Lako Tu iVale, mai vei Yongsung Kim

12–18 ni Jiulai

Vunau kei na Veiyalayalati 77–80

“Ni’u na Liutaki Kemudou Tiko”

Ni ko vulica na Vunau kei na Veiyalayalati 77–80, vakaraica na malanivosa se tikina e rawa ni vukei ira na gone mera kila vakavinaka cake na ivakavuvuli ni kosipeli. Wasea vakai iko na veitikina o raica, kevaka mada ga era sega ni vakaraitaki ena itaviqaravi eso e ra.

Vola na Veika o Vakauqeti Kina

Sureta na Veiwasei

Kerea na gone mera wasea na veika era sa vakavinavinakataka. Na cava era cakava kei na nodra matavuvale mera vakaraitaka vua na Tamada Vakalomalagi ni ra sa vakavinavinakataka na Nona veivakalougatataki?

Vakavulica na iVunau: Gone Sobu

Vunau kei na Veiyalayalati 77:2

Sa bulia na Kalou na veikabula kecega e vuravura.

Na vulici ni veika e bulia na Kalou sa rawa ni vukei ira na gone me vakila na Nona loloma me baleti ira.

iTaviqaravi e Rawa ni Caka

• Vakaraitaka vei ira na gone nai yaloyalo ni manumanu eso, oka kina na manumanu qasi kei na manumanu vuka. Ni o wilika na vosa “manumanu”, “ka sa qasi voli” kei na “manumanu vuka” ena Vunau kei na Veiyalayalati 77:2, sureta na gone mera dusia nai yaloyalo e semati kina. Vakadinadinataka ni a bulia na Kalou na veika kece oqo baleta ni lomani keda ka vinakata meda bula marau (raica talega na Vunau kei na Veiyalayalati 59:16–20).

• Lagata kei ira na gone e dua na sere ni veibuli ni Kalou, vaka na “Rogoca na Sere ni Manumanu” (iVolanisere ni Gonelalai, 16—17). Taroga se a vukei ira vakacava na gone na veika era lagata tiko mera vakila kina na loloma ni Kalou.

  

  Sa bulia na Kalou na vuravura kei na ka kecega sa tiko kina.

Vunau kei na Veiyalayalati 78:6

Au rawa ni wasea na ka e tu vei au vei ira na tani

E vinakata na Tamada Vakalomalagi meda wasea wale vakai keda na noda veivakalougatataki me rawa ni da “tautauvata ena veika vakavuravura” kei na “veika vakalomalagi” (tikina e 6).

iTaviqaravi e Rawa ni Caka

• Me vakavulici na ka e vakaibalebaletaka na “tautauvata ena veika vakavuravura” (tikina e 6), solia vei ira na gone na kedra iyaloyalo na tamata vakaleqai tu (vakai ira na walokai, mavoa, se batabata). Qai solia vei ira na gone tale eso na veika ena rawa ni veivuke (vaka na kakana, ivadreti, se itutuvi). Sureta mera wasea na ka e tiko vei ira mera vukei kina na tamata ena iyaloyalo. Me ra qai veivukevuke na gone ena veiwasei. Vukea na gone mera kila vakamatata ni vinakata na Tamada Vakalomalagi na Luvena kece me rawata na ka era gadreva, ia me caka oqo sa dau kerei keda tu o Koya meda wasea na ka e tiko vei keda vei ira na tani.

• Wilika vei ira na gone na yatuvosa ena ruku ni matai ni rua na iyaloyalo ena “Chapter 28: The Prophet Joseph Goes to Missouri Again” (Doctrine and Covenants Stories,108). Kerea na gone mera vakatatalo taka ni ra vukea tiko e dua ena tara vale, wasei ni kakana, se veiqaravi tale eso. Na cava eda vakila ni da veivuke ka veiwasei tu? Vukea na gone mera vakasamataka na veika e wasea tu o Jisu Karisito vata kei keda.

Vunau kei na Veiyalayalati 78:18

Ena liutaki au tiko o Jisu Karisito.

Ke sa lomada me “liutaki [keda] tiko” na Turaga, sa rawa ni da “marau ga,” kevaka mada ga e tiko na ka eda “sega ni colata rawa … oqo” (tikina e 18).

iTaviqaravi e Rawa ni Caka

• Sureta na gone mera wasea na gauna eso era a iliuliu tu kina, vaka na nodra tu ena muailiu ni dua na laini se liutaka voli na sere ivakatagi. Na cava e dau vakayacora na iliuliu? Vakaraitaka e dua nai yaloyalo ni iVakabula ni o wilika na malanivosa oqo mai na Vunau kei na Veiyalayalati 78:18: “Dou marau ga, niu na liutaki kemudou tiko.” Vakayagataka na draunipepa ni itaviqaravi ena macawa oqo mo vukei ira na gone me vakasamataka na sala eso eda rawa ni muria kina na iVakabula.

• Sureta na gone mera muri Jisu, ka liutaki ira wavoki ena rumu ni o taura tu na Kena iyaloyalo. Ni o vakayacora, lagata vata e dua na sere ni muri Jisu voli, vaka na “Meu Na Muri Jisu Tu” se “Digitaka na Dodonu” (iVolanisere ni Gonelalai, 40–41, 82). Me ra qai veivukevuke na gone ni taura tu nai yaloyalo ka liutaki ira voli na gone tale eso.

