Vakaliuca mo Bulataka Nomu Vakabauta

Mai vei Elder Richard G. Scott

Ena Kuoramu ni iApositolo Le Tinikarua

Se cava sara na veisaqasaqa eda bolei kina ena bula oqo, sa dodonu ga meda taura na gauna me da bulataka tudei tiko na noda vakabauta.

Ena gauna rau a se tiko kina mai na Were o Iteni o Atama kei Ivi, na veika e gadrevi ena nodrau bula ena veisiga sa soli tu vakalevu vei rau. E sega vei rau na dredre, bolebole, se mosi. Ena vuku ga ni rau se bera mada ni sotava na bula dredre, rau sega ni kila ni rau rawa ni tiko marau. Rau sega mada ni kila na lomolomora, rau sa sega kina ni vakila na vakacegu.

Sa mani yaco kina vei Atama kei Ivi me rau voroka na ivakaro me rau kakua ni kania na vuata ni vunikau ni kila na vinaka kei na ka ca. Ni rau sa vakayacora vakakina rau sa qai sega kina ni tiko savasava. Rau sa tekivu sotava na ivakarau ni veisaqasaqa. Rau sa tekivu sotava na mateveitauvi ka vakamalumalumutaka na nodrau tiko bulabula. Rau sa tekivu vakila na rarawa vakakina na reki.

Ni rau sa mai kania o Atama kei Ivi na vuanikau vakatabui, sa yaco kina ki vuravura na kena kilai na vinaka kei na ka ca. Na nodrau digidigi o ya sa rawa kina vei keda yadua meda tadu mai ki na vuravura oqo meda mai bolei ka vakatovolei. Eda sa vakalougatataki ena noda galala ni digidigi ni sa rawa meda vakatulewa ka yaco me noda ga na lewa oqori. Mai na Lutu oqo sa rawa kina ena noda bula meda vakila ruarua na marau kei na rarawa. Eda sa rawa ni kila vakavinaka na vakacegu baleta ni da vakila na lomolomora.

Sa kila tu na Tamada Vakalomalagi ni na yaco oqo vei keda. Sa tiki taucoko tiko ni Nona ituvatuva uasivi ni bula marau. A vakarautaka o Koya mai na bula nei Luvena uasivi talairawarawa, o Jisu Karisito, na noda iVakabula, me yaco Nona Veisorovaki me uabaleta na veika dredre kecega eda na rawa ni sotava ena bula vakayago oqo.

Eda sa bula donuya tiko na gauna veicavilaki. E sega ni gadrevi meu tukuna na ivurevure taucoko ni veika butobuto e vuravura. E sega ni gadrevi me vakamacalataki na bolebole kei na luluqa ni yalo sa tiki tiko ni bula vakayago oqo. Eda sa vakila yadua tiko na noda dui veigauna ni temaki, mosi kei na rarawa.

Eda a vakavulici ena vuravura taumada me baleta na inaki ni noda tadu mai ke o ya me da vakatovolei, bolei, ka kaloci. Eda sa kila tu mai ni da na sotava na veika butobuto nei vu-ni-meca. Eso na gauna eda na vakila cake na veibasai ni bula vakayago oqo mai na veika dodonu. E vakavulica o parofita Liai, “Raica sa kilikili me tu na veibasai ni veika kecega.” Se cava sara na veisaqasaqa eda bolei kina ena bula oqo, sa dodonu ga meda taura na gauna me da bulataka tudei tiko na noda vakabauta. Ni da bulataka vakaoqo ena sureta mai na kaukauwa dodonu, vakasinaiti ena vakabauta ni Veisorovaki i Jisu Karisito ki na noda bula.

Sa solia vei keda na Tamada Vakalomalagi na iyaragi me vukea noda gole mai vei Karisito ka bulataka noda vakabauta na Nona Veisorovaki. Ni sa yaco na iyaragi oqo me noda ivakarau bibi ni bula, sa na vakarautaka na sala rawarawa duadua ni kena kunei na vakacegu ni da bolei ena bula vakayago oqo. Au sa mai digitaka kina nikua e va vei ira na iyaragi oqo. Niu vosa tiko, sa rawa mo dikeva sara nomu vakayagataka vakai iko na iyaragi yadua oqo; mo qai vakasaqara na veidusimaki ni Turaga mo vakadeitaka kina na sala mo vakayagataka vakavinaka cake kina na iyaragi yadua oqo.

