iMatai ni Yatu, mai vei James Taylor Harwood

17–23 ni Me

Vunau kei na Veiyalayalati 51–57

“Sa Yalodina, ka Dodonu, ka Dauveiqaravi Vakavuku”

Na vulici ni ivolanikalou ena vukei iko mo kila na domo ni Turaga, ni a solia o Koya na ivolanikalou e na Yalona (raica na Vunau kei na Veiyalayalati 18:34–36).

Vola na Veika o Uqeti Kina

Me baleti ira na lewe ni Lotu ena 1830 vakacaca, na nodra vakasoqoni vata na Yalododonu kei na kena tarai cake na korolevu o Saioni sa ka vakayalo ka vakakina na cakacaka ni bula oqo, kei na vuqa na veika me vakadonutaki: Ena gadrevi e dua me volia ka veivotayaka na qele mera na vakaitikotiko kina na Yalododonu. Ena gadrevi e dua me tabaka na ivola kei na veivola tale eso. Ka dua e gadrevi me cicivaka e dua na sitoa me vakarautaka na kakana vei ira e Saioni. Ena ivakatakila sa volai tu ena Vunau kei na Veiyalayalati 51–57, sa lesia ka vakarautaka na Turaga eso na tamata mera qarava na cakacaka oqo, ka a raica o Koya na vanua o Inidipenideni, e Misuri, ni sa “koto ena loma donu” kei Saioni (Vunau kei na Veiyalayalati 57:3).

E dina ni kila-ka ena veika me vaka na kena voli na qele, tabaki ni ivola, ka cicivaki e dua na sitoa era sa yaga sara ki na cakacaka ni kena tarai cake o Saioni, na ivakatakila oqo era vakatavulica talega ni sa gadreva sara na Turaga vei ira na Nona Yalododonu mera sa bula kilikili vakayalo me rawa ni ra kacivi ni ra sa tamata kei Saioni. Sa kacivi keda yadua meda “sa yalodina, ka dodonu, ka dauveiqaravi vakavuku,” meda sa yalo malumalumu, ka “tudei[vaka] sara” na noda itavi sa lesi vei keda (raica na Vunau kei na Veiyalayalati 51:19; 52:15; 54:2). Kevaka eda rawa ni cakava oya—se cava ga na noda maqosa vakayago—sa rawa ni vakayagataki keda na Turaga meda tarai Saioni cake, ka cakava o Koya me “vakatotolotaka na tara ni koro ko ya” (Vunau kei na Veiyalayalati na 52:43).

Vakasama ni Vuli iVolanikalou ni Tamata Yadua

Vunau kei na Veiyalayalati 51

E vinakata na Turaga meu sa yalodina, ka dodonu, ka dauveiqaravi vakavuku.

Kevaka o a dua na lewe ni Lotu ena 1831, o na rairai rawa ni a sureti mo bulataka na lawa ni soli-ka ena nomu solia yani na veika o taukena ki na Lotu vei bisopi. Ena qai vakalesua yani vei iko o koya, ena vuqa na gauna, na veika o a solia, ka so na gauna ena vakalevutaki cake sara. Ia sa sega walega ni ka mo taukena—me sa nomu itavi mo qarava.

Nikua e sa duidui na kena iwalewale, ia na ivakavuvuli ni soli-ka kei na itavi ni dauveiqaravi era se ka bibi tikoga ki na cakacaka ni Turaga. Vakasamataka mada na vosa oqo nei Elder Quentin L. Cook: “Eda bula tiko ena gauna ni veivakararawataki oqo ka vuqa era vakabauta ni da sa sega ni soli itukutuku vua na Kalou ka sega ni noda itavi meda vakatawai keda se o ira na tamata. E vuqa e vuravura era sa caka nodra ga … [ka] sega ni vakabauta ni ra sa ivakatawa i tacidra. Ena Lotu, eda vakabauta ni cakacaka ni ivakatawa, e dua na veivakabauti tabu” (“Na Cakacaka ni iVakatawa—e Dua na Veivakabauti Tabu,” Ensign se Liaona, Nove. 2009, 91).

Ni o wilika na wase 51, vakasamataka na veika sa nuitaki iko kina na Kalou. Na cava na ibalebale ni vosa “dauveiqaravi” (tikina e 19) kei na “vakatabuya” (tikina e 5) kei na cava era tukuna tiko baleta na nanamaki ni Kalou vei iko? Na ivakavuvuli cava o raica ena wase 51 kei na vosa nei Elder Cook ni ra vakavulica vei iko na cava e kena ibalebale me dua sa dauveiqaravi? (raica vakabibi na tikina e 9, 15 – 20).

Raica talega na Maciu 25:14–30; na vidio “The Law of Consecration,” ChurchofJesusChrist.org.

Vunau kei na Veiyalayalati 52:14–19

Sa solia tu na Kalou e dua na ivakarau me levei kina na ivadi ca.

