Talei Vua na iVakatawa, mai vei Simon Dewey

28 ni June–4 ni Jiulai

Vunau kei na Veiyalayalati 71–75

“Ena Sega ni Rawata E Dua na Ka na iYaragi Kecega Sa Caka me Saqati Kemudrau”

E a vakavulica o Elder Quentin L. Cook, “Na veivakayarayarataki ni Yalo Tabu e dau salavata kei na vuli ivolanikalou ni tamata yadua kei na masumasu ena itikotiko” (“Saumaki Titobu ka Tudei vei Tamada Vakalomalagi kei na Turaga o Jisu Karisito,” Ensign se Liaona, 2018 ni Nove. 2018, 10).

Vola na Veika o Uqeti Kina

Tekivu mai na gauna a se gonetagane kina, a sotavi ira na dauvakalelewa o Josefa Simici—ira na meca—ni a saga tiko okoya me cakava na cakacaka ni Kalou. Ia e a rairai vakamosiyalo vakabibi ena mua ni 1831 ni a tekivu vosavakacacataka raraba na Lotu o Esera Buci, baleta na dauvakalelewa oqo e a dua na tamata vakabauta e liu. E a raici Josefa o Esera ni vakayagataka na kaukauwa ni Kalou me vakabula kina e dua na yalewa. E a sureti okoya me tomani Josefa e na imatai ni kena vakadikevi na vanua o Saioni e Misuri. Ia a sa mai yali na nona vakabauta ka, ena nona tovolea me vakaucacataka na Parofita, e a tabaka e dua na itabaivola veitaravi ena dua na niusipepa e Oaio. Ka vaka me mana tiko na nona sasaga eso ena: “maliwa ca sa basika ka saqati kina na Lotu” ena yasana oya (Vunau kei na Veiyalayalati 71, ulutaga ni iwase). Na cava e dodonu mera cakava na tamata vakabauta ena dua na kisi vaka o ya? Me vaka ni sega ni dua na isaunitaro dodonu ena vei ituvaki kece sara, e kena irairai ni vakawasoma—oka kina na kena oqo ena 1831—e sa tiki ni isaunitaro ni Turaga oya meda taqomaka na dina ka vakadodonutaka na veika lasu ena kena “vunautaki na … kosipeli” (tikina 1). Io, era na dau tu ga na dauvakalelewa ena cakacaka ni Turaga, ia e muri, “ena sega ni rawata e dua na ka na iyaragi kecega sa caka me [saqata]” (tikina e 9).

Raica na “Esera Buci kei Aisake Moli,” Revelations in Context, 134.

Vakasama eso ni Vuli iVolanikalou ni Tamata Yadua

Vunau kei na Veiyalayalati 71

Na Turaga ena vakasesei ira na dauvakalewa na Nona cakacaka ena Nona gauna ga.

Eda na kauwai beka ni da rogoca eso ni ra vakalewa se vosavakacacana tiko na Lotu se o ira na kena iliuliu, vakabibi ni da ririkotaka de ra na qai vakayarayarataki ena vakalelewa oya o ira eso eda kila ka lomana. Ni a yaco e dua na ka vakaoqo e Oaio ena 1831 (raica na ulutaga ni iwase ni Vunau kei na Veiyalayalati 71), na itukutuku ni Turaga vei Josefa Simici kei Sidini Rikitoni e a dua me baleta na vakabauta, sega ni rere. Ni o vulica na Vunau kei na Veiyalayalati 71, na cava beka o raica e taracake na nomu vakabauta na Turaga kei na Nona cakacaka? Na cava e vakurabuitaki iko me baleta na ivakaro ni Turaga ka a solia vei ira na Nona italai ena ituvaki oqo?

Raica talega na Robert D. Hales, “Na Yaloqaqa Vakarisito: Na iSau ni Bula Vakatisaipeli,” Ensign se Liaona, Nove. 2008, 72–75; Jörg Klebingat, “Taqomaka na Vakabauta,” Ensign, Sepi. 2017, 49–53.

Vunau kei na Veiyalayalati 72

Era sa dauveiqaravi na bisopi ena veika vakayalo ka vakayago ena matanitu ni Turaga.

Ni a kacivi o Niueli K. Witini me veiqaravi vaka ikarua ni bisopi ena Lotu, a duidui vakalailai na nona itavi eso mai vei ira na bisopi edaidai. Me ivakaraitaki, a raica raraba o Bisopi Witini na vakatabui ni iyau kei na veivakadonui mera vakaitikotiko e Misuri, ena vanua ko Saioni. Ia ni o wilika me baleta na nona ilesilesi kei na itavi ena Vunau kei na Veiyalayalati 72, o na raica beka eso na isema ki na veika era qarava na bisopi nikua—na veika vakayalo mada ga, ke sega so na kena matailailai eso, ni nodra itavi. Me ivakaraitaki, na sala cava so o dau “tukunikatak[i] itukutuku” kina vua na nomu bisopi? (tikina e 5). Ena ivakarau cava beka e dau “vakatawana na nona lololo na Turaga” ka vakatulewataka na isolisoli eso ni lewe ni tabanalevu na nomu bisopi? (raica na tikina e 10, 12). E sa vukei iko beka vakacava e dua na bisopi?

