26 ni Epereli–2 ni Me

Vunau kei na Veiyalayalati 45

“Ni Na Vakayacori …Na Veika Kecega sa Yalataki”

Ni o qasenivuli, na nomu vakavakarau bibi duadua e vakayalo. Tekivu ena nomu vulica na Vunau kei na Veiyalayalati 45 ka masulaka na veidusimaki ni Yalo Tabu. Na ituvatuva oqo e vakarautaka na vakasama ena veivuke sara vakalevu vei iko. E rawa talega mo raica na vakasama ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale se ena Liaona se iTokani.

Vola na Veika o Vakauqeti Kina

Sureta na Veiwasei

Kerei ira na gone kevaka era vinakata mera wasea na veika era sa vulica mai na ivolanikalou ena macawa oqo. Digitaka e dua me wasea, ka kerei ira na vo ni gone me ra laveta na ligadra kevaka era vulica e dua na ka vakaoqo.

Vakavulica na iVunau: Gone Sobu

Vunau kei na Veiyalayalati 45:32

Au rawa ni “tu ena veivanua tabu.”

Ena Vunau kei na Veiyalayalati 45:32, e vakavulica kina na Turaga ni ra na kunea na veitaqomaki na Nona tisaipeli ena veigauna e muri ena nodra tu ena veivanua tabu—na vanua digitaki vua na Turaga. O na vukei ira vakacava na gone me ra kila na veivanua tabu ena nodra bula?

iTaviqaravi e Rawa ni Caka

• Biuta na iyaloyalo ni dua na itikotiko, e dua na vale ni Lotu, kei na dua na valetabu ena veivanua duidui eso ena loma ni rumu. Solia na ivakatakilakila me vakamacalataka na veivanua oqo, ka sureti ira na gone me ra tu volekata na iyaloyalo ni ko vakamacalataka tiko. Wilika na imatai ni laini ena Vunau kei na Veiyalayalati 45:32. Vakadinadinataka ni da sa vakalougatataki ni da vakayagataka edua na gauna ena veivanua tabu me vaka na noda itikotiko, na noda vale ni Lotu, kei na valetabu. Kerei ira na gone me ra tukuna na veika era vakila ni ra tiko ena vanua tabu vakaoqo.

• Sureti ira na gone mera vakacavara na tabana ni itaviqaravi ni macawa oqo. Vukei ira me ra vola “Au rawa ni vukea me yaco na noqu itikotiko me vanua tabu” kei na “Vunau kei na Veiyalayalati 45:32” ena nodra droini. Na cava e rawa ni ra cakava me vukea me yaco na nodra vale me vanua tabu?

• Me vukei ira na gone me ra vakasamataka na ibalebale ni “sega ni yavalati rawa,” kerei ira mera tucake ka kakua ni yavala me rauta e dua na miniti. Wilika na imatai ni laini ena Vunau kei na Veiyalayalati 45:32. Vukei ira na gone mera kila ni “tudei tu ena veivanua tabu, ka sega ni yavalati rawa” e kena ibalebale me digitaki na dodonu ena veigauna kecega, se cava ga na veika e yaco tiko. Sureti ira me ra “sega ni yavalati rawa” mai na vakanananu savasava kei na ivalavala dodonu.

Vunau kei na Veiyalayalati 45:44–45

Ena lako tale mai o Jisu Karisito.

Ni ra sa rogoca na Yalododonu mai Katiladi, Oaio na ivakatakila e kunei ena Vunau kei na Veiyalayalati 45, ka tukuni kina na veisiga mai muri kei na iKarua ni Nona Lako mai na iVakabula, era a ciqoma ena marau. Vakasamataka na sala o na vukei ira kina na gone me ra vakavakarau ena reki ki na iKarua ni Lako Mai.

iTaviqaravi e Rawa ni Caka

• Vukei ira na gone me ra vakasamataka na veika era vakila ni sa rogovaki mai ni dua era dau taleitaka ena lako tiko mai me sikovi ira, me vaka e dua na tubunigone se e dua na itokani. Era vakavakarau vakacava ki na veisiko? Vakaraitaka e dua na iyaloyalo ni iVakabula, ka wilika e dua na tiki ni iwase se wase taucoko ni Vunau kei na Veiyalayalati: 45:44–45. Tukuna vei ira na gone na nomu nanuma baleta na iVakabula ena nona lako tale mai, ka me ra wasea na nodra nanuma.

• Vakaraitaka e dua na iyaloyalo ni iKarua ni Nona Lako Mai na iVakabula (raica na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale), ka kerei ira na gone me ra wasea na veika era vakila ni ra raica na iyaloyalo oya. Wasea na nomu ivakadinadina ni na lako tale mai o Jisu Karisito.

• Lagata e dua na sere, me baleta na iKarua ni Nona Lako Mai na iVakabula, me vaka na “Ena Lesu Tale Beka Mai” (iVolanisere ni Gonelalai, 46). Vakayagataka na sere me veitalanoataki kina na sala eso e rawa ni da vakavakarau kina ena Nona lako tale mai ko Jisu, me vaka na noda vakayacora na lomana na Kalou ka vakacilava noda rarama ena vukudra na tani.

Vakavulica na iVunau: Gone Qase Cake

Vunau kei na Veiyalayalati 45:3–5

Sa noda Mata ki vei Tamada ko Jisu Karisito.

