iVakaruru, mai vei Shaelynn Abel

5–11 ni Jiulai

Vunau kei na Veiyalayalati 76

“Ena Vakaitamera na Kedra iSau ka Tawamudu na Nodra Lagilagi”

Ni o vulica na Vunau kei na Veiyalayalati 76, vakasamataka vagumatua na ka e vinakata na Tamada Vakalomalagi mera kila vakai ira na gone ena nomu kalasi me baleti Koya, na iVakabula, o ira vaka i ira, kei na nodra icavacava tawamudu.

Vola na Veika o Vakauqeti Kina

Sureta na Veiwasei

Vakaraitaka vei ira na gone nai yaloyalo se draunipepa ni itaviqaravi eso mai na ituvatuva ni macawa oqo se na kena sa oti. Me ra qai tukuna vei iko na ka era raica ena veiyaloyalo oqo kei na ka era nanuma ni vulica mai kina.

Vakavulica na iVunau: Gone Sobu

Vunau kei na Veiyalayalati 76:24

Eda sa luvena kece na Kalou.

A kaya o Peresitedi Dallin H. Oaks kevaka eda vakavulica vua “e dua na tamata gone na vakasama kaukauwa ni sa luve ni Kalou o koya,” sa rawa ni da dolea vua na “veidokai kei na veivakayarayarataki me sabaya na veileqa ni bula” (“Powerful Ideas,” Ensign, Nov. 1995, 25).

iTaviqaravi e Rawa ni Caka

• Me vukei ira na gone ni kila dei tu na nodra rawa ni vakataka na Kalou, vakaraica na sala eso mo vakatakila vei ira ni ra tubu na luve ni manumanu me vakataka na nodra itubutubu—de rawa beka mera vakasotara vata na gone na kedra iyaloyalo na manumanu vata na kedra iyaloyalo na luve ni manumanu. Dolava na ivolanikalou ki na Vunau kei na Veiyalayalati 76:24, ka tukuna vei ira na gone ni da sa “luvena tagane kei na yalewa na Kalou.” Wasea na nomu ivakadinadina ni sa Tamada na Kalou, ka sa rawa ni da tubu meda vakataki rau na noda iTubutubu Vakalomalagi.

• Lagata vata na “Au Luve ni Kalou” (iVolanisere ni Lalai, 2–3), ka sureta na gone mera dusi ira ni ra lagata na “Au.” Kerei ira mera lagata tale na sere, ni sosomitaki na “au” ki na “iko” ka dusia e dua tale ena kalasi.

Vunau kei na Veiyalayalati 76:40–42

O Jisu Karisito sa iVakabula kei vuravura.

Na vosa kosipeli sa kena ibalebale na itukutuku vinaka. Na itukutuku vinaka e kauta mai na kosipeli oya o Jisu Karisito a “lako mai ki vuravura … me vakasavasavataka mai na veika tawadodonu kecega” (tikina e 41).

iTaviqaravi e Rawa ni Caka

• Tukuna eso na itukutuku vinaka vei ira na gone o a rogoca wale tikoga oqo. Kerea mera wasea na itukutuku vinaka era sa rogoca. Qai wasea vei ira na itukutuku vinaka ni kosipeli ena wiliki ni Vunau kei na Veiyalayalati 76:41–42. Taroga se cava era bau vakila tu na gone ena itukutuku vinaka oqo. Wasea vei ira na marau e kauta mai vei iko na itukutuku vinaka oqo.

• Vakaraitaka e dua nai yaloyalo kei Jisu Karisito. Taroga na gone kevaka era kila na ka a vakayacora o Jisu Karisito ena vukuda. Vakaraitaka vei ira na gone e dua na ka duka kei na ka savasava (me vaka e dua na itavoi vulavula se tiki ni pepa), ka vakamacalataka ni valavala ca e sa vaka na duka ena yaloda, ia sa lako mai o Jisu Karisito me vukea na noda vakasavasavataki tale.

  

  Dou Laivi Ira na Gone Lalai, mai vei J. Kirk Richards

Vunau kei na Veiyalayalati 76:62

Sa vinakata na Tamada Vakalomalagi me’u lesu tale ka bula tawayalani vata kei Koya.

Na raivotu i Josefa Simici kei Sidini Rikitoni me baleta na matanitu vakasilesitieli sa vakatakila na veivakalougatataki levu e vakarautaka tu na Kalou vei ira na Luvena, vakakina na veika sa dodonu meda cakava me rawati kina na veivakalougatataki oya.

iTaviqaravi e Rawa ni Caka

• Tukuna vei ira na gone na tolu na matanitu lagilagi rau a raivotutaka o Josefa kei Sidini. (O na rairai wilika vakatikina se taucoko vei ira na gone na “Chapter 26: The Three Kingdoms of Heaven” [Doctrine and Covenants Stories, 97–103] se vakaraitaka na kena vidio ena ChurchofJesusChrist.org.) Tarogi ira na gone na cava era taleitaka me baleta na raivotu. Vakanamata sara ni vakamacalataka na matanitu vakasilesitieli, ka vakadinadinataka ni oqo na vanua e vinakata tu na Tamada Vakalomalagi meda tiko vakayadua kina.

• Wilika vei ira na gone na Vunau kei na Veiyalayalati 76:62, ka sureta mera droinitaka na kedra iyaloyalo vata kei na Tamada Vakalomalagi kei Jisu Karisito ena matanitu vakasilesitieli.

Vakavulica na iVunau: Gone Qase Cake

Vunau kei na Veiyalayalati 76:5, 41–42, 69

Sa noqu iVakabula o Jisu Karisito.

