21–27 ni June.

Vunau kei na Veiyalayalati 67–70

‘Yaga … na iYau Kecega ni Vuravura Taucoko,’”

E dina ga ni vuqa na ivakatakila ena Vunau kei na Veiyalayalati a baleti ira ga eso na tamata ena ituvaki a yaco kina, era sa “yaga ki na tamata kecega” (“iVakadinadina ni Tinikarua na iApositolo Ki na Dina ni Vola ni Vunau kei na Veiyalayalati,” na ivakamacala taumada ki na Vunau kei na Veiyalayalati). Ni o vulica, vakaraica na dina kei na ivakavuvuli sa yaga vei iko.

Vola na Veika o Uqeti Kina

Mai na 1828 ki na 1831, a ciqoma kina na parofita Josefa Simici e vuqa na ivakatakila mai vua na Turaga, ka oka kina na ivakasala vakalou ki na tamata yadua, na idusidusi ni kena liutaki na Lotu, kei na raivotu veivakauqeti ni siga edaidai. Ia e vuqa vei ira na Yalododonu era se bera ni wilika. Era a se bera ni tabaki na ivakatakila, kei na vica na ilavelave sa tu rawa sa volailiga tu ena draunipepa sa soli wavoki tiko ena kedra maliwa na lewenilotu ka ra sa kauta wavoki tiko na daukaulotu.

Ena Noveba, 1831, a kaciva kina o Josefa e dua na nodra bose na iliuliu ni Lotu me ra veivosakitaka na kena tabaki na ivakatakila. Ni ra sa vakasaqara na lewa ni Turaga, era sa lalawataka na iliuliu mera sa tabaka na iVola ni iVakaro—na ivurevure nikua ni Vunau kei na Veiyalayalati. Sa na totolo sara nodra na wilika na tamata vakai ira na vosa ni Kalou a vakatakilai mai vua na parofita, sa ivakadinadina matata ni “sa soli tale ki na tamata na idola ni veika vuni ni nona matanitu na noda iVakabula.” Ena vuku ni inaki oqo kei na vuqa tale eso, era sa vakadeitaka na Yalododonu ena gauna o ya vakakina nikua ni ivakatakila oqo ni sa “yaga … na iyau kecega ni Vuravura taucoko” (Vunau kei na Veiyalayalati 70, ulutaga ni iwase).

Raica na Yalododonu, 1:140–43.

Vakasama ni Vuli iVolanikalou ni Tamata Yadua

Vunau kei na Veiyalayalati 67:1–9; 68:3-6

Sa tokoni ira na Nona italai na Kalou kei na vosa era cavuta ena Yacana.

Na vakatulewa me tabaki na ivakatakila a ciqomi mai vei Josefa Simici e vaka me ka rawarawa, ia eso na iliuliu ni Lotu taumada era sega ni vakadeitaka ni vakasama vinaka. Dua na kauwai o ya ni sega soti ni vinaka na vosa nei Josefa Simici a vakayagataka me volai kina na ivakatakila. Na ivakatakila ena wase 67 a qai yaco mai me sauma na kauwai oqo. Na cava o vulica me baleti ira na parofita kei na ivakatakila mai na tikina e 1–9? Na ikuri ni veivakararamataki cava o rawata mai na 68:3–6?

Ni bera ni a tabaki na iVola ni iVakaro, era a sainitaka eso na iliuliu ni Lotu e dua na ivola ni ivakadinadina ni sa dina sara na ivakatakila ena ivola oqo. Ni gadrevi me raici na nodra ivakadinadina oqo, raica na “Testimony, circa 2 November 1831,” Revelation Book 1, 121, josephsmithpapers.org.

Vunau kei na Veiyalayalati 68:1–8

Na veivakauqeti mai vua na Yalo Tabu sa vakaraitaka tiko mai na lewa ni Turaga.

Na vosa mai na veitikina oqo a cavuti ena gauna a kacivi kina o Osoni Aidi kei na so tale mera “kacivaka yani na noqu kosipeli tawavakaiyalayala, ena Yalo ni Kalou bula, mai na dua na matatamata ki na dua tale na matatamata, ka vakakina mai na dua na vanua ki na dua tale na vanua” (tikina e 1). Ena rawa vakacava ki na ivakaro raraba ena tikina e 4 me vukea e dua sa talai yani me laki vunautaka na kosipeli? Ena taurivaki vakacava na vosa oqo vei iko? Vakasamataka mada e dua na gauna o a “vakauqeti ena Yalo Tabu” (tikina e 3) mo cavuta se cakava kina e dua na ka. Na cava o raica ena veitikina oqo ena rawa mo nuidei kina mo vakamuria kina na veivakauqeti vakayalo?

Vunau kei na Veiyalayalati 68:25–28

Sa nodra itavi na itubutubu me ra vakavulici ira na luvedra.

