Na Cava na iNaki ni Valetabu?
Na Valetabu ni Lotu i Jisu Karisito ni Yalododonu Edaidai era vale vakatabui me saumi kina na taro baleta na bula`tawamudu.
Na Valetabu sa ikoya na vanua ni noda taro me baleta na bula ka ciqomi na kena isau ni tawamudu
Sa bau dua mada na tagane se yalewa, ena dua na gauna ni vakanananu lo, me sega ni vakasamataka na kena bibi na veika vuni ni bula?
E sega beka ni taroga, “Au lako li mai vei? Na cava au mai cakava eke? Au lako tiko li kivei? Na cava na noqu isema kivua ka Buli au? Ena kauta tani beka mai vei au ko mate na veiwekani bibi a vakayacori ena bula oqo? Eratou na vakacava beka na noqu matavuvale? Ena tiko tale beka e dua na bula ni oti oqo, kei na, ke vakakina, eda na veikilai beka mai kea?”
Na isau ni taro oqo e sega ni kunei ena vuku vakavuravura. Era kunei walega ena vosa vakatakilai ni Kalou. Ena saumi na taro oqo kei na taro baleta na bulatawamudu ena valetabu vakatabui ni Lotu i Jisu Karisito ni Yalododonu Edaidai. E vakatabui vakayadua me vale ni Turaga, e dua na vanua e vakalou kei na vakacegu ka tawasei mai na vuravura. Ena valetabu e vakatavulici kina na dina ka vakayacori kina na cakacaka vakalotu me kauta mai na kila ka e tawamudu ka vakauqeti ira na vakaitavi kina me ra bulataka ena kila na veika eda taukena vakalou me vaka ni da luve ni Kalou kei na noda kidava tiko na noda rawa ni rawata na ka me vaka ni da tamata tawamudu.
Era sega ni rawa me vakatautauvatani na inaki ni veivaletabu kei na kena cakacaka mai na veivale ni vakabauta vakalotu kece tale eso
Na veivale oqo, duidui mai na udolu vakaudolu na veivale ni Lotu e dau vakayacori kina na sokalou ka ra laurai e vuravura taucoko, era sega ni rawa me vakatautauvatani ena kena inaki kei na kena cakacaka mai na veivale ni vakabauta vakalotu kece tale eso. E sega ni baleta na kedra levu na veivale oqo se na totoka ni kedra itaratara e yaco kina me vakaoqo. Ia na cakacaka ga e vakayacori tiko kina.
E sega ni ka vou na kedra dau tu vakatikitiki eso na vale me baleta na cakacaka vakalotu bibi, me kilai mai kina mai vei ira na kena vo ni vanua ni sokalou. Sa ikoya oqo na kena ivakarau e Isireli ena gauna makawa, na vanua era sokalou kina na tamata e veigauna ena valenilotu. Na nodra vanua tabu sara sa ikoya, imatai, na valecavu ena lekutu kei na kena Vakatabui Vakalevu cake Sara, ka vakakina eso tale na tikina tabu ni valetabu, na vanua e vakayacori kina na cakacaka vakalotu kilai tani vakakina ena vanua ka ra yacova duadua ga o ira era sotava na ivakatagedegede e gadrevi me ra vakaitavi kina ena veicakacaka vakalotu oqo.
Sa vakakina nikua. Ni bera na kena vakatabui e dua na valetabu, e veisureti tiko yani na Lotu i Jisu ni Yalododonu Edaidai ki na lewenivanua raraba me ra curuma yani na vale ka vakadikeva na kena veimataqali iyaya. Ia ena gauna e sa vakatabui oti kina sa yaco me vale ni Turaga, e lavaki kina e dua na ivakarau e vakalou ka rawa walega ni vakadonui me ra curuma o ira na lewe ni Lotu e kilikili nodra itagede. E sega ni dua na ka e vunitaki. Sa dua ga na ka e vakatabui.
Na cakacaka ni valetabu sa baleti keda vakayadua me vaka ni da lewe ni matavuvale tawamudu ni Kalou
Na cakacaka e caka tiko ena veivale oqo e vakaraitaka na inaki tawamudu ni Kalou vata kei na kena sa baleti ira tiko na tamata, ka ra luve ni Kalou ka nona ibulibuli. Me baleta na tikina bibi duadua, na cakacaka ni valetabu sa baleta na matavuvale, vata kei keda vakayadua me vaka ni da lewe ni matavuvale tawamudu ni Kalou ka da lewe vakayadua ni matavuvale vakavuravura. E kauwaitaka na vakatabui kei na ituvaki tawamudu ena veiyalayalati ni vakamau kei na veiwekani vakamatavuvale.
