Daviess County, Misuri

14–20 ni June.

Vunau kei na Veiyalayalati 64–66

“Sa Gadreva na Turaga na Yalo kei na Vakasama sa Vakarau Tu”

E kaya o Peresitedi Henry B. Eyring: “Au dau lako vakawasoma ki na ivolanikalou ena taro ‘Na cava e vinakata na Kalou meu cakava?’ se ‘Na cava e vinakata o Koya meu dau vakila?’ Au dau raica ena veigauna na vakasama kei na vakanananu eso au se sega ni sotava eliu” (“How God Speaks to Me through the Scriptures,” Feb. 6, 2019, blog.ChurchofJesusChrist.org).

Vola na Veika o Uqeti Kina

Ena draki katakata ni Okosita, 1831, era a gole lesu tiko eso na italatala qase ki Katiladi ni oti na dikevi ni vanua o Saioni e Misuri ena veidusimaki ni Turaga. E a sega ni lakolako vinaka. O ira na lako—o Josefa Simici, Oliver Cowdery, Sidney Rigdon, Ezra Booth, kei na so tale—a katakata sara ka oca, ka sa vuki na lomakatakata ki na veiba. E a rairai toka na kena taraicake o Saioni, e dua na korolevu ni loloma, duavata, kei na vakacegu, ena taura tu e dua na gauna balavu.

Ka ni marau, na taraicake i Saioni—e Misuri ena 1831 se ena lomada kei na veitabanalevu nikua—e sega ni gadreva meda uasivi vakaoti. Ia, “koi kemudou sa gadrevi mo dou vosota,” a kaya na Turaga (Vunau kei na Veiyalayalati 64:10). Sa gadreva o Koya “na yalo kei na vakasama sa vakarau tu” (tikina e 34). Ka sa gadreva o Koya na yalovosota kei na gugumatua, ni sa tara o Saioni ena yavu ni “veika lalai,” era a vakataucokotaka o ira ka sega “ni oca ena cakacaka vinaka” (tikina e 33).

Raica talega na Yalododonu, 1:133–34, 136–37.

Vakasama ni Vuli iVolanikalou ni Tamata Yadua

Vunau kei na Veiyalayalati 64:1–11

Sa gadrevi meu na vosota na tamata kecega.

Ni o wilika na Vunau kei na Veiyalayalati 64:1–11, vakasamataka mada e dua na gauna a vosoti iko kina na Turaga. O na rairai vakasamataka talega e dua o gadreva tu mo vosota. E vakayacora vakacava na loloma ni iVakabula ki na veika o vakila tu me baleti iko kei ira tale eso? Na cava o nanuma e vakaroti keda kina na Turaga meda “vosota na tamata kecega”? (tikina e 10). Kevaka o sotavi dredre mo vosota, navuca na ka e vakavulica na ivurevure eso oqo ena sala e rawa ni veivuke kina na iVakabula: Jeffrey R. Holland, “Na Veiqaravi ni Veivakaduavatataki,” Ensign se Liaona, Nove. 2018, 77–79; Na iDusidusi ki na iVolanikalou, “Veivosoti,” scriptures.ChurchofJesusChrist.org.

Vunau kei na Veiyalayalati 64:31–34

Sa gadreva na Kalou na yaloqu kei na vakasama sa vakarau tu.

O sa bau vakila beka na “oca” ena “caka vinaka” taucoko o saga tiko mo rawata? Vakasaqara na itukutuku ni Turaga vei iko ena Vunau kei na Veiyalayalati 64:31–34. Na cava na kena ibalebale mo solia na “yalomu kei na vakasama sa vakarau tu” vua na Kalou? (tikina e 34).

Vunau kei na Veiyalayalati 64:41–43

Ena yaco o Saioni me “dua na drotini vei ira na tamata.”

Na drotini sai koya “e dua na kuila se ivakatagedegede era soqoni vata yani kina na tamata ena duavata ni inaki se ivakatakilakila” (iDusidusi ki na iVolanikalou, “Drotini,” scriptures.ChurchofJesusChrist.org). Sa yaco vakacava o Saioni—se na Lotu ni Turaga—me vaka e dua na drotini vei iko? Vakasamataka eso tale na ivakaraitaki oqo ni veika e dau laveti cake, me vaka na drotini, me vakalougatataki ira na tamata: Na Tiko mai na Lekutu 21:6–9; Maciu 5:14–16; Alama 46:11–20. Na cava e vakavulica vei iko na veitikina oqo ena sala o rawa ni vukea kina na Lotu me dua na drotini ena vanua o vakaitikotiko kina? Raica eso tale na sala e vakamacalataki Saioni kina na Turaga ena Vunau kei na Veiyalayalati 64:41–43.