O na vukei ira vakacava na gone me ra vaqaqacotaka na nodra vakabauta ni sa nodra Mata ko Jisu Karisito? O sa vulica vakacava oqo me baleti iko?

iTaviqaravi e Rawa ni Caka

• Vola e vica na vosa kei na malanivosa e laurai ena Vunau kei na Veiyalayalati 45:3–5 ena vica na tiki ni pepa. Solia vei ira na gone e dua na miniti mera vulica na veitikina oqo ena nodra ivolanikalou, ka qai sureti ira me ra sogota na nodra ivolanikalou ka qai vola na vosa ena veitiki ni pepa ena kedra ituvatuva me vaka ka tiko ena tikina o ya. A cava e tukuna na veitikina oqo, me baleta na ka e kaya na iVakabula ena Nona vakamamasu vua na Tamada Vakalomalagi ena vukuda?

• Vukei ira na gone mera vakamacalataka na vosa mata, me ra raica beka ena dikiseniri. Na cava a cakava na iVakabula me rawa kina ni noda Mata? Wasea na nomu nanuma me baleta na veika sa vakayacora o Jisu Karisito ena vukuda, me ra qai wasea na gone na veika era vakila.

Vunau kei na Veiyalayalati 45:9

Na kosipeli i Jisu Karisito sa ikoya e dua na rarama ki vuravura.

Vukei ira na gone o vakavulica tiko mera vakasamataka na sala eso e vakarautaka kina na vuravura na kosipeli me baleta na iKarua ni Nona Lako Mai na iVakabula.

iTaviqaravi e Rawa ni Caka

• Vakaraitaka na iyaloyalo ni dua na rarama kei na dua na kuila, se droinitaka ena papa ni volavola. Sureti ira na gone mera wilika na Vunau kei na Veiyalayalati 45:9 ka vakasamataka na sala e vaka kina e dua na rarama na kosipeli, dua na ivakarau (se drotini) kei na dua na dau kau tukutuku. Sa rawa mo vakamacalataka ni ena gauna e liu, e dau kena i vakarau me dau kau e dua na drotini se kuila ki na ivalu. E dau vukei ira na sotia me ra kila na vanua me ra sota kina kei na veika me ra cakava.

  

  Na Yavu ni Bula Galala, mai vei Larry Conrad Winborg

• Vukei ira na gone me ra cavuqaqataka taucoko se vakatikina na tikina e 9 ena kena volai ena papa ni volavola ka qai bokoci tani tiko vakagauna e vica vata na vosa.

Vunau kei na Veiyalayalati 45:37–38

Ena lako tale mai o Jisu Karisito.

E rawa ni vakarerei ira na gone ni ra wilika me baleta na ivalu, na caka ca, kei na veivakarusai e sa parofisaitaki ni na yaco ni bera na iKarua ni Lako mai ni iVakabula. E rawa vakacava mo vukei ira mera rai yani ena marau ki na siga yalataki oya?

iTaviqaravi e Rawa ni Caka

• Tarogi ira na gone se era na kila vakacava ni sa voleka ni veisau na draki ena loma ni yabaki. Na ivakatakilakila cava era na vakasaqara? Vakamacalataka me vaka ga ni sa tu na ivakatakilakila ni veisau ni draki ena loma ni yabaki, sa tu talega na ivakatakilakila ni iKarua ni Lako Mai. Wilika vata na Vunau kei na Veiyalayalati 45:37–38. Na cava a kaya o Jisu ni na yaco me ivakatakilakila ni iKarua ni Nona Lako Mai? Me vukei ira mera raica na ivakatakilakila e dodonu beka meda vaqara, lesi ira yadua na gone (se na ilala gone) mera wilika e vica na tikina mai na Vunau kei na Veiyalayalati 45 e vakamacalataka na ivakatakilakila eso oqo. Tikina e 26–27, 31–33, 40–42 e rawa ni vakayagataki, me kena ivakaraitaki. Mera wasea na gone na veika era sa kunea. Na ivakatakilakila cava beka mai vei ira oqo e sa yaco oti ena gauna oqo?

• Ena so na tiki ni pepa, vola eso na yalayala me baleta na veika ena yaco ena veisiga ni mataka o sa raica ena nomu vulica na wase 45. Eso na ivakaraitaki ni yalayala oqo ena rawa ni kune ena tikina e 44–45, 51–52, 55, 58–59, 66–71. Vola ena papa ni volavola na veitikina e laurai tiko kina na vosa ni yalayala. Solia vei ira na gone na tiki ni pepa, ka kerei ira me ra vakayagataka na nodra ivolanikalou me ra vakasotara kina na veitikina ena papa ni volavola ki na yalayala. Veitalanoataka na ibalebale ni yalayala eso oqo, ka sureti ira na gone me ra wasea se vosa ni yalayala cava e vukei ira mera nanamaki ki na iKarua ni Lako Mai ni iVakabula.

Vakauqeta na Vuli e Vale

Sureti ira na gone me ra vakasamataka e dua na ka era sa vulica ena gauna ni kalasi e rawa ni ra wasea vei ira na nodra matavuvale. Kerea e vica vei ira mera wasea ki na kalasi na veika era vinakata mera wasea e vale.

Vakatoroicaketaki na Noda Veivakavulici

Vukei ira na gone me ra kila ni sa tiko na Yalo. Ni o vakavulici ira na gone, tukuna vei ira ni ko sa vakila na Yalo Tabu. Talanoataka na ivakarau o dau vakadinadinataka kina na Nona iserau. Me kena ivakaraitaki, e rawa mo vakila na vakacegu se marau ni o lagata tiko e dua na sere me baleta na iVakabula. Ni ra sa kila rawa na mataqali yalo vaka oqo ena vukea me ra kila na gone ni sa tiko na Yalo.