E vakadeitaka ni tagane kei na yalewa vakayadua e sucu mai ki vuravura e luve ni Kalou, ka vakalougatataki ena so na ka ena Nona ituvaki vakalou. Na kena tokaruataki na yavu ni itagede ni ivakavuvuli oqo e vakaraitaka na kena yaga kivei ira era ciqoma, me baleta ni sa cavuti vakamatata tu na ivunau ena vosa totoka ka vakasakiti, sa qai yaco me vakila o koya e vakaitavi kina ni tagane kei na yalewa vakayadua era luvei Tamada Vakalomalgi, ka da sa lewe kece kina ni dua na matavuvale vakalou; o koya gona, era sa veitacini kina na tamata kece sara.
Ni tarogi mai vua na vunivola, “Ai vakaro cava sa kena imatai ena ivakaro kecega?” a sauma na iVakabula “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kece, kei na nomu kaukauwa kece: oqo na imatai ni ivakaro.
“Na kena ikarua oqo, Mo lomana na kai nomu me vaka ko sa lomani iko” (Marika 12:28, 30–31).
Na ivakavuvuli era sa tukuni tu ena valetabu ni gauna oqo e vakabibitaka sara ga na noda itavi vua na noda Dauniveibuli kei ira na kai noda. Na cakacaka vakalotu tabu e vakarabailevutaka na kena vakatuturagataki na dina ni matavuvale ni Kalou. Era vakatavuvulitaka ni yalo e tiko vei keda vakayadua e tawamudu, e duidui mai na yagoda, ni sa vakayago. E sega walega ni ra solia na kila me baleta na dina cecere oqo ia e vakauqeti koya talega e vakaitavi ki na loloma ni Kalou ka vakayaloqaqataki koya me vakaraitaka e dua na veitokani cecere cake sara kivei ira tale eso na luvei Tamada.
Na kena ciqomi na ivakavuvuli ni tamata yadua e luve ni Kalou e vukea noda raica ni tiko na inaki vakalou ena bula vakavuravura. Eke tale, e vakatavulici ena vale ni Turaga na ivakatakila dina. Na bula vakavuravura e tiki ni dua na ilakolako tawamudu. Eda a bula tu ni da gone vakayalo ni bera noda lako mai eke. E vakadinadinataka na ka oqo na ivolanikalou. Vakadinadinataka na vosa ni Turaga vei Jeremaia: “Niu a bera ni buli iko ena kete kau sa kilai iko; ia ni ko a bera ni sucu mai, kau sa vakatabui iko, ka lesi iko mo nodra parofita na veimatanitu” (Jeremaia 1:5).
Na vakamareqeti ni veiwekani ni bula vakamatavuvale ena tomani tiko ena vuravura sa bera mai
Eda lako mai ena bula oqo ni da luvedra noda itubutubu vakayago ka lewe ni veimatavuvale. O ira na itubutubu era veitokani vata kei na Kalou ena Nona inaki me rawati na bula tawamudu me baleti ira na Luvena. O koya gona, sa dua kina na isoqosoqo vakalou na matavuvale, ka bibi sara ena bula vakavuravura kei na bula tawamudu.
E vuqa na cakacaka e yaco tiko ena loma ni valetabu sa baleta na matavuvale. Yavutaki ena matata ni kena ibalebale sa ikoya na kena kilai na dina eda bula tiko kina me vaka ni da luve ni Kalou ni bera noda sucu mai ena vuravura oqo, eda na tomana tikoga noda bula ni oti na mate, kei na vakamareqeti kei na vakadeitaki ni veimaliwai ena bula e vuravura, na kena totoka duadua ka vakaibalebale vakalevu sara era na laurai ena matavuvale, ka na tomani tiko ena vuravura sa bera mai.
Ena gauna erau vakamau kina e dua na tagane kei na dua na yalewa ena vale ni Turaga, e sega ni rau duavata walega ena nodrau bula e vuravura ia me yacova na tawamudu taucoko. Erau sa vauci vata ena ruku ni lewa ka sega walega ena lawa ni vanua erau semati vata kina me yacova na mate ia ena matabete tawamudu talega ni Kalou, ka vauca mai lomalagi na ka kecega sa vauci e vuravura. Na veiwatini erau vakamau ena valetabu e tiko kina na veivakadeitaki ni ivakatakila vakalou ni nodrau veimaliwai kei na veimaliwai vata kei ira na luvedrau ena sega ni tinia na mate ia ena tomani tiko me tawamudu, kevaka era bula kilikili kaya na veivakalougatataki o ya.
