iTubutubu: Na Qasenivuli Taumada ni Kosipeli nei Luvedra
Mai vei Tad R. Callister
Peresitedi Raraba ni Wilivola ni Sigatabu
Ni sa tukuni ka caka na veika kece, na vuvale sai koya na vanua vinaka duadua me vakavulici kina na kosipeli i Jisu Karisito.
A tukuni koya vakaoqo o Ben Carson, “O au na gonevuli ca duadua ena noqu kalasi lima taucoko.” Ena dua na siga a dabeca kina o Ben e dua na veitarogi ni fika ka 30 na taro. A vakadodonutaka na nona cala na gone e toka e dakuna ka vakasuka lesu. Sa tekivu me kacivi ira yadua nona gonevuli na qasenivuli o Mrs. Williamson, me baleta na nodra maka. Ni yacovi Ben yani, ena madua, a veimamayaka mai na kena isau ena madua. Ni nanuma o Mrs. Williamson, ni kaya mai na “9,” a kaya yani, me rawata o Ben e 9 mai na 30 e dua na toso uasivi. Qai kacivaka mai na gone e dakui Ben, “E sega ni ciwa! … E sega ni dua e rawata … e.” E kaya o Ben ni vinakata ga me lutu yani e loma ni vuloa.
Ena gauna vata oya, a sotava tiko kina o Sonya na tinai Ben na nona leqa ga o koya. O tinana e dua vei ira na lewe 24 na gone, yaco ga ena kalasi tolu, ka sega ni rawa ni wilivola. A vakawati ni yabaki 13, sa sere, rua na luvena tagane, ka susugi rau cake tiko ena qeto mai Detroit. Ia, e bula rawati koya ka vakabauta dei ni na vukei koya kei rau na luvena na Kalou kevaka eratou cakava na nodratou itavi.
Ena dua na siga a yaco na veisau ena nona bula kei rau na luvena tagane. E votu mai vua ni o ira na tamata vakailavo e dau samaka na nodra vale e tu nodra laiberi—era dau wilivola. Ni oti na cakacaka a lako i vale bokoca na retioyaloyalo erau sarava tiko o Ben kei tacina. E kaya ena lomadei: Sa rui sivia nomudrau sara retioyaloyalo na gone oqo. Me tekivu oqo lako yani drau sa na rawa ga ni sarava e tolu na parokaramu ena dua na macawa. Ena nomudrau gauna galala drau na lako ki na laiberi—wilika e rua na ivola ena dua na macawa ka mai ripote vei au.
Erau kidacala na gonetagane. E kaya o Ben ni se bera vakadua ni bau wilika e dua na ivola ena nona bula taucoko vakavo kevaka e tukuni vua mai koronivuli. Erau vakaduiduile ka vosakudrukudru, rau veiba, ia e sega na betena. Qai nanuma lesu o Ben, “E vakadavora na lawa. Au sega ni taleitaka na lawa, ia na nona yalodina me raica ni keirau vinaka cake e veisautaka vakadua na ivakarau ni noqu bula.”
E dua dina na veisau a vakayacora. Ni qai kalasi vitu sa tu ena muailiu ni kalasi. A yaco me lai vuli ena Yale University ena dua na sikolasivi, qai muri ki na koronivuli ni vuniwai na Johns Hopkins, ka yaco kina ni yabaki 33 me kena vuniwai liu ni veisele ka dua na vuniwai kilai e vuravura ni veisele. E rawa vakacava oya? Vakauasivi baleta ni a vakalevulevuya na nona itavi vakaitubutubu e dua na tina ka sega soti ni levu vei koya na veika vinaka ni bula.
E tukuni ena ivolanikalou na itavi ni itubutubu—ni sa nodra itavi me ra vakavulici ira na luvedra “ena ivakavuvuli ni veivutuni, na vakabauti Jisu Karisito na Luve ni Kalou Bula, na papitaiso kei na iSolisoli ni Yalo Tabu,” (V&V 68:25).
Ni da itubutubu me da qasenivuli taumada ni kosipeli ka ivakaraitaki vei ira na luveda—sega ni o bisopi, na Matawilivola ni Sigatabu, na Goneyalewa se Cauravou, ia na itubutubu. Ni da nodra qasenivuli taumada ni kosipeli, e rawa ni da vakavulica vei ira ena mana kei na dina ni Veisorovaki—na kedra ivakatakilakila kei na icavacava vakalou—ni yaco vakakina sa soli kina vei ira e dua na yavuvatu tudei me ra tara cake kina. Ni sa tukuni ka caka na veika kece, na vuvale sa i koya na vanua vinaka duadua me vakavulici kina na kosipeli i Jisu Karisito.
