Veivueti ena Duavata
Mai vei Elder Chi Hong (Sam) Wong
Ena Vitusagavulu
Ena kena gadrevi meda vukea na iVakabula, e dodonu meda cakacaka vata ena duavata kei na lomavata. Na tamata yadua, itutu kece sara, kei na veikacivi yadua e sa ka bibi sara.
Eda dau rogoci Peresitedi Thomas S. Monson me kaya, “Lako mo veivueti.” E yaco mai ki na noqu vakasama e dua na itukutuku ena Veiyalayalati Vou. Oqo e dua na ivakaraitaki uasivi ni nodra rawa ni cakacaka vata na lewenilotu kei ira na daukaulotu ena duavata ena matabose ni tabanalevu mera lako yani ka veivueti. Na italanoa oqo e kune ena Marika 2:1–5. Au raica ni vakarau ni nona vakavulici keda o Jisu ena vunau se ivakavuvuli eso e sa dau veivakauqeti vakaoti ka rawarawa ni kilai matata.
E dua e tukuni tiko ena itukutuku oqo e tauvi paralase, e sega ni rawa me yavala vakavo ke dua e vukea. Sa na dau tu ga e vale na tagane oqo, ka waraka voli na veivueti.
Ena noda gauna oqo, ena rawa me yaco vakaoqo. E va na tamata e ratou sa cakava tiko na nodratou itavi a solia o nodratou bisopi me ratou sikova, ena nona vale, e dua na tagane ka tauvi paralasi tu. Au rawa ni raitayaloyalotaka ni dua e gole mai na iSoqosoqo ni Veivukei, e dua mai na kuoramu ni italatala qase, dua mai na Matabete i Eroni, ka, kena iotioti ka sega ni lailai, e dua na daukaulotu tudei. Ena matabose ni tabanalevu se qai oti toka, ni oti na veivakasalataki baleta na gagadre eso ena tabanalevu, a solia kina o bisopi na ilesilesi ni “veivueti.” E ratou sa lesi kina na lewe va oqo me ratou laki vukei koya na tagane tauvi paralasi. Ratou sa sega ni waraka me gole mai ki lotu vakataki koya. Sa dodonu ga me ratou lako ki na nona vale ka sikovi koya. Sa dodonu ga me ratou vakasaqarai koya, ka ratou sa mani gole. Sa kau mai na turaga oqo vei Jisu.
“A sa [lako] mai vei koya eso, e ratou kauta mai e dua sa tauvi paralasi, sa colati koya e le va” (Marika 2:3).
Ia, a osodrigi tu na rumu. E ratou sega ni curu rawa e katuba. Au vakabauta ni ratou saga na veika taucoko eratou vakasamataka rawa, ia e ratou se sega ga ni curu rawa. A sega ni lako vinaka na ka kece me vaka a tuvai toka mai. A yaco na veivakataotaki ena ilakolako ni “veivueti.” Ia e ratou a sega ni soro. E ratou a sega ni laivi tagane paralasi e katuba. Ratou a veivosakitaka na cava me sa na caka—me rawa ni kau na tagane oqo vei Jisu Karisito me vakabulai. Na cakacaka me vukei o Jisu Karisito mera vakabulai na tamata, vei iratou mada ga, a sega ni cakacaka dredre. Ratou sa qai nanuma e dua na ituvatuva—e sega ni rawarawa, ia e ratou sa cakava ga.
“Ia ni ratou sa sega ni torovi koya rawa e na vukudra na lewe vuqa, e ratou sa basuka na dela ni vale sa tiko kina ko koya: ia ni ratou sa basuka rawa, e ratou sa tukuca sobu nai mocemoce sa davo kina ko koya sa tauvi paralasi” (Marika 2:4).
E ratou a kauti koya ki na dela ni vale. Me raitayalotaki ni a sega beka na ikabakaba e tuba me ratou lako cake kina, ena taura e dua na gauna me ratou yaco kece kina i cake. Au nanuma ni oqo na ka a yaco: sa na rawa ni kaba e liu e dela ni vale na cauravou mai na nona tabanalevu. Me vaka ga ni se cauravou ka kaukauwa, a sega kina ni dredre vua. O nona itokani vakadauveituberi mai na kuoramu ni italatala qase kei na daukaulotu tudei balavu ka momoqaqa rau a biligi koya cake sara vakaukauwa mai ra. A rairai kaya vei iratou e dua na sisita ni iSoqosoqo ni Veivukei me ratou qaqarauni ka vosa vakayaloqaqataki iratou. E ratou sa qai basuka na dela ni vale na tagane ka vosa veivakacegui tiko o sisita vei koya na tagane ka waraka me vakabulai—me sa yavala ga vakai koya ka bula galala.
