19–25 ni Epereli

Vunau kei na Veiyalayalati 41–44

“Noqu Lawa me Liutaki Kina Noqu Lotu”

Ena nomu vakavakarau ena macawa oqo, vakarorogo matua ki na veivakauqeti o ciqoma mai vua na Yalotabu. Na cava o nanuma e gadrevi mera vulica na gone mai na Vunau kei na Veiyalayalati 41–44?

Vola na Veika o Vakauqeti Kina

Sureta na Veiwasei

Viritaka e dua na polo vua e dua na gone, ka kerei koya me wasea e dua na ivakaro e kila tu. Pasitaka tiko na polo me yacova ni ra sa vakaitavi kece ni wasea e dua na ka.

Vakavulica na iVunau: Gone Sobu

Vunau kei na Veiyalayalati 42:2

Au rawa ni muria na lawa ni Kalou.

Ni sa tubu na Lotu ka ra vakasoqoni na lewenilotu e Kirtland, Ohio, sa vakatakila na Turaga vua na parofita o Josefa Simici na ka a vakatoka o Koya me Nona “lawa” ka vakaroti ira na Yalododonu me ra “vakatudaliga mo dou rogoca ka talairawarawa kina”. E rawa vakacava mo vukei ira na gone mera kila vakavinaka ni da sa vakalougatataki ni da sa talairawarawa?

iTaviqaravi e Rawa ni Caka

• Wilika na Vunau kei na Veiyalayalati 42: 2, ka vakabibitaka na vosa “talairawarawa.” Solia vei ira na gone e vica na ivakaraitaki rawarawa ka na digitaka kina e dua na gone me talairawarawa se talaidredre ki na lawa se ivakaro. Kerei ira na gone me ra vakarorogo sara ka matadredredre ke sa talairawarawa na tamata e talanoataki ka mata cudrucudru ke talaidredre. Wasea na veivakalougatataki o sa ciqoma ni ko a talairawarawa ki na lawa ni Kalou.

• Vakayacora e dua na qito ena kena soli vei ira na gone e dua na ivakaro me muri. Me ivakaraitaki, o rawa ni tukuna vei ira me ra na laveta na ligadra ka na qai kacivi me ra sauma na taro. Me ra qai vakatovotovotaka na talairawarawa ena tarogi ni taro eso kei na nodra kacivi o ira ka laveta cake na ligadra. Na lawa cava soti sa solia vei keda na Kalou?

• Vakacavara vata kei ira na gone na tabana ni taviqaravi, se lagata na sere me baleta na talairawarawa ki na lawa ni Kalou, vaka na “I Want to Live the Gospel” (Children’s Songbook, 148). Tukuna vei ira na gone se sa vakamarautaki iko vakacava na talairawarawa ki na lawa ni Kalou.

  

  Eda vulica na ivakaro ni Kalou ena Lalai.

Vunau kei na Veiyalayalati 42:38

Au sa qaravi Jisu Karisito tiko niu qaravi ira na tani.

Sa vinakati ira na Nona Yalododonu na Turaga me ra vukei ira na dravudravua kei na vakaleqai. Vukea na gone mera kila vakavinaka ni nodra qaravi ira tiko na vakaleqai, era sa qarava tale tikoga na iVakabula.

iTaviqaravi e Rawa ni Caka

• Kevaka me a tiko o Jisu Karisito ena noda kalasi nikua, na cava eda na kaya Vua? Ena vakacava tu na noda qaravi Koya? Vakaraitaka e dua na iyaloyalo ni iVakabula, ka vakamacalataka na ivakavuvuli i Jisu ni gauna eda vakaraitaki loloma kina vei ira na tani, eda sa vakaraitaki loloma talega ki Vua. Vukea na gone me ra tokaruataka vata kei iko na tikina 38 , me vica na vosa ena dua na gauna.

• Vukea na gone me ra vakasamataka na sala eso era rawa ni qaravi Jisu kina ena nodra qaravi na tani. Era rawa ni raica eso na vakasama mai na vidio “Pass It On” (ChurchofJesusChrist.org) se mai na iyaloyalo ni iVakabula ni vukei ira tiko na tamata, vaka na Kena iyaloyalo ni vakabulai ira tiko na tauvimate se lomani ira voli na gone (raica na Gospel Art Book, naba 42, 47). Vakadinadinataka ni gauna era qaravi ira kina na tani, era sa qaravi Jisu tale tikoga.

Vunau kei na Veiyalayalati 43:1–7

Sa liutaka na Turaga na Nona Lotu mai vua na Nona parofita.

O rawa ni vukea na gone me ra levea na veicavilaki ena nodra bula taucoko ni vakavulici vei ira, ni ra se gone, na ivakarau ni Turaga ena liutaki ni Nona Lotu mai vua na parofita bula.

iTaviqaravi e Rawa ni Caka

• Vakaraitaka na iyaloyalo na kedra iyaloyalo na tamata duidui, oka kina e dua na iyaloyalo ni parofita nikua. Vakatoboicutaka na iyaloyalo, ka me ra qai vukica cake vakayadua na gone me yacova ni ra sa raica na parofita. Vakamacalataka na ivakavuvuli ni Turaga ni parofita duadua ga sa “lesi vei kemudou me ciqoma na ivakaro kei na ivakatakila mai vua [na Turaga]” me liutaka na Lotu (Vunau kei na Veiyalayalati 43:2).

• Lagata vata e dua na sere baleti ira na parofita, vaka na iotioti ni qaqa ni “Follow the Prophet” (Children’s Songbook, 110–11). Wasea na nomu ivakadinadina ni sa liutaka na Lotu na parofita.