Masu

Na imatai ni iyaragi o ya na masu. Digitaka mo drau veivosaki vakawasoma kei Tamamu mai Lomalagi. Vakarautaka e dua na gauna ena veisiga mo wasea nomu nanuma kei na lomamu Vua. Tukuna Vua na veika kece me baleti iko. E kauwai o Koya ena veika bibi ka vakakina ena veika wale ena nomu bula. Wasea Vua na lomamu taucoko kei na veika o sotava tiko.

Baleta ni doka o Koya na nomu galala ni digidigi, ena sega vakadua ni vakasaurarataki iko na Tamamu mai Lomalagi mo masu Vua. Ia ni ko vakayagataka nomu galala ni digidigi ka okati Koya ena veituvaki kece ni nomu bula ena veisiga, ena tekivu me vakasinaiti na yalomu ena vakacegu, na vakacegu veilaveti. Na vakacegu o ya ena raica matua e dua na rarama tawamudu ena nomu sasaga. Ena vukei iko mo taqeya rawa na bolebole eso oqo ena dua na rai tawamudu.

Kemuni na itubutubu, taqomaki ira na luvemuni ena nomu vakayaragitaki ira ena mataka kei na bogi ena kaukauwa ni masu vakamatavuvale. Era sa boloraki na luveda ena veisiga ena ca ni gagano, kocokoco, dokadoka ni veika butobuto kei na vuqa tale na itovo valavala ca. Taqomaki ira na luvemuni mai na veisaqasaqa ni veisiwati e veisiga ni vuravura ena nomuni vaqaqacotaki ira ena veivakalougatataki kaukauwa e yaco mai na masu vakamatavuvale. Na masu vakamatavuvale e sega ni dodonu me vakawaleni na kena vakaliuci tiko ena bula ena veisiga.

Vulici ni iVolanikalou

Na ikarua ni iyaragi o ya na vulici ni vosa ni Kalou ena ivolanikalou kei na nodra vosa na parofita bula. Eda veivosaki kei na Kalou ena masu. E dau vosa lesu mai vakavuqa o Koya mai na Nona ivola sa volai tu. Me kilai na domo Vakalou e voqa ka vakilai vakacava, wilika na Nona vosa, vulica na ivolanikalou, ka tugana. Vakayacora me sa tiki ni nomu bula ena veisiga. Kevaka o gadreva mera vakadeitaka, kila vakavinaka, ka vakauqeti ena Yalotabu o ira na luvemu, e dodonu mo vulica vata kei ira na ivolanikalou.

Kakua ni soli iko ki na veilasutaki nei Setani ni sega nomu gauna ni wilika na ivolanikalou. Digitaka mo solia na gauna ena kena vulici. Na kana mai na ivola ni Kalou ena veisiga sa ka bibi cake mai na moce, vuli, cakacaka, yaloyalo ena televiseni, qito vidio, se itukutuku vakavuravura. Ena gadrevi mo veisautaka na veika o vakaliuca me vakarautaki na gauna ni kena vulici na vosa ni Kalou. Ke sa vakakina, cakava!

E vuqa tu na yalayala vakaparofita ni kune kalougata ke vulici ena veisiga na ivolanikalou.

Au mai voqataka talega ena iyalayala oqo: ni ko vakacabo gauna ena veisiga, vakai iko vata kei na nomu matavuvale, ki na kena vulici na vosa ni Kalou, ena yaco mai na vakacegu ki na nomuni bula. Na vakacegu oqori ena sega ni solia o vuravura. Ena yaco mai ena loma ni nomudou vale, ena loma ni matavuvale, mai na yalomu e loma. Sai koya na isolisoli ni Yalo. Ena ramase mai vei iko mo vakauqeti ira na tamata e vuravura e vakavolivoliti iko. Ko na vakayacora kina e dua na ka e bibi sara me semati ki na vakacegu soli raraba e vuravura.

Au sega ni kaya ni nomu bula ena sega kina na bolebole. Nanuma na gauna rau a tiko kina o Atama kei Ivi ena were, e sega kina na bolebole, ia rau a sega ni vakila na marau, reki, kei na vakacegu. Na bolebole sa tiki bibi ni bula vakayago. Mai na kena vulici tudei ena veisiga na ivolanikalou, ko na kunea na vakacegu ena bula lomolomora e vakavolivoliti iko tu kei na kaukauwa mo vorata rawa na veitemaki. Ko na tauyavutaka mo vakabauta vakaukauwa na loloma soliwale ni Kalou ka kila ni Veisorovaki i Jisu Karisito ena vakatudonutaka na tamata kecega ena gauna ga ni Kalou.

