Bulataka na Kosipeli ena Reki
Mai vei Peresitedi Dieter F. Uchtdorf
iKarua ni Daunivakasala ena Mataveiliutaki Taumada
Vakanuinui ena kaukauwa ni veivakabulai nei Jisu Karisito; muria na Nona lawa kei na ivakaro. Ena dua tale na kena vosa—bulataka na kosipeli ena reki.
Kemuni na ganequ lomani, kemuni na noqu itokani taleitaki ka tisaipeli vakalougatataki i Jisu Karisito, e ka dokai vei au na madigi oqo meu duavata kei kemuni ni da mai dolava tale e dua na koniferedi raraba ni Lotu i Jisu Karisito ni Yalododonu Edaidai. Ena macawa mai oqo keitou na sota na Mataveiliutaki Taumada kei na iApositolo Le Tinikarua kei ira na Vakaitutu Raraba kei na iliuliu raraba ni mataisoqosoqo ka na qai muri mai ena Vakarauwai kei na Sigatabu ka tarava na veisoqoni tale eso ni noda koniferedi raraba ni vuravura. Au vakavinavinaka vakalevu vei Peresitedi Thomas S. Monson, na parofita ni Kalou ena noda gauna, ena nona kerei au meu matataka na Mataveiliutaki Taumada ni Lotu ena noqu vosa vei kemuni na ganequ ena Lotu.
Niu vakananuma na veika meu na tukuna, e lesu noqu vakasama vei ira na marama era a tara cake na noqu bula ka vukei au ena veibolebole ni bula oqo. Au vakavinavinaka vua na buqu ka a lewa ena vicasagavulu na yabaki sa oti me kauta na nona matavuvale ki na dua na soqoni ni sakaramede ni Momani. Au vakavinavinaka vei Sisita Ewig, e dua na kena marama yada ni Jamani, ka ivakadewa vakavalagi ni yacana o “Sisita Eternal.” Sai koya a vakayacora na veisureti qaqa ka vakasakiti oqo vei buqu. Au vakavinavinaka vakalevu vei tinaqu, ka a kauta e va na gone curuma na dredre ni iKarua ni iValu Levu. Au vakasamataka talega na luvequ yalewa, o ira na makubuqu yalewa, kei na itabatamata se bera mai ni yalewa yalododonu ka ra na muri mai ena dua na siga.
Ia, au vakavinavinaka tawamudu vua na watiqu, o Harriet, ka dau vakamarautaki au niu se cauravou, colata na icolacola bibi duadua ni neirau matavuvale vakatina, tuvata kei au vaka-watiqu, ka lomani ira ka vakamareqeti ira na luvei keirau, makubui keirau, kei na makubui keirau vakarua. Sai koya na vu ni kaukauwa ena neitou vuvale ena gauna vinaka kei na gauna ca. E kauta mai na rarama ki na nodra bula o ira kece era kilai koya.
Kena itinitini, au vakavinavinaka vakalevu vei kemuni kece, na milioni vakamilioni na marama yalodina e vuravura taucoko ena veiyabaki ni bula kecega o ni cakava tiko e vuqa sara na ka me tarai cake kina na matanitu ni Kalou. Au vakavinavinaka vei kemuni ena veisala e vuqa o ni vakauqeta, karona, ka vakalougatataki ira kina era wavoliti kemuni.
Luvena Yalewa na Kalou
E marautaki vei au meu maliwai ira e oba na luvena yalewa na Kalou. Ni da lagata na sere “Au Luve ni Kalou,” e curuma na yaloda na kena voqa. Ni da vakasamataka vakatitobu na dina oqo—ni da luvedrau na itubutubu vakalomalagi—e vakasinaiti keda ni da vakila na vanua eda vu mai kina, na noda inaki eke, kei na vanua eda na cava kina.
