Tomani Tiko na iVakatakila
Mai vei Peresitedi Henry B. Eyring
Matai ni Daunivakasala ena Mataveiliutaki Taumada
Na vakatulewa vakatamata kei na vakasama dodonu e sega ni rauta me saumi kina na taro bibi eso ni bula. Eda gadreva na ivakatakila mai vua na Kalou.
Na noqu vakanuinui vei keda nikua me da vakila kece na loloma kei na rarama mai vua na Kalou. E vuqa era vakarorogo tiko nikua era gadreva tu vakalevu na veivakalougatataki oya ni ivakatakila yadua mai vua na Tamada Vakalomalagi.
Vei ira na peresitedi ni kaulotu, na vakamamasu beka me kila na ivakarau me vakayaloqaqataka kina e dua na daukaulotu e sotava tiko na dredre.Vei rau e dua na tama kei na tina ena dua na vanua ni veivaluvaluti e vuravura, na gagadre vakusakusa me kila se me tokia nona matavuvale ki na veitaqomaki se me ra tiko ga ena vanua era tiko kina. E drau vakadrau na peresitedi ni iteki kei na bisopi era masuta tiko nikua me ra kila na ivakarau me ra vukea kina na Turaga ena kena vueti e dua na sipi lakosese. Vua na parofita, sai koya me kila na ka e vinakata na Turaga me tukuna ki na Lotu kei na dua na vuravura sega ni tudei.
Eda kila kece ni vakatulewa vakatamata kei na vakasama dodonu e sega ni rauta me saumi kina na taro bibi eso ni bula. Eda gadreva na ivakatakila mai vua na Kalou. Eda sega ni gadreva e dua ga na ivakatakila ena gauna ni lomaocaoca, ia eda gadreva e dua na kena idavedave me vakavoui tiko ga mai e veigauna. Eda sega ni gadreva walega e dua na caudre mai ni rarama kei na vakacegu, ia eda gadreva na veivakalougatataki tomani tikoga ni veitaratara kei na Kalou.
Na kena mai tu na Lotu a tekivu mai vua e dua na gonetagane ka kila ni dina. E kila na cauravou o Josefa Simici ni sega ni rawa vua vakataki koya me kila na lotu cava me lewena. O koya a kerea kina vua na Kalou, me vaka e tukuna vua na ivola i Jemesa ni rawa. Erau rairai mai ena dua na veikau na Kalou na Tamana kei na Luvena Daulomani. Erau sauma na taro ka sega ni tu vei Josefa na kaukauwa me sauma.
A sega walega ni qai kacivi koya na Kalou ena gauna oya me tauyavutaka na Lotu dina i Jisu Karisito, ia a vakalesui vata mai kei na kaukauwa me kacivi na Yalo Tabu me rawa ni tomani tiko na ivakatakila mai vua na Kalou.
E vakamacalataka kina o Peresitedi Boyd K. Packer na maka ivakatakilakila ni Lotu dina oya ni: “E tomani tiko ena Lotu na ivakatakila: na parofita e ciqoma ena vuku ni Lotu; na peresitedi me baleta nona iteki, nona kaulotu, se nona kuoramu; na bisopi me baleta nona tabanalevu; na tama me baleta nona matavuvale; na tamata yadua me baleti koya.”
Na iwalewale vakasakiti oya ni ivakatakila e tekivu, tini, ka tomani ni da ciqoma na ivakatakila yadua. Da taura mada na tamata cecere o Nifai me noda ivakaraitaki. A tadra na tamana. O ira na vo ni matavuvale nei Nifai era raica na tadra nei Liai me ivakadinadina ni veilecayaki ni vakasama. E okati ena tadra na ivakaro mai vua na Kalou me ra cakava na luvei Liai tagane na ka rerevaki ena nodra lesu tale ki Jerusalemi me baleta na peleti ka tu kina na vosa ni Kalou me rawa ni ra mai kauta tiko ena nodra ilakolako ki na vanua yalataki.