Lotu Vakamatavuvale

Ni ko sa cakacakataka tiko mo vaqaqacotaka na nomu matavuvale ka teivaka na vakacegu, mo nanuma sara na ikatolu ni iyaragi oqo: na lotu vakamatavuvale ena veimacawa. Qarauna me kakua ni vakayacori na nomudou lotu vakamatavuvale me ivakamuri tu ga ni oti e dua na siga osooso. Me lewai ni ena bogi ni Moniti mo dou na soqoni vata mai vakamatavuvale e vale. Me kakua ni bibi cake na gauna ni cakacaka, qito, itaviqaravi eso, ka ni vuli, se dua tale na ka me bibi cake mai na nomudou na soqoni vata mai e vale vata kei na nomudou matavuvale.

Na ituvatuva ni yakavi oqo e sega ni bibi cake mai na gauna dou sa mai duavata kina. E dodonu me vakavulici na kosipeli ena vunau kei na veivosaki. Me na vakaibalebale cake vei iratou yadua na lewe ni matavuvale. Na lotu vakamatavuvale sa gauna cecere duadua me soli kina na ivakadinadina ena vanua e taqomaki; me vulici na veivakavulici; na kila ni ituvai ni veivakasoqoni; me vaqaqacotaki kina na isema vakamatavuvale; me tauyavutaki kina na itovo vakamatavuvale; veivosaki vakai kemudou; ka bibi cake, me dua na nomudou gauna vata vakasakiti!

Ena koniferedi ni Epereli sa oti, a kaya kina o Sisita Linda S. Reeves: “Au vakadinadinataka eke na veivakalougatataki ni wiliki na ivolanikalou ena veisiga kei na masu, kei na lotu vakamatavuvale ena veimacawa. Sai koya oqo na ivakarau sara ga ena kauta laivi na lomaocaoca, dusimaki na noda bula, ka taqomaki vakakina na noda matavuvale.” E marama vuku sara o Sisita Reeves. Au sa vakamasuti kemuni mo ni rawata vakai kemuni na nomuni ivakadinadina mai na tolu na itovo bibi oqo.

Gole ki Valetabu

Na ikava ni yaragi o ya mo gole ki valetabu. Eda sa kila taucoko ni sega tale e dua na vanua veivakacegui ena vuravura oqo me vakataka na loma ni veivaletabu ni Kalou. Ke sega ni tiko na nomu ivolatara ni valetabu, mo kilikili me dua na nomu. Ni sa tiko na nomu ivolatara ni vale tabu, mo vakayagataka sara vakawasoma. Mo tuvanaka na veigauna tudei ni tiko e valetabu. Kakua ni vakatara e dua na tamata se dua na ka me tarova nomu laki tiko kina.

Ni ko sa tiko e loma ni valetabu, vakarorogo ki na veivosa ni cakacaka vakalotu, tugana ki lomamu, mo masulaka, ka saga mo kila na kedra ibalebale. Na valetabu sa dua vei ira na vanua vinaka duadua mo na kila kina vakavinaka na kaukauwa ni Veisorovaki i Jisu Karisito. Vakasaqarai Koya kina. Mo nanuma tiko ni vuqa tale na veivakalougatataki e lako mai ni ko solia na yacadratou nomu matavuvale e valetabu.

Na va na yaragi oqo sa itovo bibi me taqomaki kina na nomu bula ena kaukauwa ni Veisorovaki i Jisu Karisito. Mo nanuma tiko ni noda iVakabula sai Koya na Tui ni Sautu. Na vakacegu ena vuravura oqo e lako mai na Nona isoro ni veivakaduavatataki. Nida dau masu ena mataka kei na yakavi, vulica ena veisiga na ivolanikalou, cakava noda lotu vakamatavuvale, ka gole ki valetabu vakawasoma, eda sa vakaio tiko ki na Nona veisureti “dou lako mai Vua.” Na levu ga ni noda vakatorocaketaka na itovo oqo, sa na gu cake vakalevu o Setani me vakarusai keda ia ena malumalumu tiko ga mai na nona sasaga me cakava. Mai na kena vakayagataki na iyaragi oqo, eda sa galala kina meda digitaka na isolisoli taucoko ni Nona isoro ni veivakaduavatataki.