E vinaka me da nanuma tiko e veigauna ni ko luvena tikoga na Kalou. Na kila-ka oqori ena laveti iko curuma na gauna dredre duadua ni nomu bula ka na uqeti iko mo vakacavara na veika vakasakiti eso. Ia, sa ka bibi talega mo nanuma tiko ni o luvena yalewa na itubutubu vakalomalagi e sega ni dua na ivakatakilakila o a rawata se o na vakayalia ena dua na gauna. O na dau luvena yalewa tikoga me tawamudu na Kalou. E cecere na Nona vakanuinui na Tamamu Vakalomalagi ena vukumu, ia na kemu ivuvu vakalou walega ena sega ni vakadeitaka na nomu ivotavota vakawa vakalou. E talai iko mai ke na Kalou mo mai vakarautaki iko ki na dua na vunilagi e cecere cake mai na veika kecega e rawa ni o vakasamataka.
Na veivakalougatataki yalataki ni Kalou vei ira na yalodina era lagilagi ka veivakauqeti. Ena kedra maliwa e tu kina na “idabedabe vakaturaga, na matanitu vakatui, na matanitu vakaravouvou, na kaukauwa, na itikotiko vakaturaga, ena kena cecere kei na titobu.” Ka na sivia na ivolanisucu vakayalo se na Kadi ni Luve ni Kalou” mo kilikili kina ki na veivakalougatataki sega ni vakasamataki rawa oqo.
Ia eda na rawata vakacava?
Sa sauma na iVakabula na taro oqo ena noda gauna:
“Kevaka ko sa sega ni muria na noqu ivakaro, ko na sega sara ni rawata na lagilagi oqo.
“Raica sa qiqo na matamata ni koro ka rabailailai na sala sa basika ki na bula.
“… Ia mo dou vakabauta sara na noqu ivakaro.”
Oqo na vuna eda tukuna tiko kina me da lakova na sala vakatisaipeli.
Eda tukuna tiko na talairawarawa ki na ivakaro ni Kalou.
Eda tukuna tiko na bulataka ena reki na kosipeli, ena yaloda taucoko, noda igu, vakasama, kei na noda kaukauwa kecega.
E Kila na Kalou E Dua na Ka Eda Sega ni Kila
Ia eso vei keda, era sega ni dau marautaka na talairawarawa ki na ivakaro ni Kalou. Me da sotava mada: eso beka ena dredre se sega soti ni taleitaki—na ivakaro eda dau raica me vaka e dua na gonelailai ka dabe tu e matana e dua na peleti kakana draunikau bulabula ia sega ni taleitaki. Eda kataibatida ka vakasaurarataki keda me da sotava me rawa ni da toso yani ki na itaviqaravi taleitaki cake.
Ena gauna beka vakaoqo, eda na kunea kina ni da tarogi keda, “Au gadreva beka meu talairawarawa ki na ivakaro kece sara ni Kalou?”
Na noqu isau ni taro oqo e rawarawa:
Au kila ni Kalou e kila tiko e dua na ka eda sega ni kila na veika e sega ni yacova rawa na kaukauwa ni noda vakasama! Na Tamada Vakalomalagi e dua na kabula tawamudu ka tawayalani na cecere ni veika e kila, nona yalomatua, kei na nona vuku mai vei keda. E sega ni o koya walega oqori, ia o Koya e tawamudu talega na nona dauloloma, ka vakanamata ga vakatabakidua ena dua na inaki vakalougatataki: me tucake tale mai na mate na tamata kecega ka rawata na bula tawamudu.
Ena dua tale na kena itukutukuni, e sega walega ni kila o Koya na ka e vinaka vei iko; e vinakata vakalevu o Koya mo digitaka na ka e vinaka duadua vei iko.
