10–16 ni Me

Vunau kei na Veiyalayalati 49–50

“Na Veika Sa Mai Vua Na Kalou e Veivakararamataki”

“Kei koya sa ciqoma na rarama, ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga uasivi ko ya” (Vunau kei na Veiyalayalati 50:24). Vakasamataka vakatitobu na sala ko sa ciqoma tiko kina na rarama ni ko tomani iko tikoga vua na Kalou.

Vola na Veika o Uqeti Kina

Na iVakabula sai noda “ivakatawa vinaka” (Vunau kei na veiyalayalati 50:44). E kila tu o Koya ni so na gauna era dau lakosese na sipi ka sa levu tu ena lekutu na veivakaleqai. Sa dau liutaki keda o Koya ena loloma meda taqomaki ena Nona ivunau mai na veika rerevaki me vaka na “yalo e dauveivakacalai, era sa veilakoyaki voli e vuravura me ra vakacalai ira na kai vuravura” (Vunau kei na Veiyalayalati 50:2). Na noda muri Koya sa dau kena ibalebale meda biuta vakadua na veivakasama se itovo cala. A yaco dina oqo vei Limeni Kopeli kei na so tale mai Oaio ni ra sa ciqoma na kosipeli vakalesuimai ia era a se taura tikoga eso na vakabauta e sega ni dodonu. Ena Vunau kei na Veiyalayalati 49, a kaya na Turaga na dina a vakadodonutaka kina na vakabauta e liu nei Limeni me vakataka na ulutaga ni vakamau kei na iKarua ni Lako Mai ni iVakabula. Ia ena gauna era sa ciqoma kina na saumaki vou mai Oaio “na … yalo [era] sa sega ni kila,” sa vakavulica vei ira na Turaga na sala mera kila kina na ivakaraitaki dina ni Yalo (Vunau kei na Veiyalayalati 50:15). Na iVakatawa Vinaka a dauvosota; e kila o Koya ni o ira na Yalododonu taumada oqo—me vakataki keda kece—eda sa “gonelalai” meda “tubu cake ena loloma soli wale ka kila na ka dina” (Vunau kei na Veiyalayalati 50:40).

Vakasama ni Vuli iVolanikalou ni Tamata Yadua

Vunau kei na Veiyalayalati 49:5–23

Na dina ni kosipeli ena rawa ni vukei au meu kila kina na ivakavuvuli lasu.

Ni bera ni mai lewena na Lotu, a lewena tu o Limeni Kopeli e dua na ilawalawa vakalotu na yacana na United Society of Believers in Christ’s Second Appearing, e vakatokai talega na Shakers (raica na “Leman Copley and the Shakers,” Revelations in Context, 117–21). Ni oti na veivosaki kei Limeni, a kerea o Josefa Simici na veivakadodonutaki mai vua na Turaga me baleta eso na nodra ivakavuvuli na Shakers, a qai sauma mai na Turaga na ivakatakila ena wase 49.

Sa rawa mo raica eso na nodra vakabauta na Shakers e tukuni tiko ena ulutaga ni wase 49. Sa rawa mo makataka se vola na dina ena tikina e 5–23 a vakadodonutaka na vakabauta oya. Vakasamataka mada na ivakavuvuli lasu tale eso se na itovo e vuravura nikua. Na dina cava ni kosipeli ena rawa ni vukei iko mo taqomaki iko mai kina?

Vunau kei na Veiyalayalati 49:15–17

Na nodrau vakamau na tagane kei na yalewa sa yaga bibi ki na Nona ituvatuva na Kalou.

Na veika dina cava me baleta na vakamau o sa vulica mai na Vunau kei na Veiyalayalati 49:15–17? Na cava o nanuma kina ni nodrau vakamau e dua na tagane kei na dua na yalewa sa yaga bibi ki na ituvatuva nei Tamada Vakalomalagi? A vakaraitaka o Elder David A. Bednar e rua na vuna: iMatai ni Vuna: E rau na vakataucokotaki ka vakavinakataki sara vakairau na ituvaki vakayalo ni tagane kei na yalelwa, ka sa nakiti kina vei ira na tagane kei na yalewa me ra tubucake vakatautauvata me ra laki bula vakalou. … iKarua ni Vuna: Ena veibuli vakalou, oi rau ruarua na tagane kei na yalewa e gadrevi me rau vakasucuma mai na gone ki na bula oqo ka vakarautaka na ituvaki uasivi duadua sa vakarautaki kina me ra tuberi ka susugi cake kina na gone ” (“Marriage Is Essential to His Eternal Plan,” Ensign, June 2006, 83–84).

Raica talega na iVakatekivu 2:20–24; 1 Korinica 11:11; “Na Matavuvale: Ai Vakaro ki Vuravura Raraba,” Ensign se Liaona, Me 2017, 145.

Na nodrau vakamau e dua na tagane kei na dua na yalewa sa ilesilesi ni Kalou.

Vunau kei na Veiyalayalati 50

Na ivakavuvuli ni Turaga e rawa ni taqomaki au mai na veilawakitaki nei Setani.