Au sega ni kaya eke ni na takali vakadua na dredre ni bula oqo ni ko vakayacora na veika e va oqo. Eda tadu mai ki na bula oqo baleta sara ga meda tubu mai na noda dredre kei na vakatovolei. Ena vukei keda na bolebole meda na vakataka sara na Tamada mai Lomalagi, ka yaco na Veisorovaki i Jisu Karisito meda curuma rawa na bolebole oqori. Au vakadinadinataka ni gauna eda bulataka tiko noda gole mai Vua, eda rawa ni curuma na veitemaki kecega, na mosi ni yalo kecega, na bolebole eda tadrava, ena yaca i Jisu Karisito, emeni.

iDusidusi

1. Raica na Mosese 5:11.

2. Raica na Mosese 4–5.

3. Raica na Eparaama 3:25.

4. 2 Nifai 2:11.

5. Raica na Vunau kei na Veiyalayalati 18:36; raica talega natikina 34–35.

6. E oka kina na ivakaraitaki oqo:E kaya o Peresitedi Thomas S. Monson: “Ni da wilika ka tugana na ivolanikalou, eda na vakila na vosamalua kamica ni Yalotabu ki lomada. Sa rawa me saumi na noda taro. Eda sa vulica kina na veivakalougatataki e yaco mai na noda maroroya tiko na ivakaro ni Kalou. Eda sa rawata kina e dua na ivakadinadina vakadeitaki ni Tamada Vakalomalagi kei na noda iVakabula, o Jisu Karisito, kei na Nodrau loloma vei keda. Ni sema vata na vulici ni ivolanikalou kei na masu, eda sa vakadeitaka ni da kila ni dina na kosipeli i Jisu Karisito. … Ni da nanuma tiko na masu ka taura na gauna meda gole ki na ivolanikalou, ena vakalougatataki tawamudu na noda bula ka vakamamadataki na noda icolacola” (“Eda Sega ni Lako Duadua Voli,” Liaona, Nove. 2013, 122).E kaya o Peresitedi Gordon B. Hinckley: “Au sega ni vakabekataka noqu yalataka eke ni gauna ko ni vakamuria kina na parokaramu rawarawa oqo, se cava ga na levu ni gauna o ni wilika kina na iVola i Momani, ena yaco ki na nomu bula kei na nomu itikotiko na ikuri ni isolisoli ni Yalo ni Turaga, e dua na veivakadeitaki kaukauwa mo talairawarawa yani ki na Nona ivakaro, ka kaukauwa cake na ivakadinadina ni sa bula dina tiko na Luve ni Kalou” (“A Testimony Vibrant and True,” Liahona, Okosi. 2005, 6).E kaya kina o Peresitedi Howard W. Hunter: “Era na vakalougatataki na matavuvale ni gauna era vakasoqoni ira mai kina na luvedra na tama kei na tina yalomatua, ka wiliwili mai na veiivolanikalou sa tu, ka veivosakitaka ena galala na italanoa totoka kei na vakasama era dui kila taucoko. E laurai ni o ira na itabagone kei na lalai e vakasakiti sara na nodra kila na ivakavuvuli taumada ni lotu” (“Reading the Scriptures,” Ensign, Nove. 1979, 64).E kaya o Peresitedi Ezra Taft Benson: “Sa matau tu meda maqusa ena kena sagai me vakalevutaki na itaviqaravi ena noda iteki. Eda cakacaka vagumatua me vakalevutaki na pasede ni iwiliwili ni tiko ena soqoni ni sakaramede. Eda cakacaka vakaukauwa meda vakalevutaka na pasede ni wiliwili ni cauravou era laki kaulotu. Eda sasagataka me ra lewelevu mera laki vakamau ki valetabu. Na ka kece oqo sa sasaga me vakavinavinakataki ka bibi sara ki na kena tubu na matanitu. Ia ena gauna era tabadromuci ira kina vakawasoma na lewenilotu yadua kei na matavuvale ena ivolanikalou, era na yaco ga mai vakai ira na itaviqaravi oqo. Ena tubu na ivakadinadina. Ena qaqaco cake na solibula. Ena kaukauwa sara na matavuvale. Ena drodro mai na ivakatakila ki na tamata yadua” (“The Power of the Word,” Ensign, Me 1986, 81).E kaya o Peresitedi Spencer W. Kimball: “Au raica ni gauna au vakawalena kina na noqu veimaliwai kei na Kalou ka vaka me sega ni vakarorogo mai na Kalou ka sega talega ni vosa mai, au sa qai yawa, yawa sara. Kevaka au tabadromuci au ena ivolanikalou sa qai yaco na veivolekati ka lesu mai na veika vakayalo. Au raica niu sa lomani ira vakalevu cake e dodonu meu lomana ena yaloqu, vakasama kei na kaukauwa taucoko, ka lomani ira vakalevu, sa qai rawarawa meu muria na nodra ivakasala” (Nodra iVakavuvuli na Peresitedi ni Lotu: Spencer W. Kimball [2006], 67).E kaya o Peresitedi Marion G. Romney: “Au sa vakadeitaka ni kevaka, e yaco tiko e vale, na nodra wilika na itubutubu na iVola i Momani vakawasoma ena kena gauna, o irau vakakina kei ira na luvedrau, na yalo ni ivola cecere o ya ena yaco me curuma na noda itikotiko kei ira kece era tiko kina. Ena tubu na yalo e vakarokoroko; na veidokadokai kei na veinanumi vakai ira. Ena takali yani na yalo ni veiba. Era na vakasalataki luvedra na itubutubu ena loloma levu kei na vuku. Era na vakarorogo vakalevu na gone ka muria na nodra ivakasala na itubutubu. Ena tubu na ivalavala dodonu. Na vakabauta, inuinui, kei na loloma—o ya na loloma uasivi i Karisito—ena solega na noda itikotiko kei na noda bula, ka vakayadrati ena vakacegu, reki, kei na marau” (“The Book of Mormon,” Ensign, Me 1980, 67).E kaya o Peresitedi Boyd K. Packer: “Na ivunau dina, ni kilai, ena veisautaka na ivakarau ni bula kei na itovo. Na vulici ni ivakavuvuli ni kosipeli ena vakavinakataka cake vakatotolo na itovo mai na kena vulici na itovo me vakavinakataka na itovo” (“Kakua ni Rere,” Liaona, Me 2004, 79).E kaya o Elder David A. Bednar: “Na masu vakamatavuvale yadudua, na gauna yadudua ni wili ivolanikalou vakamatavuvale, na lotu vakamatavuvale yadudua era sa iboro yadudua ni droini ni yaloda. E sega ni dua vei ira me veivakauqeti sara se daunanumi tu ga. Ia na kena cokoti vata na iboro yadua dromodromo, koula kei na masikuvui sa yaco me dua kina na droini vakasakiti, ka sa vakakina na noda vakaivakarautaka na veicakacaka lalai ni muataki keda ki na vuanikau vakayalo” (“Vakavulici Ira Vakavinaka na Nomu Vuvale Me Ra Gugumatua,” Liaona, Nove. 2009, 19–20).

