me ra raica ena mape na vanua eso e tukuni ena ivakatakila. Na cava e vakarota na Turaga me ra cakava na Yalododonu?

• Digitaka e dua na malanivosa se yatuvosa bibi mai na Vunau kei na Veiyalayalati 38:31–33 o nanuma e vakamacalataka na vuna e vinakati ira kina na Nona tamata na Turaga me ra vakasoqoni vata. Veibiuyaka na vosa mai na yatuvosa oqo ena loma ni rumu, ka sureti ira na gone me vakasoqoni ira, biuta ena kena ituvatuva donu, ka raica na vanua e tiko kina na yatuvosa ena veitikina. Cava na vuna e vinakata kina na Turaga meda vakasoqoni?

Vunau kei na Veiyalayalati 38:24–27

E vinakata na Kalou me ra duavata na Nona tamata.

Me vakarautaka na Yalododonu mera vakasoqoni, a vakavulici ira na Turaga mera raici ira yadua vakatautauvata ka “duavata sara” (tikina e 27). Ena vakalougatataki ira vakacava na gone o vakavulica na ivakasala oqo?

iTaviqaravi e Rawa ni Caka

• Wilika vata na Vunau kei na Veiyalayalati 38:24–27, ka sureti ira na gone me ra vola na vosa eso mai na veitikina oqo era nanuma ni bibi, oka kina na vosa eso sa tokaruataki. Cava beka na vuna e tokaruataka kina na Turaga na veivosa oqo? Me ra qai wasea na ka era sa vola, ka veivosakitaka na ka era sa vulica mai na veivosa o ya.

• Vukea na gone me ra vakasamataka na ituvaki eso ena rairai galili tu kina e dua, vaka e dua na lewe ni Lotu vou se toki ki na dua na itikotiko se na koronivuli vou. Na cava e vakatura na Vunau kei na Veiyalayalati 38:24–27 ena sala meda qarava kina e dua ena ituvaki vakaoqo? Matanataka eso na ituvaki vakaoya.

• Wasea e dua na lesoni ivakaraitaki e vakatakila na sala era rawa ni cokovata se duavata kina na ka eso me duabau, vaka na veitiki ni sulu e caka kina e dua na lacadrau se gacagaca eso e buli kina e dua na madrai. Na cava e vakavulica vei keda na ivakaraitaki oqo meda duavata kina vaka tamata ni Kalou?

Vunau kei na Veiyalayalati 39–40

Au rawa ni maroroya na noqu yalayala.

E a yalataka o James Covel me talairawarawa vua na Turaga, ia e sega ni maroroya na nona yalayala. Na vulici ni ka a sotava sa rawa ni vukea na gone me ra vakasamataka na bibi ni talairawarawa.

iTaviqaravi e Rawa ni Caka

• Sureti ira na gone mera wilika na ulutaga ni wase ni Vunau kei na Veiyalayalati 39 kei na 40, ka kerea me ra vakalekalekataka vaka vosa se droini na ka era sa vulica me baleti James Covel.

• Vola na taro eso ena papa ena vukei ira na gone me ra kila vakamatata na wase 40, vaka Na cava a veiyalayalatitaka o James Covel me cakava? Cava na vuna a sega ni maroroya kina na nona veiyalayalati? Sureti ira na gone me ra raica na kena isau ena wase 40.

• Vukea na gone me ra nanuma na yalayala era a cakava ni ra papitaiso (raica na Mosaia 18:8–10). Vukea na gone me ra vola na yalorere eso se “kauwaitaka na veika vakavuravura” (Vunau kei na Veiyalayalati 40: 2) e rawa ni torova e dua na tamata ena maroroi ni veiyalayala oqo. Sureti ira na gone me ra vola kivei ira e dua na itukutuku lekaleka me ivakananumi ni na vukei ira ni ulabaleta na rere se kauwai vakavuravura na talairawarawa ki na ivakaro ni Tamada Vakalomalagi. Vakauqeta me ra maroroya na nodra ivakananumi ena dua na vanua era rawa ni raica wasoma.

Vakauqeta na Vuli e Vale

Sureti ira na gone me ra veivosakitaka kei na nodra itubutubu se lewe ni matavuvale tale eso na sala era rawa ni duavata vakalevu kina vakamatavuvale.

Vakatorocaketaki ni Noda Veivakavulici

Cavuqaqataka e dua na ivolanikalou. Navuca mo digitaka e dua na malanivosa ni ivolanikalou o nanuma e rawa ni vaqaqacotaka na nodra ivakadinadina na gone, ka vukea mera cavuqaqataka. Sa rawa ni ra cavuqaqataka na gone lalai e dua na tiki ni ivolanikalou se dua ga na malanivosa.