Rauta ni dua na yabaki sa oti au a tiko ena dua na ilesilesi mai Beirut e Lepanoni. Niu tiko voli kina, au a kila sara na itukutuku ni dua na goneyalewa yabaki 12 o Sarah. Ratou a saumaki mai ki na Lotu na nona itubutubu kei na rua na tacina mai Romania ia a qai gadrevi me ratou lesu tale ki na nodratou vanua ni se qai yabaki 7 o Sarah. E sega na Lotu mai nodratou vanua, sega na tabanilotu sa tauyavu tu, sega na Wilivola ni Sigatabu se parokaramu ni Goneyalewa. Ni oti e lima na yabaki eratou qai kila na matavuvale oqo ni tiko e dua na tabana mai Beirut, ka ni vo vakalailai meu yaco yani, eratou a vakauti Sarah na luvedrau yalewa yabaki 12, ka rau salavata kei koya na tuakana, me laki papitaiso. Niu tiko voli mai kea, au a vosa kina me baleta na ituvatuva ni veivakabulai. Ena so na gauna e dau laveta na ligana o Sarah ka sauma na taro.
Ni oti na soqoni, kau kila na nona a sega tu ni bau sotava na Lotu, au a lako vua ka taroga, “Sarah, o kila vakacava na isau ni veitaro oya?” A sauma mai ena gauna vata ga, “A vakavulici au o tinaqu.” E sega na Lotu ena vanua eratou tiko kina, ia e tiko na kosipeli ena nodratou vale. E nona qasenivuli taumada ni kosipeli na tinana.
O Inosi e kaya, “a sa votu sara mai vei au na ivakavuvuli ni bula tawamudu kei na nodra reki na yalododonu kau dau rogoca vei tamaqu” (Inosi 1:3). Eda na sega tale ni qai taroga se o cei na qasenivuli taumada ni kosipeli nei Inosi.
Au nanuma ni dau dodo tu ena yasani irara o tamaqu, ka wili ivolanikalou kei na ivola vivinaka tale eso, kau na dodo e yasana. Au nanuma na kadi e dau tawana tu ena nona taga ni sote kei na vosacavuti mai na ivolanikalou kei Shakespeare kei na veivosa vovou e dau wiligusutaka ka vulica. Au nanuma na taro vakosipeli kei na veivosaki ena teveli ni vakayakavi. Au nanuma na vuqa na gauna e dau kauti au kina o tamaqu me sikovi ira na qase—neirau dau voli asikirimu me mena e dua se toa me kena ivakayakavi e dua tale se nona iotioti ni lululu ni qumia toka eso na ilavo. Au vakila na lomavinaka kei na gagadre me’u vakataki koya.
Au nanuma na tinaqu, yabaki 90 se vica, dau vakasaqa toka ena nona valenikuro lailai ka curu yani ki tuba kei na dua na terea kakana. Au taroga se lako ki vei. E sauma mai, “Isa, au kauta na kedra eso na qase.” Au dau vakasama, “Nana, o iko mada ga e dua na qase.” Ena sega ni rawa vakadua niu vakaraitaka noqu vakavinavinaka vei rau na noqu itubutubu, e rau noqu qasenivuli taumada ni kosipeli.
E dua na ka vakaibalebale duadua e rawa ni da cakava vakaitubutubu me da vakavulica vei ira na luveda na mana ni masu, sega ni masu ga e dodonu me caka. Niu yabaki 17, au a tekiduru tu ena yasa ni noqu imocemoce, ena noqu masu ena bogi. Au sega ni kila ni duri tu e katuba o tinaqu. Niu sa oti, a kaya mai, “Tad, o kerea tiko beka vua na Turaga me vukei iko ena nomu kunea e dua na watimu vinaka?”
