Tamata Bula Vaka-Valetabu
Me tiko e dua na itaba ni valetabu ena nomuni vale me ra raica tiko na luvemuni. Tukuna vei ira na inaki ni vale ni Turaga.
Na valetabu sa ivakatakarakara cecere ni noda lewena na Lotu
Sa qai dua na ka lagilagi dina vei keda meda rawa ni gole ki na valetabu meda vakalougatataki mai kina vakayadua. Ni oti na noda gole ki na valetabu me baleta na noda vakalougatataki yadua, sa qai dua na madigi lagilagi meda vakayacora na cakacaka baleti ira era sa liu yani vei keda. Na gacagaca ni cakacaka ni valetabu oqo e cakacaka ni veinanumi. Ia ni da vakayacora yani na cakacaka ni valetabu baleti ira na tamata eso, ena dau dolei lesu mai vei keda e dua na veivakalougatataki. Meda kakua kina ni kurabui ni sa gadreva sara na Turaga me ra yaco na Nona tamata me ra tamata bula vaka-valetabu.
Na Turaga sara ga Vakaikoya, ena Nona ivakatakila vei keda, sa vakayacora na valetabu me nodra ivakatakarakara cecere na lewe ni Lotu. Meda vakasamataka mada na ivakarau kei na ivalavala dodonu sa dusimaki keda kina na Turaga ni a vakasalataki ira kina na Yalododonu mai Kirtland ka solia mai vei Josefa Simici na Parofita ni ra vakakarau tara tiko e dua na valetabu. Eda sa mai vakasalataki vakakina:
“Raica dou cokonaki kemudou; dou vakarautaka na veika sa yaga vei kemudou; dou tara e dua na vale, io me vale ni masumasu, vale ni lolo, ka vale ni vakabauta, vale ni vuli, vale ni vakarokoroko ka vale ni caka dodonu, io na vale ni Kalou” (Vunau kei na Veiyalayalati 88:119). Sai koya beka dina oqo na ivakarau kei na ivalavala eda gadreva ka vakasaqara meda rokataka oi keda yadudua?
Na noda sasaga taucoko ena loma ni Lotu ena mua ga ki na valetabu savasava
Na noda sasaga ni kena kaburaki na kosipeli, vakacokotaki ni Yalododonu, kei na nodra vakabulai na mate ena mua ga ki na valetabu savasava. Oqo e baleta ni cakacaka vakalotu ni valetabu sa rui ka bibi sara; ni da sega ni rawa ni lesu ki na itikotiko ni Kalou ke sega oqo.
E dina, na Turaga e gadreva sara me ra yaco na Nona tamata me ra tamata bula vaka-valetabu. Sa gagadre titobu ni yaloqu me ra yaco na lewe ni Lotu yadua me ra bula kilikili kaya na valetabu. Au sa nuitaka ni lewenilotu uabula yadua me ra na bula kilikili—ka me tiko—na nodra ivolatara ni valetabu sa vakayagataki tiko, ena vanua mada ga e yawa kina na valetabu ka tarova na kena vakayagataki ena veisiga se vakavudua.
Sa savasava vua na Turaga na valetabu; ka dodonu me savasava vei keda
Meda sa tamata dau curuma ka dautaleitaka na valetabu. Meda gole yani vakawasoma ki na valetabu ena kena gauna donu kei na sala kei na veika eda tuvanaki keda kina. Meda lako e sega walega me baleti ira na wekada era sa mate, ia meda lako talega me baleta na vakalougatataki ni tamata yadua ena sokalou ni valetabu, me baleta na savasava kei na veitaqomaki ka vakarautaki ena loma ni lalaga ni vale rokovi ka vakatabui oqo. Na valetabu e vanua ni veika totoka, e vanua ni ivakatakila, e vanua ni veivakacegui. Sa nona vale na Turaga. Sa savasava vua na Turaga. E dodonu me savasava vei keda.
Meda wasea vei ira na luveda na veika eda vakila vakayalo ena valetabu. Meda sa qai vakavulici ira vagumatua ka vakavinaka ena veika dodonu meda kaya baleta na inaki ni vale ni Turaga. Me tiko ena nomuni vale e dua na itaba ni valetabu me ra raica tiko na luvemuni. Vakavulica vei ira na inaki ni vale ni Turaga. Me ra tuvanaki ira ni ra se gone me ra gole kina ka kilikili kaya tiko na kena veivakalougatataki.
Ena marautaka na Turaga ni da gole ki na valetabu ena bula kilikili
Ena marautaka na Turaga me ra gole ena bula kilikili ki na valetabu o ira na noda itabagone ka laki vakayacora na papitaiso veisosomitaki ena vukudra o ira era a sega ni papitaiso rawa ena bula oqo. Ena marautaka na Turaga ni da bula kilikili me da gole ki na valetabu meda laki vakayacora na noda veiyalayalati kei Koya ka vauci vata vakaveiwatini ka vakamatavuvale. Ena marautaka talega na Turaga ni da bula kilikili ka da gole ki na valetabu ka laki vakayacora na cakacaka vakalotu ni veivakabulai vata ga oqori me baleti ira era sa mate, ka vuqa vei ira era sa waraka tiko mai me vakacavari na cakacaka vakalotu oqori ena vukudra.
Ke vinakati me ka dina vei keda na ivakatakarakara ni valetabu, e dodonu me da gadreva vakaidina. E dodonu meda bula kilikili ni da curuma na valetabu. E dodonu meda maroroya na vunau ni noda Turaga. Kevaka e rawa meda bula vakataki koya na iVakavuvuli, ka taura na Nona ivakavuvuli kei na ivakaraitaki me noda ivakarau dina ni bula, ena sega ni dredre meda bula kilikili tiko ki na valetabu, ka bula vakaivakarau ka dina ena ituvaki kecega ni bula, eda sa na qai vakatudeitaki ena dua ga na ivakarau tabu ni itovo kei na vakabauta. Ni da tiko e vale se ena makete, e koronivuli se sa sega tu ni vuli, se da bula duadua tiko se tiko vata kei ira tale eso, ena matata na noda ilakolako ka na laurai levu na noda ivakatagedegede.
Ni dua e tudei tu ena nona ivakavuvuli, me bula tu ena dodonu ka yalodina tu ena veika e vakabauta—oqori ga na ka bibi duadua. Na yalodina ki na ivakavuvuli dodonu—ena noda dui bula yadua, ena noda itikotiko kei na matavuvale, kei na veivanua kecega eda sotava ka veivakauqeti vei ira na tamata—ni sa gadrevi keda ga kina na Kalou meda yalodina tikoga. E gadrevi kina na solibula—ena yaloda taucoko, vakatitobu sara, na solibula talei e tawamudu ki na ivakavuvuli eda kila tu ni sa ka dina ki na vunau sa solia mai na Kalou. Kevaka eda na dodonu ka yalodina tiko ki na ivakavuvuli ni Turaga, eda sa qai rawa meda bula kilikili kawa tikoga na valetabu, ka yaco na Turaga kei na Nona valetabu savasava me ra ivakatakarakara cecere ni noda bula vakatisaipeli Vua.
Valetabu na Kirtland. Vakatabui ena ika 27 ni Maj., 1836.
Valetabu na Logan Utah. Vakatabui ena ika 17 ni Me, 1884. Vakatabui tale ena ika 13 ni Maj., 1979.