iVakaruru, mai vei Shaelynn Abel

5–11 ni Jiulai

Vunau kei na Veiyalayalati 76

“Ena Vakaitamera na Kedra iSau ka Tawamudu na Nodra Lagilagi”

A vakaraitaka na Turaga ena wase 76, na levu ni Nona vinakata me vakatakila na dina kivei keda (raica na tikina e 7–10). Wilika na ivolanikalou ena vakabauta ni rawata ka na vakatakila dina oKoya vei iko “na veika vuni ni Kalou” (tikina e 12) o gadreva mo kila. Qai vola na vei raititobu o ciqoma “ni sa tiko ga kei [iko] na Yalo” (tikina e 28, 80, 113).

Vola na Veika o Uqeti Kina

“Na cava ena yaco vei au ni’u sa mate oti?” Voleka ni vei matalotu e vuravura era vunauca na taro oqo ena ivatukana eso se dua tale. Ena veisenitiuri sa oti, era a dau vakavulica e vuqa na vakabauta Vakarisito, ni ra vakararavi tiko ena ivakavuvuli vakaivolatabu, me baleti lomalagi kei eli, na parataisi me baleti ira na ivalavala dodonu kei na rarawa me baleta ira na ivalavala ca. Ia ena rawa beka ni ra vidai vakaukauwa sara na matavuvale ni kawatamata taucoko ki na vinaka kei na ca? Ka na cava sara mada na ibalebale ni vosa lomalagi ? Ena Feperueri 1832, erau a vakananuma o Josefa Simici kei Sidini Rikitoni kevaka e a so tale na ka me kilai ena ulutaga oqo (raica na Vunau kei na Veiyalayalati 76, ulutaga ni iwase).

E a tiko dina. Ni rau vakasamataka tiko vakatitobu na veika oqo, na Turaga e a “tara na mata ni [nodrau] vakanananu … ka sa tadola kina” (tikina e 19). Erau a ciqoma o Josefa kei Sidini e dua na ivakatakila e veivakurabuitaki sara, rabailevu sara, veivakararamataki sara, ni ra vakatoka sara ga kina na Yalododonu me “na Raivotu.” E a tadolava kina na katuba i lomalagi, ka solia vei ira na luve ni Kalou e dua na rai tadodo vaka-vakasama ni bula tawamudu. A vakatakilai ena raivotu oqo ni lomalagi e sa cecere ka rabailevu ka veiokati vakalevu cake mai na ka era a nanuma taumada e vuqa na tamata. Na Kalou e yalololoma ka dodonu vakalevu sara mai na veika eda kila rawa. Ka sa noda na luve ni Kalou e dua na icavacava tawamudu e lagilagi cake sara mai na veika eda vakananuma rawa.

Raica na Saints, 1:147–50; “The Vision,” Revelations in Context, 148–54.

Vakasama eso ni Vuli iVolanikalou ni Tamata Yadua

Vunau kei na Veiyalayalati 76

Na veivakabulai e lako mai ena vuku i Jisu Karisito, na Luve ni Kalou.

Ni a wilika o Wilivote Uturavu na raivotu e vakamacalataki tiko ena wase 76, a kaya kina okoya, “Au vakila meu lomana na Turaga vakalevu cake sara ena noqu bula” (raica na “Domo ni Veivakalesui mai” ena mua ni ituvatuva oqo). O na rairai vakila talega oqori ena nomu wilika na ivakatakila oqo. Me itinitini, ena sega ni rawati e dua vei ira na veivakalougatataki lagilagi e vakamacalataki ena wase 76 ke sega na iVakabula. O na rawa beka ni vakatakila yadua na tikina ena wase 76 e vakamacalataka tiko na Turaga o Jisu Karisito. Na cava era vakavulica vei iko na veitikina oqo me baleti Koya kei na Nona itavi ena ituvatuva ni Kalou? Era vakayarayarataka vakacava na veika o nanuma me baleti koya? Ni o wilika ka vakasamataka vakatitobu, o na rawa beka ni vakauqeti me baleta na sala o na rawa kina ni “[rogoca] na ivakadinadina kei Jisu” ka mo “gumatua” cake kina (tikina e 51, 79).

Vunau kei na Veiyalayalati 76:39–44, 50–112

E gadreva na Kalou me vakabulai “ira kece na ibulibuli ni ligana.”

Eso na tamata, oka kina eso na lewe ni Lotu taumada, era a saqata na raivotu e tiko ena wase 76 baleta ni vakavulica ni voleka ni tamata kecega ena vakabulai ka ciqoma eso na vanua ni lagilagi. Na nodra saqata e vu beka, vaka tikina, mai na dua na nanuma cala me baleta na Kalou kei na Nona veiwekani vata kei keda. Ni o wilika na ivakatakila oqo, na cava o vulica me baleta na itovo ni bula ni Kalou kei na Nona ituvatuva me baleti ira na Luvena?