Na ilesilesi ni veivueti oqo sa gadrevi me cakacaka vata kina na tamata yadudua. Ena kena gauna donu, ena gadrevi kina na cakacaka vata me tukuci sobu kina na tagane paralasi mai na dela ni vale. E dodonu me ratou cakacaka na tagane oqo ena duavata kei na lomavata. E sega ni vinakati me kune na duidui vei iratou na le va oqo. Sa dodonu me ratou na tukuca sobu na tagane paralasi oqo ena dua vata ga na gauna. Ke dua a sorova vakatotolo cake na dali mai vei iratou na le tolu, ena lutu na tagane o ya mai na nona idavodavo. E sega ni rawa me ququmi tiko vakai koya me vaka ni malumalumu tu na yagona.
Ena kena gadrevi meda vukea na iVakabula, e dodonu meda cakacaka vata ena duavata kei na lomavata. Na tamata yadua, itutu kece sara, kei na veikacivi yadua e sa ka bibi sara. Me da sa qai duavata yani vei noda Turaga o Jisu Karisito.
Sa qai yaco, vei koya na tagane paralasi me tu e matai i Jisu. “Ia ni sa raica ko Jisu na nodratou vakabauta, sa kaya vua sa tauvi paralasi, Na luvequ, sa bokoci na nomu ivalavala ca” (Marika 2:5). Sa vakaraitaka o Jisu ni sa lomani koya ka sa vakabulai koya—sega ni vakayago walega ia vakayalo talega: “Na luvequ, sa bokoci na nomu ivalavala ca.” E sega beka ni totoka o ya? E sega beka ni da gadreva me yaco oqo vei keda kece? Au na vinakata sara ga.
Eda kila tiko beka e dua ena noda bula e tauvi paralasi vakayalo tiko, e dua sa sega tu ni rawa me lesu mai vakai koya ki Lotu? O koya e rairai dua beka vei ira na luveda, dua vei ira noda itubutubu, e dua e vakawati, se dua na itokani.
Ena vuku ni sa vuqa sara na daukaulotu tudei era sa tu ena taba ni Lotu yadua, e dodonu vei ira na bisopi kei na peresitedi ni tabana mera vakayagataka na nodra matabose ni tabanalevu se tabana. Me sureta o bisopi na lewe yadua ni matabose ni tabanalevu mera kauta mai na yacadra e gadrevi mera na vukei. Mera veivosakitaka vakayalomatua na matabose ni tabanalevu na sala vinaka mera veivuke kina. Mera vakarorogo matua na bisopi ki na veivakasama ka qai veilesilesi.
O ira na daukaulotu tudei era sa ivurevure cecere ki na tabanalevu ena sasaga ni veivueti oqo. Era tamata gone ka kaukauwa sara. Era taleitaka me tiko vei ira na yacadra mera na cakacaka kina. Era taleitaka mera cakacaka vata kei ira na lewe ni tabanalevu. Era sa kila tu ni oqo na madigi ni veikunei cecere eso kivei ira. Era sa yalodina ki na kena tauyavutaki na matanitu ni Turaga. E kaukauwa na nodra ivakadinadina ni ra na vakataka na Karisito ni ra vakaitavi ena sasaga ni veivueti.
Meu tinia, ena noqu wasea e dua tale na iyau vunitaki sa kunei e tiko ena ivolanikalou oqo. E tiko ena tikina e 5: “Ia ni sa raica ko Jisu na nodratou vakabauta” (vakamatatataki). Au a sega mada ni raica oqo e liu—nodratou vakabauta. Na noda duavata ni vakabauta ena vakayaco-ka ki na nodra bula raraba na tamata.
Ocei mada a vakamacalataki ira tiko o Jisu? O iratou talega na le va a laveti koya na paralasi, tagane paralasi, o ira era a masulaki koya, kei ira kece era a vakarorogo tiko ki na vunau i Jisu ka ra kailavaka lo toka e lomadra me yaco na caka mana. E rawa ni oka talega kina e dua e vakawati, dua na itubutubu, dua na luvena tagane se yalewa, dua na daukaulotu, dua na peresitedi ni kuoramu, dua na Peresitedi ni iSoqosoqo ni Veivukei, bisopi, kei na itokani tu vakayawa. Eda sa rawa kece ni veivukei. E dodonu meda maqusa tiko ena nodra vakasaqarai o ira era tu vakaleqai.
Au vakadinadinataka ni o Jisu Karisito na Kalou ni caka mana. E lomani keda kece o Jisu Karisito ka sa tu Vua na kaukauwa me veivueti ka veivakabulai, vakayago ka vakayalo talega. Ena gauna eda vukei koya kina ena Nona cakacaka vakalotu ni nodra vakabulai na tamata, eda sa na vakabulai vakakina. Au sa vakadinadinataka oqo ena Yacana tabu, o Jisu Karisito, emeni.