7. Raica na 2 Nifai 2:13.

8. Linda S. Reeves, “Taqomaki mai na iYaloyalo Vakasisila—Matavuvale Vakaliuci Karisito,” Liaona, Me 2014, 16–17.

9. E kaya o Peresitedi Howard W. Hunter: “Ena yalo vata oqo au sa sureti ira kina na Yalododonu Edaidai mera rai yani ki na valetabu ni Turaga me sa ivakatakilakila cecere ni nomu lewenilotu. Sa gagadre bibi ni yaloqu o ya mera curuma na valetabu ena kilikili o ira yadudua na lewe ni Lotu. Ena marautaka sara na Turaga ke mera bula kilikili o ira yadua na lewenilotu matua—ka me tiko—na nodra ivolatara ni valetabu. Na veika meda na cakava kei na veika meda kakua ni cakava me kilikili kina me dua noda ivolatara ni valetabu sai koya sara ga na veika e vakadeitaka me da bula marau kina vakatamata yadua ka vakamatavuvale. Meda sa qai tamata dau lakova vakawasoma na valetabu. Meda gole ki valetabu ena veigauna kece e rawa ni da gole kina. Me tiko e dua na iyaloyalo ni valetabu ena nomu vale ka mera raica tiko na luvemuni. Vakavulici ira baleta na inaki ni vale ni Turaga. Mera tuva vakai ira ni ra se gone mera gole kina ka bula, kilikili tikoga ki na kena veivakalougatataki” (“Exceeding Great and Precious Promises,” Ensign, Nove. 1994, 8).

10. Raica na2 Nifai 2:2.