Eda dau cavuta vakalevu na malanivosa qaqa nei Nifai ni kerei iratou na tamana me ratou lesu tale ki Jerusalemi. O ni kila na malanivosa oya: “Au na lako ka kitaka na ka sa vakarota na Turaga.”
Ni rogoca o Liai ni cavuta na vosa oqori o Nifai, e tukuna na ivolanikalou ni “sa vuabale na nona marau.” E marau baleta ni kila ni sa vakalougatataki o Nifai ena ivakatakila ni veivakadeitaki ni veitaratara dina mai vua na Kalou na tadra nei tamana. E sega ni tukuna o Nifai, “Au na lako ka kitaka na ka e tukuna na tamaqu.” Ia e kaya, “Au na lako ka kitaka na ka sa vakarota na Turaga.”
Mai na veika o ni sotava ena nomuni matavuvale, o ni na kila talega na vuna e “vuabale kina na marau” nei Liai. Nona reki e baleta ni kila ni sa ciqoma o Nifai na ivakatakila ni veivakadeitaki.
E levu na itubutubu era sa virikotora na lawa vakamatavuvale baleta na gauna me lesu mai kina i vale ena bogi na luvedra yabaki tinivakacaca. Ia vakasamataka mada na reki ni ra kila na itubutubu, me vaka e vakayacora e dua ena vica ga na macawa sa oti, ni o koya na gone se qai biubiu walega mai vale e sega walega ni biuta e dua na iyalayala ni gauna me dau tiko kina e vale ena bogi ia sa vaka kina nona dau rokova talega na Siga ni Vakacecegu me vaka ga e vakavulici kina mai vale. Na nona ivakatakila e dua na itubutubu ena tudei na kena revurevu ena ivakatakila yadua ka na tomani tiko vua na gone.
A kila beka o tinaqu na ivakavuvuli oya ni ivakatakila. Niu se cauravou, au dau sogota vakamalua na katuba e muri niu suka bera mai vale ena bogi. Meu dau lakosivita na rumu nei tinaqu niu lako yani ki na noqu. Se vakacava sara na vakamalua ni noqu titeqe, niu yacova ga yani nona katuba dola veimama, au na rogoca na yacaqu, ena domo malua sara, “Hal. Curu mada mai.”
Au na curu ka laki dabe ena bati ni nona idavodavo. Ena buto toka na rumu. Kevaka beka mo a rogoca o na nanuma ni dua ga na veitalanoa vakaveitokani ni bula. Ia me yacova mai nikua, sa dau lesu mai ki na noqu vakasama na veika e dau tukuna, ena kaukauwa vata ga au a vakila ena noqu wilika na ilavelave volai ni noqu veivakalougatataki vakapeteriaki.
Au sega ni kila se cava a kerea voli ena nona masu ni waraki au toka ena veibogi ko ya. Au nanuma ni dua beka na tikina e baleta na noqu taqomaki. Ia au kila ni dau masu me vaka e dua na peteriaki ni vakarau solia e dua na veivakalougatataki. Ena masuta me lako na nona vosa vei koya e ciqoma na veivakalougatataki me vaka na vosa ni Kalou, ka sega ni nona. Na nona masu na tinaqu me baleta na veivakalougatataki oya, sa saumi e buradelaqu. Sa tiko o koya ena vuravura ni yalo, sa sivi oqo e 40 na yabaki. Au kila ni a vuabale nona marau ena noqu vakalougatataki, me vaka ni a kerea, me rogoca ena nona ivakasala na ivakaro ni Kalou. Kau a tovolea meu lako ka kitaka me vaka na nona vakanuinui.
Au sa raica na cakamana ena tomani ni ivakatakila vei ira na peresitedi ni iteki kei na bisopi ena Lotu. Ia, me vaka na kena dina ena ivakatakila vei ira na iliuliu ni matavuvale, na yaga ni ivakatakila e vakatau ena nodra ciqoma o ira era liutaki tiko na ivakatakila ni veivakadeitaki.