Raica talega na Gospel Topics, “Bishop,” topics.ChurchofJesusChrist.org.

E a lewa na lololo ni bisopi o Niueli K. Witini.

Vunau kei na Veiyalayalati 73

Au rawa ni vaqara na madigi meu wasea kina na kosipeli.

Ni oti na nodrau lesu mai o Josefa Simici kei Sidini Rikitoni mai na nodrau kaulotu lekaleka me rau vakavinakataka eso na veivakacacani a cakava o Esera Buci (raica na Vunau kei na Veiyalayalati 71), a tukuna vei rau na Turaga me rau lesu tale ki na cakacaka ni kena vakadewataki tiko na iVolatabu (raica na Bible Dictionary, “iVakadewa ni Josefa Simici”). Ia a vinakata talega oKoya me rau vunautaka tikoga na kosipeli. Ni o wilika na Vunau kei na Veiyalayalati 73, vakasamataka na sala o rawa ni cakava mo “rawa kina” ni vunautaka tikoga na kosipeli, (tikina e 4)—se me vakaidina sara—me tiki ni nomu bula ena maliwa ni nomu itavi tale eso.

Vunau kei na Veiyalayalati 75:1–12

Na Turaga e dau vakalougatataki ira era vunautaka na Nona kosipeli ena yalodina.

Ena nodra malele tiko ki na ivakaro me “dou lako yani ki vuravura taucoko” me vunautaka na kosipeli (Vunau kei na Veiyalayalati 68:8), e vuqa na italatala qase yalodina a vakasaqara na ikuri ni ivakamacala me baleta na sala e vinakata kina na Turaga mera vakamuria na ivakaro oqo. Na veivosa kei na malanivosa cava soti o raica ena Vunau kei na Veiyalayalati 75:1–12 e veivuke mo kila na ivakarau me vunautaki kina vakavinaka na kosipeli? Na veivakalougatataki cava e yalataka na Turaga vei ira na daukaulotu yalodina? Vakasamataka na sala ena yaga kina vei iko na ivakasala kei na veivakalougatataki oqo ni o wasea na kosipeli.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 71.Na cava a kerei vei Josefa Simici kei Sidini Rikitoni me rau cakava ena gauna era a vakalewa tiko kina na Lotu kei ira na kena iliuliu na tani? Na cava meda cakava me “vakarautaka na sala” me baleti ira na tamata me ciqoma na ivakatakila ni Kalou? (Vunau kei na Veiyalayalati 71:4).

Vunau kei na Veiyalayalati 72:2.Era sa vakalougatataka vakacava na noda matavuvale na bisopi? Na cava e sa kerea vei keda na noda bisopi meda cakava, ka da na tokoni koya vakacava? Ena rawa beka ni cakava nomu matavuvale e dua na kadi me vakavinavinakataki kina nomu bisopi me baleta na nona veiqaravi.

Vunau kei na Veiyalayalati 73:3–4.Ena yaga beka ki na nomu matavuvale me vulica baleta na iVakadewa ni iVola Tabu nei Josefa Simici? (raica na Bible Dictionary, “iVakadewa nei Josefa Simici”). O na rawa ni vakaraica e vica na malanivosa ka sa vakavoui ena iVakadewa nei Josefa Simici ka veivosakitaka na dina talei eso a vakatakila mai vua na parofita na Turaga. Ena so na ivakaraitaki, raica na iVakadewa nei Josefa Simici ena Nai Vakatekivu 14:25–40 and Nai Vakatekivu 50:24–38 ena Bible appendix; eso na ivakamacala e ra ena Maciu 4:1–11; kei na Luke 2:46, ivakamacala e ra c.

Vunau kei na Veiyalayalati 74:7.Na cava e vakavulica vei keda na tikina oqo me baleti Jisu Karisito kei ira na gone lalai?

Vunau kei na Veiyalayalati 75:3–5, 13, 16.E rawa ni o vukea nomu matavuvale me kila vakavinaka na sala e vinakata kina na Turaga meda qaravi Koya ena kena veitalanoataki na duidui ni “vakawelewele” kei na “cakacaka vagumatua sara.” Ena rawa beka ni o digitaka eso na itavi e vale ka sureti ira na lewe ni matavuvale me vakaraitaka na qaravi ni itavi eso oqori ena vakasavuliga ka qai qarava ena nodra igu taucoko. Eda na qarava vakacava na Turaga ena noda igu taucoko? Me vaka e volai ena Vunau kei na Veiyalayalati 75:3–5, 13, 16, na cava e yalataka oKoya vei ira na Nona italai yalodina?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Me Da Sa Gu Tiko,” Serenilotu, naba 146.

Vakavinakataki ni Vuli Yadudua

Vakaraica na veivosa kei na malanivosa veivakauqeti. Ni o wilika tiko, ena rawa ni kauta mai vakavoleka sara vei iko na Yalo eso na vosa se malanivosa. Vakasamataka mo vola toka na veivosa se malanivosa mai na Vunau kei na Veiyalayalati 71–75 e vakauqeti iko.

Na ivakaraitaki ni dua na cauravou kei na dua na iliuliu ni matabete mai vei D. Keith Larson