Vakasamataka na kedrau duidui na noda vakabulai (mai na mate vakayago kei na vakayalo; raica na tikina e 39, 43–44) kei na bula vakacerecerei (bula vata kei na Kalou ka yaco me vakataki Koya; raica na tikina e 50–70).

Raica talega na Joni 3:16–17; Vunau kei na Veiyalayalati 132:20–25.

Vunau kei na Veiyalayalati 76:50–70, 92–95

E vinakata na Tamaqu Vakalomalagi meu rawata na bula tawamudu ena matanitu vaka silesitieli.

O sa bau lomatarotarotaka li—se lomaleqataka—me baleta na nomu rawata se sega na matanitu vaka-silesitieli? Ni o wilika na ivakamacala me baleti ira era ciqoma na lagilagi oqo (raica na tikina e 50–70, 92–95), vakaraica na veika a vakayacora na Kalou—ka sa cakava tiko—me vukei iko mo yaco me vakataki Koya ka sega ena nomu vakaraica wale tikoga e dua na lisi ni veika mo cakava. E tara vakacava na nomu nanuma baleta na nomu sasaga duadua na kena wiliki na raivotu ena sala oqo?

O na vakasamataka tale beka ga me baleta na veivakalougatataki cecere ni kena kilai oqo na itukutuku matailalai eso me baleta na matanitu vakasilesitieli. E veisautaka vakacava na sala o raica kina ka gadreva mo bulataka na nomu bula e veisiga na raivotu ni matanitu vakasilesitieli oqo?

Raica talega na Mosese 1:39; Joy D. Jones, “Yavubula Tawayalani,” Ensign se Liaona, Nove. 2017, 13–15; J. Devn Cornish, “Au sa Vinaka Li? Au na Rawata Li?” Ensign se Liaona, Nove. 2016, 32–34.

E a raica o Josefa Simici na raivotu me baleta na matanitu lagilagi ena dua na rumu me vaka oqo.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 76:22–24, 50–52, 78–79, 81–82.Na cava eda vulica mai na veitikina oqo me baleta na bibi ni noda ivakadinadina? Na itavi cava e qarava na noda ivakadinadina ena noda icavacava tawamudu? Ena rawa ni veivuke mo vakaraica na ibalebale ni gumatua me veivosakitaki kina na sala meda rawa ni “gumatua ena [noda] ivakadinadina me baleti Jisu” (tikina e 79). Ena rawa talega ni o lagata “Meu Dina Tu” (iVolanisere ni Gonelalai, 85).

Vunau kei na Veiyalayalati 76:24.Ena rawa beka ni raica nomu matavuvale na veisemati ni dina eso ena wase 76 kei na kena e vakavuvulitaki ena “Au Luve ni Kalou” (iVolanisere na Gonelalai, 2–3); e dua vei ira na dina oqo e kunei ena Vunau kei na Veiyalayalati 76:24. Ena duidui vakacava beka na vuravura kevaka era kila na tamata taucoko ni da sa luvena kece sara na Kalou? E veisautaka vakacava na dina oqo na sala eda raici ira kina na tani? Ena rawa beka ni vukea nomu matavuvale me vakasamataka vakatitobu na taro oqo na saravi ni iyaloyalo eso ni luvena tagane kei na yalewa duikaikai na Kalou ena vuravura oqo. (Raica talega na “Video Presentation: I Am a Child of God,” ChurchofJesusChrist.org.)

Vakasamataka mo lagata vata na “Au Luve ni Kalou” ka vaqara eso tale na isema ki na ivakavuvuli ena wase 76 (raica, me ivakaraitaki, na tikina e 12, 62, 96).

Vunau kei na Veiyalayalati 76:40–41.Kevaka meda vakamacalataka vakalekaleka na “itukutuku rekitaki” (tikina e 40), se na itukutuku vinaka, ena veitikina oqo ena dua na ulunitukutuku lekaleka ni niusipepa, na cava eda na kaya? Na itukutuku rekitaki cava tale eso eda kunea ena wase 76?

Vunau kei na Veiyalayalati 76:50–70.O na vukea vakacava nomu matavuvale me vakanamata ka vakavakarau ki na bula tawamudu ena matanitu vakasilesitieli? Dou na rawa ni cakacaka vata ka vakaraica na iyaloyalo, na ivolanikalou, kei na ivakavuvuli vakaparofita eso me salavata kei na veimalanivosa e tiko ena Vunau kei na Veiyalayalati 76:50–70. O na rawa ni kunea na veika oqo ena mekesini eso ni Lotu, ena ChurchofJesusChrist.org, se ena ivakamacala e ra ni ivolanikalou. Qai rawa ni o vakasokumuna na iyaloyalo, na ivolanikalou, kei na ivakavuvuli eso oqo ena dua na posita me rawa ni vakananumi ki na nomu matavuvale na nomudou takete tawamudu.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Au Sa Kila ni Bula Tu,” Sere ni Lotu, naba 76.