E sega vakadua ni dua na tagane me lomana vakaidina e dua na yalewa, se e dua na yalewa me lomana vakaidina e dua na tagane, ka rau sega ni masulaka tiko na nodrau veimaliwai me tomani tiko ni oti na mate? Sa bau dua beka na gone erau buluta nona itubutubu ka rau sega ni gadreva na veivakadeitaki ni o koya na nodrau daulomani me na nodrau tale ena vuravura sa bera mai? E rawa beka vua e dua na tamata vakabauta na bula tawamudu me vakatitiqataka ni Kalou ni lomalagi ena solia na Luvena tagane kei na yalewa na isolisoli vakamareqeti duadua ni bula, na loloma ni kunei na kena ibalebale levu duadua ena ivakaraitaki ni veimaliwai vakamatavuvale? E sega tale ni dua na ka me vakabekataka ni na tomani tikoga ni oti na mate, na veimaliwai vakamatavuvale. E gadreva tu na loma ni tamata me tomani tikoga na veimaliwai vakamatavuvale, ka sa vakatakila na Kalou ni lomalagi e dua na sala me na taqomaki kina. Ena vakarautaka na cakacaka vakalotu ni vale ni Turaga.
E rawa ni noda kece na veivakalougatataki ni valetabu
Ia ena vaka me sega ni dodonu vakaidina kevaka me vakarawarawataki na veivakalougatataki ni veicakacaka vakalotu oqo kivei ira walega era sa lewena tiko ena gauna oqo Na Lotu i Jisu Karisito ni Yalododonu Edaidai. Na dina sa ikoya na madigi ni lako ki na valetabu ka vakaitavi ena kena veivakalougatataki sa dola tu kivei ira kece era na rawa ni ciqoma na kosipeli ka papitaiso ki na Lotu. Sa yaco kina oqo, na Lotu me vakayacora e dua na parokaramu rabailevu ni daukaulotu ena vuqa na veiyasai vuravura ka na tomana tiko na kena vakatetei na parokaramu oqo ena kena levu ga e rawata, baleta ni tiko na kena itavi, ena ruku ni ivakatakila vakalou, me vakatavulici na kosipeli ki na veimatanitu, veimataqali, duivosavosa kei ira na tamata.
Ia era tu e milioni ka sega ni wiliki rawa era a bula tu e vuravura ka sega vakadua ni bau dua nodra madigi me ra rogoca kina na kosipeli. Era na vakuwai beka ena veivakalougatataki vakaoqori me vaka era soli mai ena valetabu ni Turaga?
Mai na veisosomitaki bula ka ra tucake ena vukudra na mate, e cakacaka vakalotu vata ga e vakarawarawataki kivei ira era sa yali yani mai na bula vakayago. Ena vuravura vakayalo o ira vata ga na tamata vakayadua era sa galala tu me ra ciqoma se biuta tani na cakacaka vakalotu vakavuravura a vakayacori me baleti ira, okati kina na papitaiso, vakamau, kei na veivauci vata ni veiwekani vakamatavuvale. E sega ni vakaukauwataki vua e dua na tamata me cakava eso na ka ena cakacaka ni Turaga, ia e dodonu me dua na kena madigi.
Na cakacaka ena valetabu sa ikoya e dua na itavi ni loloma nei koya e bula tiko ena vukudra na mate
Na cakacaka ni veisosomitaki oqo e vakatautauvatani ena dua na cakacaka veivakurabuitaki ni loloma ena yasai koya e bula tiko ena vukudra na mate. E cakava na ka yaga ni dua na itavi vakaitamera ena kena vakadikevi na ivola ni kawa me kune ka kilai o ira era a bula taumada mai vei keda. Me vukea na vakadidike oqo, na Lotu e semata vata e dua na parokaramu ni ivola ni kawabula ka vakarautaka na iyaya ni vakadidike e sega ni dua me tautauvata ena vuravura taucoko. Era dola tu na veivale ni itukutuku makawa kivei ira na lewenivanua ka vuqa vei ira era sega ni lewe ni Lotu era vakayagataka ena nodra vakasaqarai ira na nodra kawa. Na parokaramu oqo era sa vakacaucautaka na dautuvakawa e vuravura raraba ka sa vakayagataki tiko mai na veivanua me itataqomaki ni nodra dui ivolatukutuku. Ia na kena inaki taumada sa ikoya me rawa ni ra vakayagataka na lewe ni Lotu na ivurevure e gadrevi me ra kilai ira kina na wekadra ni rawa me ra semati vata ena veivakalougatataki era sa marautaka tu o ira vakaiira. E tautauvata ni ra kaya vakaiira, “Kevaka au lomana vakalevu sara na marama watiqu kei ira na gone niu vinakati ira ena veigauna ni bula tawamudu taucoko, e sega li ni dodonu vei ira na tukaqu kei ira na tukaqu vakarua kei ira tale eso na qase e liu me soli vei ira na madigi me ra ciqoma na veivakalougatataki tawamudu vata ga?”