Vakavulica na iVunau: Gone Qase Cake

Vunau kei na Veiyalayalati 41:5

Na tisaipeli sai koya e dua ka ciqoma na lawa ni Kalou ka talairawarawa kina.

Era sa kila li na gone o vakavulica na kena ibalebale me da tisaipeli i Jisu Karisito? Na Vunau kei na Veiyalayalati 41: 5 e rawa ni vukei ira me ra kila vakamatata na ivakarau ni bula vakatisaipeli.

iTaviqaravi e Rawa ni Caka

• Vola na Vunau kei na Veiyalayalati 41:5 ena dua na tiki ni pepa, ka vakalala tu na tikina e dodonu me biu kina na vosa “tisaipeli”. Kerei ira na gone me ra vakalewena na vanua lala, ka raica na Vunau kei na Veiyalayalati 41:5 kevaka era gadreva na veivuke. Na cava na ibalebale me da dua na tisaipeli i Jisu Karisito? Wasea na sala o sasagataka tiko kina mo dua na tisaipeli vinaka i Karisito.

• Ni oti na veivosakitaki ni Vunau kei na Veiyalayalati 41:5, kerei ira na gone me ra vakasamataka na lawa eso eda sa ciqoma mai vua na Turaga. Sureta me ra veivukevuke ena matanataki ni nodra talairawarawa ki na dua vei ira na lawa o ya ni ra tovolea na vo ni kalasi me ra vakilakila.

• Solia ki na lewe ni kalasi yadua e dua na tiki ni pepa, ka kerei ira me ra vola kina e dua na sala era rawa ni tisaipeli vinaka kina. Sureta na gone yadua me wasea na ka e sa vola, ka qai semata vata na veitikina me bulia e dua na sinucodo pepa.

Vunau kei na Veiyalayalati 42:61, 68

Sa vakatakila na vuku na Kalou vei ira era kerea.

Era vakataroga e levu na taro na gone ni toso cake na nodra kilaka me baleta na vuravura kei na kosipeli. O na vakayagataka vakacava na Vunau kei na Veiyalayalati 42:61, 68 me vukei ira ni kila na sala mera rawa vuku kina mai vua na Turaga?

iTaviqaravi e Rawa ni Caka

• Kerea na gone me ra wasea vata kei iko e dua na ka e vukei ira me ra vakila na vakacegu kei na ka e vukei ira mera vakila na reki. Sureta mera wilika na Vunau kei na Veiyalayalati 42:61 ka vaqara na vosa “veivakacegui” kei na “reki.” Vukea na gone me ra vakasamataka na dina e sa vakatakila na Kalou ka kauta mai vei ira na vakacegu kei na reki.

• Wilika vata kei ira na gone na Vunau kei na Veiyalayalati 42:61, 68 ka vakabibitaka na malanivosa “na ivakatakila ena ivakatakila, na kilaka ena kilaka.” Vakamacalataka ni sega ni dau vakatakila na ka kecega na Kalou ena dua na gauna; ia, sa solia vakalalai vagauna vei keda o Koya. Vakaraitaka na sala e tara vakalalai kina e dua na qito ni kilakila mada, se vakayagataka e dua na ka vakatautauvata me vukea na gone mera kila vakavinaka na ivakavuvuli oqo. Wasea e dua na gauna o a ciqoma kina na ivakatakila e vakalougatataki iko.

Vunau kei na Veiyalayalati 43:1–7

Na parofita duadua ga e rawa ni ciqoma na ivakatakila me baleta na Lotu raraba.

Ni ra tubu voli na gone, era na rairai sotavi ira na tamata ka via muataki ira vakatani. O na vukea vakacava na gone me vakabauta na ivakarau e liutaki ira kina na Luvena na Kalou mai vei ira na Nona parofita digitaki?

iTaviqaravi e Rawa ni Caka

• Sureti ira na gone me ra raitayaloyalotaka ni dua e duri tu ena soqoni ni soli ivakadinadina ka tukuna ki na tabanalevu ni sa ciqoma e dua na ivakatakila me baleta na Lotu (me ivakaraitaki, ni sa sega ni dodonu meda gunu sucu tale se ni sa dodonu meda tekivu vakayaco soqoni ni sakaramede ena vei Tusiti ka sega ena Sigatabu). E kaya o koya ni sa dodonu me da rogoca na ka e tukuna tiko ka kua ni rogoca na parofita. Na cava ena cala kina oya? Vukea na gone me ra vaqara na Vunau kei na Veiyalayalati 43:1–7 ka raica na sala e dau soli vakaro kina na Turaga ki na Nona Lotu.

• Vakaraitaka na iyaloyalo ni parofita bula, ka sureti ira na gone me ra wasea e dua na ka a vakavulica wale toka ga oqo. Kevaka era gadreva na veivuke, vakaraitaka e dua na vidio se wilika e dua na wase ni vosa mai na itukutuku ni koniferedi raraba wale toka ga oqo. Cava na vuna e dua kina na veivakalougatataki me tiko e dua na parofita bula nikua?

Vakauqeta na Vuli e Vale

Sureti ira na gone me ra digitaka e dua na lawa se ivakaro era nanuma me ra vakanamata ni talairawarawa kina ena macawa oqo. Vakayaloqaqataki ira me ra wasea na nodra takete ki na nodra matavuvale.

Vakatorocaketaki Noda Veivakavulici

Vakavulici ira na gone me ra vola na veika era uqeti kina. E rawa saraga ni vulica na gone me ra vakamatautaki ira ena volai ni veika vakayalo e uqeti ira. E rawa ni ra vola na veika era uqeti kina ena vakatakilakilataki ni ivolanikalou, droinitaki yaloyalo, se vakacurumi tukutuku rawarawa ena ivolaniveisiga.