Na Soqoni ni Keba, mai vei Worthington Whittredge

3–9 ni Me

Vunau kei na Veiyalayalati 46–48

“Vakasaqara Vagumatua na iSolisoli Uasivi Duadua”

Ni o wilika na Vunau kei na Veiyalayalati 46–48, vola na veivakauqeti o ciqoma. Sa rawa mo taroga, me vaka a kaya o Elder Richard G. Scott, “E tu tale beka eso na ka e dodonu meu kila?” (“Na Rawati ni Veidusimaki Vakayalo” Ensign se Liaona, Nove. 2009, 8).

Vola na Veika o Uqeti Kina

Ni ratou sa biuti Katiladi mai o Pali P. Pereta, Oliva Kaudari, Saiba Petesoni, kei Pita Witima Lailai ka gole yani ki na cakacaka tale eso, e ratou a biuta tu mai e sivia e dua na drau era sa saumaki oti ka ra tamata gugumatua dina ia e lailai nodra kila-ka se dusimaki. A sega ni dua na ivoladusidusi ni veivakasalataki, sega ni dua na soqoni ni veituberi ni veiliutaki, sega ni dua na kakaburaki ni koniferedi—na ka dina, a sega sara mada ga ni vuqa tu na ilavelave ni iVola i Momani me ra lako vata. E vuqa vei ira na vakabauta vou oqo era sa vakayarayarataki ki na kosipeli vakalesuimai sa yalataki kina na laurai ni cakacaka lagilagi ni Yalo, vakabibi na kena era sa kila ena kena vulici na Veiyalayalati Vou (raica, me vakataka na, 1 Korinica 12:1–11). Sega ni dede, eso na ivakaraitaki matalia ni sokalou—okati kina na lutu e ra se veidoloyaki vaka e dua na gata—sa tekivu yaco ena nodra soqoni ni Lotu. E vuqa a dredre sara mera kila rawa na cakacaka ni Yalo cava e dodonu kei na kena e sega. Ni sa raica o Josefa Simici na veilecayaki oqo, a masu me kerea na veivuke. Sa yaga vakakina nikua na nona isaunitaro na Turaga, ena gauna era cata se sega ni kauwaitaka kina na tamata na veika ni Yalo. A vakatakila na Turaga ni sa ka dina na ivakaraitaki ni cakacaka vakayalo ka ra sa vakamatatataki kina—na isolisoli mai vua na Tamada Vakalomalagi, ni “sa soli na veika oqo me yaga vei ira sa lomani [Koya] ka muria na [Nona] ivakaro kece sara” (Vunau kei na Veiyalayalati 46:9).

Vakasama ni Vuli iVolanikalou ni Tamata Yadua

Vunau kei na Veiyalayalati 46:1–6

Era sa kidavaki o ira kece era sa vakasaqaqara vagumatua mera mai sokalou ena Lotu ni Turaga.

E dodonu ki na veisoqoni ni Lotu i Jisu Karisito ni Yalododonu Edaidai me sa dua vei ira na soqoni veivakauqeti ka dauveikidavaki duadua e vuravura. Sa vakasalataki keda kina vakacava na Turaga ena Vunau kei na Veiyalayalati 46:1–6 ena sala meda dau ciqomi ira kina era gole mai ki na noda soqoni? Era dau yalo vakacegu beka o ira na nomu itokani kei ira ena nomu itikotiko raraba ni ra tiko ena nomuni veiqaravi ni sokalou ni tabanalevu? Na cava o sa cakava tiko me yaco na nomuni soqoni ni Lotu me vanua era via lesuva tale na tamata? Vakasamataka vakatitobu na sala e rawa ki na nomu sasagataka mo muria na Yalo Tabu ena soqoni ni Lotu me mana kina na veika o sotava.

Raica talega na 3 Nifai 18:22–23; Moronai 6:5–9; “Welcome,” vidio, ComeUntoChrist.org; “Religious Enthusiasm among Early Ohio Converts,” Revelations in Context, 105–11.

Vunau kei na Veiyalayalati 46:7–33

Sa solia na Kalou na isolisoli vakayalo me vakalougatataki ira kina na Luvena.

Era a vakabauta na Yalododonu taumada na isolisoli vakayalo ia era a gadrevi mera dusimaki ki na kedra inaki. Ni ko sa vulica na veika e baleta na isolisoli ni Yalo ena nomu vakayagataka na Vunau kei na Veiyalayalati 46:7–33, vakasamataka vakatitobu na vuna e bibi kina mo “dou dau [nanuma] tikoga na inaki era a soli kina” (tikina e 8). Sa rawa mo raica na sala era vakayagataki kina na veitikina oqo ki na itukutuku oqo mai vei Elder Robert D. Hales: “Sa soli na isolisoli oqo kivei ira era sa yalodina tiko vei Karisito. Era na vukei keda meda kila ka vakatavulica na dina ni kosipeli. Era na vukei keda meda vakalougatataki ira na tamata. Era na dusimaki keda lesu tale vua na Tamada Vakalomalagi” (“iSolisoli ni Yalotabu,” Ensign, Fepe. 2002, 16). Na cava o sa vulica mai na veitikina oqo me baleta na ivakaraitaki ni cakacaka vakayalo? Era na vukei iko vakacava na dina oqo mo “kakua ni vakacalai”? (tikina e 8).