E vakavulica o Sister Joy D. Jones, na Peresitedi Raraba ni Lalai, “[E dua] na ki ni nodra vukei na itabagone me ra vorata na ivalavala ca sai koya me tekivu ni ra se gone sara me ra vulica na ivunau taumada ni kosipeli—mai na ivolanikalou, na Yavu ni Vakabauta, na ivolalailai Me iSakisaki ni iTabagone , sere ni Lalai, serenilotu, kei na noda dui ivakadinadina—oqori ena tuberi ira na gone vua na iVakabula” (“Ai Tabatamata Dau Vorata na iValavala Ca,” Ensign se Liaona, Me 2017, 88).

Me vaka ena Vunau kei na Veiyalayalati 68: 25–28, na cava soti eso na “ivunau taumada ni kosipeli” a vakamacalataka o Sisita Jones ni dodonu vei ira na itubutubu me ra vakavulici ira na luvedra? Na cava na vuna e soli kina na itavi bibi oqo vei ira na itubutubu? Na cava o na kaya vua e dua na itubutubu e nanuma ni sega ni vuku me vakavulica na veika oqo vei ira na luvena?

Raica talega na Tad R.Callister, “iTubutubu: Na Qasenivuli Taumada ni Kosipeli nei Luvedra,” Ensign se Liaona, Nove. 2014, 32-34

Na vuvale sai koya na vanua uasivi duadua vei ira na gone me ra vulica na kosipeli.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 67:10–14.E dau tarovi keda vakacava na vuvu, rere, kei na viavialevu meda toro voleka sara vua na Turaga? Na cava na vuna e sega kina ni rawa vua e dua sa “tovo vakayago” me tiko ena serau ni Turaga? (tikina e 12; raica talega na Mosaia 3:19). Na cava eda kunea ena veitikina oqo e vakauqeti keda meda “vosota tikoga me yacova [ni da] sa vinaka sara”? (tikina e 13).

Sa rawa talega me talevi lesu vakamatavuvale, na itukutuku nei Elder Jeffrey R. Holland “O Koya Mo Dou Qai Vinaka Sara—Vakaoti” (Ensign se Liaona, Nove. 2017, 40–42).

Vunau kei na Veiyalayalati 68:3–4.Sa rawa ki na matavuvale mera wasea na veika era sa sotava ka sa vaqaqacotaka na nodra vakabauta ni nodra vosa na italai ni Turaga sa “loma ni Turaga,” “sa nanuma ni Turaga,” ka sa “kaukauwa ni Kalou me ia kina na veivakabulai” (tikina e 4). Se sa rawa mera vakasaqara na itukutuku ni koniferedi raraba sa oti me baleta na ibolebole e rairai sotava tiko na nomu matavuvale.

Vunau kei na Veiyalayalati 68:25–35.Era umani tu ena veitikina oqo na ivakasala bibi vei ira “na lewei Saioni” (tikina e 26). Na cava eda sa vakauqeti meda vakatorocaketaka ni oti noda wilika na veitikina oqo? E rawa ni ka marautaki me caka eso na iyaloyalo era tukuna tiko na ivakavuvuli ena veitikina oqo ka veivuniyaka ena veiloma ni nomu vale. Oti o ya, ena veisiga e tarava ni dua sa kunea e dua na iyaloyalo, mo qai taura na gauna o ya me vakavulici kina na ivakavuvuli o ya. Na cava na vuna sa vanua vinaka duadua kina na itikotiko mera vulica kina na gone na veika oqo?

Vunau kei na Veiyalayalati 69:1–2.A talai yani o Oliva Kaudari ki Misuri vata kei na ivolavolai ena liga ni ivakatakila nei Parofita me laki tabaki, vata kei na ilavo me vukea me laki tauyavu e kea na Lotu. Na ivakasala cava a solia na Turaga ena tikina e 1 me baleta na ilakolako nei Oliver? Na cava na vuna e bibi kina meda tiko vata kei ira na tamata era “dina ka yalododonu”? (tikina e 1). Ena gauna cava so era sa uqeti keda kina na itokani meda vakatulewa vinaka se ca? E rawa vakacava meda veivakauqeti vinaka vei ira tale eso?

Vunau kei na Veiyalayalati 70:1–4.A solia na Turaga vei ira eso na italatala qase na ilesilesi mera raica raraba tiko na tabaki ni ivakatakila. E dina ga ni sega vei keda na itavi digitaki o ya, ena vakasama cava eda sa rawa ni okati meda “veiqaravi ena ivakatakila kei na ivakaro”? (tikina e 3).

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere sa vakaturi: “Vale me Vaka mai Lagi,” Serenilotu, naba 181.

Vakatorocaketaki ni Noda Veivakavulici

Bulataka na ivolanikalou ena noda bula. Ni wiliki oti na malanivosa ni ivolanikalou, sureti ira na lewe ni matavuvale mera vakayagataka ena nodra bula. Me vakataka, ni sa rawa mo sureti ira me ra vakasamataka na veika vata oqo era na rawa ni sotava e taurivaki kina na ivakavuvuli ni kosipeli vata ga.

Na iVola ni iVakaro, na ivurevure ki na Vunau kei na Veiyalayalati, a tabaki ena tabaivola me vakataka oqo.