Kevaka o vakabauta e yalomu oqo—kevaka o vakabauta vakaidina ni nona cakacaka cecere na Tamada Vakalomalagi me vakacerecerei keda ka vakalagilagi keda na Luvena ka kila vakavinaka o Koya na kena icakacaka—e sega beka ni vakaibalebale me da ciqoma ka muria na Nona ivakaro, na kena sara mada ga e dau vaka me dredre tu? Me da kakua beka ni karona na veidurunicina sa solia mai o Koya ka dau tuberi keda ena butobuto kei na veivakatovolei ni bula oqo? Era vakatakilakilataka na noda sala lesu ki na noda itikotiko vakalomalagi! Ena noda digitaka na sala nei Tamada Vakalomalagi, o sa vakotora tiko e dua na yavu vakalou mo tubu kina vakaluvena yalewa na Kalou ka na vakalougatataki iko ena nomu bula taucoko.
E dua na tiki ni noda bolebole sai koya, au vakabauta, ni da dau nanuma ni lokata tu na Kalou na Nona veivakalougatataki kece sara ena dua na o vakaitamera mai lomalagi, ka sega ni via solia mai vei keda vakavo kevaka eda bulamuria e dua na ivakarau e gadrevi sa tura tu o Koya. Ia na ivakaro e sega sara ga ni vaqori. Na ka dina, na Tamada Vakalomalagi sa vakatauca tiko mai e veigauna na veivakalougatataki vei keda. Na noda rere, vakatitiqa kei na ivalavala ca, me vaka e dua na iviu, sa dau tabonaka ena kena yacovi keda mai na veivakalougatataki oqori.
Na Nona ivakaro e idusidusi ni loloma kei na veivuke vakalou vei keda ka na uruca na iviu, me rawa ni da ciqoma na mimira ni veivakalougatataki vakalomalagi.
E gadrevi me da ciqoma ni ivakaro ni Kalou e sega ni dua walega na ituvatuva balavu ni vakasama vivinaka. Era sega ni iwalewale ni veivakalaboci mai na dua na buloqu ena Initaneti se vosacavuti veivakauqeti mai na dua na papa ni Pinterest. Era ivakasala vakalou, ka yavutaki ena dina tawamudu ka soli me kauta mai na “vakacegu ena bula oqo ka rawata na bula tawamudu ena bula sa bera mai.”
Sa toka kina vei keda e dua na digidigi. Ena dua na yasana, sa koto kina na rai ni vuravura kei na kena vakasama dau veisau kei na sasaga dau vakatarogi. Ena dua na yasana, sa koto na vosa ni Kalou vei ira na Luvena—Na Nona yalomatua tawamudu, na Nona yalayala dei, kei na Nona idusidusi ni loloma me baleta na lesu tale ena lagilagi, loloma, kei na vakaturaga ki na Nona iserau.
E nomu na digidigi!
O koya na Dauveibuli ni waitui, nuku, kei na kalokalo e sega ni yalani rawa sa tarai kemuni tiko yani ena siga sara ga oqo! Sa solia tiko na iwalewale cecere ni marau, sautu, kei na bula tawamudu!
Me rawati na veivakalougatataki lagilagi oqo, sa dodonu mo vakamalumalumutaki iko, cakacakataka nomu vakabauta, taura na yaca i Karisito, vakasaqarai Koya ena vosa kei na ivalavala, ka “tu mo vakadinadinataka na Kalou ena veigauna kecega ena veika kecega, kei na veivanua kecega.”
Na Vuna me da Talairawarawa Kina
Ni o sa kila dina na Kalou kei na Nona ivakaro, sa na yaco mo kilai iko talega vakavinaka kei na inaki vakalou ni nomu mai tiko eke. Oqori sa na veisau kina na inaki ni nomu muria na ivakaro, ka yaco me gagadre ni yalomu mo bulataka ena marau na kosipeli.
Me kena ivakaraitaki, o ira era dau raica na lako i Lotu me nodra sala ni vakalevutaka cake na nodra lomana na Kalou, kune vakacegu, laveti ira cake na tani, vakasaqara na Yalotabu, ka vakavouya na nodra yalayala me ra muri Jisu Karisito era na vutuniyau vakalevu cake mai vei ira era lako tu yani i lotu me isau ni taro walega. Kemuni na ganequ sa bibisara me da dau lakova na soqoni ena Sigatabu, ia au vakabauta deivaki ni kauwaitaka vakalevu cake na Tamada Vakalomalagi na noda vakabauta kei na veivutuni mai na iwiliwili ni tiko rawa ena Sigatabu.
