10–16 ni Me.

Vunau kei na Veiyalayalati 49–50

Na Veika e Vu Mai Vua na Kalou e Veivakararamataki;

Ni o wilika na Vunau kei na Veiyalayalati 49–50, vaqara na itukutuku, se na ivakavuvuli o vakila ni na vakaibalebale vakalevu vei ira na gone o vakavulica. E vica era a vakatututaki ena ituvatuva oqo.

Vola na Veika o Vakauqeti Kina

Sureta na Veiwasei

Vakaraitaka na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka vukei ira na gone me veitalanoataki e ivakatawa ni sipi vinaka vakacava o Jisu Karisito.

Vakavulica na iVunau: Gone Sobu

Vunau kei na Veiyalayalati 49:12–14

Au rawa ni muri Jisu Karisito.

Vukei ira na gone me ra kila ni rawa ni ra muri Jisu Karisito ena nodra vakabauti koya, veivutuni, papitaiso, ka ciqoma na Yalo Tabu.

iTaviqaravi e Rawa ni Caka

• Vakabira e va na mawe ni yava pepa kei na va na iyaloyalo e matataka na vakabauti Jisu Karisito, veivutuni, papitaiso, ka ciqoma na Yalo Tabu. Wilika na Vunau kei na Veiyalayalati 49:12–14, ka kerei ira na gone me ra dusia na iyaloyalo dodonu ni ra cavuti yadua ena veitikina oqori. Me ra vukei iko na gone mo biuta na mawe ni yava ena fuloa kei na iyaloyalo me tikiva, ka sureti ira na gone me ra veivukevuke ena lako e na mawe ni yava. Wasea na nomu ivakadinadina ni da vakayacora na veika e tiko ena iyaloyalo oqo, eda sa muri Jisu Karisito.

• Vakayagataka na tabana ni itaviqaravi ena macawa oqo me caka kina na papeti ni iqaqalo ni liga e rawa ni vukei ira na gone mera vulica na muri Jisu Karisito ena vakabauta, veivutuni, papitaisotaki, ka ciqoma na isolisoli ni Yalo Tabu.

Vunau kei na Veiyalayalati 50:23–25

E rawa ni serau cake tikoga noqu rarama vakayalo.

Na vakasama sega ni rairai vaka na dina kei na yalo e rawa ni dredre vei ira na gone me ra kila na Yalo, ia ni vakatauvatani ki na rarama, me vaka e kitaka na Turaga ena Vunau kei na Veiyalayalati 50:23–25, e rawa ni veivuke.

iTaviqaravi e Rawa ni Caka

• Vakayagataka e dua na itaviqaravi ka rawa ni vakaraitaka na ivakarau e rawa ni serau cake tikoga kina na noda rarama vakayalo. E rawa ni o vakaraitaka na iyaloyalo ni veika e solia na rarama (me vaka na kadrala, dua na matanicina, kei na matanisiga) me ra qai tuvai ira na gone mai na kena e lailai duadua na kena rarama ki na kena e levu duadua. Se sureti ira na gone me ra vakatayaloyalotaka na cina e serau cake tikoga ena nodra cuva sobu qai tucake mai vakamalua ka dodoka cake na ligadra. Vukei ira me ra vakasamataka na veika vinaka e rawa ni ra cakava me serau cake kina na kedra rarama.

• Lagata kei ira na gone e dua na sere me baleta na nodra rarama vakayalo, me vaka na “Shine On” (Children’s Songbook, 144). Vakadinadinataka na sala sa vukea kina na Tamada Vakalomalagi na nomu rarama me tubu cake tikoga. Tukuna vei ira na gone me baleta na rarama o sa raica vei ira.

Vunau kei na Veiyalayalati 50:41–44

E lomani au o Jisu Karisito.

Na iVakatawa Vinaka o Jisu Karisito. Eda sa na Nona sipi, ka lomani keda yadua o Koya. Na cava ena vukei ira o vakavulica me ra vakila na Nona lomani ira?

iTaviqaravi e Rawa ni Caka

• Vakaraitaka e dua na iyaloyalo i Jisu Karisito vata kei ira na gone (raica na Gospel Art Book, naba 47, 84, se116), ka tarogi ira na gone era kila vakacava ni lomani ira o Jisu. Wasea se o kila vakacava ni lomani iko kei ira na vo ni gone ena kalasi ko Jisu.

• Cakava na sipi pepa, vola kina na yacadra na gone ena kalasi, ka vunitaki ira ena loma ni rumu. Vakaraitaka e dua na iyaloyalo ni iVakabula, ka wilika Vunau kei na Veiyalayalati 50:41–42. Vukei ira na gone mera kila na cava e vakavuvulitaki ena veitikina oqo ena veika e nanuma ko Jisu me baleti ira. Me ra kunea na sipi ena loma ni rumu ka biuta ena papa ni volavola volekata na iyaloyalo kei Jisu me “kua ni dua e yali” (tikina 42).

Vakavulica na iVunau: Gone Qase Cake

Vunau kei na Veiyalayalati 49:12–14

Au rawa ni muri Jisu Karisito.