E vakidacalataki au na nona taro. Oqori na ka e yawa duadua mai na noqu vakasama. Au a vakasamataka tiko na basketbol kei na vuli. Au mani sauma, “Sega,” qai kaya mai o koya, “Io, e dodonu luvequ; oya na vakatulewa bibi duadua mo na vakayacora.” E dromu sara vakatitobu ki yaloqu na veivosa oya, o koya, au sa masuta kina na Kalou ena loma ni ono na yabaki ka tarava me vukei au ena noqu kunea e dua na watiqu vinaka. Io sa sauma dina mai o Koya na masu oya.
Ni da itubutubu, e rawa ni da vakavulici ira na luveda me ra dau masulaka na veika e tawamudu na kena yaga—me ra masuta na kaukauwa me ra dau savasava tu vakayalo ena dua na vuravura veibolei, me ra talairawarawa, me ra yaloqaqa ka dau tutaka na dina.
E sega ni vakabekataki ni vuqa vei ira noda itabagone era dau cabora nodra masu ena veibogi, ia de rairai e vuqa beka vei ira e dau dredre na itovo ni masu e veimataka. Ni da itubutubu, ni da nodra qasenivuli taumada ni kosipeli, e rawa ni da vakadodonutaka na tikina oqo. O cei beka na itubutubu ena gauna ni iVola i Momani ena laiva na luvena tagane me gole yani ki na buca ni valu ni sega tu nona peleti ni sere kei na isasabai kei na iseleiwau me taqomaki koya mai na nodra imoku na meca? Ia e vica beka vei keda e dau laiva na luvena me curu yani mai na katuba e liu e veimataka ki na bucanivalu rerevaki duadua, me sotavi Setani kei na nona veitemaki e vuqa, ka sega tu nodra peleti ni seredra kei na isasabai kei na iseleiwau vakayalo ka dau yaco mai ena mana veitaqomaki ni masu? E kaya na Turaga, “Mo gumatua ena masu, … mo rawa na ka kecega, io me kakua ni rawai iko ko Setani” (V&V 10:5). Ni da itubutubu, e rawa ni da veivuke ena kena dregati e yalodra na luveda na itovo kei na mana ni masu e veimataka.
E rawa talega ni da vakavulica vei ira na luveda me ra dau vakayagataka vakavuku na nodra gauna. Ena gauna eso, me vakataki Sonya Carson, eda na gadreva me da vakadeitaki keda ena yalololoma ka yalana na nodra gauna na luveda ena retiyaloyalo kei na veiyaya vakalivaliva tale eso sa monataka tiko vakalevu na nodra bula. Me da vagoleya na nodra gauna ki na veisasaga yaga ka salavata kei na kosipeli. Ena tu beka eso na veisaqa taumada, eso na vosakudrukudru, ia me vakataki Sonya Carson, sa gadrevi me tu vei keda na raiyawa kei na yalo me da vakadeitaka. Ena dua na siga era na qai ciqoma ka vakavinavinakataka na luveda na veika eda sa vakayacora. Kevaka eda sega ni cakava, o cei me na cakava?
Me da na tarogi keda kece beka: sa soli tiko beka vei ira na luveda na noda sasaga vakayalo, vaka-vakasama, kei na cokocokonaki vinaka duadua, se soli tiko beka vei ira na vo ni noda gauna kei na taledi, ni da sa solia na noda igu kaukauwa duadua ki na veikacivi vaka-Lotu se na noda cakacaka eda saumi kina? Ena bula sa bera mai, au sega mada ni kila kevaka ena kilai kina na itutu vakabisopi se peresitedi ni iSoqosoqo ni Veivukei, ia au kila ni itutu vakatagane vakawati kei na yalewa vakawati, tama kei na tina, ena tomani ka vakarokorokotaki kina, ena vuravura tawavakaiyalayala. Oqori e dua na vuna sa rui bibi kina me da rokova na noda itavi vakaitubutubu e vuravura oqo me rawa ni da vakarautaki kina ki na itavi cecere cake, ia e tautauvata, ena bula sa bera mai.
Ni da itubutubu, me da toso ena veivakadeitaki ni na sega ni laivi keda duadua tu na Kalou. Ena sega vakadua ni solia vei keda na Kalou e dua na itavi ka sega ni solia mai na veivuke vakalou—oqori au rawa ni vakadinadinataka. Me da yaco me da qasenivuli taumada ni kosipeli ka ivakaraitaki vei ira na luveda ena noda itavi vakalou vakaitubutubu, ka veitokani kei na Kalou, sa noqu masu ena yaca i Jisu Karisito, emeni.