Vakavulica na iVunau: Gone Qase Cake

Vunau kei na Veiyalayalati 77

Au rawa ni ciqoma na isau ni noqu vakatataro me baleta na ivolanikalou.

Sa rawa ni vukea na gone na nodra vakavulici ena sala a qara kina o Josefa Simici na isau ni nona vakatataro mera kila ni na sausaumi vei ira na Tamada Vakalomalagi ni ra qara na Nona veituberi. Navuca mo wasea na veika o sotava ena ciqomi ni sausaumi mai Vua.

iTaviqaravi e Rawa ni Caka

• Wilika vei ira na gone na vosa eso ena ruku ni imatai ni tolu nai yaloyalo ena “Chapter 27: The Prophet Continues His Work Despite Persecution” (Doctrine and Covenants Stories, 104). Taroga na gone kevaka era, vakataki Josefa, bau vakila tu mada ni ra sega ni kila dei tu e dua na ka ena ivolanikalou. Me ra qai wasea na ka era sotava. Na cava a cakava o Josefa me kune isau ni taro kina? Tukuna vei ira na gone na gauna a vukei iko kina na Tamada Vakalomalagi mo kila dei tu e dua na ka ena ivolanikalou.

• Era na rairai taleitaka na gone o vakavulica na wiliki ni so na tikina mai na iVakatakila e a lomatarotarotaka tu o Josefa Simici. Me ra na qai raica ena Vunau kei na Veiyalayalati 77 na ka a vinakata na Turaga vua me kila dei tu. Digitaka e vica na tikina o nanuma ni na vakaibalebale.

Vunau kei na Veiyalayalati 78:3–7

Au rawa ni veivuke ni “vakatetea na inaki” i Jisu Karisito.

Ena wase 78, a solia vakatabakidua na Turaga na ivakasala eso ki na vica na iliuliu ni Lotu me vukei ira me “vakatetea na inaki ” ni Turaga (tikina e 4). Vukea na gone mera navuca se cava na nodra itavi ena vakatetei ni inaki ni Turaga.

iTaviqaravi e Rawa ni Caka

• Kerea na gone mera wilika na Vunau kei na Veiyalayalati 78:4. Na cava na “inaki” eda “vakadonuya” (vakatara se tokona) ena gauna eda papitaiso kina? Vakauqeta mera raica na veimalanivosa ni ivolanikalou vakaoqo ena isau ni vakatataro eso: Mosaia 18:8–10; Vunau kei na Veiyalayalati 20:37; Mosese 1:39.

• Vakamacalataka vei ira na gone ni a taukena tu o Niuweli K. Witini e dua na sitoa ka mani kerei koya na Turaga kei na so tale mera vakayagataka na nodra ilavo me vukea na saumi ni cakacaka ni Turaga (raica na Vunau kei na Veiyalayalati 63:42–43). Sureta mera wilika na Vunau kei na Veiyalayalati 78:3–7 ka vakaraica na vuna era a kerei kina na turaga oqo mera vakayacora vakakina. Bau vakacava tu mada na noda nanuma kevaka eda a kerei meda veiwasei me vaka e kitaka o Niuweli? Vukea mera vakasamataka na sala eso era cau kina na tamata ki na cakacaka ni Turaga ena noda gauna, vaka na saumi ikatini kei na isolisoli ni lolo, veiqaravi ena veikacivi eso, kei na so tale.

Vunau kei na Veiyalayalati 78:19

Sa dodonu me’u ciqoma na “ka kecega ena vakavinavinaka.”

Sa dau vakalougatataki keda vakalevu na Turaga kevaka eda vakavinavinakataka na ka e sa solia oti vei keda o Koya. O na vukea vakacava na gone o vakavulica mera dau vakavinavinakataka na nodra veivakalougatataki?

iTaviqaravi e Rawa ni Caka

• Kerea na gone mera wilika na Vunau kei na Veiyalayalati 78:19 ka raica na ka e yalataka na Turaga vei ira ka dau vakavinavinaka. Vukea na gone mera kila vakavinaka na ibalebale ni “yadrau,” ena vakaraitaki ni dua na iyaya lailai ka qai kuri ena 100 tale na iyaya vata oya.

• Lagata e dua na sere ni vakavinavinaka, vaka na “I Am Glad for Many Things” (Children’s Songbook, 151), se sarava na vidio “Think to Thank” (ChurchofJesusChrist.org). Solia na gauna vei ira na gone mera vola na veika era sa vakavinavinakataka. Vakauqeta mera vola na levu ga ni ka e rawa ena gauna o solia vei ira.

Vakauqeta na Vuli e Vale

Navuca mo veitaratara kei ira na itubutubu ni gone o vakavulica ka vakatututaka e dua na taro era rawa ni taroga vei ira na luvedra ena ka era a vulica ena kalasi.

Vakatorocaketaki Noda Veivakavulici

Vakadinadinataka na veivakalougatataki yalataki. Ni o sureta na gone ena Lalai mera bulataka e dua na ivakavuvuli, wasea na yalayala eso sa vakayacora na Kalou vei ira na parofita kivei ira ka bulataka na ivakavuvuli oya. Dua na ivakaraitaki ni yalayala o rawa ni wasea e kune ena Vunau kei na Veiyalayalati 78:19. (Raica talega na Veivakavulici ena iVakarau ni iVakabula, 35.)