Au raica na cakamana oya ni ivakatakila ni oti na kacabote ni Teton Dam mai Idaho ena 1976. E vuqa vei keda e kila na italanoa ni veika a yaco. Ia na ivakaraitaki ni tomani ni ivakatakila ka a soli mai vua e dua na peresitedi ni iteki e rawa ni vakalougatataki keda kece ena veisiga mai liu.
Era a tokitaki e udolu na tamata ni sa vakarusai nodra vale. E liutaka na cakacaka ni veivueti e dua na peresitedi ni iteki e kea, ka dauteitei. Au tiko ena dua na valenivuli e Ricks College ni oti e vica na siga mai na gauna ni leqa. Sa yaco mai e dua na iliuliu mai na tabana ni veivuke ena gauna ni leqa ni matanitu. Era lako mai o koya kei iratou na nona ivukevuke ki na rumu levu sa soqoni ira tiko kina na bisopi kei ira talega na italatala ni veisoqosoqo lotu e kea e dua na peresitedi ni iteki. Au tiko e kea baleta ni ra qaravi ka vakavaletaki tiko kina e vuqa na vueti mai e koronivuli kau kena peresitedi.
Ni tekivu na soqoni, a tucake na mata mai na tabana ni veivueti ni matanitu ka tekivu tukuna ena domo ni lewa na veika me na caka. Ni sa tuva oti yadua na lima se ono na cakacaka e tukuna ni bibi, a sauma vakamalua na peresitedi ni iteki, “Keitou sa cakava oti oqori.”
Ni oti e vica na miniti, sa kaya mai na turaga mai na tabana ni veivueti ni matanitu, “Au vakabauta meu sa na dabe mada ga ka sarasara.” Eratou sa qai vakarorogo o koya kei iratou na nona ivukevuke ni ra ripotetaka na bisopi kei na peresitedi ni kuoramu ni italatala qase na veika era sa cakava. Era vakamacalataka na idusidusi era sa ciqoma ka cakava mai vei ira na nodra iliuliu. Era tukuna talega me baleta na veika era sa vakauqeti me ra cakava ena nodra muria na ivakaro me ra raici ira na veimatavuvale ka vukei ira. Sa bogi sara toka. Era sa oca vakalevu ka sa sega soti ni levu na luluvu e rawa ni ra vakaraitaka ia na nodra loloma ga ena vukudra na tamata.
E solia e vica tale na iotioti ni idusidusi vei ira na bisopi o peresitedi ni iteki, ka qai kacivaka e dua na gauna ni soqoni ni soli ripote, ena mataka lailai ka tarava.
Ena mataka ka tarava a yaco mai na iliuliu ni timi ni veivueti ni matanitu ni vo e 20 na miniti me tekivu na soqoni ni ripote kei na veilesi. Au a duri voleka tu. Au rogoca nona tukuna vakamalua vei peresitedi ni iteki, “Peresitedi, na cava o vinakata me keitou cakava o au kei na noqu timi?”
Na ka e raica na tamata oya au sa raica ena veigauna ni leqa kei na vakatovolei e vuravura taucoko. E dina o Peresitedi Packer. Na tomani ni ivakatakila e dau yaco mai vei ira na peresitedi ni iteki me laveti ira sivia na nodra dui vuku kei na veika era rawata. Ka, sivia oqori, e dau solia na Turaga vei ira e liutaka tiko na peresitedi e dua na ivakadinadina veivakadeitaki ni nona ivakaro e lako mai vua na Kalou ena Yalo Tabu ki vua e dua na tamata sega ni taucoko tu.