Na valetabu e solia na madigi me vulici na veika dina ka vakaibalebale ni bula
O koya gona na veivale vakalou oqo era vakaraitaka na itaviqaravi vakaitamera, era qaravi kina ena vakanomodi kei na vakarokoroko. Era kauta lesu mai na vakasama ni dua na tiki ni raivotu nei Joni na Dauvakatakila era volai kina na taro oqo kei na kena isau: “O cei beka ko ira oqo sa vakaisulu ena isulu vulavula? ka ra lako beka mai vei? …
“O ira oqo era sa lako mai na vakararawataki levu, ia era sa sava nodra isulu, ka vakavulavulataka ena dra ni Lami.
“O koya era sa tiko kina ena mata ni tikotiko ni Kalou, a ra sa qaravi koya ena siga kei na bogi e nona valenilotu” (Ai Vakatakila 7:13–15).
O ira era lako mai ki na veivale vakalou oqo era vakaisulu vulavula me vaka ni ra vakaitavi kina. Era lako walega mai ena veivakadonui ni nodra daunilewa vakaitaukei ena Lotu, ka ra sa vakadinadinataki ni ra sa kilikili. E namaki vei ira me ra lako mai ena savasava ni vakasama, savasava ni yago, kei na savasava ni isulusulu me ra curu mai kina ena valetabu ni Kalou. Ena nodra sa curu mai e namaki vei ira me ra biuta laivi ki dakudra na vuravura ka vakatabakidua ki na veika vakalou.
Na itaviqaravi oqo, kevaka e rawa me vakayacani, e tiko na kena yaga vakaikoya, o cei ena gauna dredre oqo me sega ni ciqoma e dua na madigi me sogoti vuravura ka curuma na vale ni Turaga, e kea me vakasamataka ena vakanomodi na veika tawamudu ni Kalou? Na veivanua tabu vakaoqo era solia na madigi, sega tale ni dua na vanua me rawati kina, me vulici ka vakananumi kina na veika dina ka vakaibalebale ena bula—na noda veimaliwai ki na veika Vakalou kei na noda ilakolako tawamudu mai na dua na ituvaki mai liu ki na bula oqo kei na dua na vanua sa bera mai ena vanua eda na kila ka veimaliwai vata kei na dua tale, okati kina o ira na noda dui daulomani kei ira noda qase era a liu taumada mai vei keda ka lako mai vei ira noda isolisoli ena veika vakayago, vakanananu, kei na veika vakayalo.
Ena valetabu e soli vei keda na yalayala ni Kalou ena veivakalougatataki tawamudu
E dina sara ni veivaletabu oqo era sega ni tautauvata kei na veivale kecega. Era vale ni veidusimaki. Era vanua ni veiyalayalati kei na yalayala. Ena nodra icabocabo ni isoro eda tekiduru kina e mata ni Kalou, noda Dauniveibuli, ka soli vei keda na yalayala ni Nona veivakalougatataki tawamudu. Ena veivanua tabu ni valetabu eda veitaratara vata kei Koya kei na vakanananu vua na Luvena, noda i Vakabula ka Dauveivueti, na Turaga o Jisu Karisito, ka a veiqaravi me sosomitaki keda vakayadua ena dua na solibula ni veisosomitaki ena vukuda. Eke me da biuta vakatikitiki na noda dui nanumi koya vakaikoya ka qaravi ira era sega ni rawa ni veiqaravi. Eke, ena ruku ni kaukauwa dina ni matabete ni Kalou, eda vauci vata ena veiwekani taucoko vakatamata e vakatabui duadua—me vaka na watina tagane kei watina yalewa, o ira na gone kei na itubutubu, na matavuvale ena ruku ni dua na veivauci ka sega ni rawa me vakarusa na gauna kei na mate e sega ni rawa me vakataotaka.
Era a tara na veivale tabu oqo ena gauna ni veiyabaki dredre o ya ena kena vagauna nodra vakasavi ka vakararawataki na Yalododonu Edaidai. Era a tara ka vakavinakataki ena gauna ni dravudravua kei na rawa ka. Era lako mai ena nodra kaukauwa ni vakabauta ena dua na iwiliwili ni tamata ka sa tubu cake tikoga ka ra wasea nodra ivakadinadina ni dua na Kalou bula, ni Turaga sa tucaketale, o ira na parofita kei na ivakatakila vakalou, kei na vakacegu kei na vakadeitaki ni veivakalougatataki tawamudu e kunei walega ena vale ni Turaga.
Tobu ni papitaiso, Valetabu na Papeete Taiti.
Valetabu na Stockholm Sweden. Vakatabui ena ika 2 ni Julai, 1985.
Valetabu na Manti Utah. Vakatabui ena ika 21 ni Me, 1888. Vakatabui tale ena ika 14 ni June, 1985.