Oqo tale e dua na ivakaraitaki:
A tauvi matenitoa e dua na tina sega ni vakawati ka rua na luvena gonelalai. Ia, e sega ni dede rau sa tauvimate talega na luvena. E voleka me sa sega ni rawa ni sotava na tina gone oqo na itavi ni nodratou qaravi o koya kei rau na luvena lalai. Sa yaco na vale dau savasava tu ga me kabuwacara ka duka. E sinai ena siqi na iyayanikana duka, ka bini ena veiyasana kecega na isulu.
Ni solia tiko nona igu vei rau na luvena ka rau tagitagi tiko—ka via tagi toka mada ga—sa rogo na tukituki e katuba. O rau na nona dauveisiko. E rawa ni rau raica na nona leqa na tina gone oqo. E rawa ni rau raica na nona vale, nona valenikuro. Erau rogoca na nodra tagi na gone.
Ia, kevaka me rau a leqataka tikoga na marama oqo me rau vakacavara ga na nodrau ilesilesi ni veisiko vakavula, erau na solia beka vei tina e dua na peleti kuki, tukuna ni ra sa nanumi koya dina ena soqoni ni iSoqosoqo ni Veivukei ena macawa sa oti, ka tukuna e dua na ka me vaka, “Qai tukuna mai ke dua na ka keirau rawa ni cakava!” Oti erau na qai lesu yani ena reki, ka marau ni sa 100 na pasede na nodrau veisiko ena dua na vula.
E kalougata, ni o rau na marama oqo erau tisaipeli dina nei Karisito. Erau raica ka kila na veika e gadreva ka vakayagataka na kila kei na taledi e tu vei rau. Erau vakasavasavataka na kabuwacara, ka kauta mai na rarama kei na yalodei ena loma ni vale, ka qirita e dua na itokani me kauta mai na kakana gadrevi vakalevu. Ni qai mai oti na nodrau cakacaka ka vakamoce, erau biuta koto mai na tina gone ena yaloluluvu—luluvu ni vakavinavinaka kei na loloma.
Me tekivu mai na gauna ko ya ka lako yani, sa veisau na ivakarau ni nona vakasama na tina gone oqo me baleta na veisiko. “Au kila,” e kaya o koya, “niu sega walega ni dua na itoqa ena nona ituvatuva ni veika me caka e dua tale.”
Io, e dodonu vei ira na dausiko vuvale me ra yalodina ena nodra veisiko e veivula, na veika kece ka me kakua ni guilecavi na vuna bibi ena daku ni ivunau oqo: me da lomana na Kalou kei na wekada.
Ni da raica na ivakaro ni Kalou kei na noda itavi ena kena taraicake na Nona matanitu me dua ga na ka me toqai ena dua na ituvatuva me caka, eda sa calata na uto ni bula vakatisaipeli. Eda sa calata na tubu dau yaco ni da bulataka ena reki na ivakaro ni Tamada Vakalomalagi.
Na lakovi ni sala vakatisaipeli e sega ni gadrevi me gauna dragali. E “kamikamica sara mai na veika kamikamica kecega.” E sega ni dua na icolacola me bikai keda sobu. Na bula vakatisaipeli e laveta ka vakararamataka na yaloda. E vakauqeti keda ena vakabauta, na inuinui kei na loloma cecere. E vakasinaita na yaloda ena rarama ena gauna ni butobuto, kei na lomavinaka ena gauna ni rarawa.
E solia vei keda na kaukauwa vakalou kei na reki tudei.
Bulataka na Kosipeli ena Reki
Kemuni na ganequ lomani ena kosipeli, se o yabaki 8 se 108, e dua na ka au nuitaka mo ni na ciqoma ka kila vakavinaka sara:
O ni lomani.
