Me Yacova Nida Qai Sota Tale
Mai vei Peresitedi Thomas S. Monson
Me da vakananuma vakatitobu sara na veidina eda sa rogoca, ka mera vukei keda me da tisaipeli qaqa cake mai na kena a tekivu na koniferedi oqo.
Kemuni na taciqu kei na ganequ, eda se qai sotava oti oqo e rua na siga lagilagi ni itukutuku veivakauqeti. Sa lauti na yaloda ka vaqaqacotaki noda vakabauta ena noda mai wasea vata na yalo ka tiko kei keda ena veisoqoni kece sara ni koniferedi oqo. Ena noda mai cava oqo, eda vakavinavinakataki Tamada Vakalomalagi ena Nona veivakalougatataki kece sara vei keda.
Eda laveti ka uqeti mai na sere kei na ivakatagi ka ra vakarautaki ena veisoqoni yadua. Ka ra kauti keda voleka yani ki lagi na masu era a cabori.
Au gadreva meu vakaraitaka na vakavinavinaka ni Lotu raraba mai vuniyaloda, kivei ira na Tacida era sa mai vakagalalataki ena koniferedi oqo. Eda na dau nanumi ira tu ga. Sa vakaitamera na nodra cau ki na cakacaka ni Turaga ka na dau vakilai ena veitabagauna sa bera mai.
Meda lesu ki noda veivale ka yalataka e yaloda meda vinaka cake mai vakalailai mai na noda veigauna eliu. Meda dauveikauwaitaki ka dauveinanumi vakalevu cake. Me da dolele ka dau veivuke, sega vei ira walega na noda lewenilotu ia vakakina vei ira eda sega ni vakabauta vata. Ni da veimaliwai, me da dau rokovi ira sara.
E tu o ira era dau veiqalisomuniwai kei na bolebole e veisiga. Meda vakaraitaka vei ira na noda kauwai, vakakina na noda veivuke. Eda na vakalougatataki, ni da dau veivukevukei.
Meda dau nanumi ira na qase kei ira era sa voleka ni toki yani. Ena noda sikovi ira, era na vakila kina na nodra lomani ka taleitaki. Meda dau muria na veivakaroti ni “vukei ira sa malumalumu, vakaukauwataka na liga sa wadamele, kei na duru sa malumalumu.”
Meda tamata yalodina ka yalododonu, ena noda tovolea meda dau cakadodonu ena ka kecega vakakina ena gauna kece sara. Me da tudei ena noda muri Karisito, ivakaraitaki ni bula dodonu, ka yaco sara meda “cina e vuravura.”
Kemuni na taciqu kei na ganequ, au vakavinavinakataka na nomuni dau masulaki au. E dau vaqaqacotaki au ka laveti au ena noqu dau segata e yaloqu kei na noqu igu taucoko meu vakayacora na loma ni Kalou ka qaravi Koya vakakina o kemuni.
Nida biubiu yani ena koniferedi oqo, au kerea na veivakalougatataki mai lagi me nomuni vakayadudua. Mo ni lesu vinaka yani na tutani mai vale ka raica ni tuvaki matau tu na veika kece. Meda vakananuma vakatitobu sara na veidina eda sa rogoca, ka mera vukei keda me da tisaipeli qaqa cake mai na kena a tekivu na koniferedi oqo.
Me yacova ni da qai sota tale ena vula ono mai oqo, au kerea na veivakalougatataki ni Turaga me sobuti kemuni, vakaidina vakakina, me sobuti keda kece sara, kau vakayacora ena Yacana tabu—o Jisu Karisito saraga, na noda Turaga ka iVakabula—emeni.