Na Nomu Sala ki na Valetabu
Me Baleti Ira na Gone
O kila beka na valetabu e voleka duadua vei iko? Droinitaka na iyaloyalo ni valetabu oqori, ka vakaliliga ena dua na vanua mo raica tiko kina ena veisiga kece.
Na valetabu na vale ni Turaga. Oqori na vanua eda vulica kina na ka me baleta na Tamada Vakalomalagi, cakava na veiyalayalati (se yalayala) vata kei Koya, ka ciqoma na veivakalougatataki cecere eso. Ena valetabu, eda cakava kina na veicakacaka bibi me baleti keda kei ira na lewe ni matavuvale era sa mate. Na cakacaka e vakayacori ena loma ni valetabu e oka kina na papitaiso me baleti ira na mate, na edaumeni, kei na veivauci. Era vakatokai me ra cakacaka vakalotu ni valetabu.
Na Cava e Dau Yaco ena loma ni Valetabu
Papitaiso me baleti ira na Mate
Ni ko sa yabaki walu, sa rawa ni o papitaiso ka vakadeitaki mo lewe ni Lotu i Jisu Karisito ni Yalododonu Edaidai. E levu vei ira na tubumu era sa mate ka ra se bera tu ni papitaiso ka vakadeitaki. E dina ni sa mate na yagodra, e se bula tikoga na yalodra mai na vuravura ni yalo, ka rawa ni ra laki vakavulici kina ena kosipeli i Jisu Karisito.
Ni o sa yabaki 12, e rawa ni o lako ki na valetabu ka vukei ira na tamata oqo ena nomu papitaiso ka vakadeitaki ena yacadra. E rawa ni ra qai digitaka ena gauna oqori me ra ciqoma se kua na papitaiso kei na veivakadeitaki. O na vakaisulu vulavula kece tu ni o papitaiso ena vukudra na mate, me vaka ga o vakayacora ena nomu papitaiso me baleti iko ga.
Kerei rau na nomu itubutubu me rau vukei iko mo cakava e dua na ituvatuva me baleti ira na lewe ni matavuvale era sa mate ka ra se bera tu ni papitaiso ki Na Lotu i Jisu Karisito ni Yalododonu Edaidai. Dikeva kevaka e dua sa lako oti ki na valetabu me laki papitaiso ena vukudra.
Na Edaumeni
E dua na veivakalougatataki cecere ni valetabu na edaumeni. Edaumeni na kena ibalebale na “isolisoli.” Ni o ciqoma na nomu edaumeni, o na vulica e vuqa cake na ka me baleta na yavu ni veivakabulai ka cakava na veiyalayalati. Na veiyalayalati sa ikoya na yalayala eda vakayacora vata kei na Tamada Vakalomalagi. Ni o rokova na veiyalayalati oqori, o sa vakarau kina mo laki bula vata kei Tamada Vakalomalagi kei Jisu Karisito ena dua na siga.
Ena loma ni valetabu e tu kina e dua na rumu totoka vakanomodi ka vakatokai na rumu vaka-silesitieli. Ena rumu vaka-silesitieli eda na vakila na noda voleka sara vei Tamada Vakalomalagi kei Jisu Karisito, ka da vakila kina vakalailai na ivakarau ni bula eda na laki vakila kevaka eda na laki bula vata kei Rau ena matanitu vaka-silesitieli.
Veivauci ni Gauna Oqo kei na Veigauna Tawamudu
Ni rau vakamau e dua na tagane kei na dua na yalewa ena loma ni valetabu, erau na tekiduru ena dua na icabocabo ni soro ka vauci vata me baleta na gauna oqo kei na bula tawamudu taucoko. Sa kena ibalebale oqo ni rawa ni ratou duavata o rau kei ira na luvedrau me dua na matavuvale tawamudu. Tuva mo na vakamau ena valetabu ena dua na siga. Oqo na veivakalougatataki cecere duadua ni valetabu.
Na iVolatara ni Valetabu
Na valetabu e vanua savasava. Era na vakadeitaka na bisopi kei ira na peresitedi ni tabana ni ra sa vakarau tu ka kilikili o ira me ra curuma na valetabu. Ni bera ni o lako ki na valetabu, me na dua mada na nomudrau veivakatarogi kei na nomu bisopi se peresitedi ni tabana. Ena taroga o koya kevaka sa tiko e dua na nomu ivakadinadina me baleta na Lotu, o dau rokova na ivunau, dau tokoni ira na iliuliu ni Lotu, talairawarawa ki na Vosa ni Vuku, saumi ikatini, ka dau dina ena veika kece o dau vakayacora ka tukuna. Ena vukei iko ko koya mo kila na veika mo vakayacora mo kilikili kina mo curuma na valetabu.
Vakavakarau Oqo mo Curuma na Valetabu
Sa dau solia na Tamada Vakalomalagi e vuqa na veivakalougatataki vei ira era dau buladodonu ka curu ki na valetabu. Sa ka bibi sara me da vakavakarau me da curuma na valetabu ni da se gone.
E lomani iko na Tamada Vakalomalagi ka vinakata mo ciqoma na veivakalougatataki ni valetabu. Ena vakalougatataki iko ko koya ena nomu vakayacora na cakacaka vakalotu ni valetabu ena vukumu kei ira tale eso. E dina ni na sega beka ni rawa mo curu ki na valetabu ena gauna oqo, kevaka e tiko voleka e dua na valetabu, e rawa ni o lako ki na lomanibai ni valetabu ka vakila na yalotabu e tu kina. E rawa talega ni o maroroya tiko e dua na iyaloyalo ni valetabu e nomu vale me vakananuma tiko vei iko na bibi ni valetabu. Buladodonu me rawa kina ni o kilikili mo curuma na vale ni Turaga.
Raica na iloilo ena iyaloyalo oqo. Eso na rumu ni veivauci era tu kina na iloilo me vakaoqo. Ena vuku ni veivauci ena valetabu, na noda matavuvale, me vaka ga na iyaloyalo ena iloilo, e rawa ni tomani tiko me tawamudu.
Raica na rumu vaka-silesitieli ena iyaloyalo oqo ka vakakina ena iyaloyalo ena tabana e 64. Na cava o dau vakila ni o raica e dua na rumu vaka-silesitieli?
Valetabu na Boston Massachusetts. Vakatabui ena ika 1 ni Okotova, 2000.
Rumu ni veivauci, Valetabu na Aba Nigeria.
Rumu vaka-Silesitieli, Valetabu na Nuku’alofa Tonga.