E gadreva na Turaga vei keda kece meda vakavulici ira na tamata me ra gole yani Vua ena vakabauta, veivutuni, papitaiso, ka ciqoma na isolisoli ni Yalo Tabu.

iTaviqaravi e Rawa ni Caka

• Sureti ira na gone mera vakatauvatana na Vunau kei na Veiyalayalati 49:12–14 kei na veika e vakavulica o Pita ena Cakacaka 2:38 kei na ikava ni yavu ni vakabauta. Na cava soti era raica ni tautauvata? Na cava sa rui bibi kina na veika dina oqo?

• Sureti ira na gone mera cakacaka vata vakaitokani ka vakatakarakarataka ni dua vei rau e vinakata me kila na sala me muri Jisu Karisito kina. E rawa ni vakavulici koya na kena isa ni vakayagataka na Vunau kei na Veiyalayalati 49:12–14.

Vunau kei na Veiyalayalati 49:15–17

Na nodrau vakawati na tagane kei yalewa sa yaga ki na Nona ituvatuva na Kalou.

E rawa ni ra sotava na gone o vakavulica na itukutuku vakatubu veilecayaki me baleta na vakawati. NaVunau kei na Veiyalayalati 49:15–17 e rawa ni vukei ira me ra kila na lomana na Turaga me baleta na vakawati.

iTaviqaravi e Rawa ni Caka

• Vakamacalataka ni Lotu Seka e dua na ilawalawa e vakabauta ni sega ni dodonu me ra vakawati na tamata (raica na ulutaga ni wase ni Vunau kei na Veiyalayalati 49). Sureti ira na gone me ra raica na veika e vakavulica na Turaga me baleta na vakamau ena Vunau kei na Veiyalayalati 49:15–17.

• Vukei ira na gone me ra kila vakavinaka na ibalebale ni malanivosa na “sa ilesilesi va-Kalou na vakamau”. Sureti ira me ra cakacaka vata vakaitokani mera vakatauvatana na Vunau kei na Veiyalayalati 49:15–17 vata kei na imatai ni tolu na parakaravu ni “Na Matavuvale: Ai Vakaro ki Vuravura Raraba.” Na cava sa rui bibi kina vei Tamada Vakalomalagi na vakamau?

• Me lagati vata na ikarua ni qaqani “Matavuvale me Tawamudu Tu” (iVolanisere ni Gonelalai, 98) se dua tale na sere me baleta na matavuvale. Vukei na gone me ra vakasamataka na sala e rawa ni ra vakavakarau kina me ra vakamau ena valetabu ena dua na siga ka dua nodra matavuvale tawamudu.

  

  Nodrau vakamau e dua na tagane kei na yalewa sa ilesilesi ni Kalou.

Vunau kei na Veiyalayalati 50:40–46

Na iVakatawa Vinaka o Jisu Karisito.

NaVunau kei na Veiyalayalati 50: 40–46 e umani tu kina na ivakaraitaki ena rawa ni vukei ira na gone o vakavulica me ra kila na lomana na iVakabula me baleti ira.

iTaviqaravi e Rawa ni Caka

• Me dua na qito veivakasotari me vakayagataki kina na malanivosa mai na Vunau kei na Veiyalayalati 50:40–46. Me kena ivakaraitaki, e rawa mo vola “Dou kakua ni rere, na gonelalai” me na vakasotari kei na dua tale na kadi me volai kina “ni dou sa noqu” (verse 41). Wilika vata Vunau kei na Veiyalayalati 50:40–46 . Qai kumuna na kadi ena vuloa, ena dua na teveli, se vava ni volavola, ka kerei ira na gone me ra vakasotara vata na veimalanivosa. Na cava e vakavulica vei keda na italanoa eso oqo me baleti Jisu Karisito?

• Me vukei ira na gone me ra kila na sala e tautauvata kina na iVakabula kei na ivakatawa ni sipi vinaka, kerei ira mera wilika na Vunau kei na Veiyalayalati 50:40–46 vata. Qai vakaraitaka na vidio “Jesus Declares the Parable of the Lost Sheep” (ChurchofJesusChrist.org), ka kerei ira mera raica e dua na ka ena vidio ka vakananumi ira ena ka era sa wilika. E dau vueti keda vakacava o Jisu Karisito? E rawa vakacava me da ivakatawa vinaka vei ira tale eso?

Vakauqeta na Vuli e Vale

Vakarautaka e dua na itukutuku vei ira yadua na gone ena malanivosa oqo: Qai taroga vei au baleta na. Me ra vakalewena na gone na vanua lala ena dua na ka era sa vulica ena kalasi (vukei ira kevaka e gadrevi) ka vakapinitaka na itukutuku ena nodra isulu me vakauqeti kina na veivosaki mai vale.

Vakatorocaketaki Noda Veivakavulici

Moica na itaviqaravi me ganita nodra yabaki na gone o vakavulica. Ni ra sa tubu cake na gone, sa tu eso tale na ka mera solia ki na kalasi. Sa levu cake na veika era kila ka vinaka cake nodra wasea na nodra nanuma. Ni ko vakavulici ira na gone sobu, o na gadreva beka mo vakamacalataka vakalevu cake mai na nomu vakavulici ira na gone qase cake. Dau solia vei ira na gone e dua na madigi me ra vakaitavi ga vakai ira, ka vukei ira kevaka e gadrevi.