Vakasamataka vakatitobu na cava so beka na nomu isolisoli vakayalo—kei na sala mo na vakayagataki ira kina “me yaga vei ira na luve ni Kalou” (tikina e 26). Kevaka e tiko nomu veivakalougatataki vakapeteriaki, ena rawa ni tukuna tiko na isolisoli sa soli vei iko.

Raica talega na Ulutaga Vakosipeli, “Spiritual Gifts,” topics.ChurchofJesusChrist.org.

Vunau kei na Veiyalayalati 47

E vinakata na Turaga na Nona Lotu me dau vola itukutuku.

Na nona a kacivi o Joni Witima me dau vola na ivolatukutuku ni Lotu sa mai tomani tiko kina e dua na nodra ivakarau tudei na dauvolaitukutuku vei ira na tamata ni Kalou (raica na 2 Nifai 29:11–12; Mosese 6:5; Eparaama 1:28, 31). Na kena dina, ni itutu ni Dauniitukutuku Makawa ni Lotu ka Dauvolaitukutuku se tu ga nikua. Na cava na vuna o nanuma kina ni kena maroroi tiko na itukutuku sa bibi sara vua na Turaga? Vakasamataka vakatitobu oqo ni ko wilika na Nona ivakamacala kivei Joni Witima baleta na ilesilesi oqo ena wase 47. Sa rawa mo raica talega na veika o ni sa sotava e gadrevi me volai. Me vakataka, na cava sa vakavulica vei iko na Turaga o gadreva me maroroi?

Ni ko vakasamataka vakatitobu na taro oqo, mo raica mada na veivakararamataki oqo mai vei o Elder Marlin K. Jensen ena Vitusagavulu, ka a veiqaravi vaka-Dauniitukutuku Makawa ni Lotu ka Dauvolaitukutuku mai na 2005 ki na 2012:

“Eda maroroya na itukutuku me vukea meda nanuma tiko. … Eda gadreva me ra vukei na lewe ni Lotu mera nanuma tiko na veika cecere sa cakava na Kalou vei ira na Luvena. … Na veilesoni sa oti era vukei keda meda bula rawata na noda siga nikua ka solia na inuinui ni noda veisiga ni mataka” (“There Shall Be a Record Kept among You,” Ensign, Dec. 2007, 28, 33).

Ni gadrevi mo vulica na cakacaka sa vakayacori tiko ena gauna oqo ena veidusimaki nei Dauniitukutuku Makawa ni Lotu, sikova na history.ChurchofJesusChrist.org.

A kacivi o Joni Witima me vola tiko na itukutuku ni Lotu.

Na Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 46:2–6.Na cava e rawa ni da cakava vakamatavuvale me rawa ni ra yalovakacegu o ira tale eso ena nodra mai tiko ena noda soqoni ni Lotu? (raica talega na 3 Nifai 18:22–23). Na iyaloyalo e salavata kei na ituvatuva oqo e rawa me ikuri ki na veivosaki oqo.

Vunau kei na Veiyalayalati 46:7–26.Na solisoli vakayalo cava eda raica tiko vei keda yadua? Ena rawa vakacava ki na isolisoli oqo me vakalougatataka na noda matavuvale?

Vunau kei na Veiyalayalati 47.E rawa vakacava mo vakayaloqaqataka na nomu matavuvale me ra vola na kedra itukutuku ena loma ni macawa? Sa rawa ni o wasea eso na itukutuku mai na nomu ivolaniveisiga se wasea e dua na italanoa ni dua na qase e liu (raica na FamilySearch.org). Eso na matavuvale era vakayagataka e vica na miniti ena veimacawa kivei ira yadua mera vola na nodra ivolaniveisiga. Sa rawa mo vakarautaka eso na veiuqeti ni ivolaniveisiga, me vakataka “Na cava a yaco ena macawa oqo o gadreva vei ira na makubumu mera na kila?” se “O a raica vakacava na liga ni Turaga ena nomu bula ena macawa oqo?” Sa rawa mera droinitaka na gonelalai na veika era sa sotava, se mo katona na veika era talanoataka tiko. Na veivakalougatataki cava e yaco mai ni maroroi tiko “e veigauna e dua na itukutuku”? (tikina e 1).

Vunau kei na Veiyalayalati 48.Era a vakaroti o ira na Yalododonu mai Oaio mera wasea na nodra qele kivei ira era sa gole tiko ki Oaio mai na tokalau kei Amerika. Na cava e rawa ni da wasea yani me sotavi kina na nodra gagadre eso?

Me baleta eso tale na vakasama ni nodra vakavulici na gonelalai, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

Sere e vakaturi: “Na Cakavinaka” (Serenilotu, naba 131).

Vakatorocaketaki Noda Veivakavulici

Vakayagataka na italanoa kei na ivakaraitaki Sa dau vakayagataka na Turaga na italanoa kei na vosa vakatautauvata me vakavulica kina na ivakavuvuli ni kosipeli. Vakasamataka na ivakaraitaki kei na italanoa mai na nomu bula e rawa ni vakayaco bula mai kina e dua na ivakavuvuli ni kosipeli ki na nomu matavuvale (raica na Veivakavulici ena iVakarau ni iVakabula, 22).

Sa solia na Tamada Vakalomalagi vei ira na Luvena na isolisoli vakayalo mera vakalougatataka na nodra bula na tamata.