Karisito kei na Cauravou iLiuliu Vutuniyau, mai vei Heinrich Hoffman

19–25 ni Jiulai

Vunau kei na Veiyalayalati 81–83

Kivei “Koya Sa Soli Vakalevu Vua Ena Gadrevi Vakalevu Mai Vua”

Ni o vulica na Vunau kei na Veiyalayalati 81–83, vola na ivakavuvuli eso ena rawa ni vukei iko mo caka vinaka vei ira na nomu matavuvale, nomu itokani, kei ira na tani.

Vola na Veika o Uqeti Kina

Ena Maji ni 1832, a kacivi Jese Kasi kina na Turaga me dua na daunivakasala vei Josefa Simici ena Mataveiliutaki ni Matabete Levu (sa kilai tu nikua me Mataveiliutaki Taumada). Na Vunau kei na Veiyalayalati 81 sai koya e dua na ivakatakila kivei Baraca Kasi, vakaroti koya tiko ena nona ilesilesi vou ka yalataka tiko vua na veivakalougatataki me baleta na nona veiqaravi ena yalodina. Ia a sega ni veiqaravi ena yalodina o Jese Kasi. Sa mani kacivi kina o Veretariki G. Viliame me sosomitaki koya, ka a vakaisosomitaki na yaca i Baraca Kasi ena yaca i Baraca Viliame ena ivakatakila.

Ena vaka beka me dua na ka lailai oya, ia sa vakaibalebaletaka e dua na dina bibi: E vuqa vei ira na ivakatakila ena Vunau kei na Veiyalayalati era vagolei vakatabakidua ki na so na tamata, ia eda rawa sara ga ni vakasaqara e veigauna na sala eso mera yaga kina vei keda (raica 1 Nifai 19:23). Na ivakasala ni Turaga vei Veretariki G. Viliame me “vakaukauwataka na duru sa malumalumu” e rawa ni vagolea na lomada kivei ira na tamata eda na rawa ni vaqaqacotaki ira (Vunau kei na Veiyalayalati 81:5). Na ivakasala ni Turaga vei ira na lewe ni United Firm me “vauci kemudou ena veiyalayalati oqo” me rawa kina ni sotavi na gagadre vakayago eso ni Lotu e rawa ni vagolea na lomada ki na noda veiyalayalati. Kei na yalayala ni Turaga ni oKoya ena “vauci ni dou muria na noqu vosa” e rawa ni vakavotuya vei keda na Nona yalayala vei keda ni da talairawarawa tiko (Vunau kei na Veiyalayalati 82:10, 15). Oqori na kena dodonu, ni sa vakaraitaka talega na Turaga, “Na veika au sa tukuna vua e dua, au sa tukuna vei kemudou kece” (tikina e 5).

Raica na “Newel K. Whitney and the United Firm,” “Jesse Gause: Counselor to the Prophet,” Revelations in Context, 142–47, 155–57.

Vakasama eso ni Vuli iVolanikalou ni Tamata Yadua

Vunau kei na Veiyalayalati 81

Au rawa ni yalodina ni’u cakava na veika e kerea vei au na Turaga.

O bau dau vakasamataka ena so na gauna mo vakayacora vakacava na itavi bibi eso ena nomu bula? Me vaka e dua na daunivakasala vua na Parofita o Josefa Simici, e a vuqa dina sara na itavi bibi nei Veretariki G. Viliame. Ena wase 81, a solia vua na Turaga na ivakasala baleta na ivakarau me qarava vinaka kina. Na cava o raica ena iwase oqo e rawa ni vukei iko mo qarava vinaka na itavi sa solia vei iko na Turaga?

Oqo e so na taro me vukei iko mo vakasamataka vakatitobu na tikina e 5:

• Na cava eso na sala e rawa ni “malumalumu” kina e dua na tamata? Na cava na kena ibalebale mera “vakaukauwataki” o ira era malumalumu?

• Na cava e rawa ni vakavuna na liga ni dua na tamata me “damele” vakaibalebale? Eda na “laveta cake” vakacava na liga oqori?

• Cava beka na ibalebale ni malanivosa na “duru sa malumalumu”? Me da “vakaukauwataka” vakacava na vei duru sa malumalumu?

Na vulici beka ni tikina oqo e sa kauta mai ki na vakanananu e dua o rawa ni “vukea,” “laveta cake,” se “vakaukauwataka.” Na cava o na cakava mo veiqaravi kina vua na tamata o ya?

Na Mataveiliutaki Taumada: Sidini Rikitoni, Josefa Simici, Veretariki G. Viliame

Vunau kei na Veiyalayalati 82:1–7

E sureti au tu na Turaga me’u veivutuni ka biuta tani sara na noqu ivalavala ca.

Ni o wilika na Vunau kei na Veiyalayalati 82:1–7, okata mo cakava e rua na lisi ni veika o sa vulica: veivakaroti me baleta na ivalavala ca kei na veika dina me baleta na veivosoti. Ena vukei iko vakacava na dina eso oqo mo vorata rawa na veitemaki ni meca?