E Laveta O Kavetani Moronai na Drotini ni Bula Galala, mai vei Gary E. Smith

Vunau kei na Veiyalayalati 65

“Dou caramaka na sala ni Turaga”

E vakamacalataki Joni na Dauveipapitaisotaki o Maciu ni sa dua ka kacikaci tiko, “Dou caramaka na sala ni Turaga” (Maciu 3:3; raica talega na Aisea 40:3). Ena Vunau kei na Veiyalayalati 65, sa vakayagataka na Turaga na vosa vakatautauvata oqo me vakamacalataka kina na Nona cakacaka ena gauna oqo. Na veika vakatautauvata cava o raica ena ka e cakava o Joni na Dauveipapitaisotaki (raica na Maciu 3:1–12) kei na ka e vinakata na Turaga meda cakava nikua? Na cava o raica ena ivakatakila oqo e vakauqeti iko mo veivuke ena kena vakataucokotaki na parofisai eso e tiko kina? Vakasamataka vakatitobu na sala eso o rawa ni “tukuna yani na cakacaka [ni Kalou] e veivakurabuitaki vei ira na tamata” (tikina e 4).

Vunau kei na Veiyalayalati 66

Sa kila tu na Turaga na nanuma ni lomaqu.

Ni oti ga vakalailai na leweni ni Lotu, a kerea o William E McLellin vei Josefa Simici me vakatakila na loma ni Kalou me baleti koya. A sega ni kila o Josefa, ni a lima na vakatataro nei Viliame ka a nuitaka ni na sauma na Turaga mai vua na Nona Parofita. Eda sega ni kila na vakatataro cava so nei Viliame, ia eda sa kila na ivakatakila a vagolei vua, oqo na Vunau kei na Veiyalayalati 66, sa sauma na taro vakayadua ki na “lomavakacegu vakataucoko” i Viliame (“William McLellin’s Five Questions,” Revelations in Context, 138).

Ni o wilika na wase 66, vakasamataka na ka a kila tu na Turaga me baleti Viliame Makilelini kei na kauwai kei na inaki eso ni lomana. E sa vakatakila vakacava na Turaga ni kilai iko? Ke tiko na nomu veivakalougatataki vakapeteriaki, navuca mo vulica. Ni ko vakayacora, na cava e vukei iko kina na Yalo Tabu mo kila vakamatata na loma ni Kalou kivei iko?

Raica talega na Yalododonu, 1:138–40; Ulutaga Vakosipeli Eso, “Veivakalougatataki Vakapeteriaki,” topics.ChurchofJesusChrist.org.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 64:8–10.Na veimaliwai vakamatavuvale sa vakarautaka e vuqa na madigi me vulici kina na veivosoti. De na rawa mera veivosakitaka na lewe ni matavuvale na sala esa vakalougatataka kina na nomu matavuvale na nodra veivosoti vakai ira. E sa vukei keda vakacava na iVakabula meda veivosoti vakaikeda? Eda “vakararawataki” vakacava (tikina e 8) ni da sega ni vosoti ira na tani?

Vunau kei na Veiyalayalati 64:33.Na cava e vinakata na Tamada Vakalomalagi me cakava na nomu matavuvale me rawati kina na Nona “cakacaka cecere”? Rairai beka na gole tu ki na valetabu, wasei ni kosipeli ki na dua na wekamu, se na valuti ni veileti. De na rawa ni ra soqona mai na lewe ni matavuvale yadua na veika lalai, vakataka na vatu se bulukau se tiki ni qito lalai eso, ka vakayagataki ira me matataka na “veika lalai” eda rawa ni cakava ena veisiga me “[tuva] tiko na yavu” ni cakacaka cecere ni Kalou. Digitaka vakamatavuvale e dua vei ira na ka lalai oqo me cakacakataki ena macawa oqo.

Vunau kei na Veiyalayalati 66:3.O na vakavulica vakacava na bibi ni veivutuni? Sa rawa mo vakarautaka e dua na peleti kakana e savasava ga vakalailai ka wilika na vosa ni Turaga vei William McLellin: “Ko sa savasava, ia sa sega ni taucoko sara.” Mo qai vakasavasavataka na peleti ka wasea na kakana ni veivosakitaki tiko na sala sa rawata kina o Jisu Karisito meda savasava vakayalo.

Vunau kei na Veiyalayalati 66:10.E rawa vakacava me muria na nomu matavuvale na ivakasala ni Turaga mera “kakua ni vakaosoosotaki [ira],” se lomaocaoca ena veika e vuqa me caka? Sa rawa ni o tukuna na italanoa i Meri kei Marica (raica na Luke 10:38–42), ka veivosakitaka na sala me kakua ni vakaosoosotaki kina na nomu matavuvale ena veika tawayaga tawamudu.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere vakaturi: “Ni Vukei Au Mai Noqu Kalou,” iVolanisere ni Gonelalai, 52.

Vakatorocaketaki ni Noda Veivakavulici

Dau tiko ka veitaratara vakarawarawa. Eso na gauna uasivi ni veivakatavulici e tekivu vaka taro se kauwai eso ena lomadra na lewe ni matavuvale. Raica me ra kila na lewe ni nomu matavuvale mai na nomu vosa kei na ivalavala ni ko vinakata tu mo rogoci ira. (Raica na Veivakavulici ena iVakarau ni iVakabula,16.)

Sa Vosoti, mai vei Greg K. Olsen. Vakayagataki ena veivakadonui. www.GregOlsen.com