Au sa vakalougatataki meu kacivi meu muri ira na iliuliu vakauqeti ena vuqa na gauna ni noqu bula. Niu se cauravou gone sara au a kacivi meu daunivakasala vua e dua na peresitedi ni kuoramu ni italatala qase. Au sa daunivakasala talega vei rau e rua na peresitedi ni tikina, kei na dua na Bisopi Vakatulewa ni Lotu, lewe ni Kuoramu ni iApositolo Le Tinikarua, ka daunivakasala vei rau e rua na Peresitedi ni Lotu. Au sa raica na ivakatakila e soli vei rau oti qai vakadeitaki vei ira era daumuri ira.
Na ivakatakila yadua oya ni veiciqomi, eda dau gadreva kece, e sega ni dau yaco mai vakarawarawa, ka sega talega ni rawarawa na kena rawati me vaka na noda kerea. E solia na Turaga na ivakatagedegede oqo me vukei keda me da ciqoma na ivakadinadina vakaoqo mai vua na Kalou. Sa idusidusi vei ira kece era vakasaqara na ivakatakila yadua, me vaka e dodonu vei keda kece.
“Ia me uasivi sara na nomu loloma vei ira na tamata kecega, kei ira era veitokani ena vakabauta, mo qarauna me savasava tikoga na nomu vakanananu; ia ena taucoko sara kina na nomu vakabauta ena mata ni Kalou; raica ena yaco vei iko na veivakalougatataki ni ilesilesi vakabete me vaka na tegu sa lutu mai lagi.
“Ena sala vata voli ga kei iko na Yalo Tabu.”
Mai na tikina oqori au taura mai kina na ivakasala vei keda kece. Kakua ni vakawalena na veika o vakila ena loloma vua na parofita ni Kalou. Se vanua cava ga au dau lako kina ena Lotu, se o cei ga e parofita tiko ena gauna oya, era na kerea na lewenilotu, “Ni o sa lesu tale ki na itikotiko liu ni Lotu, yalovinaka qai tukuna vua na parofita na levu ni neimami lomani koya?”
Oqori e levu cake mai na nona qoroi vakasivia e dua se na nanuma e dau yaco vei keda ena so na gauna ena noda vakacaucautaki ira na tamata rogo. E isolisoli ni Kalou. Ni tu vei iko o na ciqoma kina vakarawarawa na isolisoli ni ivakatakila veivakadeitaki ni vosa ena nona itutu vakaparofita ni Turaga. Na loloma o vakila sai koya na loloma e tu vua na Turaga vei cei ga e Nona gusunivosa.
Oqori e sega ni rawarawa me da vakila tikoga baleta ni vakavuqa nona dau kerea na Turaga vua na Nona parofita me solia na ivakasala e dau dredre me ra ciqoma na tamata. Na meca ni yaloda ena tovolea me uqeti keda me da cudru ka vakatitiqataka ni kacivi mai vua na Kalou na parofita.
Au sa raica na nona rawa ni tara na Yalo Tabu e dua na yalo vakamalumalumutaki me taqomaki kina e dua na tisaipeli yalomalumalumu i Jisu Karisito ena ivakatakila ni veivakadeitaki.
A talai au na parofita meu laki solia na kaukauwa tabu ni veivauci vua e dua na tamata ena dua na siti lailai yawa sara. Na parofita duadua ga e tu vua na idola me lewa o cei me soli vua na kaukauwa tabu ka solia na Turaga vei Pita, na iApositolo dede duadua. Sa soli oti talega vei au na kaukauwa vata ni veivauci oya, ia ena veidusimaki duadua ga ni Peresitedi ni Lotu e rawa niu solia kina vua e dua tale.
Ena loma ni dua na rumu ena dua na valenilotu yawa sara mai Salt Lake, au vakotora na ligaqu ena uluna e dua na turaga ka digitaki koya na parofita me ciqoma na kaukauwa ni veivauci. E laurai e ligana na ivakatakilakila ni dau cukiwere ena nona bula taucoko me rawata eso na ka lalai me bula kina. E dabe e yasana na marama lailai ka watina. E vakaraitaka talega na bula dredre e veiyabaki ni cakacaka vakaukauwa e yasai watina.