Domo ni Veivakalesui mai: iVakadinadina ni “na Raivotu”

Wilivote Uturavu

A lewena na Lotu o Wilivote Uturavu ena Tiseba 1833, voleka ni rua na yabaki ni oti nodrau ciqoma na raivotu ka volai ena Vunau kei na Veiyalayalati 76o Josefa Simici kei Sidini Rikitoni. E a vakaitikotiko okoya mai Niu Ioka ena gauna o ya ka vulica me baleta “na Raivotu” mai vei ira na daukaulotu era veiqaravi tiko ena vanua o ya. Ena veiyabaki e muri a tukunikataka okoya na nona vakanananu me baleta na ivakatakila oqo:

“Au a vakavulici mai na noqu gauna ni gone ni dua na Lomalagi ka dua na Eli, ka tukuni vei au ni sa dua vata ga na kedra itotogi na dau caka ca kece ka dua vata ga na nodra lagilagi na ivalavala dodonu. …

“… Ni’u wilika na raivotu … , e vakararamataka noqu vakasama ka solia vei au na reki levu, sa kena irairai vei au ni Kalou ka vakatakila mai na ivakavuvuli vei ira na tamata e a vuku, dodonu ka dina, ka taukena ruarua na vinaka ni itovo ni bula kei na vakasama vinaka kei na kila ka vinaka duadua, ka’u vakila meu lomana vakalevu cake sara na Turaga ena noqu bula.”¹

“Na ‘Raivotu’ [sai koya] e dua na ivakatakila ka vakavotui kina e levu cake na rarama, na dina kei na ivakavuvuli mai na ivakatakila kecega ka volai tu ena ivola kecega eda sa bau wilika. E vakamatatataka ki na noda vakasama na keda ituvaki ena gauna oqo, na vanua eda lako mai kina, na cava eda mai tiko kina eke, kei na vanua eda lako tiko kina. Ena rawa ni kila mai na ivakatakila oqori e dua ga na tamata se na vakacava na nona tikina kei na nona ituvaki.”²

“Ni bera ni’u se raici Josefa au a kaya ni’u sega ni kauwaitaka se sa yabaki vica okoya, se vakacava na nona gone o koya; Au sega ni kauwaitaka se vakacava na kena irairai—se balavu sara na uluna se lekaleka; na tamata ka tosoya yani ki liu na ivakatakila oya e a dua na parofita ni Kalou. Au a kila ga vakai au.”³

Phebe Crosby Peck

Ena nona rogoca o Phebe Peck ni rau vakavulica o Josefa kei Sidini “na Raivotu,” e a vakaitikotiko voli kina mai Misuri ka susugi ira cake tiko e lima na luvena vaka dua na tina sega ni vakawati. E a vakurabuitaki ka vakauqeti koya vakalevu sara na raivotu ka vola kina okoya na veika oqo me wasea na veika e sa kila rawa vata kei na nona vuvale raraba:

“Na Turaga sa vakatakila tiko mai na veika vuni ni Matanitu vakalomalagi vei ira na Luvena. … Erau a sikovi keitou o Josefa Simici kei Sidini Rikitoni ena vulaitubutubu sa oti, ka levu na neitou soqoni rekitaki ena nodrau a tiko eke, ka vuqa na veika vuni a cereki ki matai keitou, ka solia vei au na vakacegu cecere. Keitou rawa ni raica kina na lako sobu mai ni Kalou ni vakarautaka tiko na tikina eso ni vakacegu baleti ira na luvena. Ia ko koya yadua ena sega ni ciqoma na taucoko ni kosipeli ka tu me sotia qaqa ena inakinaki i Karisito ena sega ni rawa ni tiko ena iserau ni Tamada kei na Luvena. Ia sa vakarautaki tu e dua na vanua vei ira kece era sega ni ciqoma, ia sa ikoya na vanua ni lagilagi e lailai sobu sara mai na tiko ena matanitu vaka-Silesitieli. Au na sega ni tovolea meu vakuria me baleta na veika oqo ni ra sa tabaki rawa ka sa lako tiko yani ki vuravura. Ia ena rairai nomu e dua na madigi mo wilika vakai iko, ka kevaka o cakava oqori, au nuitaka ni o na wilika ena dua na yalo mareqeti kei na vakamamasu, ni sa kilikili kaya me kilai na veika oqo. Ka’u gadreva mo vakasaqaqara sara kina, ni sai koya oqo e sa solia wale mai na noda marau ena vuravura oqo kei na vuravura sa bera mai.”⁴

iDusidusi

1. “Remarks,” Deseret News, 27 ni Me, 1857, 91.

2. Deseret News, 3 ni Okosita, 1881, 481; raica talega na Nodra iVakavuvuli na Peresitedi ni Lotu: Wilivote Uturavu Woodruff (2004), 120–21.

3. “iTukutuku,” ena Deseret Weekly, 5 ni Sepi., 1891, 322.

4. iVola nei Phebe Crosby Peck vei Anna Jones Pratt, 10 ni Okos., 1832, Church History Library, Salt Lake City; vakavoui na sipeli kei na pagitueti.

Lagilagi vaka iTagede, mai vei Annie Henrie Nader