Vunau kei na Veiyalayalati 82:8–10

Na ivakaro e sa baleta na noqu vakabulai kei na noqu taqomaki.

Kevaka o iko—se dua tale o kila—sa bau vakananuma tu na cava na vuna e solia kina na Turaga e vuqa sara na ivakaro, na Vunau kei na Veiyalayalati 82:8–10 e rawa ni veivuke. Na raititobu cava so ena veitikina oqo ena rawa ni vukei iko mo vakamacalataka vua e dua se cava o digitaka kina mo muria na ivakaro ni Turaga? O na rawa talega ni okata na sala sa veisautaka kina na nomu bula na Nona ivunau. Na cava o vulica me baleta na Turaga ni o wilika na tikina e 10?

Raica talega na Vunau kei na Veiyalayalati 130:20–21; Carole M. Stephens, “Kevaka Dou sa Lomani Au, Dou Talairawarawa ki na Noqu Vunau,” Ensign se Liaona, Nove. 2015, 118–20.

Vunau kei na Veiyalayalati 83

“Mera na qaravi kina na dawai kei na luveniyali.”

Ena Epereli 1832, me vaka a vakaroti mai vua na Turaga, a lakova o Josefa Simici voleka ni 800 na maile me laki sikovi ira na Yalododonu era a vakasoqoni vata mai Misuri (raica na Vunau kei na Veiyalayalati 78:9). Ena dua na itikotiko ka sikova okoya era a okati kina na dawai ka ra susuga duadua voli na luvedra. A maliwai ira o Phebe Peck kei Anna Rogers, ka kilai rau vakavoleka sara na parofita. E Misuri e na 1830 vakacaca, na lawa ni matanitu a yalana na nodra dodonu na yada ki na iyau ni watidra era sa mate. Na cava o vulica mai na wase 83 baleta na nanuma ni Turaga me baleti ira na yada kei na luveniyali? O kila beka e dua ena ituvaki oqo ka na yaga vua na nomu loloma se veikauwaitaki?

Raica talega na Aisea 1:17; Jemesa 1:27.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 81:3.E rawa ni o solia vei ira na lewe ni matavuvale na uto pepa eso ka sureti ira mera droinitaka se vola kina e dua na ka era vinakata mera masulaka. Veitalanoataka na ibalebale ni masu “tikoga ena masu vakadomoilevu kei na masu ni yalomu.”

Vunau kei na Veiyalayalati 81:5.Me vulici kina na ivakavuvuli e tiko ena tikina oqo, de na rawa beka ni ra wasea na lewe ni matavuvale na ivakaraitaki eso ni nodra a vakila na “malumalumu” ka dua a qai vakaukauwataki se vaqaqacotaki ira. E rawa talega mera sarava na vidio me baleta na qaravi ira na tani, me vaka na “Works of God” se “The Miracle of the Roof” (ChurchofJesusChrist.org). Veivosakitaka na sala e rawa ni ra veiqaravi wasoma kina vakataki ira na nomu matavuvale ena veisala rawarawa eso.

Vunau kei na Veiyalayalati 82:8–10.E dua beka na qito rawarawa ena vukea nomu matavuvale me vakila na vakavinavinaka me baleta na ivakaro ni Kalou. E dua na lewe ni matavuvale e rawa ni soli ivakaro me vukea e dua tale e tabonaki na matana me cakava e dua na saniwiti se me lako curuma e dua na sala dredre. Vakasamataka e dua na ka marautaki ka bulabula! Qai veivosakitaka na sala e vaka kina na ivakaro ni qito oqo na vunau ni Kalou.

Vunau kei na Veiyalayalati 82:18–19.Na cava e rawa ni ra cakava na lewe ni matavuvale yadua me “vakavinakataka cake na … [nona] dui taledi ” ka “rawata na … taledi tale eso,”? E rawa ni ka marautaki me caka e dua na vakaraitaki taledi vakamatavuvale. Vakasamataka na sala eso me okati kina na taledi ka sega ni dau vakaraitaki vakarawarawa (me vaka na veisolisoli vakayalo; raica na Vunau kei na Veiyalayalati 46:11–26). E rawa vakacava meda vakayagataka na noda taledi ka wasea na veika e tu vei keda me vakalougatataka na noda matavuvale kei ira na wekada? Na cava na kena ibalebale meda vakayagataka na noda taledi “ena mata sa vakatabakidua ki na lagilagi ni Kalou”?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Na Cakavinaka?” Sere ni Lotu, naba 131; raica talega “Na Vakasama Eso me Vakavinakataka na Nomu Vuli iVolanikalou Vakamatavuvale.”

Vakatorocaketaki Noda Veivakavulici

Taroga na taro e vakavurea na cakacaka. Okata na taro eso e uqeti ira na nomu lewe ni matavuvale me vakananuma na sala e rawa kina mera bulataka vakalevu cake na kosipeli. “Qo era sega ni taro me veivosakitaki; ia e baleta ga na vakasama yadudua.” (Veivakavulici ena iVakarau ni iVakabula, 31).

iVakaraitaki i Jisu ni vakabula tiko e dua na tagane mai vei Dan Burr