Era a nanamaki o ira na saumaki vou mai Oaio me ra ciqoma na ivakaraitaki vakayalo e yalataki tu ena ivolanikalou, ia sa nanamaki talega o Setani me lawakitaki ira. Era a lomatarotaka kina, Ni dua e kaila se cibari koya, sai koya beka o ya na veivakauqeti ni Yalo?

Vakasamataka mada ni ko sa kerei mo vukei ira na saumaki vou oqo mera kila vinaka na sala mera kila kina na ivakaraitaki dina ni Yalo Tabu ka mera kakua ni lawakitaki ena veilasutaki nei Setani. Na ivakavuvuli cava o raica ena Vunau kei na Veiyalayalati 50 ena rawa mo wasea? (raica vakabibi na tikina e 22–25, 29-34, 40–46).

(Raica talega na 2 Timoci 3:13–17.

Vunau kei na Veiyalayalati 50:13–24

O ira na qasenivuli kei ira na gonevuli era sa vakatataki vata mai vua na Yalo.

E dua na sala o rawa ni vulica kina na Vunau kei na Veiyalayalati 50:13–24 o ya mo droinitaka e dua na iyaloyalo ni dua na qasenivuli kei na dua na gonevuli, ka vola ena dui yasadrau na vosa kei na malanivosa eso mai na veitikina oqo e vakavulica vei iko e dua na ka me baleta na vuli kosipeli kei na veivakavulici. Na cava beka o sa bau sotava a vakavulici iko kina baleta na bibi ni Yalo ena gauna ni veivakavulici kei na vuli? Raica mada na cava o rawa ni cakava me vakatorocaketaka nomu sasaga ni ko gonevuli ka qasenivuli.

Na Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 49:2.Na cava beka na ibalebale ni “gadreva mera kila vakatikina ga na dina, ka sega ni o koya taucoko”? Sa rawa mo vakaraitaka vakaveimama e dua na iyaloyalo ka mera vakilakila na lewe ni matavuvale se cava o ya. Na cava ena yaco ni da sa ciqoma vakatikina ga na ka dina? (raica na 2 Nifai 28:29). E veivakalougatataki vakacava vei keda na taucoko ni kosipeli?

Vunau kei na Veiyalayalati 49:26-28.Eda sa vakalougatataki vakacava ena yalayala ni Turaga “Au na liutaki kemudou ka muri tale ga; io au na tiko ena kemudou maliwa”? Sa rawa mera wasea na lewe ni matavuvale na gauna era a vakila kina na Turaga ni “sa liutaki [ira]” tiko se vakila ni sa tu o Koya “ena [kedra] maliwa.”

Vunau kei na Veiyalayalati 50:23–25.Sa rawa mo ni soqoni yani ena dua na rumu butobuto ka me wiliki na Vunau kei na Veiyalayalati 50:23–25 ka vakuria vakamalua cake na rarama ena kena waqaci na kadrala se tabaki vakaveitaravi yadua na cina. Sa rawa talega mo wilika na veitikina oqo ni saravi tiko na cadra mai ni matanisiga ena mataka. Na cava e rawa ni da cakava me tubu tikoga kina na noda rarama ni kosipeli? Ni ra vulica na lewe ni matavuvale e dua na ka vou me baleta na kosipeli ena loma ni macawa, vakayaloqaqataki ira me ra wasea ki na matavuvale ena nodra vola e dua na ivola ka vakabira ki na dua na cina dabe se eso tale na cina e vale.

Vunau kei na Veiyalayalati 50:40–46.Ni wiliki oti na Vunau kei na Veiyalayalati 50:40–46, sa rawa mo vakaraitaka na iyaloyalo ni iVakabula e salavata kei na ituvatuva oqo ka taroga na taro vakaoqo: O na kila vakacava ni iVakabula e lomani ira na sipi? Ena sala cava na iVakabula sa vaka kina e dua na ivakatawa vei keda? Na malanivosa cava soti mai na ivolanikalou e vakaraitaka tiko na vakasama ni iVakabula sa ikoya e dua na ivakatawa ni sipi ka da sa Nona sipi?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

E vakaturi tiko kina na sere: “Shine On,” Nodra Sere na Lalai,144.

Vakatorocaketaki Noda Veivakavulici

Mo vakarawarawataka. Na gauna uasivi ni veivakatavulici, vakabibi e vale, era sa dau nakiti ka sega ni namaki: e dua na kakana ni matavuvale ena rawa ni vakauqeta e dua na veivosaki me baleta na kana magiti ena vosa ni Kalou, ka yaco na uca kaukauwa me gauna ni kena vakadinadinataki kina na wai ni bula. Ke o sa vakavakarau tu vakayalo, sa rawa vua na Turaga me solia vei iko “ena gauna sara ga ko ya, na veika mo kaya” (Vunau kei na Veiyalayalati 100:6).

Na iVakatawa Yalovinaka, mai vei Kim Yongsung