Vukea mera kila vakavinaka na gone na veivakalougatataki lagilagi e yalataka tu na Kalou vei ira na yalodina ena bula sa bera mai sa rawa duadua ga ena vuku ni iVakabula o Jisu Karisito.

iTaviqaravi e Rawa ni Caka

• Vola ena papa Na cava e sa cakava o Jisu Karisito ena vukuqu? Kerea na gone yadua me wilika lo na tikina e 5, tikina e 41–42, se tikina 69 ena wase 76, ni vakaraici tu na isaunitaro ena papa. Me ra qai wasea na nodra isaunitaro (raica talega na “Tala Mai Na Luvena,” iVolanisere ni Gonelalai, 20–21). Eda rawa vakacava ni vakaraitaka na noda vakavinavinaka ki na ka e sa cakava na iVakabula ena vukuda?

• Vola nai katolu ni yavu ni vakabauta ena papa, ka vakalala na tikina me biu kina na vosa bibi eso. Solia vei ira na gone na veivosa e yali tiko oqo ena tiki ni pepa eso, ka sureti ira mera biuta na nodra vosa ena vanua donu eso ena papa. Na cava e vakavulica vei keda na yavu ni vakabauta oqo ena vuna eda gadrevi Jisu Karisito kina? (raica talega na vidio “Why We Need a Savior,” ChurchofJesusChrist.org).

Vunau kei na Veiyalayalati 76:12, 15–19, 114–16

Na vulici ni ivolanikalou sa rawa ni vukei au meu “kila vakamatata na veika ni Kalou.”

A ciqoma o Josefa Simici kei Sidini Rikitoni na Vunau kei na Veiyalayalati 76 ni rau a vakasamataka vagumatua voli na ivolanikalou. Vukea na gone mera raica na sala e rawa ni sureta kina nai vakatakila na vulici ni ivolanikalou mai na Yalo Tabu.

iTaviqaravi e Rawa ni Caka

• Taroga na gone kevaka era kila na ka a cakava tiko o Josefa Simici kei Sidini Rikitoni ni rau raica na raivotu ena Vunau kei na Veiyalayalati 76. Sureta mera wilika na tikina e 15–19 me laurai kina. Wasea na gauna o a ciqoma kina na veivakauqeti ni wiliki tiko na ivolanikalou, ka kerei ira na gone mera veivosakitaka na veivakauqeti vakayalo e tiko vei ira ena wiliki ni ivolanikalou.

• Kerea na gone mera bobo ka tovolea mera vakayacora e dua na itavi, vaka na rokataki ni yaloyalo se dolavi ni ivolanikalou ki na dua na tikina vakatabakidua. Na cava e dredre kina ni caka eso na ka ni tasogo tu na matada vakayalo? Wilika vata na Vunau kei na Veiyalayalati 76:12, 15–19, 114–16 me raici kina na ka sa gadrevi meda cakava me tadolavi kina na matada vakayalo.

Vunau kei na Veiyalayalati 76:50–70

E sa vakarautaka tu vei au na Tamada Vakalomalagi e dua na matanitu lagilagi vakasilesitieli.

Sa rawa ni vakauqeti ira na gone na kilai ni lagilagi vakasilesitieli sa vakarautaka tu na Kalou mera “rawa ena vakabauta” (tikina 53) na bolebole kei na veivakatovolei eso era sotava.

iTaviqaravi e Rawa ni Caka

• Kevaka e dua e tarogi keda, “Cava na vuna me’u muri Jisu Karisito kina ka muria na Nona ivakaro?” na cava eda na kaya? Sureta na gone mera vakaraica na kena isau ena Vunau kei na Veiyalayalati 76:50–70, ka vakamacalataki ira na rawata na bula tawamudu ena matanitu vakasilesitieli. Me ra qai dramataka na gone na kena saumi na taro. Wasea na nomu ivakadinadina ena veivakalougatataki levu sa vakarautaka tu vei keda na Tamada Vakalomalagi kevaka eda muri Jisu Karisito.

• Droinitaka e dua nai yaloyalo levu ni matanisiga ena dua na tiki ni pepa, ka kotiva na tikina eso vakaiba. Solia e dua na tikina ki na gone yadua, vata kei na dua na malanivosa ni ivolanikalou oqo mera wilika: Vunau kei na Veiyalayalati 76:51; 76:52; 76:53; 131:1–2. Kerea na gone mera raica ena nodra tikina e dua na ka sa dodonu me caka meda rawata kina na bula tawamudu ena matanitu vakasilesitieli (so na tikina e levu cake na kena isaunitaro), ka vola ena nodra tiki ni matanisiga. Ni ra cakacaka vata me vakasotari na iba, vakaraitaka na nomu yalodei vei ira ni ena veivuke ni iVakabula, sa rawa ni ra tikora na matanitu vakasilesitieli.

Vakauqeta na Vuli e Vale

Sureta na gone mera vakayagataka na draunipepa ni itaviqaravi ena macawa oqo mera vakavulica na nodra matavuvale ena ka era sa vulica me baleta na raivotu i Josefa Simici kei Sidini Rikitoni

Vakatorocaketaki Noda Veivakavulici

Vakayagataka na ivolanikalou. Kevaka mada ga era se sega ni wiliwili rawa na gone o vakavulica, vakayagataka wasoma na ivolanikalou ni ko vakavulici ira. Me ra qai raica na dina o wasea tiko e sa vu mai na ivolanikalou.