O ni nodrau daulomani na itubutubu vakalomalagi.
E kilai kemuni o koya na Dauveibuli tawayalani ka tawamudu! E dau kauwaitaki kemuni o Koya.
Io, na Kalou, e lomani kemuni ena siga saraga oqo kei na veisiga kecega.
E sega ni waraka tiko o Koya me qai lomani kemuni ena gauna o sa vakamalumalumutaka rawa kina na nomu malumalumu kei na itovo ca. E lomani iko nikua ka kila vakavinaka tu na nomu veidredre. E kila o Koya na gauna o dolele cake yani kina Vua ena masu mai vuniyalomu kei na vakanuinui. E kila na gauna o kukuva toka kina na rarama katabokoboko ka vakabauta tiko—ena loma sara mada ga ni butobuto. E kila na nomu vakararawataki. E kila na nomu yaluma ena veigauna o yacokoso kina se sega ni rawata. Ia e lomani iko tikoga.
Ka kila talega na Kalou na nomu qaqa; e dina ni na rairai lailai vei iko, e vakadinadinataka ka vakamareqeta yadua o Koya. E lomani iko o Koya ena nomu dodoliga yani vei ira na tani. E lomani iko ena nomu dolele yani ka vukei ira na tani me ra colata rawa nodra icolacola bibi—ni o sotava dredre tiko mada ga na nomu.
E kila o Koya na veika kece me baleti iko. E raici iko tu vakamatata o Koya—E kilai iko me vaka na kemu ituvaki dina. Ka lomani iko o Koya—nikua kei na veigauna kecega!
O nanuma beka ni kauwaitaka na Tamada Vakalomalagi kevaka era sa uasivi sara na nomu isasauni, isulu, kei na taukuku? O nanuma beka ni na vakatau na kemu yaga ena levu ni nomu itokani ena Instagram se Pinterest? O nanuma beka ni vinakata o Koya mo leqataka se yalolailai kevaka e dua e bokoci iko se sega ni via muri iko ena Facebook se Twitter? O nanuma beka ni na duatani na kemu yaga vei Koya a bulia na vuravura kecega mai na kemu irairai e tautuba, se na levu ni nomu ivinivo?
E lomani iko o Koya sega ni baleta walega o cei o iko ena siga nikua ia sa baleta talega na tamata lagilagi ka rarama e rawa ka tu vei iko na kena gagadre mo vakakina.
E levu cake mai na veika e rawa ni o vakasamataka, na Nona gadreva mo rawata na nomu icavacava—mo lesu yani ki na nomu vuvale vakalomalagi ena dokai.
Au vakadinadinataka ni sala me rawati kina oqo sai koya me biu na gagadre kocokoco kei na sasaga tawakilikili ena icabocabo ni soro ni solibula kei na veiqaravi. Kemuni na ganequ, ni vakanuinui ki na kaukauwa ni veivakabulai nei Jisu Karisito; rokova na Nona lawa kei na ivakaro. Ena dua tale na kena itukutuku—bulataka ena yaloreki na kosipeli.
Sa noqu masu mo ni na vakila e dua na ivakarau vakavoui ka vakarabailevutaki ni nona loloma totoka na Kalou ena nomuni bula; mo ni raica kina na vakabauta, yalodina, kei na igu me vulici na ivakaro ni Kalou, vakamareqeta e yalomu, ka bulataka ena yaloreki.
Au yalataka ni o ni vakayacora vakakina, o ni na raica na kemuni vinaka duadua—o kemuni dina O ni na kila na kena ibalebale dina ni luvena yalewa na Kalou tawamudu, na Turaga ni ivalavala dodonu kecega. Au vakadinadinataka na veika oqo ka laiva vei kemuni na noqu veivakalougatataki me vaka niu dua na iApositolo ni Turaga, ena yaca i Jisu Karisito, emeni.