Me vaka ni vuqa na tamata era sa tukuna ni ra sa cakava tiko na ivakaraitaki vakayalo, era sa kauwai tiko na Yalododonu taumada ni sa rawa mera vakacalai. Era na kila vakacava o cei vei ira oqo “sa ciqoma na [Kalou]”? (tikina e 15). Ena Vunau kei na Veiyalayalati 52:14–19, sa solia na Turaga e dua na ivakarau e veivukei. O na vakayagataka vakacava na ivakarau oqo mo kila kina na itukutuku lasutaki e vuravura? Sa rawa talega mo vakayagataka na ivakarau oqo mo dikevi iko kina: ka rawa mo vakayagataka na malanivosa mai na veitikina oqo mo vola na taro vakaoqo “Niu dau vosa, au sa yalo bibivoro beka?”

Vunau kei na Veiyalayalati 54

Au sa rawa ni gole vua na Turaga ena gauna era vakamosia kina na yaloqu ena nodra digidigi eso.

Me tiki ni nodra vakasoqoni vata ki Oaio, e dua na ilawalawa ni Yalododonu a liutaki ira o Niueli Naiti mai Kolosivili, Niu Ioka, era a gadreva e dua na vanua mera na tiko kina. A dua tiko na qele levu ni iteitei nei Limani Kopeli e volekati Katiladi, ka sa yalataka o koya mera sa na mai tiko na Yalododonu ena nona vanua. Ia, oti ga vakalailai na nodra vakaitikotiko e kea, sa luluqa na vakabauta nei Kopeli, voroka na nona veiyalayalati, ka cemuri ira laivi na Yalododonu mai na nona vanua (raica na Yalododonu, 1:125–28).

Me vaka e volai tu ena wase 54, a kaya na Turaga vei Niueli Naiti na ka mera cakava na Yalododonu me baleta na leqa o ya. Na cava o sa kunea ena ivakatakila oqo e rawa ni vukei iko ena gauna o vakaleqai kina ni dua e voroka na nona yalayala se so na digidigi cala?

Na vanua ni teitei mai Oaio a yalataka o Limani Kopeli ki na Lotu.

Vunau kei na Veiyalayalati 56:14–20

Sa kalougata ko ira sa yalo savasava.

Ena veitikina oqo, e vosa tiko na Turaga vei ira na vutuniyau kei ira talega na dravudravua; ka rawa me ka taleitaki ni vakatauvatani na Nona ivakasala ki na rua na ilawalawa oqo. Na cava era tiko ena veitikina oqo o vakila ni baleti iko? E rawa vakacava nomu vakanamata tiko ki na iyau me “veveka” kina na yalomu? (tikina e 16). Na cava e kena ibalebale vei iko mo “yalo savasava” (tikina e 18) tiko me baleta na veika vakayago?

Raica talega na Jekope 2:17–21.

Na Vakasama me baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 51:9.Sa rawa mo cakava e dua na qito ena taleitaka na matavuvale, ni oti me qai veivosakitaki na kena rawa me duidui na qito ke dua a lawaki. Na cava na vuna e bibi kina meda dau “cakacaka vakadodonu” vakai keda? Ena vukei keda vakacava na noda cakacaka vakadodonu meda “duabau tiko”?

Vunau kei na Veiyalayalati 52:14–19.Ni ko ni veitalanoataka na ivakarau e vakamacalataki ena veitikina oqo, ena rawa ni marautaka na nomu matavuvale mera vakasaqara e so tale na ivakarau o vakayagataka—me vaka na ivakarau ni cula isulu se cakava e dua na cakacaka ni liga. Sa rawa mo ni cakacaka vata me caka e dua na ka mai na ivakarau o ya ni veivosakitaki tiko na ivakarau sa solia na Turaga me levei kina na ivadi ca.

Vunau kei na Veiyalayalati 53:1.Sa rawa mo wasea ki na nomu matavuvale na gauna me vakataki Sidini Kilipati, o a taroga kina na Turaga “me baleta na nomu ilesilesi.”

Vunau kei na Veiyalayalati 54:2; 57:6-7.Na cava na kena ibalebale me da “tudei sara” (Vunau kei na Veiyalayalati 54:2) ena ka e kerea vei keda na Kalou meda cakava? Sa rawa mo sureti ira na lewe ni matavuvale me ra tucake ka cavuta e dua na ka sa kerei ira kina na Kalou me ra cakava.

Vunau kei na Veiyalayalati 55.A vakayagataka vakacava na Turaga na rawa-ka nei Viliame Felepi ni sa dauvolaivola ka dautaba ivola? (me vakataka, raica na ituvatuva vakamatanivola ni o koya e vola mai ni ivolanisere me baleta e dua na lisi ni serenilotu a vola). Sa rawa ki na lewe ni matavuvale mera veivosakitaka na taledi kei na rawa-ka era raica vei ira vakayadua. Ena rawa vakacava ki na noda taledi me yaga ki na cakacaka ni Kalou?

Me baleta eso tale na vakasama ni nodra vakavulici na gonelalai, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

E vakaturi tiko na sere: “‘Give,’ Said the Little Stream,” Nodra Sere na Lalai, 236.

Vakatorocaketaki ni Vuli Yadudua

Me tiko e dua na nomu ivolaniveisiga ni vuli. Ena rawa me veivuke vei iko ni ko vakayagataka e dua na ivolalailai se na ivolaniveisiga mo vola kina na vakanananu, vakasama, na taro kei na nanuma e yaco mai ni ko vuli tiko.

Ciqoma Tiko O Bisopi Patereji na iSolisoli, mai vei Albin Veselka