Au cavuta na vosa a solia mai na parofita: “Ena lewa lesi kei na itavi mai vei,” qai cavuti na yacana na parofita, “ka tu vua na idola kece sara ni matabete e vuravura ena gauna oqo, au sa solia kina na kaukauwa ni veivauci vei,” kau cavuta na yaca ni tamata qai muria na yaca ni valetabu me na veiqaravi kina vakadauveivauci.
E drodro sobu mai baluna na wainimatana. Au raica ni tagi tale toka ga na watina. Au waraka me oti na nodrau luluvu. A tucake mai o yalewa ka kalawa mai vei au. A raici au cake ka tukuna mai vakamalua ni marau ka rarawa talega. E kaya ni dau taleitaka na lako ki valetabu vata kei watina ia oqo e vakila me sa kua ni lako vata kei koya baleta sa digitaki koya na Kalou ena veivakabauti lagilagi ka tabu. Oti qai kaya ni yaco mai na nona nanuma ni sega ni kilikili me nona itokani vakavaletabu baleta ni sega ni rawa ni wilivola se volavola.
Au vakadeitaka vua ni na ka dokai vei watina na nona veitokani ena valetabu ena vuku ni nona kaukauwa cecere vakayalo. Ena kena vinaka duadua au rawata mai na kila lailai e toka vei au me baleta nona vosa, au tukuna vua ni sa vakatakila vua na Kalou na veika ka sivia sara na vuli kecega vakavuravura.
E kila mai na isolisoli ni Yalotabu sa solia na Kalou, mai vua Nona parofita, vei watina e dau lomana sa veivakabauti vakalou. A kila vakataki koya ni idola me soli kina na kaukauwa ni veivauci e taura tu e dua na tamata se bera vakadua ni raica ia e kila vakataki koya ni parofita bula ni Kalou. E kila, ka sega ni yaga me tukuni vua mai vua e dua na ivakadinadina bula, ni a masulaka na yacai watina na parofita. E kila vakataki koya ni sa veikacivi na Kalou.
E kila talega ni cakacaka vakalotu ena qarava na watina ena vauca vata na tamata me tawamudu ena matanitu selesitieli. Sa vakadeitaka ena nona vakasama kei na yalona ni se tomani tikoga ena Lotu na yalayala a vakayacora na Turaga vei Pita: “Ia na ka kecega ko na vauca e vuravura ena vauci mai lomalagi.” E kila vakataki koya oqori, mai na ivakatakila, mai vua na Kalou.
Me da lesu tale mada ki na vakasama eda tekivu mai kina. “Sa tomani tiko ena Lotu na ivakatakila: e ciqoma na parofita ena vuku ni Lotu; na peresitedi me baleta nona iteki, nona tabana ni kaulotu, se nona kuoramu; na bisopi me baleta nona tabanalevu; na tama me baleta nona matavuvale; na tamata yadua me baleti koya.”
Au wasea vei kemuni noqu ivakadinadina ni dina. E dau rogoca nomuni masu na Tamada Vakalomalagi. E lomani kemuni o Koya. E kila na yacamuni. O Jisu na Karisito, na Luve ni Kalou, ka noda Dauveivueti. E lomani iko ka na sega ni rawa ni o vakasamataka rawa.
Dau sovaraka mai na Kalou na ivakatakila, mai na Yalo Tabu, vei ira na Luvena. E dau vosa vua na Nona parofita e vuravura, ena gauna oqo sai Thomas S. Monson. Au vakadinadinataka ni taura tu ka dau vakayagataka na idola kece ni matabete e vuravura.
Ni da vakarorogo ena koniferedi oqo ki na nodra vosa sa kacivi ira na Kalou me ra vosa ena Vukuna, au masuta mo ni na ciqoma na ivakatakila veivakadeitaki o ni gadreva mo ni kunea kina na nomuni sala ena ilakolako ki vale, me da laki duavata kei koya ena matavuvale sa vauci tawamudu. Ena yaca tabu i Jisu Karisito, emeni.